Bhaamuzi 20

Bhaizilaeli bhaliandaa kwa ngondo

1Bhela Bhaizilaeli bhokapi kutumbula ku inchi jaka Dani mbaka ku Beeli Sheba, papamu na bhandu bha inchi ja Gileadi bhakabhokiki ngati mundu jumu na kulibhongana palongi jaka Bambo Chapanga ku Misipa hoku. 2Ihongozi bhokapi bha makabila gha Izilaeli bhakahikiki palongi ja uhimanganu wa bhandu bhaka Chapanga. Bhakabhi manjolinjoli laki nchechi bhabhajenda kwa magholu koni bhatotwili mapanga. 3Bhandu bha likabila laka Benyamini, bhakapatiki utenga kubha bhandu bhangi Bhaizilaeli bhajabhu bhakweliki kujenda ku Misipa.

Bhela panihapa Bhaizilaeli bhakapwaghike, “Mutupwaghilaje ntundu lijambu lihakau heli lihengakiki bhole?” 4Mlawi jola, ndomi waka mbomba jola joakakomakiki, akapwaghike, “Nepani na lidaba langu tukahikiki ku Gibea muchi wa likabila laka Benyamini, nahuli tughonilaje konihoku ikilu. 5Chikahi cha ikilu bhandu bha ku Gibea bhakahikiki na kujiyongolota nyumba monakabhi ng'onile, bhakapaliki kungoma. Bhakundimbiki lidaba langu mbaka kupotela. 6Panihapa nakajitoliki hyegha jaka lidaba langu, nakunhekiti hipandi hipandi na kujipeleka kwa makabili ghokapi gha Izilaeli, maghambu bhatendiki lijambu la kuhakaliha na lijambu la iyoni mu inchi ja Izilaeli. 7Bhela, mwehapa Bhaizilaeli bhokapi, mpwaghaje na mbohaje utemulu winu.”

8Bhandu bhokapi bhakajumwiki bhakapwaghaje ngati mundu jumu, “Njeta mundu jokapi pachilanda jitu jonaakelabhukaje mu lihema laki, wala njeta mundu jokapi joanajendaje kunyumba jaki. 9Anana nde moanatubhahengilaje bhandu bha ku Gibea: Anatulapulaje kula ja ntundu wa kubhalapula. 10Anatutolaje bhandu komi mu kila bhandu mia moja bha Izilaeli, bhandu mia moja mu kila bhandu elufu jimu, bhandu elufu jimu mu kila bhandu elufu komi. Bhanihabha anabhakubhaje na lihengu la kubhaletela chilebhi bhajabhu pabhikubhaje na lihengu la kuulapula muchi wa Gibea mu inchi jaka Benyamini kwa uhakau wabhu na iyoni jebhatendiki mu inchi ja Izilaeli.” 11Bhela akanalomi bhokapi bha Izilaeli bhakahimangini papamu, na kulilomba ngati mundu jumu kujenda kubhalapula bhandu bha muchi wa Gibea.

12Makabila gha Izilaeli ghakatumiki bhandu kujenda mu pandu pabhatama likabila lokapi laka Benyamini na kupwagha, “Bho, nde uhakau bhole wa kujoghuheka ghoutendakiki pachilanda jinu? 13Henu mutupekyaje bhandu bhahakau bha Gibea habha nahuli tubhakomaje na kubhoha uhakau mu Izilaeli.” Nambu bhandu bha likabila laka Benyamini ngachebhakabhajowanili bhalongu bhabhu Bhaizilaeli. 14Bhandu bha likabila laka Benyamini bhakabhokiki mu michi jabhu, bhakalibhongini ku Gibea nahuli kukomana na Bhaizilaeli. 15Bhandu bha likabila laka Benyamini bhakalibhongini kuhuma mu michi jabhu, linjolinjoli la bhandu elufu ishilini na sita bhabhatumila mapanga, nabhombi bhandu bha muchi wa Gibea bhakalibhongini bhandu mia saba bhabhamanyi kukomana wichu. 16Pachilanda ja manjolinjoli bhokapi bhabhahaghuliwi habha, kukabhili na manjolinjoli mia saba bhabhatumilaje chiwoku cha kumangeja, kila jumu akaweziki kulenga liganga kwa ngumbila na kulenga lijunju panga kukosa. 17Nabhombi Bhaizilaeli bhangi, patali na likabila laka Benyamini, bhakabhabhongini bhandu akanalomi laki nchechi bhabhaweza kutumila mapanga, bhokapi habha bhakabhi wichu kwa kukomana ngondo.

