Bhaamuzi 17

Himong'umong'u yaka Mika

1Pakabhili na mundu jumu joakabhili atama ku inchi ja itombi ya Efulahimu, lihina laki akalowakiki Mika. 2Lichobha limu akumpwaghili mabhu waki, “Hipandi elufu jimu na mia jimu ya madini gha feza yeyajibhakiki kwaku, yenakajowini ukapwaghaje malobhi gha masolu kwaka mundu joakujibhile, yepambane. Nepani nde nenakajibhike, nambu sajenu ndenda kukukelabhukila.”

Panihapa mabhu waki akumpwaghile, “Bambo Chapanga na akupengalyaje, mwanango.” 3Mika akunkelabhukili mabhu waki hipandi elufu jimu na mia jimu ya madini gha feza, na mabhu waki akapwaghike, “Nahuli masolu ghanabhohiki ngaghakupata, nepani naghabheka madini gha feza hagha palongi jaka Bambo Chapanga, nahuli kulenganakela chimong'umong'u cha kubhacha na chimong'umong'u cha kuyeyusha, kwa ndandi jaku wehapa wamwanango. Henu anangubha ngati nukukelabhukila wehapa madini gha feza hagha.” 4Mika paakunkelabhukili mabhu waki hipandi ya madini gha feza yela, mabhu waki akatoliki hipandi mia ibheli ya madini gha feza na kumpekeha ndenganakela wa imong'umong'u ya kubhacha. Imong'umong'u heyi yakabhekakiki mkati ja nyumba jaka Mika.

5Bhela, Mika akabhili na pandu pa kujojabhalela ichapanga yaki, akalenganakili chizibau cha kipenganyambiku na imong'umong'u, panihapa akuntendiki mwana waki kubha mpenganyambiku waki. 6Machobha ghanihagha ngachepakabhili na nkolongwa mu Izilaeli. Kila mundu akatendiki chokapi cheakaweni kubha nde chamboni pamihu jaki mweni.

7Bhela chikahi chenihechi kukabhili na nkombu jumu Mlawi, akabhili atama ku muchi wa Beselehemu ku inchi ja Yuda. 8Nkombu hoju akabhokiki ku Beselehemu ku inchi ja Yuda, akapiti kulonda pandu pangi pa kutama. Mu mwanja waki akahikiki kunyumba jaka Mika mu inchi ja itombi yaka Efulahimu. 9Mika akundalukile, “Bho, wehapa uhumiki kwako?”

Najombi akayangike, “Nepani nde Mlawi kuhuma ku Betelehemu mu inchi ja Yuda, nonda pandu pa kutama.”

10Mika akumpwaghile, “Tamaje papamu na nepani, ubyaje ngati tati wangu na mpenganyambiku wangu, na nepani ananukupekyaje hipandi komi ya madini gha feza kwa chaka, ingobhu na yeipalika kwa ndandi ja matamu ghaku.” 11Mlawi hoju akajetakili kutama papamu na Mika, na akatemi kwaki ngati jumu wa bhana bhaka Mika. 12Najombi Mika akuntendiki nkombu Mlawi hoju kubha mpenganyambiku waki, na nkombu hoju akatemi panyumba jaka Mika. 13Panihapa Mika akapwaghike, “Sajenu manyi kubha Bambo Chapanga anaandendilaje lamboni, kwa ndandi Mlawi hoju abhi mpenganyambiku wangu.”