2 Samweli 13

Aminoni na Tamali

1Abisalomu akabhi na ndombu waki joakabhi mnyahi namaa, lihina laki akalowakiki Tamali. Aminoni, mwana jongi wa chikambaku waka Daudi, akumpaliki namaa Tamali. 2Aminoni akang'ahakiki namaa kubhokana na Tamali mbaka akalwaliki, kwa ndandi Tamali akabhi kamwali bikila, na ikabhonakini kubha ngaiwezikani kwaka Aminoni kuhenga naku lijambu lokapi. 3Nambu Aminoni akabhi na nkochi lihina laki akalowakiki Yonadabu, mwana waka Shimea, ndongu waka Daudi. Yonadabu akabhi mundu wa kuchenjela namaa. 4Bhela Yonadabu akundaluki Aminoni, “Wehapa nde wa mwana waka nkolongwa, bho, maghambu kiki lichobha mbaka lichobha ubhonikana utenda kukombala? Na ngacheupala kumbwaghila?”

Aminoni akumpwaghile, “Numpala Tamali, ndombu waka ndongu wangu Abisalomu.”

5Yonadabu akumpwaghile, “Ujenda ukaghonila pachitanda, na ulitenda kubha utenda kulwala. Tati waku paanahikaje kukubhona umpwaghilaje, ‘Undeka ndombu wangu, Tamali ahika anetila chokapi chela nahuli ngulaje. Chondi unjetakalya ahika andelakya chilebhi palongi jangu koni nakabya numbona, nahuli aneha chilebhi.’ ” 6Bhela, Aminoni akaghoni pachitanda, na kulitenda kubha atenda kulwala. Nkolongwa paakahikiki kumbona, Aminoni akumpwaghile, “Undeka ndombu wangu, Tamali ahika anenganakya mabumunda machokopi koni nakabya nundingalila, nahuli anehaje.”

7Bhela, Daudi akapeliki ubholu kwaka Tamali ku nyumba ja kikolongwa hoku, akapwaghaje: “Ujenda mu nyumba jaka ndongu waku Aminoni, ukandenganakya chilebhi.” 8Tamali akapiti kunyumba jaka Aminoni joakabhi ndongu waki, na kunhimani Aminoni aghoni pachitanda. Tamali akatoliki uhembi ghoukajeghaliki amila akauhunyiki, na kulenganake mabumunda na kughajocha, koni Aminoni akundingalyaje. 9Tamali akabhohiki mabumunda mu chikalangilu nahuli ampekya Aminoni, nambu Aminoni akakaniki kula. Aminoni akabhapwaghili bhahemba bhaki, “Mumpiha kunja kila mundu joabhi pambane.” Bhela kila mundu akabhokike. 10Bhela, Aminoni akumpwaghi Tamali, “Unetila mabumunda ghanihagha mkati ja chumba changu nahuli uneha mabumunda ghanihagha.” Bhela Tamali akatoliki mabumunda ghaakalenganaki ghala, na kumpelake Aminoni joakabhi mbeli waki mkati ja chumba chaki. 11Nambu paakabhi ampelakela mabumunda ghanihagha, Aminoni akunkamwi kwa makili, na kumpwaghila, “Uhika ughonila na nepani, ndombu wangu.”

12Tamali akumpwaghile, “Ngabhela mbeli wangu! Ngawinyomalakela. Ndandi lijambu la ntundu ghonihoghu ngachelipalika kutendakeka mu Izilaeli! Ngawihenga lijambu leniheli la king'ang'a. 13Kwa upambala wangu, anakubya bhole? Bho, anambelaka kwaku ihoni yeniheye? Bhelabhela kwa upambala waku, anakubya bhole? Anaukubha ngati jumu wa bhang'ang'a bhahakau mu Izilaeli. Chondi ulongila na nkolongwa, maghambu ngaakuhibhalaki kundoghola.” 14Nambu Aminoni ngachepaliki kunjowanela, na kwa ndandi akabhi na makili kumpeta Tamali, akunjomalakili na kughone naku chihyegha.

15Bhela, Aminoni akunhakalili Tamali, kwa mahakalilu makolongwa namaa. Chakaka Aminoni akunhakalili kupeta moakabhi ampalike. Aminoni akumpwaghi Tamali, “Ujumuka, na upita kunja!”

16Tamali akumpwaghile, “Ngabhela! Kundopola anakubya kuhakahu nakanopi kupeta ghala ghaunhengile.”

Nambu Aminoni akakaniki kunjowanela. 17Akundohiki mtumika waki joantumakyaje, na kumpwaghila, “Umboha mbomba ajoju palongi jangu, na ujighala ndyangu kwa kabali!” 18Mtumika waka Aminoni jola akumpihiki kunja Tamali, na kujighi ndyangu kwa kabali. Tamali akabhi awati ingobhu jilachu jejilenganakiki wichu, kwa ndandi jikabhi nde ntundu wa ingobhu jejiwatakika na akakamwali bha kikolongwa bhabhakabhi mabikila. 19Bhela, Tamali akalipakiki ilihu kumutu jaki, na kujikachu ingobhu jaki jilachu jeakabhi awati jela. Akabhekiki mabhoku ghaki kumutu, na kubhoka koni akabya alela kwa sauti. 20Abisalomu paakumbweni Tamali, ndombu waki akundalukile, “Bho, Aminoni mbeli waku le, ahimangini na wehapa chihyegha? Henu utumbalaje, ndombu wangu, jombi nde ndongu waku. Ngawalibheka lijambu heli muntima jaku.” Najombi Tamali akatami kunyumba jaka Abisalomu, mbeli waki, koni akabya mbomba joumbina mtima.

