2 Samweli 10

Daudi abhaweza Bhaamoni na Bhasilia

1 Mambu gha Chikahi 19:1-19

1Paghakapetiki ghanihagha, nkolongwa Nahashi wa Bhaamoni akapotile, najombi mwana waki joakalowakiki Hanuni, akabhi nkolongwa pandu paki. 2Nkolongwa Daudi akaholalile, “Ananuntendila ghamboni Hanuni, mwana waka Nahashi, ngati tati waki moakandendili nepani wamboni.” Bhela, Daudi akabhatumiki bhabholu nahuli kupeleka ulamukilu kwaka Hanuni kwa ndandi ja nyiwa jaka tati waki.

Bhabholu bhaka Daudi pabhakahikiki ku inchi ja Bhaamoni, 3ihongozi bha Bhaamoni bhakumpwaghi Hanuni, bambo wabhu, “Bho, uholake Daudi antopi tati waku kwa kubhatuma bhandu kwaku nahuli kulangiha kubha umbiniki mtima? Bho, Daudi le ngacheabhatumiki bhandu abhabha kwaku nahuli kuuchunguza na kuupelaleza muchi nahuli bhauyonangaje?”

4Bhela, Hanuni akabhakamwi bhandu bhaka Daudi, na kubhamogha kila mundu nusu ja indehu yaki, akaikachwili ingobhu yabhu pachilanda ja matamilu, na kubhaleka bhajendaje. 5Chikahi Daudi paakapwaghakiki lijambu leniheli, akabhatumiki bhabholu nahuli kujenda kubhajopalela, maghambu bhakabhi bhahekatiwi utopelu wabhu namaa. Najombi nkolongwa akapwaghike, “Ntamaje ku muchi wa Yeliko, mbaka paimela indehu hinu, panihapa nde mwihikaje.”

6Bhela Bhaamoni pabhakamanyiki kubha bhuntendiki Daudi kuhakalila, bhakaajili manjolinjoli bha ku Silia bhabhajenda kwa magholu elufu ishilini, kuhuma ku Beti Lehobu na ku Soba. Bhelabhela akuntoliki nkolongwa wa ku muchi wa Maaka, papamu na manjolinjoli elufu jimu, na manjolinjoli elufu komi na ibheli kuhuma ku muchi wa Tobu. 7Daudi paakajowini lijambu leniheli, akuntumiki Yoabu papamu na manjolinjoli bhokapi bhana makili. 8Bhaamoni bhakapitiki kunja na kulipanga kwa ngondo pundyangu wabhu ukolongwa wa muchi wa Laba, nabhombi Bhasilia kuhuma ku Soba, na Lehobu na bhandu kuhuma ku muchi wa Tobu na Maaka, bhakabhi kanjika jabhu pa uwanda.

9Bhela Yoabu paakaweni kubha kulongi jaki na kunyuma jaki kubhi na manjolinjoli gha maadui, akabhahawi manjolinjoli bhakumu bhabhabhi na makili bha Izilaeli, na kubhapanga nahuli bhakomana na Bhasilia. 10Bhandu bhala bhabhakahighalili akabhabhekiki pahi ja ulonguheku waka ndongu waki Abishai, na jombi akabhapangiki nahuli bhakomana na Bhaamoni. 11Yoabu akapwaghike, “Ngati Bhasilia anabhambetiki makili, wihika kunyangatila. Nambu ngati Bhaamoni anabhukupetiki makili, nepani ananhika kukujangatila. 12Ukangamalaje, na tukomana kwa kukangamala, kwa ndandi ja bhandu bhitu, na kwa ndandi jaka Chapanga witu. Najombi Bambo Chapanga anaahenga lelibhi lamboni palongi jaki.”

13Bhela, Yoabu papamu na bhandu bhabhakabhi papamu naku bhakaheghali kulongi nahuli kukomana ngondo na Bhasilia, nabhombi Bhasilia bhakatilike. 14Chikahi Bhaamoni pabhakaweni kubha Bhasilia bhatenda kutila, nabhombi bhakatiliki palongi jaka Abishai, na kujingi mkati ja muchi. Bhela, Yoabu akakotwiki kukomana na Bhaamoni, na kukelabhuka ku Yelusalemu.

15Nambu Bhasilia pabhakaweni kubha bhalepalili palongi ja Bhaizilaeli, bhakalibhongini kabhete. 16Hadadezeli akalaghalaki Bhasilia bhabhakabhi bhatama kwihi ja nkoka Eufulati bhaletakikaje, na kupelekwa ku muchi wa Helamu, koni bhakalonguhika na Shobaki, linjolinjoli nkolongwa waka Hadadezeli. 17Daudi paakapwaghakiki mambu ghanihagha, akabhabhongini Bhaizilaeli bhokapi, na kulomboka nkoka Yoludani, na kujenda mbaka ku muchi wa Helamu. Nabhombi Bhasilia bhakalipangiki tayali kwa ndandi ja kukomana ngondo na Daudi, na bhakatumbwi kukomana naku. 18Nambu Bhasilia bhakatiliki palongi ja Bhaizilaeli, najombi Daudi akabhakomiki Bhasilia mia saba bhabhakabhi bhajendesha magali gha kuhutakika, na manjolinjoli elufu alobaini bhabhakabhi bhajendesha falasi. Bhelabhela akundapwi Shobaki joakabhi linjolinjoli wabhu nkolongwa, na kupotela pala pala. 19Bhela bhakolongwa bhokapi bhabhakabhi bhuntumaki Hadadezeli pabhakaweni kubha bhalepalili palongi ja Bhaizilaeli, bhakatendiki majonganu gha lukwali na bhandu bha Izilaeli, na kubha bhatumika bha Bhaizilaeli. Bhela Bhasilia bhakajowipi kubhajangati Bhaamoni kabhete.