2 Samweli 3

1Bhela kukabhi na ngondo ja chikahi chilachu pachilanda ja bhandu bha munyumba jaka Sauli na bhandu bha munyumba jaka Daudi. Nambu Daudi akajendalili kuneng'anela nakanopi, na upambala waka Sauli ukajendali kulepa kubha na makili nakanopi.

Bhana bha chikambaku bhaka Daudi

2Bhana bha chikambaku bhabhakabhelakiki na Daudi ku muchi wa Hebuloni hoku: Mbelakeka waki wa kutumbula akabhi Aminoni, mabhu waki akalowakiki Ahinoamu, kuhuma ku muchi wa Yezileeli. 3Mbelakeka waki wa kabheli akabhi Danieli, mabhu waki akalowakiki Abigaili, joakaweliwi na ndomi Nabali, kuhuma ku muchi wa Kalimeli. Wa katatu akabhi Abisalomu, mabhu waki akalowakiki Maaka, mwali waka Talimai nkolongwa wa ku Geshuli. 4Wa kachechi akabhi Adoniya, mabhu waki akalowakiki Hagiti, na wa kahanu akabhi Shefatia, mabhu waki akalowakiki Abitali. 5Wa sita akabhi Itileamu, mabhu waki akalowakiki Egila, nhwanu waka Daudi. Bhanihabha nde bhana bha chikambaku bhaka Daudi bhabhakabhabheliki chikahi paakabhi atama ku Hebuloni.

Abineli alilomba na Daudi

6Chikahi ngondo pachilanda ja bhandu bha munyumba jaka Sauli na bhandu bha munyumba jaka Daudi pajakabhi jijendalela, Abneliakabhi ajendale kulijonjuke makili kwa bhandu bha munyumba jaka Sauli. 7Bhela Sauli akabhi na mtumika jumu wa chimbomba, lihina laki akalowakiki Lisipa, mwali waka Aya. Najombi Ishibosheti akundaluki Abineli, “Bho, maghambu kiki ughoni na mtumika wa chimbomba waka tati wango?”

8Abineli akayomiki namaa kubhokana na malobhi ghaka Ishibosheti, najombi akapwaghike, “Bho, uholake le nepani nhweza kung'anambuka Sauli? Bho, uholake le nepani nabhatumaki bhandu bha Yuda? Lingalyaje, Nepani mili nundongwana kwaka Sauli, bhalongu bhaki, na bhakochi bhaki, na ngachenukutendiki wehapa ukamulika na Daudi mbaka lalenu. Hata bhela, lalenu umona nepani kubha mi na lihakau kwa ndandi jaka mbomba! 9Chapanga na andendila nepani Abineli bhenibhela, na kujonjukeka, ngati nepani nganhengi chela Bambo Chapanga cheandaghi Daudi kwa kulapa, 10kwa kuubhoha ukolongwa kuhuma mu nyumba jaka Sauli, na kuchihimika chitehu chaka Daudi panani ja Izilaeli, na panani ja Yuda, kutumbu ku muchi wa Dani mbaka ku muchi wa Beeli Sheba.” 11Ishibosheti ngecheakalengiki kupwagha lilobhi lengi kwaka Abineli, maghambu akunjowipi Abineli.

12Bhela, Abineli akabhatumiki bhabholu kwa ndandi jaki kwaka Daudi, kumpwaghila, “Bho, inchi ajeji jaka nane? Utenda majonganu na nepani, nanatu ananukujangatya kubhatenda bhandu bhokapi bha Izilaeli bhakubha upambala waku.”

13Daudi akapwaghike, “Wichu, anandenda majonganu na wehapa, nambu mbala lijambu limu lembala unhengila kuhuma kwako: Ngawihika kuhimangana na nepani mbaka unetila Mikali, mwali waka Sauli, chikahi pawikubha uhika kumona nepani.” 14Bhela Daudi akapeliki bhabholu kwaka Ishibosheti, mwana waka Sauli, akapwaghaje, “Umbekya nhwanu wangu Mikali, jonakuntowili kwa magovi mia jimu gha Bhafilisti.”

15Bhela, Ishibosheti akalaghalaki kubha Mikali atolakikaje kuhuma kwaka Palitieli ndomi waki, joakabhi mwana waka Laishi. 16Palitieli ndomi waki akapiti papamu na nhwanu waki koni alela mu indela jokapi mbaka ku Bahulimu. Bhela, Abineli akumpwaghi Palitieli, “Ubhuja kunyumba.” Bhela najombi akabhujike. 17Bhela Abineli akapiti kubhapwaghi lijambu leniheli ihongozi bha Izilaeli, akapwaghaje, “Kwa chikahi chilachu mkabhi mpala Daudi akubha nkolongwa winu. 18Henu, ntenda bhenibhela! Maghambu Bambo Chapanga akundaghi Daudi, akapwaghaje, ‘Kwa kupete Daudi mtumika wangu, ananabhakengalya bhandu bhangu bha Izilaeli kuhuma mu makili gha Bhafilisti, na kuhuma mu makili gha maadui bhabhu bhangi bhokapi.’ ” 19Bhelabhela Abineli mweni akalongi na bhandu bha likabila laka Benyamini, bhela akapiti mbaka ku Hebuloni kumpwaghi Daudi kubhokana na ghala ambaghu bhandu bha Izilaeli na bhandu bha likabila lokapi laka Benyamini ghabhajetangani kuhenga.

