2 Samweli 17

Hushai ankoloha Abisalomu

1Nakanopi ja ghanihagha, Ahitofeli akumpwaghi Abisalomu, “Unyetakalya nepani nhaghula bhandu elufu komi na ibheli, nahuli moka nabhu ikilu jenjenu na nukundonda Daudi. 2Ananumpitalya pwitupwitu na kundapula akabya atondiki na ahekatiki mtima, nanatu ananumpekya choghohi. Bhela bhandu bhokapi bhabhabhi papamu naku anabhatilaje. Ananunkoma nkolongwa kanjika jaki, 3na kubhakelebhu bhandu bhangi bhokapi kwaku wehapa. Ngati anatunkomiki mundu jumu ajoju joulonda kunjonanga, anakubhatenda bhandu bhangi bhokapi kubha na lukwali.” 4Liholalelu leniheli lakabhonakini kubha lamboni kwaka Abisalomu, na kwa ihongozi bhokapi bha Izilaeli.

5Bhela, Abisalomu akapwaghike, “Bhelabhela mundoha na Hushai, Mwaliki, nahuli tujowana najombi apwagha kike.” 6Hushai paakahikiki kwaka Abisalomu, Abisalomu akapwaghike, “Ahitofeli nde joabhohiki liholalelu aleli. Bho, tuhenga ngati moapwaghile? Ngati ngabhela, utupekya maholalelu ghaku.”

7Bhela Hushai akumpwaghi Abisalomu, “Chikai chenjenu, maholalelu ghaabhohiki Ahitofeli nga manyahi. 8Nakanopi ja ghanihagha, Hushai akumpwaghile, ‘Wehapa umanyi kubha tati waku na bhandu bhaki, nde bhakomana ngondo bhabhabhi na makili, nabhombi bhabhi na inyela ngati chinyama cha muchitengu chechilowakeka dubu chechinyaghuliki mwana waki. Nakanopi ja ghanihagha, tati waku nde mkomana ngondo mwana makili, ikilu ngayighoneli papamu na bhandu bhake.’ 9Hata sajenu ajomwili kulihiya mu limbaku limu laki pachilanda ja ghaghabhi konihoku, au pandu pangi. Ngati anabhalonguli kubhalapu na kubhakoma manjolinjoli bhaku, na mondu jokapi jola anaajowini lilobhi leniheli anaapwaghaje, ‘Makomakeku ghapitalili mu lipogha la bhahemba bhaka Abisalomu.’ 10Bhandu bhaku pabhijowana bhenibhela, hata jola joabhi na makili nakanopi, joabhi na mtima ghoubhi na makili ngati wa lihimba, anaahekatika mtima kwa choghoi. Ndandi Bhaizilaeli bhokapi bhamanya kubha tati waku nde mundu mwana makili, na bhandu bhokapi bhaabhi nabhu jombi bhabhi na makili. 11Bhela liholalelu langu nde kubha, ubhabhongana bhandu bhokapi bha Izilaeli kutumbu ku muchi wa Dani mbaka ku muchi wa Beeli Sheba, upambala wa kunkachi, bhakubha bhamaheli ngati luhanga lwa mumaheku ja bahali, na wehapa wamwete ubhalonguha kujenda kungondo. 12Panihapa nde anatuweza kundapula pandu pokapi pala paibhonikanaje, natatu anatumpitalya kwa kupwitukila ngati lyangami molihabhuki paluhombi. Bhela, njeta mundu hata jumu joanahighalya kubha mwomi, kutumbu jombi mweni papamu na bhandu bhokapi bhabhabhi papamu naku. 13Ngati anaatilili ku muchi wokapi ghola, bhela bhandu bhokapi bha Izilaeli anabhauyongaluha muchi ghonihoghu kwa ngoji, natatu anatuhutana muchi ghonihoghu mbaka kulibondi, mbaka pilepa kubhonikana chindu chokapi chela hata liganga lichoku la muchi ghonihoghu.”

14Bhela Abisalomu na bhandu bhokapi bha Izilaeli bhakapwaghike, “Liholalelu laka Hushai, Mwaliki, nde lamboni nakanopi kupeta lila laka Ahitofeli.” Maghambu Bambo Chapanga akaholali kulipenga liholalelu linyahi laka Ahitofeli, nahuli kuleta mayonangeku kwaka Abisalomu.