Bhaizilaeli bhakomana na likabila laka Benyamini

18Bhaizilaeli bhakapiti ku Beseli na kundaluki Chapanga, “Bho, nde nane pachilanda jitu jonalongulyaje palongi jitu nahuli kukomana na likabila laka Benyamini?”

Bambo Chapanga akabhayangike, “Yuda nde jonaalongulyaje.”

19Bhela Bhaizilaeli bhakabhokiki chilabhu jaki lukela, bhakabhekiki likambi labhu pambipi na muchi wa Gibea. 20Bhaizilaeli bhakabhokiki na kujema kila mundu pandu paki nahuli kukomana na bhandu bha likabila laka Benyamini pambipi na Gibea. 21Bhandu bha likabila laka Bhenyamini bhakapitiki kunja ja muchi wa Gibea na kukomana na Bhaizilaeli, Bhaizilaeli elufu ishilini na ibheli bhakakomakiki mu lichobha leniheli. 22Nambu Bhaizilaeli bhakajeghalini mtima kila jumu na njaki, bhakalipangiki kabhete kwa ngondo pandu pala pabhakalipangiki pakutumbula. 23Mangani ja ghanihagha, Bhaizilaeli bhakapiti palongi jaka Bambo Chapanga na kulela palongi jaka Bambo Chapanga mbaka pakamihi, nabhombi bhakundaluki Bambo Chapanga bhakapwaghaje, “Bho, tujenda le kabheti kukomana ngondo na bhalongu bhitu Bhabenyamini?”

Bambo Chapanga akabhayangike, “Nkwelaje mkakomana nabhu.” 24Lichobha la kabheli Bhaizilaeli bhakabhaheghalili nahuli kukomana na bhandu bha likabila laka Benyamini. 25Lichobha la kabheli heli bhandu bha likabila laka Benyamini bhakabhokiti ku Gibea na kukomana na Bhaizilaeli, bhakabhakomiki manjolinjoli elufu komi na nane gha Bhaizilaeli. 26Panihapa Bhaizilaeli bhokapi, bhakapiti ku Beseli, lichobha leniheli bhakatami konihoku palongi jaka Bambo Chapanga bhakalelaje. Bhakatami panga kula chindu mbaka pakamihi na kubhoha nyambiku ja kujochakeka na nyambiku ja lukwali kwaka Bambo Chapanga. 27Nabhombi Bhaizilaeli bhakundalukili Bambo Chapanga. Mu lichobha heli lisanduku la Lulaghilu laka Chapanga lakabili ku Beseli hoku, 28na Finehasi mwana waka Eleazali, nchokolu waka Haluni, akabhi ajemiki palongi ja lisanduku heli chikahi hechi. Bhaizilaeli bhakumpwaghi Finehasi alalukyaje kwaka Bambo Chapanga, “Bho, tukwela le kujenda kukomana kabheti na Bhabenyamini bhalongu bhitu, au ngatwikwela?”

Bambo Chapanga akabhayangike, “Njendaje, chilabhu ananuntenda mubhaweza bhandu bhanihabha.”

29Panihapa Bhaizilaeli bhakabhabhekiki manjolinjoli bha kujobhalela kuyongolota muchi wa Gibea. 30Bhaizilaeli bhakapiti kukomana na bhandu bha likabila laka Bhenyamini mu lichobha la katatu. Bhakalipangiki wichu nahuli kukomana na bhandu bha Gibea, ngati mobhakatendili pakutumbula hapa. 31Bhela Bhabenyamini bhakabhokiki nahuli kukomana nabhu, Bhaizilaeli bhakabhahutiki Bhabenyamini bhabhokaje mu muchi. Bhakatumbwili kukomana na kubhakoma Bhaizilaeli selasini, ngati mobhakatendiki pakutumbula, mu indela ngolongwa, jimu jejijenda ku Beseli na jengi ku Gibea. 32Bhabhenjamini bhakapwagha, “Bhalapuliki palongi jitu ngati pakutumbula.”

