2 Samweli 2

Daudi ajeghaleka mahuta kubha nkolongwa wa Yuda

1Paghakapetiki mambu ghanihagha, Daudi akundaluki Bambo Chapanga, “Bho, ngwela lelu kujenda ku ghumu wa muchi wa Yuda?”

Bambo Chapanga akapwaghike, “Ena, ukwelaje.”

Daudi akalalukile, “Bho, nyenda kwako?”

Bambo Chapanga akayangike, “Ujenda ku Hebuloni.” 2Bhela, Daudi akakweliki kujenda ku Hebuloni, papamu na akabhahanu bhaki bhabheli, Ahinoamu wa ku muchi wa Yezileeli, na Abigaili, joakahweliwi na ndomi waki Nabali, wa ku muchi wa Kalimeli. 3Bhelabhela Daudi akabhatoliki bhandu bhabhakabhi papamu naku, kila jumu na bhandu bha munyumba jaki, na bhombi bhakatami ku michi ja Hebuloni hoku. 4Panihapa bhandu bha ku Yuda bhakahikiki ku Hebuloni, konihoku bhakunjeghi Daudi mahuta akubha nkolongwa wa Yuda.

Daudi paakapwaghakiki kubha bhandu bha ku Yebeshi Gileadi nde bhabhuntaghiki Sauli, 5akatumiki bhabholu kwa bhandu bha ku Yebeshi Galeadi, na kubhapwaghila, “Bambo Chapanga ampengalyaje kwa kulangiha wamboni aghoghu wa kuntagha Sauli, bambo winu. 6Henu Bambo Chapanga na andangiha wamboni na ulongwana, na nepani nanatu ananuntendila wamboni ghonihoghu kubhokana na lijambu aleli lentendike. 7Henu, nkangamalaje na mkubha na makili, maghambu Sauli, bambo winu, apotile, na bhandu bha Yuda bhanyeghi nepani mahuta ngubha nunkolongwa wabhu.”

Ishibosheti ahimikwa kubha nkolongwa wa Izilaeli

8Chikahi chenihechi Abineli mwana waka Neli, nkolongwa wa manjolinjoli ghaka Sauli, akabhi antoliki Ishibosheti, mwana waka Sauli, kundomboha nkoka Yoludani, na kumpeleka mbaka ku muchi wa Mahanaimu. 9Konihoku, Abineli akunhimiki Ishibosheti kubha nkolongwa wa inchi ja Gileadi, Asheli, Yezileeli, Efulaimu, Benyamini na Izilaeli jokapi. 10Ishibosheti mwana waka Sauli akabhi na umule wa hyaka alobaini chikahi paakatumbwi kujitawala inchi ja Izilaeli, najombi akatawili kwa hyaka ibheli. Nambu bhandu bha likabila la Yuda bhakunjengali Daudi. 11Chikahi ambachu Daudi akabhi nkolongwa panani ja bhandu bha likabila la Yuda ku Hebuloni hoku chakabhi hyaka saba na myehi sita.

Ngondo pachilanda ja bhandu bha Izilaeli na bhandu bha Yuda

12Abineli mwana waka Neli, papamu na bhatumika bhaka Ishibosheti, mwana waka Sauli, bhakabhokiki ku Mahanaimu, na kujenda ku Gibeoni. 13Yoabu mwana wa Seluya, na bhatumika bhaka Daudi bhakabhokiki na kuhimangana na Abineli papamu na bhandu bhaakabhi nabhu ku litanda lelibhi ku Gibeoni. Lipogha limu lakatami upambala ghumu wa litanda na lipogha lengi lakatami upambala wa kabheli.

14Bhela Abineli akumpwaghi Yoabu, “Tubhabheka akakombu bhakumu bhakomana bheni kwa bheni palongi jitu.”

Yoabu akapwaghike, “Haya, na bhatenda bhenibhela.”

15Bhela akakombu ishilini na ncheche bhakabhalangike: Upambala wa likabila laka Benyamini na Ishibosheti mwana waka Sauli, akakombu komi na bhabheli, na upambala waka Daudi akakombu komi na bhabheli. 16Bhela kila mundu akakamulini na njaki kumutu, na kuhomikana mapanga mwindeta. Bhokapi bhabheli bhakahawiki pahi, koni bhakabya bhapotile. Bhela, pandu panihapa pakalowakiki Helikati Hazulimu, yani “Ngonda wa Mapanga. Pandu panihapa pabhi ku Gideoni.”

