2 Samweli 9

Daudi na Mefibosheti

1Lichobha limu, Daudi akalalukile, “Bho, kubhi le na mundu jokapi jola joahighalile pachilanda ja bhandu bha munyumba jaka Sauli, nahuli nuntendila ghamboni kwa ndandi jaka Yonasani?”

2Bhela kukabhi na mtumika pachilanda ja bhandu bha munyumba jaka Sauli, joakalowakiki Siba. Bhela Siba akalowakiki kujenda kwaka Daudi. Najombi nkolongwa Daudi akumpwaghile, “Bho, wehapa le wa Siba?”

Najombi akayangike, “Ena, nepani nde nuntumika waku.”

3Nkolongwa akalalukile, “Bho, kubhi le na mundu joahighalili pachilanda ja bhandu bha munyumba jaka Sauli, nahuli nunhengila wamboni waka Chapanga?”

Siba akayangike, “Akali abhi mwana waka Yonasani, nambu jombi nde chilema wa magholu ghokapi.”

4Nkolongwa akalalukile, “Bho, abhi kwako?”

Siba akayangike, “Abhi kunyumba jaka Makili, mwana waka Amieli, ku muchi wa Lo Debali hoku.”

5Bhela, nkolongwa Daudi akabhatumiki bhandu, najombi akaletakiki kuhuma kunyumba jaka Makili, mwana waka Amieli, ku Lo Debali hoku.

6Bhela, Mefibosheti mwana waka Yonasani, nchokolu waka Sauli akapiti kwaka nkolongwa Daudi, na chikahi paakahikiki kwaka nkolongwa Daudi, akajinimi ukutama nahuli kuntopela. Daudi akundohiki, “Mefibosheti.” Najombi akayangike, “Naam! Nepani pambane nuntumika waku.”

7Daudi akumpwaghile, “Ngawijoghopa. Nepani ananukutendila ghamboni kwa ndandi jaka tati waku Yonasani. Pandu pokapi papakabhi paka hoko waku Sauli, ananukukelabhukyaje. Nanau machobha ghokapi anaukula chilebhi pameza jangu.”

8Mefibosheti akachikimi, na kupwagha, “Nepani nde ngati nakawa jejiwile, bho, maghambu kiki unhengila wamboni ghonihogho?”

9Bhela, nkolongwa Daudi akundohiki Siba mtumika waka Sauli, na kumpwaghila, “Numpekihi Mefibosheti, nchokolu waka bambo waku, mali ghokapi ghaghakabhi ghaka Sauli na bhandu bha munyumba jaki. 10Wehapa, bhana bhaku na bhatumika bhaku mwandemila Mefibosheti na kundete mahunu nahuli nchokolu waka bambo waku akubha na chilebhi chikahi chokapi. Nambu Mefibosheti nchokolu waka bambo waku anaakula chilebhi pameza jangu.” Chikahi chenihechi Siba akabhi na bhana komi na nhwanu bha chikambaku, na bhatumika ishilini.

11Bhela, Siba akumpwaghi nkolongwa, “Nepani nuntumika waku, ananhenga ghokapi aghagha, ngati wa bambo wangu nkolongwa mounaghalaki kuhenga.” Bhela Mefibosheti akabhi akula chilebhi chaki pameza jaka Daudi, ngati jumu wa bhana bha kikolongwa. 12Mefibosheti akabhi na mwana nchoku wa chikambaku joakalowakiki Mika. Bhandu bhokapi bha munyumba jaka Siba bhakabhi bhatumika bhaka Mefibosheti. 13Bhela, Mefibosheti joakabhi na chilema cha magholu ghaki ghokapi ghabheli, akatami ku muchi wa Yelusalemu, na kupata chilebhi chaki kuhuma pameza jaka nkolongwa chikahi chokapi.