Bhaamuzi 18

Mika na bhandu bha likabila laka Dani

1Bhela mu machobha ghanihagha Bhaizilaeli ngachebhakabhili na nkolongwa. Bhela bhandu bha likabila laka Dani bhakabhili bhalonda pandu pabhu bhene pa kutama, kwa ndandi bhakabhili bhakali bhalonda upwelelu wabhu pachilanda ja makabila gha Izilaeli. 2Panihapa bhandu bha likabila laka Dani bhakabhatumiki manjolinjoli nhwanu kuhuma ku Sola na Eshitaoli nahuli bhakapelalizaje inchi heji na bhakachunguzaje. Bhandu habha bhakahaghuliki kuhuma mu lukolu lwabhu. Bhakabhapwaghile, “Njendaje mkajichunguzaje inchi heji.” Bhandu habha bhakajingili mu inchi ja hitombi yaka Efulahimu, nabhombi bhakahikiki kunyumba jaka Mika, bhakaghonili ikilu jokapi. 3Pabhakabhili panyumba jaka Mika, bhakajimanyi sauti jaka nkombu Mlawi jola. Bhakunjendili na kundalukila, “Bho, nde nani joakuletiki pambane? Bho, uhenga kiki pandu pambane? Bho, ubhili na lihengu bhole pambane?”

4Akabhapwaghili ghala Mika ghaantendili, najombi akapwaghike, “Mika ambekihi lihengu la kubha mpenganyambiku waki.”

5Nabhombi bhakumpwaghile, “Chondi tukulobha utulalukyaje kwaka Chapanga, nahuli tumanyaje ngati mwanja witu anaubya wichu.”

6Mpenganyambiku jola akabhayangike, “Njendaje kwa lukwali. Bambo Chapanga abhi papamu na mwanja winu.”

7Bhela, bhandu nhwanu habha bhakabhokiki na kujenda ku Laishi, pandu ambapu bhakabhahimanili bhandu bhatama kwa lukwale, ngati Bhasidoni, kwa lukwali na panga choghohi. Inchi jabhu ngachejakepakiwi na chindu chokapi chela, bhela bhakabhi na hindu yamaheli. Kabheti bhakatemi kutali namaa na Bhasidoni, wala ngachebhakamulini na mundu jokapi jola.

8Panihapa bhapalelezi nhwanu habha bhakakelawiki kwa bhalongu bhabhu ku Sola na Eshitaoli. Bhalongu bhabhu bhakabhalalukile, “Bho, mtuletili malobhi bholi kuhuma konihoko?” 9Bhombi bhakayangike, “Tujendaje tukakomanaje nabhu! Tujiweni kubha inchi nde inyahi namaa. Bho, anantamaje pambane panga kuhenga chindo? Ngamwikabhakila tujendaje tukajitendaje inchi heji kubha jitu. 10Pamwijenda konihoku anamubhahimanyaje bhandu bhanga na choghohi chokapi chela. Inchi heji nde ngolongwa, ngachejikepakiwi na chindu chokapi chela, na Chapanga anjangatili kujitola inchi jeniheji.”

11Panihapa bhandu mia sita bha likabila laka Dani, koni bhakabya na silaha ya ngondo, bhakabhokiki kuhuma ku Sola na ku Eshitaoli na kujenda kukomana ngondo. 12Bhakapiti kubheka likambi labhu ku Kiliati Yealimu mu inchi jaka Yuda. Nde ndandi upambala wa kolijibhi lyobha wa Kiliati Yealimu palohakeka Mahane Dani mbaka lalenu, yani Likambi laka Dani. 13Kuhuma konihoku bhakapiti ku inchi ja itombi yaka Efulahimu, na kuhika kunyumba jaka Mika.

14Bhandu nhwanu bhala bhabhakapiti kujipeleleza inchi ja Laishi bhakabhapwaghili bhalongu bhabhu, “Bho, mmanyi lelu kubha jimu ja nyumba heji kubhili na chizibau, chimong'umong'u kubhacha na chimong'umong'u cha kuyeyusha? Henu muholalyaje ntundu monamwitendaje.” 15Panihapa bhapelelezi bhala bhakapiti kunyumba jaka Mika, bhakajingili mkati na kundamukila, na kundaluha mambu ghaka nkombu Mlawi jola. 16Chikahi hechi, bhandu mia sita bha likabila laka Dani bhala, bhakabya na silaha yabhu ya ngondo, bhakajemiki pundyangu ukolongwa. 17Bhandu nhwanu bhala bhabhakapiti kujipeleleza inchi bhakajingili mkati ja nyumba na bhakatoliki chimong'umong'u cha kubhacha na kuyekalewa kwa madini gha feza ghala na imong'umong'u yengi na chizibau. Chikahi hechi mpenganyambiku jola akabhili ajemiki pundyangu ukolongwa ghola papamu na bhandu mia sita bhala bhabhabhili na silaha ya ngondo.