17Lichobha leniheli ngondo jakabhi ngolongwa namaa, najombi Abineli na bhandu bha Izilaeli bhakalepalili palongi ja bhandu bhaka Daudi. 18Bhana bhatatu bhaka Seluya bhakabhi konihoku: Yani Yoabu, Abishai na Asaheli. Bhela Asaheli hoju akabhi na imbelu ngati mbabhala. 19Asaheli akuntopwi Abineli, panga kung'anambuka kumalelelu wala kumangeja chikahi paakabhi antopola. 20Bhela Abineli akalingalili kunyuma na kumbona Asaheli, na kundalukila, “Bho, wehapa le wa Asaheli?”

Jombi akayangiki, “Ena.”

21Bhela Abineli akumpwaghile, “Ng'anambukaje upambala wa kumalelelu au kumangeja. Untola jumu wa akakombu bha chikambaku na unhula silaa yaki.” Nambu Asaheli ngachekakotwiki kuntopola. 22Abineli akundakali kabhete Asaheli, na kumpwaghila, “Ukotuka kundopola! Bho, maghambu kiki unyomalake kukukoma? Bho, ananhweza bholi kundingalila ndongu waku Yoabu kumihu?” 23Nambu Asaheli akakaniki kukotoka kuntopola, bhela Abineli akunhomiki Asaheli palutumbu kwa nkoha waki wangakuhongoka cha kunyuma, nkoha ukunhotwili na kupitali kungongu jaki. Bhela Asaheli akahawiki na kupote pala pala. Bhandu bhokapi pabhakahiki pandu paakabhi apotili Asaheli, bhakajemiki chinunu.

24Nambu Yoabu na Abishai bhakunjengali Abineli, na lyobha palakabhi lijibhila, bhakahikiki kuchitombi cha Ama, pambipi na Gia, ku indela jejijenda ku chingwenji cha Gibeoni. 25Bhela bhandu bha likabila laka Benyamini bhakalibhongini kabheti kunyuma jaka Abineli. Bhakalenganaki lipogha limu, na kujema panani ja chitombi. 26Bhela Abineli akundohiki Yoabu, na kumpwaghila, “Bho, anatukomana le machobha ghokapi? Bho, ngacheubhona kubha ujomukelu waki anaukubha mabhinilu? Bho, anaujendalya kwa chikahi bholi pangakubhakanakila bhandu bhaku bhakotuka kubhajengalela bhalongu bhabho?”

27Yoabu akayangike, “Chakaka ngati moatami Chapanga, ngati ukabhi ngacheupwaghiki lijambu leniheli, bhandu bhangu bhakabya bhajendali kubhajengali bhalongu bhabhu mbaka chilabhu lukela.”

28Bhela, Yoabu akalapwi lipenenga, na bhandu bhokapi bhakajemiki, na kukotoka kubhajengalela bhandu bha Izilaeli, wala ngachebhajendali kukomana kabhete.

29Ikilu jela Abineli na bhandu bhaki bhokapi bhakajendiki kwa kupetela ku libondi la Alaba. Bhakalombwiki nkoka Yoludani, na kujendalela kwa kupetela inchi jokapi ja Bitiloni, na kuhika ku Mahanaimu.

30Bhela, Yoabu akakelawiki kuhuma kunjengale Abineli, na kubhabhongana bhandu bhaki bhokapi. Papamu na Asaheli, bhandu bhangi komi na tisa bhaka Daudi bhakabhi bhapotile. 31Nambu bhandu bhaka Daudi bhakabhi bhabhakomiki bhandu mia itatu na sitini bha likabila laka Benyamini, bhabhakabhi papamu na Abineli. 32Yoabu na bhandu bhaki bhakajitoliki hyegha jaka Asaheli, na kujenda kuutagha ku litengeli laka tati waki, lelibhi ku Beselehemu hoku. Bhela Yoabu na bhandu bhaki bhakajendiki ikilu jokapi, na pakukachile bhakabhi bhahikiki ku Hebuloni.