Daudi alakaliwa na kutila

15Bhela Hushai akabhapwaghi bhapenganyambiku Sadoki na Abiasali ntundu Ahitofeli, na jombi mweni mobhakumpeki maholalelu Abisalomu, na ihongozi bhokapi bha Izilaeli. 16Henu ntuma bhabholu manyata kwaka Daudi, bhakumpwaghilaje, “Ikilu jenu ngawighone mu ilombukelu ya kuchingwenje, nambu kwa ntundu wokapi ghola ulombukaje, nanga bhela, nkolongwa papamu na bhandu bhokapi bhabhabhi papamu na jombi anabhayonangikaje.”

17Bhela chikahi chenihechi, Yonasani na Ahimaasi bhakabhi bhalendale pambipi na Enilogeli, nahuli ngabhibhonikana na mundu jokapi jola. Najombi mtumika jumu wa chimbomba akabhi ajenda kubhapelake malobhi, nabhombi bhakaghapeliki kwaka nkolongwa Daudi. 18Nambu chikahi chenu, nkombu jumu akabhaweni, na akapiti kumpwaghi Abisalomu. Bhela bhokapi bhabheli bhakabhokiki manyata, na kujenda mbaka kunyumba jaka mundu jumu ku Bahulimu hoku. Mundu jonihoju akabhi na chilibha mu liwangala la nyumba jaki. Nabhombi Yonasani na Ahimaasi bhakajingi mu chilibha chenihechi na kujobhalela. 19Nhwanu waka mweni nyumba jeniheji akatoliki chifuniku na kuchiyekalela chilibha chenihechi, na kujanika mahunu panani ja chifuniku hechi. Njeta mundu jokapi jola joakalimanyi lijambu leniheli. 20Chikahi bhandu bhaka Abisalomu pabhakahikiki kwaka mbomba jonihoju, bhakumpwaghile, “Bho, bhabhi kwaku Ahimaasi na Yonasani?”

Mbomba jola akabhayangike, “Bhalombwiki chikoka.”

Bhandu bhaka Abisalomu bhakabhalondike, na pabhakalepali kubhabhona, bhakakelawiki ku muchi wa Yelusalemu. 21Chikahi bhandu bhanihabha pabhakajomwi kubhoka, Yonasani na Ahimaasi bhakapitiki muchilibha, na kujenda kwaka nkolongwa Daudi kumpwaghi mambu ghanighala ghokapi. Bhakumpwaghile, “Ubhoka manyata, ulombuka kwihi ja nkoka, maghambu Ahitofeli ampekihi maholalelu Abisalomu kwa ndandi jaku.” 22Bhela, Daudi akabhokiki papamu na bhandu bhokapi bhabhakabhi papamu nabhu, na kulomboka nkoka Yoludani. Pakukahiki lukela njeta mundu hata jumu joakabhi akali ngakulomboka nkoka Yoludani. 23Ahitofeli paakaweni kubha liholalelu laki ngachelijetakaliwi, akatandiki liponda laki, na kubhoka kujenda kunyumba jaki, ku muchi waki. Paakahikiki konihoku, akapangiki wichu mambu gha munyumba jaki, na mweni akatehi kulinyonga. Akapotili na kutaghakika mu litengeli laka tati waki.

24Bhela, Daudi akapiti ku muchi wa Mahanaimu. Najombi Abisalomu akalombwiki nkoka Yoludani papamu na bhandu bhokapi bha Izilaeli. 25Chikahi chenihechi, Abisalomu akabhi ambekiki Amasa kubha nkolongwa wa manjolinjoli pandu paka Yoabu. Amasa akabhi mwana waka Yitila, mbelakeka wa Bhaishimaeli. Mabhu waki akalowakiki Abigaili, mwali waka Nahashi, joakabhi ndombu waka Seluya, mabhu waka Yoabu. 26Abisalomu papamu na bhandu bha Izilaeli bhakabhekiki likambi labhu ku inchi ja Gileadi.

27Daude pakahikiti ku Mahanaimu, Shobi joakabhili mwana waka Nahashi kuhuma ku Laba ja Bhaamoni, Makili joakabhili mwana waka Amieli kuhuma Lo Debali, na Balizilai, Mgileadi kuhuma ku Logelimu. 28Bhanihabha bhakaletiki itanda, mabilika, yombu ya lutopi, inganu, shayili, uhembi, bisi, ngondi na dengu, 29busi na mahibha ghaghagandiki, limbeleli na mahibha ghaghagandiki gha ng'ombi, kuhuma mu hinyama yabhu kwa ndandi jaka Daudi papamu na bhandu bhokapi bhaakabhi nabhu. Ndandi bhandu bhakapwaghike, “Bhandu abhabha bhabhi na injala, bhatondiki na bhabhi na inywita kwa ndandi ja kujenda muchingwenje.”