18Bhandu habha pabhakajingili mu nyumba jaka Mika na kutola chimong'umong'u cha kubhacha na kuyekalewa kwa madini gha feza ghala, chizibau, na imong'umong'u yengi, mpenganyambiku jola akabhalalukile, “Bho, muhenga kike?”

19Bhombi bhakumpwaghile, “Tumbalaje, kongaje ndomu waku! Uhikaje ukubha papamu na tepani, ukubhaje mundu wa kutupekeha maholalelu manyahi na mpenganyambiku witu. Au ubhona bhole? Bho, inyambiki nakanopi kwaku kubha mpenganyambiku waka mundu jumu au kubha mpenganyambiku wa likabila laku na bhalongu bhaku mu Izilaeli?” 20Mpenganyambiku jola akahekalili namaa. Akatoliki chizibau chela na imong'umong'u yengi na chimong'umong'u cha kubhacha, na kubhoka papamu nabhu.

21Panihapa bhakatumbwi kubhoka kuhuma ku muchi waka Mika, koni bhabhalongwihi palongi bhana bhabhu bhachoku, na hinyama yabhu ya kudima na hindu yabhu. 22Pabhakabhokiki na kubha patali pachokopi na nyumba jaka Mika, Mika akamanyi kubha hindu yaki itehi kutolakeka, najombi akabhalohiki bhandu bhabhakabhili pambipi na nyumba jaki na kulibhongana papamu, bhakabhajengalili bhandu bha likabila laka Dani na kubhahimanila. 23Bhakabhahonili njobhela, nabhombi bhandu bha likabila laka Dani bhakang'anambwiki na kundaluki Mika, “Bho, upala kike mbaka uhika na lipogha la bhandu ntundu aghogho?”

24Mika akayangike, “Mwehapa mtoliki ichapanga yangu yenilenganakile, muntoliki na mpenganyambiku wangu, na kubhoka panga kunekela chindu chokapi chela. Bho, muweza bholi kunaluha, ‘Upala kike?’ ”

25Bhandu bha likabila laka Dani bhakumpwaghile, “Mbanga wilekaje njobhela yaku, nangabhela bhakumu bhitu bhabhabhili na inyela ikali bhaweza kukulapula, na wehapa kuhobhea matamu ghaku na matamu gha bhandu bha munyumba jaku.” 26Panihapa bhandu bha likabili laka Dani bhakabhokiki, najombi Mika paakaweni kubha bhandu habha bhapetalili makili kupeta jombi, akang'anambwiki na kubhuja kunyumba jaki.

27Nabhombi bhandu bha likabili laka Dani habha bhakatoliki hindu yela ambayu Mika akabhili ayilenganakili, bhakuntoliki na mpenganyambiku waka Mika. Panihapa bhakahikiki ku muchi wa Laishi. Konihoku bhakabhalapwili na kubhakoma kwa mapanga bhandu bhabhatamika monihomu kwa lukwali na panga choghohi, na bhakauyoningi muchi ghonihoghu kwa moto. 28Bhandu bha muchi ghonihoghu ngachebhakabhili na mundu wa kubhakengalela, kwa ndandi bhakabhili kutali na muchi wa ku Sidoni, kabheti ngachebhakabhili na upambipi na bhandu bhangi. Muchi hoghu ukabhili mu libondi pambipi na Beti Lehobu. Bhandu bha likabila laka Dani bhakauchengiki kabheti muchi ghonihoghu, na kutama monihomu. 29Bhakang'anambwili lihina la muchi hoghu, bhakaulohiki Dani, kujengalela lihina laka hokolu wabhu Dani joakabhelakiki na Izilaeli, yani Yakobo. Nambu muchi hoghu pakutumbula hapa ukalowakiki Laishi. 30Bhandu bha likabila laka Dani bhakabhekiki chimong'umong'u cha kubhacha chela, najombi Yonasani mwana waka Gelishomu, nchokolu waka Musa, papamu na bhana bhaki bhakabhili bhapenganyambiku bha likabila laka Dani mbaka bhandu bhanihabha pabhakatolakiki kwa makili kujenda ku Babeli. 31Chikahi lihema la kunjojabhe Chapanga palakabhi ku Shilo hoku, bhandu bha likabila laka Dani bhakajojabhili chimong'umong'u cha kubhacha ambachu Mika akabhi achilenganakile.