2 Samweli 14

Yoabu apanga kunkelebhu Abisalomu

1Yoabu mwana waka Seluya, akamanyiki kubha mtima waka nkolongwa Daudi ukabhi na chilolu cha kumbona Abisalomu. 2Bhela Yoabu akatumiki bhandu kujenda ku Tekoa na kundeta mbomba joabhi na mbulau kuhuma konihoku. Akumpwaghi mbomba hoju, “Ulitenda ubhi mu chikahi cha kulela malelu. Uwata ingobhu ya maombulezu, na wehapa ngawalipaka mahuta ghokapi ghala gha kukunyambiha, ulitenda ngati mbomba ambaju abhi mu mabhinilu gha mtima kwa machobha ghamaheli kwa ndandi ja kuhwelewa. 3Bhela, ujenda kwaka nkolongwa ukumpwaghila malobhi ghangane.” Najombi Yoabu akumpekihi ubholu mbomba jola.

4Mbomba wa kuhuma ku Tekoa hoju akapiti kwaka nkolongwa, akachikimi na kujinama ukupama, nahuli kumpeke utopelu nkolongwa, akapwaghaje, “Wenga unkolongwa, unyangatyaje!”

5Nkolongwa akundalukile, “Ubhi na mang'ahiku bhole?”

Mbomba jola akayangike, “Nepani nde mbomba nenhweliwi na ndomi wangu. 6Nepani mtumika waku nakabhi na bhana bhabheli. Lichobha limu bhakakomini ngondo bheni kwa bheni kungonda hoku wala konihoku ngachekukabhi mundu hata jumu wa kukenga ngondo jeniheji, na jumu akundapwi njaki na kunkoma. 7Henu bhalongu bhangu bhokapi bhaniyomela nepani, bhakapwaghaje, ‘Utupekya mundu jola joankomiki ndongu waki, nahuli tunkomaje kwa ndandi ja womi waka ndongu waki joankomiki, panihapa na tepani anatubya tunhekatili kutali na mpwelelu waki.’ Anabhatendiki bhenibhela anabhakubha bhahimihi lihobhalelu langu lelihighalile, ndomi wangu ngayikubhi na lihina wala mwana pani pundema.”

8Nkolongwa akumpwaghi mbomba hoju, “Bhuja kunyumba jaku, nanatu anamoha lilaghalakilu kwa ndandi jaku.”

9Nambu mbomba wa kuhuma ku Tokea jola akupwaghile, “Bambo wangu nkolongwa, mahakau ghokapi ghabyaje kwangu na bhalongu bhangu na bhandu bha munyumba jaka tati wangu, najombi nkolongwa na chitehu chaku cha ukolongwa ngachikubha na mahakau.”

10Nkolongwa akayangike, “Anakubhi mundu jokapi anaakujowihi kwa chokapi, undetaje kwangu, najombi ngaakung'ahi kabhete.”

11Mbomba jola akapwaghike, “Chondi, nkolongwa, unobhila kwaka Bambo Chapanga, Chapanga waku, nahuli kuhibhalaki mlepa kisasi cha kukoma ngayijendale kuyonanga, ngabhihika kunkoma mwana wangu joahighalile.”

Nkolongwa akapwaghike, “Chakaka ngati moatami Bambo Chapanga, njeta lijunju hata limu la pamutu jaka mwana waku leanalihabhuka pahi.”

12Bhela mbomba jola akapwaghike, “Nukulobha, nepani mtumika waku, unyetakya kupwagha lilobhi kwaku wehapa, wa bambu wangu nkolongwa.”

Nkolongwa akayangite, “Upwaghaje.”

13Mbomba hoju akapwaghike, “Henu maghambu kiki wehapa uholale lijambu ngati lendenu kwa bhandu bhaka Chapanga? Kubhokana na utemulu wako kwa lijambu lendenu, unkolongwa nde ngati ulitemwi wamwete kubha na mahakau, maghambu ngacheunjetakili mwana waku akelabhuka kunyumba kuhuma koakabhi atilile. 14Tepani tabhokapi anatupotilaje. Tepani nde ngati machi ghaghajitiki pahi ambaghu ngacheghaweza kujolakeka. Hata Chapanga ngacheatenda ulenganganu kwaka mundu jumu na mundu jongi, nambu jombi alonda indela nahuli bhabhakanakiki, na kutila bhapata kukelabhuka kwaki. 15Nepani nhikiki kulonge na wehapa, wa bambo wangu nkolongwa, maghambu bhandu bhatehi kunyoghoha. Henu nepani nuntumika waku, nakaholalili kubha, ‘Mbanga nongeli na nkolongwa, pangi aweza kunyangatila kwa ghala ghanundobha nepani mtumika waki. 16Pangi nkolongwa ananyetakalya kungengalela nepani nuntumika waki kuhuma mu mabhoku ghaka mundu joalenga kunyonanga nepani papamu na mwana wangu, kuhuma mu upwelelu ghoatupekihi Chapanga.’ 17Bhela mtumika waku apwagha, ‘Lilobhi laka bambo wangu nkolongwa analimbekya lukwali muntima, maghambo bambo wangu nkolongwa nde ngati mtumika wa kunani kwaka Chapanga mu kumanya lamboni na lihakau. Bambo Chapanga, Chapanga waku, na akubha papamu na wehapa!’ ”

18Panihapa nkolongwa akumpwaghi mbomba hoju, “Mbala kukulaluki lilalukilu limu, nambu ngawinhiya lijambu lokapi lela.”

