Bhaamuzi 19

Mlawi na lidaba laki

1Bhela mu machobha ghanihagha Izilaeli ngachebhakabhili na nkolongwa. Panihapa Mlawi jumu joatamika pandu patali mu inchi ja hitombi ya Efulahimu, akatoliki lidaba limu kuhuma ku muchi wa Beselehemu mu inchi ja Yuda, 2nambu lidaba waki akakosiki ulongwana na kuhenga ukemi kunja jaka Mlawi hoju, najombi akundekiki abhujaje kunyumba jaka tati waki ku Beselehemu mu inchi ja Yuda. Akatemi konihoku kwa chikahi cha myehi nchechi. 3Lichobha limu ndomi waki akapiti kundobha nahuli akelabhukaje. Akapiti na mtumika waki na maponda ghabheli. Mbomba jola akunjopalili na kumpeleka mkati ja nyumba jaka tati waki, tati waki paakumbweni akunjopalili kwa chiheku. 4Panihapa nkohanu waki, yani tati waka kamwali jola, akundobhiki nahuli atamaje, najombi Mlawi jola papamu na mtumika waki bhakatemi machobha ghatatu, bhakakulaji na kunywa na kughonela konihoku. 5Lichobha la kachechi bhakajumwiki lukela pachibhombu na kuliandaa kubhoka, nambu tati waka mbomba jola akumpwaghi nkohanu waki, “Kula hoti chilebhi nahuli upataje makili na ujendaje na mwanja waku.”

6Panihapa bhakatemi bhokapi bhabheli nahuli kula na kunywa papamu. Tati waka mbomba jola akumpwaghile, “Chondi nukulobha ughonila pambane ikilu jenu na kuhekalela.”

7Bhela, mundu jola paakajemiki nahuli kubhoka, tati waka mbomba jola akumpembalili nahuli ahighalyaje ikilu jela, najombi akahighalili konihoku kabheti. 8Lukela lichobha la kahanu, paakajumwiki nahuli abhokaje, tati waka mbomba jola akumpwaghile, “Chondi nukulobha, ukula hoti nahuli upata makili, ulendalyaje mbaka lyobha likepaje, panihapa wibhokaje.” Nabhombi bhokapi bhabheli bhakakuliki chilebhi papamu.

9Mlawi na lidaba waki papamu na mtumika waki pabhakajemiki nahuli kubhoka, tati waka mbamba jola akumpwaghile, “Lingalyaje, sajenu chimihi chiheghalile. Ughonila pambane ikilu uheghalile. Utama, uhekalyaje. Chilabhu lukela pachibhombu ujumukaje, na kutumbula mwanja wa kubhuja kunyumba jaku.”

10Nambu mundu hoju akakaniki kughonela kabheti panipala ikilu jenijela, akabhokiki na kujenda mbaka ku Yebusi, yani Yelusalemu, akabya na maponda ghaki ghabheli ghaghatandakiki wichu, papamu na lidaba laki. 11Pabhakabhili pambipi na Yebusi na ikilu ukabhili uheghalile, mtumika akumpwaghili bambo waki, “Mbanga tujingalaje mu muchi wa Yebusi hoghu tughonilaje monihomo.”

12Nambu nkolongwa akumpwaghile, “Ngatwing'ambuki kujingila mu muchi wa chigheni, ambau bandu bhaki nga Bhaizilaeli. Anatujendalyaje mbaka tuhikaje ku Gibea. 13Akumpwaghili mtumika waki, tukangamalaje tukahika ku Gibea au ku Lama, na tepani anatughonilaje mu muchi ghumu waki.” 14Panihapa bhakajendalili na mwanja wabhu mbaka lyobha lakajibhili pabhakabhili pambipi na muchi wa Gibea, ambau nde muchi wa likabila laka Benyamini. 15Bhakajingili mu muchi ghonihoghu na kujenda kutama mu lubhanja lwa palanga lwa muchi, kwa ndandi ngacheakabhili mundu joakabhajopalili na kujenda kughonela kunyumba jaki.

