2 Samweli 15

Abisalomu apanga uhakau

1Paghakapetiki mambu ghanihagha, Abisalomu akapatiki magali gha ngondo gha kuhutakika na falasi na bhandu hamsini bha kundongule palongi. 2Abisalomu akayobhali kujumuka lukela pachibhombu na kujenda kujema punkeghi ja indela jejijenda ku ndyangu ukolongwa wa muchi. Mundu jokapi joakabhi na matakilu ambaju akapaliki kughapeleka kwaka nkolongwa nahuli kupata utemulu waki, Abisalomu akabhi andoha mundu hoju punkeghi na kundalukila, “Wehapa uhuma ku muchi bhole?” Ngati mundu hoju anaapwaghiki ahumiki ku muchi ghumu waki wa likabila la Izilaeli, 3Bhela Abisalomu akabi ampwaghila, “Lingalyaje, matakilu ghaku nde gha chakaka na manyahi, nambu njeta mundu joahaghuliwi na nkolongwa nahuli kukujowanela.” 4Bhelabhela Abisalomu akajonjuki kupwagha, “Ngati nepani nakabya nhaghuliki kubha mtemula mu inchi jenjenu! Kila mundu joabhi na matakilu na mang'ahiku akabya ahikiki kwangu nanatu nakabya numpeki chela cheapalika kupata.” 5Nyonjeka ja ghanihagha mundu jokapi paakunheghalili nahuli kunchikamila na kunjojabhe palongi jaki, Abisalomu akahatambwili chibhoku chaki, na kunkamula na kumbusu. 6Abisalomu akajendalili na luhomu londoni palongi ja Bhaizilaeli bhokapi bhabhakunjendi nkolongwa kundobha abhapekya chela chebhapalika kupata, bhela Abisalomu akajitendiki mitima ja bhandu bha Izilaeli kubha na ulongwana kwaki.

7Payakapetiki hyaka ncheche, Abisalomu akumpwaghi nkolongwa, “Chondi nukulobha unyetakalya nyenda ku Hebuloni, nahuli nakabhoha nazili jenakumbeki Bambo Chapanga. 8Chikahi mtumika waku paakabhi ku Geshuli hoku mu inchi ja Silia, nakabhekiki nazili nakapwaghaje, ‘Ngati Bambo Chapanga anaangelawihi ku Yelusalemu lukwali, bhela nepani ananunjojabya jombi ku Hebuloni hoku.’ ”

9Nkolongwa akumpwaghile, “Ujenda kwa lukwale.” Bhela Abisalomu akabhokiki na kujenda ku Hebuloni. 10Nambu Abisolamu akatumiki bhabholu kwa kulihiya mu makabila ghokapi gha Izilaeli, kupwagha, “Chikahi pamwijowana sauti ja lipenenga, bhela mpwaghaje, ‘Abisalomu nde nkolongwa ku Hebuloni hoku!’ ” 11Bhandu mia ibheli kuhuma ku Yelusalemu bhakabhi bhunjengale Abisalomu. Bhakabhi bhakokakiki ngati bhagheni nabhombi bhakapiti kwa nia jinyahi, panga kumanya lijambu lokapi lela. 12Chikahi Abisalomu paakabhi abhoha nyambiku ja kujochakeka, akatumiki bholu ku Gilo, nahuli kundoha Ahitofeli, Mgiloni, joakabhi mundu wa pambipi waka nkolongwa Daudi. Bhela mpangu uhakau waka Abisalomu ukajendali kupata makili, na bhandu bhabhakabhi bhalongana na Abisalomu bhakajendali kujonjukeka.

Daudi atila kuhuma mu muchi wa Yelusalemu

13Mbolu jumu akunjendi Daudi, na kumpwaghila “Mitima ja bhandu bha Izilaeli jilangi ulongwana kwaka Abisalomu.”

14Bhela, Daudi akabhapwaghi bhatumika bhaki bhokapi bhabhakabhi papamu na jombi ku Yelusalemu hoku, “Muhikaje! Itupalika tutilaje, nanga bhela, njeta hata jumu witu joanaweza kunjepa Abisalomu. Bhela, itupalika tubhoka manyata, nanga bhela, anahika imbelu na kutupata, anaatuyonangaji na kubhakoma bhandu bha muchi kwa mapanga.”

15Nambu bhatumika bhaka nkolongwa bhakayangike, “Tepani bhatumika bhaku tubhi tayali kuhenga lijambu lokapi lela lewihaghula wehapa wa bambo witu nkolongwa.” 16Bhela nkolongwa akabhokiki, nabhombi bhandu bha munyumba jaki bhakunjengalile, nambu akabhalekiki bhatumika bhaki bha chimbomba komi nahuli bhajighoha nyumba ja kikolongwa.

17Bhela nkolongwa akabhokiki, papamu na bhandu bhaki bhokapi. Nambu akapomulili pachokopi pabhakahikiki ku Beti Melihaki, yani ujomukelu wa muchi. 18Bhatumika bhaki bhokapi bhakajendiki, bhakampetiki bhakabya bhalongini na Bhakelesi na Bhapelesi bhokapi, kabheti Bhagiti bhokapi mia sita bhaakalongini nabhu kuhuma ku Gasi, bhakalongulili palongi jaka nkolongwa, 19nkolongwa akumpwaghili Itai, Mgiti, “Kwa ndandi kiki ulonganaje na tepane? Kelukaje ukatamaje papamu na nkolongwa Abisalomu. Wehapa nde wangeni, wanhika kuhuma kuinchi jako. 20Wehapa uhikiti kongoni kwichukwichu pela. Bho, nepani nikutendaje ulyungalyungaje papamu natepane, chikahi ngachenimanyi konyenda? Kelukaje, nawehapa ukabhatolaje bhalongu bhaku. Wamboni na ulongwana na ukubha papamu na wehapa.”

