2 Samweli 4

Kukomakeka kwaka Ishibosheti

1Bhela Ishibosheti mwaka waka Sauli, paakajowini kubha Abineli akomakiki ku Hebuloni hoku, akahekatiki mtima, na bhandu bhokapi bha Izilaeli bhakabhi na choghohi namaa. 2Bhela Ishibosheti mwana waka Sauli, akabhi na bhandu bhabheli bhabhakabhi ihongozi bha ikosi ya manjolinjoli. Jumu akalowakiki Baana, na jongi akalowakiki Lekabu, bhana bhaka Limoni, mundu wa likabila laka Benyamini, kuhuma ku muchi wa Beeloti, ndandi muchi wa Beeloti bhelabhela ukabhi mali gha likabila laka Benyamini. 3Kukabhi bhandu bha ku muchi wa Beeloti bhakatilili ku muchi wa Gitaimu, na bhakatami konihoku ngati bhagheni mbaka lichobha la lalenu.

4Najombi Yonasani, mwana waka Sauli akabhi na mwana wa chikambaku joakabhi na chilema cha magholu ghaki ghokapi ghabheli. Mwana jonihoju akalowakiki Mefibosheti. Mefibosheti akabhi na hyaka nhwanu chikahi malobhi gha kupotela kwaka Sauli na Yonasani paghakajowaniki kuhuma ku Yezileeli. Ikapitali kubha mundu joakabhi angoha paakajowini kubha Sauli na Yonasani bhakomakiki ku Yezilaeeli hoku, akuntoliki Mefibosheti na kutila naku. Nambu paakabhi atila naku kwa manyata, mwana hoju akahawiki na kubha na chilema.

5Bhela, Lekabu na Baana, bhana bhaka Limoni, kuhuma ku muchi wa Beeloti, bhakapiti kunyumba jaka Ishibosheti, nabhombi bhakahikiki konihoku muhi, chikahi Ishibosheti paakabhi apomulili panyumba jaki. 6Bhakajingili mu chumba cha mkati ngati bhajenda kutola inganu, na kunhomeka Ishibosheti nkoha palutumbu jaki. Bhela pabhakajomwi kunkoma bhenibhela, Lekabu na ndongu waki Baana bhakatilike. 7Bhakabhi bhajingili mkati ja nyumba chikahi Ishibosheti paakabhi aghoni pachitanda, muchumba chaki. Pabhakunhomiki nkoha na kunkoma, bhakunhekiti mmutu waki. Bhakautoliki mmutu hoghu, na kujenda nau ikilu jokapi kwa kupetela indela ja libondi la Alaba. 8Bhakautoliki mmutu waka Ishobosheti ghola na kundete Daudi ku mchi wa Hebuloni hoku. Nabhombi bhakumpwaghi nkolongwa Daudi, “Lingalyaje, aghoghu nde mmutu waka Ishibosheti mwana waka Sauli, adui waku, joakabhi apala kughayonanga matamu ghaku. Lichobha la lalenu Bambo Chapanga akulepili chisasi wa bambo wangu unkolongwa, kwa ndandi jaka Sauli na bhabhelakeka bhaki.”

9Nambu Daudi akabhayangiki Lekabu na ndongu waki Baana, bhana bhaka Limoni, kuhuma ku muchi wa Beeloti, akapwaghaje, “Chakaka napa kwaka Bambo Chapanga joabhi mwomi, kubha jombi nde joangengalili matamu ghangu kubhokana na mang'ahiku ghokapi. 10Mundu jola joakahiki kumbwaghi kubha Sauli akomakiki, koni akaholakya kubha anete ubholu wamboni, nakunkamwili na kunkoma ku muchi wa Sikilagi hoku. Ghonihoghu ukabhi nde nhupu ghonakumpekihi kubhokana na ubholu waki ghoanetile. 11Bho, anakubhi bhandu bhahakau bhunkomiki mundu wamboni koni akabya pachitanda chaki, munyumba jaki, bho, nga wichu lelu kwangu nepani kundepe chisasi kwa kunkoma mundu joahengiki bhenibhela, na kumboha pani pundema?” 12Bhela Daudi akabhalaghalaki bhandu bhaki, nabhombi bhakabhakomike. Bhakahekiti mabhoku ghabhu, na magholu ghabhu, na kuijenjeha hyegha yabhu pambipi na litanda la ku muchi wa Hebuloni hoku. Nambu bhakautoliki mmutu waka Ishobosheti na kuutagha palitengeli laka Abineli ku muchi wa Hebuloni hoku.