2 Samweli 16

Siba na nkolongwa Daudi

1Bhela Daudi paakabhi apetiki pachokopi kuhuma panani ja chitombi, Siba mtumika waka Mefibpsheti akunjopali Daudi konihoku koni akabya na maponda ghaki ghabheli, ghaghakabhi aghatandiki koni ghatotwi mabumunda mia ibheli, ishada mia jimu ya zabibu jijomu, mapambiku mia jimu gha palumu, na mfuku wa chingumba ghoukabhi na divai. 2Nkolongwa akundaluki Siba, “Bho, maghambu kiki uletiki hinde ayeye?”

Siba akamuyangike, “Maponda nde kwa ndandi ja kukwela bhandu bha munyumba jaka nkolongwa, mabumunda na mapambiku gha palumu nde kwa ndandi ja akakombu bhokapi, na divai nde kwa ndandi ja bhala bhabhitonda muchingwenje.”

3Bhela nkolongwa akundalukile, “Mwana waka bambo waku abhi kwako?”

Siba akumpwaghi nkolongwa, “Jombi ahighali ku muchi wa Yelusalemu, maghambu aholake kubha lalenu bhandu bha Izilaeli anabhunkelabhukya ukolongwa waka hokolu waki Sauli.”

4Nkolongwa akumpwaghi Siba, “Mali ghokapi ghaghakabhi ghaka Mefibosheti sajenu nde mali ghaku wehapa.”

Siba akumpwaghile, “Njengula, bambo wangu nkolongwa, nanatu nyopa mbata chihomu palongi jaku chikahi chokapi.”

Shimei ampeke masolu nkolongwa Daudi

5Chikahi nkolongwa Daudi paakaheghali kuhika ku muchi wa Bahulimu, akapitalili mundu jumu kuhuma mu lukolu lololu lwaka Sauli, lihina laki akalowakiki Shimei, mwana waka Gela, akatumbwi kumpeke masolu Daudi paakabhi abhoka. 6Akunhomi nkolongwa Daudi na bhatumika bhokapi bhaka nkolongwa Daudi. Bhandu bhangi bhokapi na bhana makili bhakabhi bhunhyongalwiti Daudi upambala wa kumalelelu na upambala wa kumangeja. 7Shimei akumpekii masolu Daudi akapwaghaje, “Ubhoka pambane, ubhoka pambane, wehapa wa mundu wa kukoma, mundu wangakubha na nyonjeka! 8Baambo Chapanga akulepiki kubhokana na kihengu chaku cha kubhakoma bhandu bha munyumba jaka Sauli, ambaju sajenu wehapa utoliki ukolongwa kuhuma pandu paki. Henu, Bambo Chapanga ampeki ukolongwa mwana waku Abisalomu. Lingalya, henu mayonangeku ghakupatiki maghambu wehapa nde wa mkoma bhandu!”

9Bhela Abishai mwana waka Seluya, akumpwaghi nkolongwa, “Bho, maghambu kiki nakawa ajeji jejiwili jukupeke masolu wehapa wa bambo wangu nkolongwa? Unyetakalyaje nambuka nunjengalya, nahuli nakunhekata mmutu waki.”

10Nambu nkolongwa akumpwaghile, “Bho, kubhi kike pachilanda jangu nepani na mwehapa mabhana bhaka Seluya? Anakubhi Bambo Chapanga ampwaghi, ‘Umpekya masolu Daudi,’ bho, nde nane joaweza kulalukila, ‘Bho, maghambu kiki uhenga bhenibhela?’ ”

11Bhela nkolongwa Daudi akumpwaghi Abishai, na bhatumika bhaki bhokapi, “Anakubhi mwana wangu namweti aghalonda matamu ghangu, bho, nga nakanopi lelu kwa mundu wa likabila laka Benyamini? Mwehapa mundeka ambekya masolu, ndandi Bambo Chapanga nde joampwaghi ahenga bhenibhela. 12Iwezikana kubha Bambo Chapanga aweza kughalolakela mahakau ghaghambatike, najombi aweza kunepa ghamboni kwa ndandi ja masolu ghambekewa lalenu.” 13Bhela nkolongwa Daudi na bhandu bhaki bhokapi bhakajendali na mwanja koni Shimei akabya anjengalela na kunhoma maganga, na kumicha luhombi kunani nahuli lunjendila nkolongwa Daudi. Shimei akabhi ajenda munkeghi ja panani ja chitombi, kulengana na Daudi. 14Bhela nkolongwa na bhandu bhokapi bhabhakabhi papamu na jombi, bhakahikiki ku nkoka bhakabya bhatondiki. Bhela bhakapomulili pandu panihapa.

Abisalomu ku muchi wa Yelusalemu

15Chikahi hechi, Abisalomu na bhandu bhokapi bha Izilaeli bhakapiti ku muchi wa Yelusalemu, najombi Ahitofeli akabhi papamu nabhu. 16Bhela Hushai kuhuma ku Aliki, nkochi waka Daudi, akunjendili Abisalomu, na kumpwaghila, “Unkolongwa utama matamu malachu! Unkolongwa utama matamu malachu!”

17Abisalomu akundaluki Hushai, “Bho, aghoghu le nde wamboni waku kwaka nkochi waku Daudi? Bho, mbona ngacheupiti na nkochi waku?”

18Hushai akamuyangike, “Ngabhela! Ndandi jola joahaghuliwi na Bambo Chapanga, bhandu abhabha na bhandu bhokapi bha Izilaeli, jonihoju nde joanangubha kwaki, na kutama papamu na jombi. 19Nakanopi ja ghanihagha, bho, imbalika nuntumakya nane? Bho, nga mwana waka nkochi wango? Ngati monakuntumaki tati waku, bhenibhela nde moananukutumakya wehapa.”

20Bhela Abisalomu akumpwaghi Ahitofeli, “Utupekya maholalelu ghaku, bho, tuhenga kyane?”

21Ahitofeli akumpwaghi Abisalomu, “Ughonila na bhatumika bha chimbomba bhaka tati waku bhaabhalekiki nahuli kujighoha nyumba ja kikolongwa. Panihapa bhandu bhokapi bha Izilaeli anabhajowana kubha uhakaliwi na tati waku, na kwa kuhenga bhenibhela kila mundu joabhi papamu na wehapa anaajeghalika makili.” 22Bhela, bhandu bhakundenganakili Abisalomu lihema panani ja nhwaghala, najombi akaghoni na bhatumika bha chimbomba bhaka tati waki, koni bhandu bhokapi bha Izilaeli bhakabya bhumbona.

23Mu machobha ghanihagha malobhi ghokapi ghaakabhi apwagha Ahitofeli ghakabhi ngati ghahuma kwaka Chapanga. Na malobhi ghokapi ghaakalongi Ahitofeli ghakapatiki utopelu kwaka Daudi na kwaka Abisalomu.