21Bhela nkolongwa Daudi paakajowini mambu ghanihagha ghokapi, akayomiki namaa. 22Abisalomu ngacheakalongi lilobhi lokapi lela na Aminoni, likubhi linyahi au lihakahu, kwa kubha akunhakali namaa Aminoni, maghambu akabhi ampohiki lihamu Tamali, ndombu waki.

Abisalomu alepa kisasi

23Payakapetiki hyaka ibheli, chikahi bhaheketa mangoma gha mambeleli ghaka Abisalomu pabhakabhi ku Baali Hasoli hoku pambipi na malindakilu ghaka Efulaimu, Abisolomu akabhakokiki bhana bha chikambaku bhokapi bhaka nkolongwa nahuli bhajenda konihoku. 24Abisalomu akunjendi nkolongwa Daudi, na kumpwaghila, “Lingalyaje, nepani nuntumika waku mili na bhaheketa mangoma bha mambeleli bhabhahikike. Chondi nukulobha, unkolongwa papamu na bhatumika bhaku, tambokanyaje papamu na nepani, nuntumika waku.”

25Nkolongwa akamuyangike, “Ngabhela, mwanango, ngatwijenda tabhokapi, nahuli ngatwikubha chibwahila kwaku.” Hata ngati Abisalomu akajendali kumpembalake nakanopi, nkolongwa akakaniki kujenda, nambu nkolongwa akumpengali Abisalomu.

26Bhela, Abisalomu akapwaghike, “Ngati ngauhiki, chondi unjetakalya ndongu wangu Aminoni ajenda papamu na tepani.”

Nkolongwa akundalukili, “Bho, maghambu kiki ajenda papamu na wehapa?” 27Nambu Abisalomu akajendalili kundobha Daudi, na pakujomukela nkolongwa akunjetakili Aminoni papamu na bhana bhaki bhangi bhajenda ku uwangalalu ghanihoghu. 28Abisalomu akabhalaghalaki bhatumika bhaki: “Njowanyaje! Chikahi Aminoni paikubha akunywiki divai na kulobhela nakanopi nanatu ananumpwaghi mwehapa, ‘Mundapula Aminoni,’ bhela munkomaje. Ngamwijoghopa. Bho, nga nepani le nenundaghalaki mwehapa kuhenga bhenibhela? Mkubha na makili na mkangamalaje.” 29Bhela, bhatumika bhaka Abisalomu bhakunhengili Aminoni ngati Abisalomu moakabhi abhalaghalakile. Panihapa bhana bhokapi bhaka nkolongwa bhakabhokiki, na kutila kwa kutumi nyumbu yabhu.

30Chikahi pabhakabhi mwindela, ubholu wakunhiki Daudi, kupwagha: “Abisalomu akomakiki na bhana bhokapi bhaka nkolongwa, njeta hata jumu wabhu joahighalile.” 31Nkolongwa Daudi akajumwiki, na kukachu ingobhu jaki, na kughone pahi paluhombi. Nabhombi bhatumika bhaki bhokapi bhakajemiki punkeghi jaki na ingobhu yabhu yakabya ikachuliwi. 32Nambu Yonadabu, mwana waka Shimea, ndongu waka Daudi, akapwaghike, “Bambo wangu ngawiholale kubha bhana bhaku bhokapi bhatehi kukomakeka, nambu nde Aminoni kanjika jaki pela nde joapotile. Lendenu libhi liholalelu la mtima waka Abisalomu kutumbu lichobha lela Aminoni paakunhengi lijambu lihakau Tamali, ndombu waki. 33Bhela, wa bambo wangu nkolongwa, ngawing'ahakika na ubholu kubha bhakomakiki bhana bhaku bhokapi. Aminoni kanjika jaki pela nde joakomakike.”

34Chikahi chenihechi, Abisalomu akabhi atilike.

Bhela mlonda akalingalakili, najombi akabhaweni bhandu bhamaheli mwindela upambala wa kolijibhi lyobha bhakahelala kuhuma upambala wa kunyuma ja katombi. Mlonda akapiti kumpwaghi nkolongwa, “Mona bhandu bhakahumila upambala wa ku Holonaimu, upambala wa kunyuma ja katombi hoku.”

35Yonadabu akumpwaghi Daudi, “Lingalyaje, bhana bhaku unkolongwa bhabhi pambane, kubhi ngati nepani mtumika waku monakakupwaghile.” 36Paakajomwili kupwagha, bhana bhaka nkolongwa bhakajingi mkati ja nyumba, na kutumbu kulela kwa sauti. Bhelabhela najombi nkolongwa, papamu na bhatumika bhaki bhokapi, bhakaleliki kwa mabhinilu namaa.

37Nambu Abisalomu akatiliki na kujenda kwaka Talimai, mwana waka Amihudi, nkolongwa wa ku Geshuli. Nambu nkolongwa Daudi akundeli mwana waki Aminoni kwa machobha ghamaheli namaa. 38Bhela Abisalomu akatiliki, na kujenda ku Geshuli, na akatami konihoku kwa hyaka itatu. 39Nkolongwa Daudi akatokulili kunjendela Abisalomu, maghambu nkolongwa akabhi alihelihi mtima kubhokana na kupotela kwaka Aminoni.