2 Samweli 11

Daudi na Batisheba

1Bhela mu utumbulilu wa chaka chahenu, chikahi bhakolongwa pabhajenda kungondo, Daudi akuntumiki Yoabu, na bhatumika bhaki, papamu na Bhaizilaeli bhokapi, nahuli kujenda kubhayonanga Bhaamoni, na kuuyongalota muchi wa Lama kwa manjolinjoli. Nambu Daudi mweni akahighali mu Yelusalemu.

2Lichobha limu, chikahi cha pakamihi, Daudi akajumwiki pachitanda chaki, na kujenda jenda panani ja nhwaghala wa nyumba jaki ja kikolongwa. Paakabhi ajenda jenda kunhwaghala kola, akumbweni mbomba jumu akajogha machi cha kutali. Mbomba jonihoju akabhimnyahi namaa kwa sula. 3Bhela Daudi akuntumiki mundu kujenda kulalukila malobhi kubhokana na mbomba jola. Mundu hoju akumpwaghi Daudi, “Mbomba jonihoju nde Batisheba mwali waka Eliabu, nhwanu waka Ulia, Mhiti.” 4Bhela, Daudi akatumiki bhabholu bhakundeta Batisheba kwaki. Bhela Batisheba akahikiki kwaka Daudi, najombi Daudi akaghoni naku kihyegha. Chikahi chenihechi mbomba jonihoju akabhi nde ahuma mu kuligholola kubhokana na kujomola mambu ghaki gha kumwehi. Bhela akabhujiki kunyumba jaki. 5Mbomba jonihoju akapatiki chitumbu, najombi akumpelaki Daudi ubholu kupwagha, “Nepani mi na chitumbu.”

6Bhela, Daudi akapeliki ubholi kwaka Yoabu, akapwaghaje, “Umpwaghila Ulia, Mhiti, ahika kwangu nepani.” Najombi Yoabu akuntumiki Ulia kwaka Daudi. 7Ulia paakahikiki kwaka Daudi, Daudi akundaluki malobhi kubhokana na Yoabu, ntundu manjolinjoli mobhajendalela, na malobhi gha ngondo mojijendalela. 8Bhela Daudi akumpwaghi Ulia, “Ubhuja kunyumba jaku na ukapomulya kwa chikahi.” Bhela Ulia akabhokiki kuhuma panyumba ja kikolongwa, najombi nkolongwa Daudi akumpelaki Ulia nhupu. 9Nambu Ulia ngacheakabhujiki kunyumba jaki, nambu akaghoni papamu na bhalonda bhokapi bhaka bambo waki pundyangu ukolongwa wa nyumba ja kikolongwa. 10Chikahi Daudi paakapwaghakiki kubha Ulia ngacheakapiti kunyumba jaki, Daudi akundaluki Ulia, “Wehapa uhuma kumwanja, bho, maghambu kiki ngachewabhujiki kunyumba jako?”

11Ulia akamuyangiki Daudi, “Lisanduku la Lulaghilu, papamu na manjolinjoli bhokapi bha Izilaeli na manjolinjoli bha Yuda bhatama mu mahema kungondo. Najombi Yoabu bambo wangu na bhatumika bhaki bhokapi bhabhekiki likambi ku uwanda, bho, wichu le kwangu nepani kujenda kughone kunyumba jangu, kula na kunywa, na kughone kihyegha na nhwanu wango? Chakaka nukulapi wehapa unkolongwa, nepani ngenhwezi kuhenga chindu ngati chenihechi!”

12Bhela, Daudi akumpwaghi Ulia, “Haya, utama pambani kwa lichobha limu nakanopi, na chilabhu ananukuleka ubhujaje.” Bhela Ulia akahighali mu muchi wa Yelusalemu kwa lichobha lenilela, na lichobha la kabheli laki. 13Daudi akunkokiki Ulia kula na kunywa kunyumba jaki ja kikolongwa, na kuntenda Ulia kulobhela. Hata bhela, ikilu jenijela, Ulia ngacheakabhujiki kujenda kughone kunyumba jaki, nambu akaghoni pa uleli pachilanda ja bhatumika bhaka bambo waki.