Mbomba hoju akapwaghike, “Haya, bambo wangu nkolongwa, upwaghaje.”

19Nkolongwa akundalukile, “Bho, Yoabu le ahusika mu lijambu lendeno?”

Mbomba hoju akayangike, “Chakaka nukulapila, bambo wangu nkolongwa, njeta mundu jokapi jola joaweza kujepa kumalelelu au kumangeja kubhokana na chokapi cheapwagha bambo wangu nkolongwa. Ena, mtumika waku Yoabu nde joamoliki kuhenga anana, najombi nde joamoliki malobhi aghagha ghokapi ghanukupwaghi nepani nuntumika waku. 20Mtumika waku Yoabu ahengiki bhenibhela nahuli kung'anambula ntundu wa lijambu aleli molibhelile. Bambo wangu nkolongwa abhi na mbulau ngati ja bhatumika bha kunani kwaka Chapanga, hata uweza kumanya mambu ghokapi ghaghabhi pani pundema.”

21Bhela nkolongwa akumpwaghi Yoabu, “Wichu namaa, ananilitenda lijambu lenu. Ujenda, ukunkelabhuha nkombu Abisalomu.”

22Yoabu akachikimi na kujinama ukutama mbaka paluhombi nahuli kumpeke nkolongwa utopelu, akapwaghaje, Lalenu nepani mtumika waku manyi kubha mbatiki chihomu palongi jaku, kwa kulijetakela lilobhu langu. 23Bhela, Yoabu akabhokiki, na kujenda ku muchi wa Geshuli, na kundeta Abisalomu ku muchi ku Yelusalemu. 24Nambu nkolongwa akapwaghike, “Abisalomu ajenda akatama kunyumba jaki, nepani ngachembala kuhimangana naku.” Bhela Abisalomu akabhi atama kunyumba jaki, na ngacheakahimangini na nkolongwa Daudi.

Abisalomu ajongana na nkolongwa Daudi

25Mu Izilaeli jokapi, nga mundu joakabhi na mnyahi ngati Abisalomu. Kutumbu lwaju lwaki mbaka palutoutou lwaki, Abisalomu ngacheakabhi na lijambu lokapi lela lihakau. 26Chikahi chokapi paakabhi amogha majunju gha kumutu jaki, na kila chaka akabhi amogha majunju ghaki ndandi ghakatopiki namaa, nyweli heyi yakabhi na kutopa kwa kilu ibheli kulengana na ipemu ya kikolongwa. 27Abisalomu akabheliki bhana bhatatu bha chikambaku papamu na mwali jumu, lihina laki akalowakiki Tamali. Tamali akabhi mbomba mnyahi namaa kwa sula.

28Bhela, Abisalomu akatami mu muchi wa Yelusalemu kwa chikahi cha hyaka ibheli, panga kumbona nkolongwa Daudi. 29Bhela, Abisalomu akuntumi ubholu Yoabu, nahuli ajenda kwaka nkolongwa kwa ndandi jaki, nambu Yoabu akakaniki kuhika. Abisolamu akatumiki ubholu kwa mala ja kabheli, nambu Yoabu akakaniki kuhika. 30Bhela, Abisalomu akabhapwaghi bhatumika bhaki, “Ndingaje, Yoabu abhi na ngonda wa shayili pambipi na ngonda wango. Njenda mkaujocha moto.” Bhela bhatumika bhaka Abisalomu bhakapiti kuujocha moto ngonda waka Yoabu. 31Bhela, Yoabu akapiti kunyumba jaka Abisalomu, na kundalukila, “Bho, maghambu kiki bhatumika bhaku bhachunjiki moto ngonda wangu?”

32Abisalomu akamuyangike, “Lingalyaje, nakakupelakili ubholu, uhika kongone nahuli nukutuma kwaka nkolongwa, ukundalukyaje: ‘Bho, maghambu kiki nakabhokiki ku Geshuli? Ikabhi mbanga kwangu nakabya nhighali konihoku.’ Henu unyangatyaje nahuli mbata kumbona nkolongwa. Ngati anami na lihakau la lijambu lokapi lela bhela, angomaje!”

33Bhela, Yoabu akapiti na kumpwaghi nkolongwa malobhi ghanihagha ghokapi, najombi nkolongwa akundohiki Abisalomu, najombi akajingili kunyumba jaka nkolongwa, akachikimi na kujinama ukutama mbaka pahi palongi jaka nkolongwa. Najombi nkolongwa akunjobhati Abisalomu.