2 Samweli 7

Ulota waka Nasani kwa ndandi jaka Daudi

1 Mambu gha Chikahi 17:1-15

1Bhela chikahi nkolongwa Daudi paakabhi atama mu nyumba jaki ja kikolongwa, Bambo Chapanga akunjangati kubha na lukwali kubhokana na maadui bhaki ipambala yokapi. 2Nkolongwa Daudi akumpwaghi Nasani, “Lingalyaje, nepani ndama mu nyumba ja kikolongwa ja mikongu ja mielezi, nambu Lisanduku laka Chapanga litama mu lihema!”

3Bhela Nasani akumpwaghi nkolongwa, “Lijambu lokapi lela leubhi nalu muntima waku, ujenda ukahengaje, maghambu Bambo Chapanga abhi papamu na wehapa.” 4Nambu ikilu ghola ghola Bambo Chapanga akumpwaghi Nasani, 5“Ujenda ukumpwaghila mtumika wangu Daudi, ‘Bambo Chapanga apwagha anana, bho, wehapa le anaunjengila nepani nyumba nahuli ndama mkati jake? 6Kwa ndandi kutumbu lichobha lenakabhabhohiki bhandu bha Izilaeli kuhuma ku inchi ja Misili nepani ngachendami mu nyumba mbaka lalenu. Nambu mili nakajenda kuhuma pandu pamu mbaka pandu pangi koni nakabya ndama mkati ja lihema. 7Pandu pokapi pala panakapiti na bhandu bha Izilaeli bhokapi, bho, nabhali le kundaluki chiongozi wabhu jokapi jola, jonundaghalaki kubhadima bhandu bhangu Izilaeli, maghambu kiki ngacheunjengi nyumba ja mielezi?’ ”

8“Henu, umpwaghila mtumika wangu Daudi, nepani Bambo Chapanga wa manjolinjoli mbwagha anana, ‘Nakakubhohiki wehapa kuhuma mu kudima mambeleli, nahuli ukubha chiongozi wa bhandu bhangu Izilaeli. 9Kutumbu chikahi chenihechi mili papamu na wehapa pokapi paujenda, na nabhayoningi maadui bhaku bhokapi palongi jaku. Bhela ananilitenda lihina laku kubha likolongwa ngati mahina gha bhandu bhangi bhabhabhi bhakolongwa pundema. 10Nanatu ananabhahaghulya bhandu bhangu bha Izilaeli pandu pa kutama, ananabhajokakyaji, nahuli bhatama pandu pabhu bheni, ngabhing'ahakika kabhete. Bhandu bhahakau ngabhabhoneli kabhete, ngati mokwabheli pakutumbula hapa. 11Kutumbu chikahi panakabhahawili bhatemula panani ja bhandu bhangu bha Izilaeli, bhelabhela ananumpekya chiheku palongi ja maadui bhaku bhokapi. Bhelabhela Bambo Chapanga mweni akupwaghi anaakuchengila wehapa nyumba. 12Machobha ghaku paghikubha ghajomwiki, bhandu anabhakutagha wehapa mu matengeli gha akatati bhaku, nanatu ananuntenda jumu wa bhabhelakeka bhaku wamwete kubha nkolongwa pandu paku wehapa, nanatu ananujemakya ukolongwa. 13Jonihoju nde joananjengila nyumba kwa ndandi jangu, nanatu ananyemakya chitehu cha ukolongwa waki mileli. 14Nepani anangubha tati waki, najombi anaakubha mwana wangu. Anaahengiki mahakau, ananundapula ngati mundu moandapuli mwana waki wa chiboku. 15Nambu nganambokeli upalu wangu kwaki, ngati monakubhohili kwaka Sauli, jonakumbohiki abhoka palongi jaku. 16Nyumba jaku na ukolongwa waku anautamakya mileli palongi jangu. Nachombi chitehu chaku cha ukolongwa ananichitenda chijemakya mileli.’ ”

17Bhela Nasani akumpwaghi Daudi malobhi ghanihagha ghokapi, na mabhonu ghanihagha ghokapi.

