2 Samweli 12

Nasani andakali Daudi

1Bhela Bambo Chapanga akuntumiki mlota Nasani kwaka Daudi. Paakahikiki kwaka Daudi, akumpwaghile, “Kukabhi na muchi ghumu ukabhi na bhandu bhabheli, jumu akabhi na hindu yamaheli na jongi akabhi kahochu. 2Mwanahindu yamaheli jola akabhi na mambeleli ghamaheli na ng'ombi yamaheli, 3nambu kahochu jola akabhi na kakenda ka limbeleli kachoku kambomba kaakabhi akahemile. Akalidimiki limbeleli heli, lakakolili kwaki papamu na bhana bhaki. Limbeleli heli lakabhi likula chilebhi chaka bambo waki na kunywelela chikombi chaki hata bhela limbeleli heli lighonila mu mabhoku ghaka bambo waki. Kwaki akabhi ngati mwali waki. 4Lichobha limu mwanahindu yamaheli jola akahikiwi na ngeni, nambu mwanahindu yamaheli jola ngacheakapaliki kutola limu la limbeleli wala ng'ombi yaki mweni nahuli kunchinji ngeni, nambu akatoliki limbeleli lichoku limbomba lela lelakabhi laka kahochu jola na kunchinji ngeni waki jola.”

5Bhela Daudi paakajowini mambu ghanihagha akamuyomi namaa mundu mwanahindu yamaheli jola, na akumpwaghi Nasani, “Chakaka nukulapila kwaka Bambo Chapanga, mundu hoju joatendiki mambu ghanihagha impalika kupotela! 6Impalika andepa kahochu hoju mwanalimbeleli, ipalika andepa mala pacheche nakanopi, kwa ndandi atendiki lijambu lihakau na ngacheakabhi na chiha.”

7Bhela Nasani akumpwaghi Daudi, “Wehapa nde wa mundu jonihoju!” “Henu Bambo Chapanga, Chapanga wa Izilaeli apwagha anana: ‘Nakakupakiki mahuta ukubha unkolongwa wa Izilaeli, na kukukengalela kuhuma mu chiwoku chaka Sauli. 8Nukupekihi nyumba jaka bambo waku na akabhahanu bhaka bambo waku, bhakubha bhaku wehapa. Nakakupekihi ukolongwa panani ja Izilaeli na Yuda. Ngati ghanihagha ghokapi ghakabhi machoku nakanopi, nakabya nukupekihi hata nakanopi. 9Bho, maghambu kiki ulijojwihi lilobhi laka Bambo Chapanga kwa kuhenga lijambu lelibhi lihakau palongi jaki? Ukunkomiki Ulia, Mhiti, kwa lipanga na kuntola nhwanu waki kubha nhwanu waku. Ubhatumili Bhaamoli bhunkoma Ulia kungondo. 10Bhela lipanga ngalibhoki munyumba jaku ng'o kwa ndandi ukanyojwihi nepani, na kuntola nhwanu waka Ulia, Mhiti, kubha nhwanu waku.’ 11Ujowanyaje, Bambo Chapanga apwagha, ‘Lingalyaje, ananeta mahakau kwa bhalongu bhaku wamweti. Ananabhatola akabhahanu bhaku koni wamwete ukabya ubhona, na kumpeke njaku, najombi anaaghonila nabhu kihyegha palanga. 12Wehapa ukatendiki lijambu heli kwa kulihiya, nambu nepani anandenda lijambu leniheli palongi ja bhandu bhokapi bha Izilaeli, koni lyobha libhala.’ ”

13Bhela Daudi akamyangiki Nasani, “Nuntendi Bambo Chapanga mahoku.”

Nasani akamyangike, “Bambo Chapanga akubhokili mahoku ghaku, nanau ngawipoteli. 14Nambu kwa kubha kwa kutenda lijambu lendenu ubhapekihi maadui bhaka Chapanga mbekenyu ngolongwa ja kuntondola, mwana joanabhelakika kwaku chakaka anapotilaje.”

15Bhela Nasani akakelawiki kunyumba jaki.

Kupotela kwaka mwana waka Daudi

Bambo Chapanga akundapwi kwa chitamu mwana jola ambaju Batisheba nhwanu waka Ulia akumbelaki Daudi. 16Daudi akundobhiki Chapanga kwa ndandi jaka mwana apata kulama. Akakongiki kula chilebhi na akajingi mkati ja nyumba jaki akabya machobha ghokapi aghoni pasakafu ikilu jokapi. 17Ihingozi bha munyumba jaki bhakunjendili na kujema pambipi naku nahuli kunjumuha kuhuma pasakafu pala, nambu jombi akakaniki, wala ngacheakakuliki chilebhi chokapi chela papamu nabhu. 18Lichobha la saba mwana hoju akapotile. Bhatumika bhaka Daudi bhakajowipi kumpwaghi kubha mwana apotile, kwa ndandi bhakaholalili, “Chikahi mwana paakabhi akona mwomi, tukalongili naye, nambu ngacheakatujowanile. Henu, anatuweza bholi kumpwaghi kubha mwana apotile? Aweza kuhenga chindu cha kulipoteka!”

