2 Samweli

Chitabu chaka

2 Samweli

Ulongulelo

Itabu yaka 1 Samweli na 2 Samweli pakutumbula hapa chakabhi nde chitabu chimu chikolongwa chechakamanyakini ngati “Chitabu chaka Samweli.” Kwa mala ja kutumbula chitabu chenjenu kuchigabhanya na kubha itabu ibheli chakahengakiki mu litoleu lelakalowakiki, “Litoleu la Septuaginti.” Aleli lakabhi nde litoleu la kutumbula la kutafusili Lulaghilu lwa Mwande mu lugha ja Kiyunani. Lihina la tafusili jeniheji lakatotwili ndandi ja kubha tafusili jeniheji jakalembakiki na bhasomi sabini au sabini na bhabheli bha Kiyahude. Mu tafusili jenjenu ja Kigiliki, itabu yaka 1 Samweli na 2 Samweli yakalowakiki 1 Ngolongwa na 2 Ngolongwa, na mu litoleu la Kilatini lelakajengalili baada ja leniheli, itabu yeniheyi yakang'anambuliwi na kulowakeka 1 Bhakolongwa na 2 Bhakolongwa. Bhela itabu yeimanyikana lalenu ngati 1 Bhakolongwa na 2 Bhakolongwa, mu litoleu leniheli yakalowakiki 3 Bhakolongwa na 4 Bhakolongwa. Itabu yaka 1 Samweli na 2 Samweli ilongalela mambu ghaakahengiki mlota Samweli, nkolongwa Sauli, na nkolongwa Daudi. Samweli akabhi nde chiongozi wa kujomulela wa inchi ja Izilaeli pajakang'anambwiki kuhuma mu kutawaliwa na Bhatemula, na kutumbula kutawaliwa na bhakolongwa. Samweli jojoju nde joakabhapakiki mahuta Sauli na Daudi kwa kubhahimika kubha bhakolongwa bhabheli bha kutumbula bha inchi ja Izilaeli. Itabu yaka 1 Samweli na 2 Samweli ilongalela mambu gha inchi ja Izilaeli mu chikahi chenihechi.

Njeta joamanyi kubha nde nane joakailembiki itabu ya 1 Samweli na 2 Samweli. Mlemba ngacheakaliloghwili mweni mkati ja itabu yeniheyi, nambu ihobhaleka akabhi mwomi chikahi chokapi cha utawala waka nkolongwa Daudi, na pangi akahighalili kubha mwomi hata baada ja utawala ghonihoghu, na iwezikana kubha akabhi na uwezu wa kubhona na kusoma malembu ghangi ghaghalandili matamu ghaka Sauli na Samweli, kubhokana na hali ja kulepa kumanyikana jejiyongolota utambulishu waka mundu au bhandu bhabhakalembiki itabu yenu, bhelabhela ngacheimanyikana kubha itabu yenu yakalembakiki lile.

Ghaghabhihomu

Daudi moakapati kubha nkolongwa wa Yuda, na panakatai kubha nkolongwa wa Izilaeli jokapi, mu sula ja 1-5.

Ntundu Daudi moakatawali ngati nkolongwa, na kubhaweza maadui bhaki bhamaheli, mu sula ja 6-10.

Daudi moakahengi lihoku la ugoni na kukoma, na ntundu moakalakaliwi na mlota Nasani, mu sula ja 11-12.

Kupengwa kwa kutumbula na kupengwa kwa kabheli panani jaka Daudi, mu sula ja 13-20.

Malobhi gha kujomulela gha matamu ghaka Daudi ngati nkolongwa, mu sula ja 22-24.