16Pabhakabhili konihoku mzee jumu akahikiki kuhuma kungonda jaki. Mzee hoju akabhi mwenehi wa inchi ja hitombi ya Efulaimu na akabhi atama ku Gibea ngati ngeni. Bhandu bha muchi wa Gibea bhakabhili bha likabila laka Benyamini. 17Mzee hoju paakabhaweni bhatenda mwanja habha mu chibhanja cha muchi, akabhalalukile, “Bho, mwehapa muhuma kwaku? Na njenda kwako?”

18Akamuyangike, “Tupeta tuhuma ku Beselehemu jaka Yuda, tujenda mu inchi ja hitombi jaka Efulaimu, konihoku nde konitamaje. Nakapiti ku Beselehemu jaka Yuda, na sajenu nyenda kunyumba jangu pandu paajojabhalewa Bambo Chapanga. Nga mundu jokapi jola joanyopalili na kumbeleka kunyumba jaki. 19Tubhili na manyonyoli na chilebhi cha maponda ghitu na libumunda na divai kwa ndandi jitu na bhatumika bhaku yani nepani, mtumika wangu wa chimbomba, papamu na mtumika wangu jotulongini naku joni. Ngachetupala chindu chokapi chela.”

20Mzee jola akabhapwaghile, “Lukwali lubya na mwenga! Tujendaje kunyumba jango. Ananumpekyaje chokapi chela chemkepakiwi, nambu ngamwighonela mu chibhanja chenu cha muchi.” 21Panihapa hokomundu jola akabhapeliki kunyumba jaki na kughapekeha maponda ghabhu chilebhi. Na bhagheni bhala bhakagholwilli magholu ghabhu kwa machi, bhakakuliki na kunywa.

22Pabhakabhili bhahekalela, palapala bhandu bhahakau bha muchi hoghu, bhakahikiki na kujiyongolota nyumba jaka hokomundu jola. Bhakahoniki ndyangu na kumpwaghila hokomundu mweni nyumba jola, “Umpiha kunja mundu jola joajingili mu nyumba jaku, nahuli tughonila naku.”

23Nambu hokomundu mweni nyumba jola akapitiki kunja, na kubhapwaghila, “Ngamwatenda bhenibhela bhalongu bhango, mpepakoku ngamwatenda uhakau hoghu. Jonihoju nde ngeni wangu, ngamwanhengela lijambu heli la iyoni. 24Njowanyaje, kamwali wangu abhi pambane, nde kamwali jwangakummanya mwanalomi, na lidaba laka mundu hoju, ananabhapihaje kunja koni, henu mwehapa nhweza kubhatola na kubhatendela ghanihagha ghamughabhona kubha nde ghamboni, nambu mundu hoju ngamwanhengela lijambu la chihakau hele.” 25Nambu bhandu bhala ngachebhunjowanili. Panihapa Mlawi jola akumpihiki lidaba laki kunja kwa bhandu bhala, nabhombi bhakuntoliki na kughone naku kwa makili na kuntendela mambu gha iyoni ikilu jokapi mbaka lukela. Pakwatumbula kunang'ana bhakundekiki ajendaje.

26Lukela mbomba jola akahikiki mbaka pundyangu wa nyumba jeakabhi bambo waki, akahawiki pahi pundyangu hapa na kutama panihapa mbaka pachibhombu.

27Bhela bambo waki paakajumwiki lukela na kuhogho ndyangu wa nyumba na kupita kunja nahuli ajendalyaje na mwanja waki, palapala akunhimani lidaba laki aghonile pahi pundyangu, mabhoku ghaki ghakamulakili ngelaketi ya ndyangu. 28Akumpwaghi lidaba jola, “Jemaje, tujendaje.” Nambu jombi ngacheakayangiki chindu. Bhela bambu jola akunjukwihi na kunkweha panani ja liponda laki, akabhokiki na kujenda naku kunyumba jaki. 29Paakahikiki kunyumba jaki akatoliki mpamba na kunheketa lidaba jola hipandi komi na ibheli. Panihapa akaipeliki hipandi heyi pandu pokapi mu kila likabila la inchi ja Izilaeli. 30Kila mundu joakaliweni lijambu heli akapwaghike, “Lijambu la ntundu hoghu ngachelibhonakini wala kuhengakeka, kutumbula Izilaeli pabhakakweliki kuhuma ku Misili. Tuholalyaje kubhokana na ntundu wa kulihengela lihengu lijambu leniheli!”