Bhaamuzi 21

Akabhahanu kwa ndandi ja likabila la Benyamini

1Bhela Bhaizilaeli bhakalibhongini na kulapa ku Misipa: “Nga mundu jokapi joanaantoghukyaje kamwali waki kwa likabila laka Benyamini.” 2Pajapetiki ngondu jeniheji, bhandu bha Izilaeli bhakapiti ku Beseli, bhakatami palongi jaka Chapanga mbaka chimihi, bhakajamalili na kulela namaa. 3Bhakapwaghike, “Bambo Chapanga wa Izilaeli, bho, kwa ndandi kiki lijambu heli libhapatiki Bhaizilaeli? Bho, kwa ndandi kiki likabila limu la Izilaeli lihobhaje?”

4Chilabhu jaki lukela pachibhombu bhandu bhakachengiki pandu pa kubhokeha nyambiku na kuleta nyambiku ja kujochakeka na nyambiku ja lukwali. 5Panihapa Bhaizilaeli bhakalaluhine, “Bho, nde likabila laleku la Izilaeli ambalu ngachelihikiki mu uhimanganu ghoutendakiki palongi jaka Bambo Chapanga?” Kwa ndandi bhakabhekiki chilapu chikolongwa kubha jokapi jwangakuhika palongi jaka Bambo Chapanga ku Misipa, chakaka akomakakije. 6Nambu Bhaizilaeli bhakabhabhonili chiha bhalongu bhabhu bha likabila laka Benyamini, bhakapwaghaje, “Lalenu likabila limu la Izilaeli liyonangike. 7Bho, henu tutenda kiki nahuli kubhapekeha akabhahanu, kwa akanalomi bha likabila laka Benyamini bhabhahighalile? Maghambu tukajomwili kulapa kwa lihina laka Bambo Chapanga kubha ngatubhapekehi akakamwali bhitu kubha bhahanu bhabhu.”

8Panihapa bhakapwaghike, “Bho, nde likabila laleku la Izilaeli ambalu ngachelakahikiki palongi jaka Bambo Chapanga ku Misipa?” Bhakamanyiki kubha njeta mundu hata jumu joakahumiki ku Yabeshi Gileadi joakahikiki mu uhimanganu hoghu. 9Pabhakatendiki ubhalangiku bhandu bhakaweni kubha nga mundu jokapi wa ku Yabeshi Gileadi joakabhile. 10Panihapa uhimanganu bhakatumiki manjolinjoli bhabhamanyi kukomana ngondo wichu elufu komi na ibheli na kubhalaghalakila, “Njendaje mkabhakomaje bhandu bha ku Yabeshi Gileadi, akambomba papamu na bhana. 11Bhakapwaghike: Leniheli nde lemwitendaje. Mubhakomaje kila mundu mwanalomi na mbomba jwangakubha kamwali lenda.” 12Bhakabhahimanili akakamwali lenda mia nne bha ku Yabeshi Gileadi ambabhu ngachebhalabhalili kughonela na akanalomi, bhakabhapeliki kulikambi ku Shilo hoku mu inchi ja Kanaani.

13Panihapa uhimanganu ukatumiki utenga wa lukwali, kwa bhandu bha likabila laka Bhenjamini ambabhu bhakabhili ku litalaghu la Limoni. 14Bhela bha Bhabenyamini bhakabhujiki kunyumba yabhu, kuhuma kulitalaghu la Limoni, bhakapekiwi akakamwali lenda bha Yabeshi Gileadi bhabhakakengaliwi. Nambu ngachebhaghanili akanalomi bhokapi.

15Bhaizilaeli bhakabhabhonili chiha bhandu bha likabila laka Benyamini, maghambu Bambo Chapanga akahighali pachokopi pela kulihobheha likabila laka Benyamini mu inchi ja Izilaeli. 16Ihongozi bha uhimanganu bhakapwaghike, “Kwa kubha akambomba bha likabila laka Benyamini bhatehi kuyonangeka, bho, tutenda kiki nahuli kubhapekeha akambomba akanalomi bhala bhabhakosike? 17Bhakapwaghike, kubha ipalika kubhapekeha bhakambomba akanalomi bha likabila laka Benyamini bhabhahighalili nahuli bhajendelizaje likabila, na bhela ngalihobha likabila lokapi mu Izilaeli. 18Ngatuwezi kubhapekeha akakamwali bhitu kubha bhahanu bhabhu, kwa ndandi tepani Bhaizilaeli tulapiki chilapu chenjenu, ‘Apataje masolu mundu jokapi joanaampekyaje mbomba, mwanalomi wa likabila laka Benyamini.’ ” 19Panihapa bhakapwaghiki, “Nkombukaje kubha kubhi na uwangalalu wa kila chaka kwaka Bambo Chapanga mu Shilo, kungondi ja Beseli na kolipita lyobha wa indela jela jejihuma ku Beseli kujenda ku Shekemu, upambala wa kunkachi wa Lebona.” 20Bhakabhalaghalakili Bhabenyamini bhakapwaghaje, “Njendaje mkajobhalyaje mu mighonda ja mizabibu, 21na mwehapa mlilingalyaje. Akakamwali bha Shilo pabhipita kunja kukina chakahi cha uhangalalu, mpitanyaje mu mighonda ja mizabibu na kila mundu antolaje kamwali jumu abyaje nhwanu waki. Panihapa nkelabhukaje mu inchi jaka Benyamini. 22Akatati bhabhu au bhalongu bhabhu akanalomi pabhihikaje kutung'ong'utakela, anatubhapwaghilaje, ‘Tepani tundobha mubhabhonila chiha bhandu bhaka Benyamini na mwabhalekilaje bhabhatolaje akambomba bhanihabha, maghambu ngachetukabhapekihi akabhahanu kuhuma mu ngondu ja ku Yabeshi Gileadi. Nambu wehapa mabheni ngachemwapekihi akakamwali bhinu habha, panihapa ngamwitemuliwe.’ ”

23Akanalomi bha likabila laka Benyamini bhakatendiki bhenibhela, kila jumu akahawili kamwali pachilanda ja akakamwali bhabhakapitiki kunja kukina ku Shilo hoku na kuntola kubha nhwanu waki. Panihapa bhakakelawiki mu inchi jabhu na kujichenga michi jabhu kubha jahenu na kutama monihomu. 24Chikahi chenihechi Bhaizilaeli bhakabhokiki pandu pala na kujenda kumanyumba ghabhu, mu makabila ghabhu na kwa bhandu bhabhu, kila jumu mu pandu paakapekiwi kubha paki.

25Mu machobha ghanihagha ngachepakabhili na nkolongwa mu Izilaeli. Kila mundu akatendiki ngati moakabhonili kubha nde wichu pamihu jaki mweni.