Nambu Bhaizilaeli bhakapwaghiki, “Tepani tutilaje nahuli tubhahutaje bhaulekaje muchi bhajendaje kuindela ngolongwa.” 33Manjolinjoli bhokapi bha Bhaizilaei pabhakahikiki ku Baali Tamali bhakatehi kujema, na kulipanga kabheti pandu pabhu nahuli kukomana ngondo, chikahi chenihechi manjolinjoli bha kujobhalela bha Bhaizilaeli bhala bhakapitalili manyata pandu panihapa ku upambala wa kolijibhi lyobha wa muchi wa Gibea. 34Manjolinjoli elufu komi bhabhamanyi kukomana ngondo wichu bhabhahaghuliki kuhuma mu makabila ghokapi gha Izilaeli, bhakahikiki kubhalapula bhandu bha muchi wa Gibea. Ngondo jakabhi ngolongwa namaa. Nambu bhandu bhaka Bhenyamini ngachebhakamanyi kubha kuyonangeka kwabhu kukabhi pambipi namaa. 35Bambo Chapanga akabhaweziki Bhabenyanimi palongi ja Bhaizilaeli na lichobha lenilela Bhaizilaeli bhakabhakomiki Bhabenyamini manjolinjoli elufu ishilini na nhwanu na mia jimu, bhokapi habha bhakabhi manjolinjoli bhabhaweza kutumi mapanga. 36Bhela Bhabenyamini bhakaweni kubha bhalapuliki.

Ntundu Bhaizilaeli mobhakabhalapulile Bhabenyamini

Panihapa Bhaizilaeli bhakabhi bhabhokiki palongi ja Bhabenyamini, kwa ndandi Bhaizilaeli bhakabhi bhabhahobhalela bhabhajobhalela bhabhakabhi bhabhekakiki kuujobhalela muchi wa Gibea. 37Bhabhajobhalela bhala bhakatendiki manyata kuulapula muchi wa Gibea na kubhakoma bhokapi bhabhakabhi monihomu kwa mapanga. 38Manjolinjoli bhokapi bha Izilaeli bhakajetangani na manjolinjoli bhala bhabhakajobhalili kuuyongolota muchi, na kubheka nginyulila. Bhakajetanganili kubha bhala bhabhajobhalela pabhijingala mu muchi bhapambakya moto nahuli lyohi laki likwelaje kunani kuhuma mu muchi ghobihogho ngati lihundi, 39nabhombi bhandu Bhaizilaeli bhakang'anambwiki kukomana. Manjolinjoli bhaka Benyamini bhakabhi tayali bhatumbwi kubhalapula na kubhakoma bhandu selasini bha Izilaeli, panihapa bhakaholalile, “Chakaka anatubhalapulaje ngati motukabhawezili mu ngondo pakutumbula hapa.” 40Nambu chikahi lihundi la lyohi lela palatumbulaje kukwela kuhuma mu muchi ghola, Bhabenyamini bhakang'anambwiki kunyuma bhakakangichi kubhona kubha muchi wabhu ukabhi uyonangeka kwa moto. 41Panihapa Bhaizilaeli bhakang'anambwiki, na bhandu bha likabila laka Benyamini bhakakamuliki na lujoghopu, maghambu bhakaweni kubha kuyonangeka kwabhu kuheghalile. 42Bhela Bhabenyamini bhakang'anambwiki na kubhatila Bhaizilaeli kujenda kulipololu, nambu ngachebhakaweziki kujepa ngondo jenijela. Nabhombi Bhaizilaeli bhabhakabhokiki mu michi jenijela bhakabhakomiki konihoku. 43Bhaizilaeli bhakabhalapwi bhandu bha likabila laka Benyamini kuhuma ku ipambala yokapi na kubhatopola, na kubhakoma panihapa pabhakabhili bhapomulili, mu upambala wa kolipita lyobha wa muchi wa Gibea. 44Lichoba leniheli bhakabhakomiki manjolinjoli ghaghamanyi kukomana ngondu wichu elufu komi na nane bha likabila laka Benyamini. 45Bhandu bhangi bha likabila laka Benyamini bhakang'anambwiki na bhakatiliki kujenda kuchingwenji mbaka kulihikila litalaghu la Limoni, Bhaizilaeli bhakabhakomiki bhandu elufu nhwanu bhakabya mwindela. Bhakabhajengalili kwa manyata mbaka ku Gidomu, na konihoku bhakabhakomiki bhandu bhangi elufu ibheli. 46Ubhalangiku wa bhandu bhokapi bhabhakomakiki mu lichobha leniheli bhakabhi bhandu elufu ishilini na nhwanu, bhokapi bhakabhi manjolinjoli bhabhamanyi kukomana ngondu wichu.

47Nambu akanalomi mia sita bha likabila laka Benyamini bhakaweziki kutilila kuchingwenji mbaka kulitalaghhu la Limoni, bhakatami konihoku kwa chikahi cha myehi nchechi. 48Bhaizilaeli bhakakelawiki kabhete kwa bhandu bhangi bha likabila laka Benyamini, na kubhakoma bhokapi: Akanalomi, akambomba, bhana na hinyama. Na michi jokapi jebhakajihimanili konihoku bhakajijochiki kwa moto.