2 Samweli 1

Daudi apwaghakika kupotela kwaka Sauli

1Paakajomwi kupote Sauli, Daudi paakabhi akelabhuka kuhuma kubhaweza Bhaamaleki, Daudi akatami machobha ghabheli ku Sikilagi hoku. 2Lichobha la katatu akahiki mundu joakabhi na ingobhu yeikachwiki na akabhi na luhombi pa mutu jaki kuhuma kulikambi laka Sauli. Paakunhiki Daudi, akachikimi palongi jaki nahuli kumpeke utopelu. 3Daudi akundalukile, “Wenga uhumiki kwako?”

Najombi akamuyangike, “Ndiliki kuhuma kulikambi la Bhaizilaeli.”

4Daudi akundalukile, “Bho, chipitali kike? Umbwaghilaje.”

Akapwaghike, “Bhandu bhakatiliki kuhuma ku ngondo. Bhamaheli bhabhu bhakahawiki na kupotela. Najombi Sauli na mwana waki Yonasani bhapotile.”

5Panihapa Daudi akumpwaghi nkombu jola joakundeti ubholu, “Bho, umanyiki bholi kubha Sauli na Yonasani mwana waki bhatehi kupotela?”

6Nkombu jola akapwaghike, “Ikapitalili panakabhi panani ja chitombi cha Giliboa, najombi Sauli akabhi konihoku akabya ajeghamakili nkoha waki, na magali gha ngondo na bhajendeha falasi bha upambala wa maadui bhakabhi bhunheghali pambipi nakanopi. 7Paakang'anambwiki na kumona, akatehi kunoha. Nanatu nakapwaghike, ‘Nepani, mi pambane.’ 8Akanalukile, ‘Bho, wehapa wa nane?’ Nakamuyangike, ‘Nepani nde Muamaleki.’ 9Bhela akambwaghile, ‘Uheghalya pambani, ungomaje! Mili mumabhinilu makolongwa gha kupotela, hata ngati nakona namwome.’ 10Bhela, nakamuheghalili, na kunkoma, maghambu nakamanyiki kwa uchakaka kubha anaawiki pahi, ngaawezi kulama. Nanatu nakatoliki litaji lela lelakabhi pa mutu jaki na bangili jejakabhi muchiwoku chaki, na nepani nukuletili pambani wa bambo wangu.”

11Panihapa Daudi papamu na bhandu bhokapi bhabhakabhi papamu naku bhakakamwili ingobhu yabhu na kuikachula kwa mabhinilu. 12Bhakaombulizi, bhakaleliki na kukonga kula chilebhi mbaka pakamihe kwa ndandi jaka Sauli na Yonasani mwana waki, na kwa ndandi ja manjolinjoli ghaka Bambo Chapanga na nyumba ja Izilaeli, maghambu bhamaheli bhabhu bhakakomakiki kwa lipanga kungondo.

13Bhela, Daudi akumpwaghi nkombu joakundeti ubholu jola, “Bho, wehapa wa mwenehi wa kwako?”

Akamuyangike, “Nepani nde mwana waka ngeni, Muamaleki.”

14Daudi akundalukile, “Bho, maghambu kiki ngachewajowipi kujinula chiwoku chaku na kunkoma mundu joahaghuliwi na Bambo Chapanga?”

15Bhela, Daudi akundohiki jumu wa bhandu bhaki na kumpwaghila, “Ujenda ukunkomaje!” Bhela akundapwi nkombu jola, najombi nkombu jola akapotile. 16Daudi akumpwaghile, “Ikupalika kupotela kwa lijambu leniheli leupwaghike. Ndandi kwa malobhi ghaku wamwete ghalangihi kubha uhengiki lijambu lihakau, ukapwaghaje, ‘Nunkomiki mundu joahaghuliwi na Bambo Chapanga.’ ”

Daudi aombuleza kwa ndandi jaka Sauli na Yonasani

17Daudi akaombulizi malelu ghanihagha kwa ndandi jaka Sauli na Yonasani mwana waki, 18najombi akalaghalakili kubha bhandu bha Yuda bhabholakikaje ombulezu leniheli lelilembakiki mu chitabu cha Yashali.

19“Bhabhabhi ulumbalilu waku, wenga wa Izilaeli, bhakomakiki pa itombi yaku yeijinwike!

Bhandu bhaku bhabhamanyi kukomana wichu bhokapi bhatehi kuhabhuka!

20Ngamubhapwaghi bhandu bha muchi wa Gati lijambu leniheli,

ngamwalitangaza haleli mu indela ya Ashikeloni.

Nanga bhela, anamubhatenda akambomba bha Bhafilisti kubha na chiheku,

na ngamubhaleka akambomba bhangakummanya Chapanga kubha na chiheku.”

21“Mwenga itombi ya Giliboa, ngamwikubha na lyangami wala iyula panani jinu.

Wala mighonda jinu ngajipambika mahunu gha nhupu.

Maghambu konihoku nde ambaku ngau jaka mwana makili jakajeghaliki uhakau,

ngau jaka Sauli ngajipakakiki mahuta kabhete.

22Upendi waka Yonasani ngachewakelawiki kunyuma ng'o,

lipanga laka Sauli ngachelakelawiki kunyuma waka,

chikahi chokapi yakakomiki bhandu bhamaheli.

Ena, yakakomiki bhana makili bha maadui.”

23“Sauli na Yonasani, bhakapalakiki na bhandu mumatamu ghabhu na kuneng'anela.

Ngachebhalekini mu matamu ghabhu, wala mu nyiwa jabhu.

Bhakajojwiki kupeta ngwahe, na bhakabhi na makili kupeta lihimba.

24Mwenga akakamwali bha Izilaeli, ndelaje kwa ndandi jaka Sauli!

Akunhwatiki mwehapa kwa ingobhu ikeli yeibhi na ulumbalilu,

na akumpeki mwehapa zahabu ja kuipamba ingobhu hinu.”

25“Lingalya ntundu bhana makili mobhahabhuki,

bhakomakiki koni bhakabya kungondo.

Wenga wa Yonasani, ukomakiki, panani ja itombi yeijinwike.”

26“Umina mtima kwa ndandi jaku, undongu wangu wa Yonasani,

kwangu nepani ukabhi umpalu wangu!

Upalu waku kwangu ukabhi wa kukangacha namaa,

wa kukangacha nakanopi ja upalu wa akambomba.”

27“Lingalya ntundu bhana makili mobhahabhukile,

na ntundu silaha yabhu ya ngondo moiyonangakile.”