20Bhela, Abineli akapiti kwaka Daudi ku muchi wa Hebuloni hoku koni akabya na bhandu ishilini. Najombi Daudi akuntendi uwangalalu Abineli, papamu na bhandu bhokapi bhabhakabhi papamu naku. 21Bhela Abineli akumpwaghi Daudi, “Sajenu uneka nepani nyenda nakakuletila wehapa wa bambo wangu nkolongwa, bhandu bhokapi bha Izilaeli. Anabhahika na kutenda majetanganelu na wehapa, nahuli ukubha nkolongwa wabhu, nanau anaubhatawala bhokapi ngati moupalila.” Najombi Daudi akundaghi Abineli, najombi akapiti kwa lukwali.

Yoabu ankoma Abineli

22Chikahi chelachela, bhandu bhaka Daudi na Yoabu bhakakelawiki kuhuma kukomana, nabhombi bhakakelawiki na hindu yamaheli namaa yebhaitoliki kwa makili. Nambu Abineli ngacheakabhi kabheti na Daudi ku muchi wa Hebuloni hoku, maghambu Daudi akabhi ajomwi kundaghi ajendaje, najombi akapiti kwa lukwale. 23Chikahi Yoabu na manjolinjoli bhokapi bhaakabhi nabhu pabhakakelawiki, akapwaghakiki kubha Abineli, mwana waka Neli, akahikiki kumbona nkolongwa Daudi, najombi andaghi ajendaje, najombi apiti kwa lukwale. 24Bhela Yoabu akapiti kwaka nkolongwa Daudi, na kumpwaghila, “Bho, henu uhengiki chindu bhole? Lingalya, Abineli akahikiki kwaku, maghambu kiki undekiki abhokaje? 25Umanyi kubha Abineli, mwana waka Neli, akahikiki nahuli kukukolowa, na kuluchunguza lujendu lwaku, na kumanya kila chindu cheuchihenga!”

26Bhela Yoabu paakajomwi kulonge na Daudi, akatumiki bhabholu bhunjengalya Abineli, nabhombi bhakunkelawihi kuhuma ku chilibha cha Sila. Nambu Daudi ngacheakalimanyi lijambu lenihele. 27Bhela, Abineli paakakelawiki ku muchi wa Hebuloni, Yoabu akuntoliki na kujenda naku punkeghi ja ndyangu ukolongwa, nahuli kulonge naku kwa pakanjika jabhu. Panihapa Yoabu akunhomiki Abineli nkoha mulutumbu na kupotela pala pala, maghambu Abineli akabhi ankomiki Asaheli. 28Panakatai Daudi paakajowili kubhokana na lijambu leniheli, akapwaghike, “Nepani na ukolongwa wangu ngachetubhi na lihoku palongi jaka Bambo Chapanga, kubhokana na kukomakeka kwaka Abineli, mwana waka Neli. 29Lihakau la kunkoma mundu jonihoju na likubha panani jaka Yoabu, na panani ja bhandu bhokapi bha munyumba jaka tati waki! Chikahi chokapi bhandu bha munyumba jaka Yoabu ngabhilepa kubha na mundu joalwala chitamu cha kupita uwila, na chitamu cha malohi au mundu joajenda kwa kutegame mbehu au joakomakeka kwa lipanga, au mundu joalepa kubha na chilebhi!” 30Bhela, Yoabu na ndongu waki Abishai, bhakunkomiki Abineli, maghambu Abineli akunkomiki ndongu wabhu Asaheli ku ngondo ja ku muchi wa Gibeoni hoku.

31Bhela, Daudi akumpwaghi Yoabu, papamu na bhandu bhokapi bhaakabhi nabhu Yoabu, “Nkachulana ingobhu hinu, na muwata ingobhu ya magunila, na mukaombuliza kwa ndandi jaka Abineli.” Chikahi cha kutagha, nkolongwa Daudi akajendiki kunyuma ja lisanduku. 32Bhela bhakuntaghiki Abineli ku Hebuloni hoku, najombi nkolongwa Daudi akaleliki kwa sauti ngolongwa panani ja litengeli laka Abineli, na bhandu bhokapi bhelabhela bhakalelike. 33Nkolongwa akajembiki nyembu ajeji kwa ndandi ja kumuombuleze Abineli:

“Bho, maghambu kiki Abineli akapotili ngati moapotale mundu ng'ang'a?

34Mabhoku ghaku ngacheghakongakike,

na magholu ghaku ngacheghakongakike.

Apotili ngati mundu joakomakiki na bhandu bhahakau!”

Nabhombi bhandu bhokapi bhakundeli kabhete.

35Bhela bhandu bhokapi bhakapiti kumpembalake Daudi nahuli akula chilebhi, chikahi pakukabhi kukali muhi. Nambu Daudi akalapiki, akapwaghaje, “Chapanga na angomaje ngati ananguliki chilebhi au chindu chokapi chela mbaka lyobha palijibhalaje!” 36Bhandu bhokapi bhakalilolakili lijambu leniheli, nabhombi bhakaliweni kubha nde lijambu lamboni, ngati mobhakabhoni kubha ghamboni mambu ghangi ghokapi ghaakatendiki nkolongwa. 37Bhela mu lichobha lenilela bhandu bhokapi, na Bhaiziaeli bhokapi bhakamanyiki kubha nkolongwa ngacheankomiki Abineli, mwana waka Neli. 38Bhela nkolongwa akabhapwaghi bhandu bhaki, “Bho, ngachemmanyi kubha lalenu mundu jumu nkolongwa, na joamanyakini apotili mu Izilaeli? 39Nanatu lalenu hata ngati mbakiki mahuta kubha nunkolongwa, lalenu nepani ngachemi na makili. Bhana bhaka Seluya abhabha bhambetiki makili. Bambo Chapanga na andepa mundu joahengiki mahakau aghagha kulengana na matendu ghaki mahakau!”