Malobhu gha kuchengula ghaka Daudi

1 Mambu gha Chikahi 17:16-27

18Bhela nkolongwa Daudi akajingi mkati ja lihema na kutama palongi jaka Bambo Chapanga, na kupwagha, “Wenga wa Bambo Chapanga, bho, nepani nde nani na bhandu bha munyumba jangu nde kyani, hata unetiki pambani pamile? 19Lijambu alale lakabhi lichoku palongi jaku wehapa wa Bambo Chapanga, nakanopi ja ghanihagha ubhalaghili bhandu bha munyumba jangu mambu makolongwa kwa machobha ghaghahika. Bho, ajeji le nde indela jaku ja kawaida ja kunjangati mundu, wenga wa Bambo Chapanga? 20Bho, nepani nukupwaghila chindu bholi nakanope? Maghambu ummanyi mtumika waku, wenga wa Bambo Chapanga. 21Kwa ndandi ja lilobhi laku, na mapalu ghaku wamwete, utendiki mambu aghagha makolongwa, na kundenda nepani mtumika waku naghamanyaje. 22Chakaka, wehapa nde unkolongwa, wenga wa Bambo Chapanga, wa Chapanga! Njeta jongi joabhi nkolongwa ngati wehapa, wala njeta Chapanga jongi nambu wehapa, ngati bhela motujowanili kwa makutu ghitu tabhete. 23Kabhete nde bhandu bholi pani pundema bhabhaweza kulenganeswa na bhandu bhaku bha Izilaeli, ambabhu Chapanga wabhu akapiti kubhakombola nahuli bhakubha bhandu bhaki mwene? Wenga wa Chapanga ulitendili lihina wamwete, na kulitendela mambu makolongwa na gha kukangacha kwa ndandi ja inchi jaku palongi ja bhandu bhaku ambabhu kwa ndandi jaku wamwete akabhakombwili kuhuma ku inchi ja Misili, kwa kubhatopola bhandu bha inchi nayengi na ichapanga yabhu. 24Ubhajemakakili bhandu bhaku bha Izilaeli kwa ndandi jaku wamwete, nahuli bhakubha bhandu bhaku mileli, nanau wenga wa Bambo Chapanga, ubhi wa Chapanga wabhu.

25“Bhela, wa Bambo Chapanga, ukatimiza lilobhi lela leukapwaghiki panani jaka mtumika waku, na panani ja bhandu bha munyumba jangu, ulitenda lijemakya mileli, kwa kutenda ngati moaukalaghile. 26Nalombi lihina laku analilumbalika mileli, nabhombi bhandu anabhapwaghaje, ‘Bambo Chapanga wa manjolinjoli nde Chapanga joatawala panani ja Izilaeli.’ Na bhandu bha munyumba jangu nepani mtumikwa waku, anabhajemakya mileli palongi jaku. 27Kwa kubha, wenga wa Bambo Chapanga wa manjolinjoli, Chapanga wa Izilaeli, uniyekulili nepani mtumika waku, ukapwaghaje, ‘Ananukuchengila nyumba,’ nde ndandi mweni kubha nde wichu muntima wangu kukulobha lulobhu lendenu.

28“Henu, wenga wa Bambo Chapanga, wa Chapanga, wehapa nde wa Chapanga. Malobhi ghaku nde chakaka, nanau unaghili nuntumika waku lijambu aleli lamboni. 29Bhela, sajenu nukulobha ubhapengalya bhandu bha munyumba jangu nepani mtumika waku, nahuli bhatamakya mileli palongi jaku, kwa kubha wehapa wa Bambo Chapanga, wa Chapanga, upwaghiki bhenibhela, na kwa mbengalelu yaku bhandu bha munyumba jangu anabhapengaliwa mileli.”