2 Samweli 8

Kuweza kwa manjolinjoli ghaka Daudi

1 Mambu gha Chikahi 18:1-17

1Paghakapetiki ghanihagha, Daudi akabhalapwi na kubhaweza Bhafilisti. Najombi akautoliki kwa makili muchi wa Metegi Ama kuhuma mu utawala wa Bhafilisti.

2Bhela Daudi akabhalapwi Bhamoabu. Akabhapangiki bhandu bhaakabhatoliki kwa makili habha mu misitali, na kubhaghoneka pahi. Akalaghalaki bhala bhabhakabhi mu misitali jibheli bhakomakikaje, na bhala bha msitali wa katatu ngabhikomakeka. Bhela, Bhamoabu bhakabhi bhatumika bhaka Daudi, na bhakabhi bhundepa kode.

3Bhelabhela Daudi akunhweziki Hadadezeli, mwana waka Lehobu, nkolongwa wa ku muchi wa Soba. Daudi akamuweziki chikahi Hadadezeli paakabhi mwindela kujenda kukelabhuha pandu pa nkoka Eufulati, nahuli kubha kabhete pandu pa utawala waki. 4Daudi akabhatoliki kwa makili bhajendesha falasi elufu jimu na mia saba, na manjolinjoli bhabhajenda kwa magholu elufu ishilini. Bhela Daudi akahekiti mihipa ja kunyuma ja falasi yokapi yeikabhi ihuta magali, nambu akailekiki pela falasi mia jimu panga kuiheketa mihipa ja kunyuma.

5Nabhombi Bhasilia bha kuhuma ku muchi wa Damasko pabhakapiti kunjangati nkolongwa Hadadezeli, nkolongwa wa ku Soba, Daudi akabhalapwili na kubhakoma manjolinjoli elufu ishilini na ibheli. 6Bhela Daudi akabhekiki likambi la manjolinjoli ku muchi wa Bhasilia bha ku muchi wa Damasko. Bhela Bhasilia bhakabhi bhatumika bhaki na bhakabhi bhundepa kode. Bambo Chapanga akunjangati Daudi kuweza kila koakapiti kukomana ngondo. 7Daudi akaitoliki ngau ya zahabu yeyakabhi ya manjolinjoli bhaka Hadadezeli, na kuileta ku muchi wa Yelusalemu. 8Bhelabhela nkolongwa Daudi akatoliki madini ghamaheli namaa gha shaba kuhuma ku michi ja Beta na Belotai, jejakabhi michi jaka Hadadezeli.

9Chikahi nkolongwa Tou, wa ku muchi wa Hamati, paakajowini kubha Daudi abhalapwi manjolinjoli bhokapi bhaka Hadadezeli, 10akuntumiki Yolamu, mwana waki, kwaka nkolongwa Daudi nahuli kundamukila na kumpongeza kwa ndandi ja kundapula na kumuweza Hadadezeli kungondo. Maghambu Hadadezeli akabhi akomana ngondo pamaheli na Tou. Yolamu akundetili Daudi nhupu ya yombu ya madini gha feza, yombu ya zahabu na yombu ya shaba. 11Nkolongwa Daudi akaibhekiki yombu yeniheyi yokapi palongi jaka Bambo Chapanga, ngati moakahengi kwa madini gha feza, na zahabu yeakabhi aitoliki kwa makili kuhuma kwa inchi yokapi yeakaiweziki kungondo. 12Yani kuhuma kwa bhandu bha ku Edomu, bhandu bha ku Moabu, bhandu bha ku Amoni, Bhafilisti, na Bhaamaleki, papamu na hindu yokapi yeakaitoliki kwa makili kuhuma kwaka Hadadezeli, mwana waka Lehobu, nkolongwa wa ku muchi wa Soba.

13Bhela lihina laka Daudi lakajonjukiki kumanyikana, chikahi paakabhi akelabhuka kuhuma kubhakoma Bhaedomu elufu komi na nane, ku libondi la Mwinyu. 14Daudi akabhekiki kambi ya manjolinjoli mu pandu pokapi pa Edomu. Nabhombi Bhaedomu bhokapi bha konihoku bhakabhi bhatumika bhaki. Bambo Chapanga akunjangati Daudi kuweza kila koakapiti kukomana ngondo.

15Bhela, Daudi akatawili panani ja inchi jokapi ja Izilaeli, najombi akabhahengi bhandu bhaki bhokapi utemulu ghoupalika. 16Yoabu mwana waka Seluya, akabhi nkolongwa wa manjolinjoli, na Yehoshafati mwana wa Ahiludi, akabhi mlemba wa kombukombu. 17Sadoki mwana waka Ahitubu, na Ahimeleki mwana waka Abiasali, bhakabhi bhapenganyambiku, Selaya akabhi mlemba. 18Benaya mwana waka Yehoyada, akabhi chiongozi wa Bhakeleti na Bhapeleti, nabhombi bhana bha chikambaku bhaka Daudi bhakabhi bhapenganyambiku.