2 Samweli 6

Lisanduku la Lulaghilu liletakeka ku Yelusalemu

1 Mambu gha Chikahi 13:1-14; 15:25-16:6,43

1Bhela Daudi akabhabhongini kabhete manjolinjoli bha Izilaeli, bhokapi bhakabhi elufu selasini. 2Daudi akabhokiki na kujenda papamu na bhandu bhaki bhokapi bhaakabhi nabhu ku Baala Yuda, na kujenda kulitola Lisanduku laka Chapanga kuhuma konihoku, lelilowakeka kwa lihina laka Bambo Chapanga wa manjolinjoli joatama panani ja ihumbi yeibhi na mapapanila panani ja Lisanduku la Lulaghilu. 3Bhela, bhakalitoliki Lisanduku laka Chapanga heli kuhuma ku nyumba jaka Abinadabu, jejibhi ku itombi, na kulitotola kwa ligali la kuhutakika lahenu. Uza na Ahio bhana bhaka Abinadabu nde bhabhakabhi bhalijendesha ligali la kuhutakika heli. 4Bhakalibhohiki ligali la kuhutakika heli kuhuma panyumba jaka Abinadabu jejibhi ku itombi, papamu na Lisanduku laka Bambo Chapanga. Ahio nde joakalongulili palongi ja Lisanduku la Lulaghilu. 5Daudi na bhandu bhokapi bha Izilaeli, bhakabhi bhajemba nyembu na kukina kwa makili ghabhu ghokapi, palongi jaka Bambo Chapanga. Bhakabhi bhalapu lilimba, zeze, matali, kayamba na matoazi.

6Pabhakahikiki pa lubhanja lwa kupumundila mahunu lwa ku Nakoni, Uza akahatambwi chiwoku chaki na kulikamu Lisanduku laka Chapanga, maghambu ng'ombi yeyakabhi ilihuta ligali heli yakatehi kulikobhandola. 7Bhela, Bambo Chapanga akabhi na inyela namaa kwa ndandi ja chihengu cheakahengiki Uza cha kulepa kubha na utopelu, panihapa Bambo Chapanga akundapwi na kupotela pala pala punkeghi ja Lisanduku laka Chapanga. 8Najombi Daudi akayomiki kwa kubha Bambo Chapanga akundapwi Uza kwa inyela. Bhela, pandu panihapa pakalowakiki “Pelesi Uza,” yani “Malapuliku ghaka Uza,” mbaka lalenu.

9Bhela mu lichobha leniheli Daudi akunjowipi Bambo Chapanga, akapwaghaje, “Bho, henu Lisanduku laka Bambo Chapanga analinhikila bhole?” 10Bhela, Daudi ngacheakapaliki kabhete kulileta Lisanduku laka Bambo Chapanga kwaki mu muchi waka Daudi, nambu Daudi akalipeliki ku nyumba jaka Obedi Edomu, kuhuma ku muchi wa Giti. 11Lisanduku laka Bambo Chapanga heli lakatami mu nyumba jaka Obedi Edomu kwa myehi jitatu, najombi Bambo Chapanga akumpengali Obedi Edomu, papamu na bhandu bha munyumba jaki.

12Bhela nkolongwa Daudi paakapwaghakiki kubha Bambo Chapanga abhapengali bhandu bha munyumba jaka Obedi Edomu na hindu yokapi yeakabhi nayu kwa ndandi ja Lisanduku laka Chapanga, akapiti kulitola Lisanduku laka Chapanga kuhuma kunyumba jaka Obedi Edomu, na kulipeleka ku muchi waka Daudi kwa chiheku. 13Bhandu bhala bhabhakalitotwi Lisanduku laka Bambo Chapanga kila pabhakabhi bhajenda hatua sita, Daudi akabhohiki nyambiku ja likambaku limu la ng'ombi na litoli lelinonike. 14Daudi akakiniki palongi jaka Bambo Chapanga kwa makili ghaki ghokapi, koni akabya awati chizibau cha ingobhu jinyahi jihuhu. 15Bhela, Daudi na bhandu bhokapi bha Izilaeli bhakalipeliki Lisanduku laka Bambo Chapanga mbaka ku muchi waka Daudi kwa chiheku, na kwa sauti ngolongwa ja mapenenga.

16Bhela, chikahi Lisanduku laka Bambo Chapanga palakabhi lijingi mu muchi waka Daudi, Mikali mwali waka Sauli akalingali palidilisha. Najombi paakumbweni nkolongwa Daudi ahomba homba na kukina palongi jaka Bambo Chapanga, akunjojwi muntima waki. 17Bhela bhakalijingihi Lisanduku laka Bambo Chapanga mkati ja Lihema leakalenganaki Daudi pandu panihapa, na kulibheka pandu paki. Najombi Daudi akabhohiki nyambiku ya kujochakeka na nyambiku ya kutama kwa lukwali palongi jaka Bambo Chapanga. 18Daudi paakajomwi kubhoha nyambiku ya kujochakeka na nyambiku ya kutama kwa lukwali, akabhapengali bhandu kwa lihina laka Bambo Chapanga wa manjolinjoli. 19Bhela akabhaghabhili bhandu bhokapi, na lipogha lokapi la bhandu bha Izilaeli, akanalomi na akambomba, kila mundu libumunda la inganu, chipandi cha inyama, na libumunda la zabibu. Panakatai, bhandu bhokapi bhakabhokiki na kubhuja kila mundu kunyumba jaki.

20Bhela Daudi paakakelawiki kunyumba jaki nahuli kubhapengale bhandu bha munyumba jaki, Mikali mwali waka Sauli, akapiti kunjopalela, akapwaghaje, “Ngangachu jaka nkolongwa kwa kulepa kulitopela lalenu, kwa kuliyekula utopu waki palongi ja bhatumika bhaki bha chikambaku na bha chimbomba, ngati mundu jwangakubha na utopelu moahuli ingobhu yaki palongi ja bhandu panga iyoni!”

21Daudi akumpwaghi Mikali, “Nakabhi palongi jaka Bambo Chapanga joakanhawi nepani pandu paka tati waku, na bhandu bha munyumba jaki, chikahi paakanhawili kubha chiongozi wa bhandu bha Izilaeli, bhandu bhaka Bambo Chapanga. Bhela nepani anangina pela palongi jaka Bambo Chapanga. 22Anangubha wangakubha na utopelu nakanopi ja momeli sajenu. Wehapa anaumona kubha nepani nga chindu, nambu bhatumika bha chimbomba bhaubhapwaghiki abha anabhandopilaje!”

23Bhela, Mikali mwali waka Sauli, ngacheakabhi na mwana mbaka kupotela kwaki.