19Daudi paakaweni bhatumika bhaki bhajojalanela bheni kwa bheni, najombi akamanyiki kubha mwana ajomwi kupotela. Akabhalalukile, “Bho, mwana apotile?”

Nabhombi bhakamyangike, “Ena, mwana apotile.”

20Bhela Daudi akajumwiki kuhuma pasakafu pala. Akajoghiki machi na kulipaka mahuta, na kuhwata ingobhu nahengi, bhela akapiti mkati ja nyumba jaka Chapanga, na kujojabhela. Paakajomwi kutenda bhenibhela akabhujiki kunyumba jaki, na paakapaliki chilebhi bhakumpekihi, najombi akakulike.

21Bhela bhatumika bhaki bhakundalukile, “Bho, maghambu kiki utenda bhenibhela? Mwana paakabhi akali mwomi, wehapa ukakongiki kula chilebhi na kulela. Nambu sajenu mwana apotili, ujumwiki na kula chilebhi!”

22Daudi akabhayangike, “Chakaka mwana paakabhi akali mwomi, nakakongiki kula chilebhi na kulela. Nakatendiki bhenibhela kwa ndandi nakaholalile, ‘Bho, nde nani joamanya? Pangi Bambo Chapanga aweza kumone chiha nahuli kundeka mwana akubha mwomi.’ 23Nambu sajenu kwa kubha apotile, maghambu kiki ngonga kula chilebhi? Bho, nepani le nhweza kunkelebhu kabheti akubha mwome? Lichobha limu nepani ananyenda konihoku koapiti jombi, nambu jombi ngacheaweza kukelebhuka kwangu nepani.”

Kubhelakeka kwaka Solomoni

24Bhela Daudi akunjeghi mtima Batisheba nhwanu waki, najombi akaghoni naku kihyegha. Batisheba akapatiki chitumbu na kulibopo mwana wa chikambaku, ambaju Daudi akundohiki Solomoni. Bambo Chapanga akumpaliki Solomoni, 25na kwa kubha Bambo Chapanga akumpaliki Solomoni, Chapanga akatumiki ubholu kwaka Daudi kupetela kwaka mlota Nasani, kubha mwana alohakika Yedidia kwa ndandi jaka Bambo Chapanga.

Daudi autola kwa makili muchi wa Laba

1 Mambu gha Chikahi 20:1-3

26Chikahi chenihechi, Yoabu akaulapwi muchi wa Laba, muchi ukolongwa wa Bhaamoni, na kuutola kwa makili muchi wa kikolongwa. 27Bhela Yoabu akatumiki bhabholu kwaka Daudi, kupwagha, “Nuulapwi muchi wa Laba, nanatu ndoliki chitumbulilu chabhu cha machi gha muchi. 28Henu ubhongana bhandu bhabhahighalili na ukauyongoluta muchi kwa manjolinjoli na kuutola kwa makili. Nanga bhela, ananutolaje nepani kwa makili, nawombi anaulohakika kwa lihina langu.” 29Bhela Daudi akabhongini manjolinjoli bhokapi na kujenda ku muchi wa Laba, akabhalapwi bhandu bha muchi ghonihoghu, na kuutola muchi hoghu kwa makili. 30Bhela akatoliki kofia kuhuma pamutu jaka nkolongwa wabhu, jejakabhi na kutopa kwa kilu selasini na nhwanu, najombi jakabhi jibhekakiki hindu ya mbiya yamaheli, najombi jakabhekakiki panani ja mmutu waka Daudi. Bhelabhela akatoliki hindu yamaheli namaa kuhuma mu muchi ghonihoghu. 31Akabhatoliki bhandu bhabhakabhi bhatama muchi ghonihoghu, na kubhabheka bhahenga lihengu la kutumila misumenu, sululu ya choma na mabhaghu gha choma, najombi akabhabhekiki mu lihengu la kufyatula matofali. Akatendiki bhenibhela kwa michi jokapi ja Bhaamoni. Pakujomulela Daudi na manjolinjoli ghaki bhokapi bhakakelawiki ku muchi wa Yelusalemu.