21Nambu Itai akamuyangiti nkolongwa, “Chakaka ngati Bambo Chapanga moatamila na ngati bambu wangu nkolongwa moatamila, pokapi bambu wangu nkolongwa panakubha, ikubhi nde kutama au kupotela, panihapa nde mtumika waku panakubha.”

22Bhela Daudi akumyangiki Itai, “Jendaje henu, ujendalya.” Bhela Itai, Mgiti, akajendalili papamu na bhandu bhaki bhokapi, kabheti na bhalongu bhaki bhokapi bhabhakabhili papamu naku. 23Bhandu bhokapi bha kunja ja muchi bhakaleliki kwa sauti chikahi bhandu bhokapi pabhakabhili bhapeta. Nkolongwa najombi akalombwiki likemba laku Kidiloni, nabhombi bhandu bhokapi bhakapiti ku chingwenji.

24Najombi Sadoki akabhi, papamu na Bhalawi bhokapi bhabhakabhili papamu naku bhakabhili bhatotwili Lisanduku la Lilaghilu laka Chapanga. Bhakalitoliki pahi lisanduku laka Chapanga, najombi Mpenganyambiku Abiasali akabhohiki nyambiku ja kujochakeka pamoto mbaka bhandu bhokapi pabhakabhili bhabhokanili pambwani. 25Bhela nkolongwa akumpwaghi Sadoki, “Ulikelabhuha Lisanduku laka Chapanga ku muchi. Ngati anambatiki chihomu palongi jaka Bambo Chapanga, anaangelabhukaje, nanatu ananilibhona kabhete Lisanduku leniheli, papamu na Lihema laki. 26Nambu ngati Bambo Chapanga anapwaghiki, ‘Nepani ngachenyambakiki na wehapa,’ bhela nepani mi tayali jombi atendaje chokapi cheabhona jombi kubha chinyahi.”

27Bhela nkolongwa Daudi akumpwaghi kabhete Sadoki, “Lingalyaje, bho wehapa le nga wa mlola? Ubhuja ku muchi kwa lukwali wehapa papamu na mwana waku Ahimaasi, na Yonasani mwana waka Abiasali. Wehapa na Abiasali mubhatola na bhana bhinu bhabheli. 28Nambu nepani anangubha nendalela pandu papabhi na ilomboku koni kuchingwenje, mbaka panipata malobhi kuhuma kwinu mwehapa.” 29Bhela Sadoki na Abiasali bhakalikelawihi Lisandu la Lulaghilu laka Chapanga ku muchi wa Yelusalemu, na bheni bhakahighali konihoku.

30Nambu Daudi akajendalile, akakweliki chitombi cha Mizeituni koni akalelaje, koni akabya ayekalili mmutu waki, na panga magubasi mumagholu ghaki. Hata bhandu bhokapi bhabhakabhi papamu naku nabhombi bhakaliyekalili mimutu jabhu, na bhakabhi bhakwela chitombi koni bhakalelaje. 31Chikahi chenihechi, Daudi akapwaghakiki kubha hata Ahitofeli akabhi nde jumu wa bhabhumpengiki na kulombana Abisalomu. Nambu Daudi akalobhiki apwaghaje, “Wenga wa Bambo Chapanga, nukulobha, utenda mpangu waka Ahitofeli kubha chindu cha king'ang'a!”

32Bhela, chikahi Daudi paakahikiki kunani ja chitombi, pandu pa kunjojobhe Chapanga, mundu jumu lihina laki Hushai kuhuma ku Aliki akahikiki nahuli kunjpalela, ingobhu yaki yakabhi ikachulike, na mmutu waki ukabhi na luhombi. 33Daudi akumpwaghile, “Anaupiti papamu na nepani, anaukubha chibwahila kwangu nepani. 34Nambu ngati anaubhujiki ku muchi wa Yelusalemu, na kumpwaghi Abisalomu, ‘Anangubha nuntumika waku, wenga unkolongwa, ngati monakabheli nuntumika waka tati waku, pakutumbula hapa,’ bhela winyangatyaje nahuli mpangu waka Ahitofeli ngawihengakeka. 35Bhapenganyambiku Sadoki na Abiasali anabhakubha papamu na wehapa ku muchi! Bhela, chokapi chewijowana kuhuma munyumba jaka nkolongwa, ubhapwaghila bhapenganyambiku Sadoki na Abiasali. 36Lingalyaje, bhana bhabhu bhabheli bha chikambaku, Ahimaasi mwana waka Sadoki, na Yonasani mwana waka Abiasali, bhabhi papamu nabhu konohoku. Na chokapi chemwijowanaje mwinetila malobhi ghanihagha kwa kupete bhombi.”

37Bhela, Hushai nkochi waka nkolongwa Daudi, akahikiki mu Yelusalemu chikahi Abisalomu paakabhi ajingi mu muchi wa Yelusalemu.