14Bhela, pakwahiki lukela, Daudi akundembi Yoabu baluwa, na kumpeke Ulia nahuli ajipelaka kwaka Yoabu. 15Mkati ja baluwa heji akalembiki ana: “Umbeka Ulia mu msitali wa palongi, pandu ambapu ngondo nde ngolongwa nakanopi, na bhela undeka konihoku na kukelabhuka kunyuma nahuli alapulikaji na kupotela.” 16Bhela, Yoabu paakabhi auyongalota muchi akumbekiki Ulia pandu ambapu akamanyi kubha manjolinjoli bha maadui bhabhi na makili namaa. 17Chikahi bhandu bha muchi ghonihoghu pabhakapitiki kujenda kukomana ngondo na Yoabu, bhandu bhakumu pachilanda ja manjolinjoli bhaka Daudi bhakakomakike, najombi Ulia, Mhiti, akapotile.

18Bhela, Yoabu akumpelaki Daudi malobhi ghokapi kubhokana na ngondo. 19Yoabu akuntumiki mbolu, akapwaghaje, “Anaujomwi kumpwaghi nkolongwa mambu ghokapi kubhokana na ngondo, 20nkolongwa aweza kubha na inyela, na kukulalukila, ‘Bho, maghambu kiki mkapiti pambipi na muchi pamukabhi nkomana ngondo? Bho, ngachemwamanyi kubha bhaweza kunhoma mipendi kwa kupetela mu lumatu ya muchi wabho? 21Bho, ngachenkomboka kubha nde nane joakunkomiki Abimeleki, mwana waka Yelubesheti? Bho, si mbomba jumu mu muchi wa Tebesi ambaju akahomiki liganga la kuyaghila kwa kupete mulumatu, nalombi lakunkomiki Abimeleki? Henu, maghambu kiki mkapiti pambipi na lumatu lwa muchi?’ Bhela, wehapa wamuyanga ana, ‘Bhelabhela hata mtumika waku Ulia, Mhiti, apotile.’ ”

22Bhela mbolu jola akabhokiki na kujenda kwaka Daudi, na paakahikiki akumpwaghi Daudi kila chindu ngati moakapwaghakiki na Yoabu apwaghaje. 23Mbolu jola akumpwaghi Daudi, “Maadui bhitu bhakatupetiki makili, nabhombi bhakapitiki kunja ja muchi na kutulapula ku uwanda. Hata bhela, tepani tukabhakelawihi mbaka pambipi na ndyangu wa ukolongwa wa muchi. 24Panihapa bhahoma mipendi bhakahomiki mipendi jabhu kwitu tepani bhatumika bhaku kwa kupete mulumatu lwa muchi wabhu. Bhatumika bhaku bhakumu bhakakomakike. Nakanopi ja ghanihagha, hata mtumika waku Ulia, Mhiti, najombi apotile.” 25Daudi akumpwaghi mbolu jola, “Ukumpwaghila Yoabu, ‘Lijambu aleli ngalakung'aha ndandi lipanga ngachelibhi na mihu, na ngondo jikoma mundu jokapi jola. Nambu ujonjukya kuulapu muchi na uyonanga muchi ghonihoghu.’ Ukumpwaghila Yoabu bhenibhela nahuli kunjeghe mtima.”

26Bhela Batisheba, nhwanu waka Ulia paakajowini kubha ndomi waki Ulia apotile, akundeli ndomi waki. 27Chikahi cha maombulezu pachakapetiki, Daudi akalaghalaki Batisheba atolakikaje na kupelekwa kunyumba jaki. Batisheba akabhi nhwanu waka Daudi, najombi akumbelaki Daudi mwana wa chikambaku. Nambu Bambo Chapanga akahakali namaa kubhokana na lijambu leniheli leakahengiki Daudi.