2 Samweli 5

Daudi akubha nkolongwa wa Izilaeli na Yuda

1 Mambu gha Chikahi 11:1-9; 14:1-7

1Bhela bhandu bha makabila ghokapi gha Izilaeli bhakunjendi Daudi ku muchi wa Hebuloni hoku, na kumpwaghila, “Tepani nde ihupa yaku na mwahi waku. 2Pamwandi hapa, chikahi Sauli paakabhi nkolongwa witu, wehapa nde weubhalonguha bhandu bha Izilaeli kungondo. Najombi Bambo Chapanga akakupwaghile, ‘Wehapa anaubhalonguha bhandu bhangu Izilaeli, na anaukubha unkolongwa panani ja Izilaeli.’ ” 3Ihongozi bhokapi bha Izilaeli bhakunjendi nkolongwa Daudi ku muchi wa Hebuloni hoku, najombi nkolongwa akatendiki lulaghilu nabhu palongi jaka Bambo Chapanga, nabhombi bhakunjeghi Daudi mahuta nahuli akubha nkolongwa Izilaeli. 4Daudi akabhi na hyaka selasini chikahi paakabhi atumbu kutawala, na akatawili kwa chikahi cha hyaka alobaini. 5Akatami ku muchi wa Hebuloni koni kwa hyaka saba na nusu koni akajitawala Yuda, na akatami ku muchi wa Yelusalemu kwa hyaka selasini na itatu koni akajitawala Izilaeli jokapi na Yuda jokapi.

6Bhela nkolongwa na bhandu bhakapiti ku muchi wa Yelusalemu kubhalapu Bhayebusi bhabhakabhi bhenehi bhatama monihomu. Nambu bhombi bhakumpwaghile, “Ngaujingili mu muchi ghoni, ndandi hata akangalola na iwete anabhakutopulya kutali.” Bhakumpwaghi bhenibhela maghambu bhakaholaki kubha Daudi ngacheaweza kujingi monihomu. 7Hata bhela, Daudi akajitoliki kwa makili ngomi ja Sayuni, jejakamanyakini ngati muchi waka Daudi.

8Mu lichobha leniheli, Daudi akapwaghike, “Mundu jokapi jola joanaabhalapula Bhayebusi, apetila ku nkolulela wa machi nahuli kubhalapu ilema na akangalola, ambabhu roho jangu jitenda kubhahakalila.” Nde ndandi bhandu bhapwagha, “Akangalola na iwete ngabhijingi mu Nyumba jaka Bambo Chapanga.”

9Bhela Daudi akatami mu ngomi jeniheji, na kujiloha, “Muchi waka Daudi.” Bhela Daudi akauchengiki muchi kujiyongolota ngomi jeniheji, akachengiki kutumbu ku Milo kujenda mkati ja muchi. 10Daudi akajonjukiki kuneng'anela nakanopi, maghambu Bambo Chapanga, Chapanga wa manjolinjoli, akabhi papamu naku.

11Bhela, nkolongwa Hilamu wa ku muchi wa Tilo akabhatumiki bhabholu kwaka Daudi, bhelabhela akumpelaki mielezi, maselemala na bhachenga, ambabhu bhakunchengi Daudi nyumba ja kikolongwa. 12Najombi Daudi akamanyiki kubha Bambo Chapanga antendiki kubha nkolongwa panani ja Izilaeli, na aukwehiki ukolongwa waki kwa ndandi ja bhandu bhaki, Izilaeli.

13Bhela chikahi Daudi paakajomwi kubhoka ku muchi wa Hebuloni, akabhatoliki bhatumika bha chimbomba nakanopi na akabhahanu kuhuma ku Yelusalemu hoku. Bhanihabha bhakumbelaki Daudi bhana bhamaheli bha chikambaku na bhana bha chimbomba. 14Aghagha nde mahina gha bhana bha chikambaku, bhabhakumbelaki akabhahanu bhaki ku muchi wa Yelusalemu hoku: Shamua, Shobabu, Nasani, Solomoni, 15na Ibihali, Elishua, Nefegi, Yafia, 16na Elishama, Eliada na Elifeleti.

Daudi abhaweza Bhafilisti

1 Mambu gha Chikahi 14:8-17

17Bhela Bhafilisti pabhakajowini kubha Daudi ajeghaliki mahuta kubha nkolongwa wa Izilaeli, bhakabhokiki bhokapi papamu na manjolinjoli ghabhu kujenda kundonda, nambu Daudi akajowini malobhi ghanihagha, najombi akahelili kujenda kujingi mu ngomi. 18Bhela Bhafilisti bhakahikiki na kughabhanika ku libondi la Bhalefai. 19Bhela, Daudi akundaluki Bambo Chapanga, akapwaghaje, “Bho, nyenda lelu nakabhalapula Bhafilisti? Bho, anaunyangatya le kubhaweza?”

Bambo Chapanga akayangike, “Ena, ujenda ukabhalapulaje, ndandi chakaka ananukujangatya ubhaweza Bhafilisti!”

20Bhela, Daudi akapiti mbaka ku Baali Pelasimu, na konihoku akabhaweziki Bhafilisti. Panihapa akapwaghike, “Bambo Chapanga apetiki pachilanda ja maadui bhangu ngati mafuliku gha machi ghaghajenda kwa makili.” Bhela pandu panihapa pakalowakiki Baali Pelasimu, yani Bambo Chapanga wa mafuliku. 21Bhafilisti bhakailekiki imong'umong'u yabhu konihoku, najombi Daudi na bhandu bhaki bhakaibhokili kutali.

22Bhela Bhafilisti bhakakweliki kwa mala ja kabheli, na kughabhanika mu libondi la Bhalefai. 23Bhela Daudi akundaluki kabhete Bambo Chapanga, najombi Bambo Chapanga akayangike, “Ngawijenda kwa kubhoke pandu paubhile, nambu ubhayongaluta kwa kunyuma jabhu, na ukabhalapulaje kwa palongi ja mikongu ja mifolosadi. 24Chikahi pela pawijowana sauti ja nganyatu kuhuma kunani ja mikongu ja mifolosadi, ujenda manyata, maghambu jeniheji anajilangiha kubha Bambo Chapanga alongulili palongi jaku kubhalapu manjolinjoli gha Bhafilisti.” 25Bhela Daudi akatendiki ngati Bambo Chapanga moakundaghalakile, najombi akabhalapwi Bhafilisti mu indela jokapi kutumbu ku muchi wa Geba mbaka ku muchi wa Gezeli.