2 Samweli 18

Kulepalela na kukomakeka kwaka Abisalomu

1Daude akabhongini bhandu bhaakabhili nabhu na kubheka hilongozi bhakolongwa bha manjolinjoli maelufu kwa maia. 2Daudi akatumiki manjolinjoli bhaki kungondo mu ikosi itatu: Selusi jimu bhakalonguhiki na Yoabu, selusi ja kabheli bhakalonguhiki na Abishai, mwana waka Seluya, ndongu waka Yoabu, na selusi ja katatu bhakalonguhiki na Itai, Mgiti. Bhela nkolongwa Daudi akabhapwaghi bhokapi, “Nepani namwete ananyenda papamu na mwehapa.”

3Nambu bhandu bhakapwaghike, “Wehapa ngawibhoka. Maghambu, ngati anatutiliki, bhombi ngabhatuholaleli tepani. Ngati ana nusu jitu anabhapotili, bhelabhela ngabhatuholaleli tepani. Nambu wehapa ubhi na samani ngolongwa hata kupeta bhandu elufu komi pachilanda jitu. Bhela nde mbanga wehapa uhighalya mu muchi, na kutulete ujangatilu kuhuma mu muchi.”

4Nkolongwa akayangike, “Nepani ananhenga lijambu lokapi lela lemwibhona mwehapa kubha lamboni.” Bhela, nkolongwa akajemiki punkeghi ja ndyangu ukolongwa, koni manjolinjoli bhokapi bhakapitaje mu mapogha gha maelufu na mamia. 5Nkolongwa akabhalaghalaki Yoabu, Abishai na Itai, akapwaghaje, “Muntendila nkombu jola, Abisalomu kwa chiha kwa ndandi jangu.”

6Bhela, manjolinjoli bhakabhokiki na kujenda pa lubhanja lwa ngondo na kukomana na bhandu bha Izilaeli. Ngondo jeniheji bhakakomini mu chitengu chaka Efulaimu. 7Konihoku manjolinjoli bha Izilaeli bhakalepalili palongi ja manjolinjoli bhaka Daudi. Mu lichobha leniheli bhakakomakiki bhandu bhamaheli namaa, manjolinjoli bhokapi bhabhakakomakiki bhakabhi elufu ishilini. 8Ngondo jakajaghani mu inchi jokapi, na bhandu bhamaheli bhakahweli mu chitengu kupeta hata bhandu bhala bhabhakakomakiki kwa lipanga kungondo.

9Bhela Abisalomu, koni akabya atami panani ja nyumbu waki, akahimangini na bhatumika bhaka Daudi. Nyumbu jeniheji pajakabhi jipeta pahi ja limbandi likolongwa la nkongu wa mwaloni, mmutu waka Abisalomu ukapatili palimbandi la mwaloni. Abisalomu akahighalili panipala koni ajenjela munani, nambu nyumbu joakabhi atami panani jaki akajendali na mwanja. 10Jumu wa bhandu bhanibhala paakaweni lijambu leniheli, akumpwaghi Yoabu, “Lingalyaje, numbweni Abisalomu akajenjala panani ja nkongu wa mwaloni!”

11Bhela Yoabu akumpwaghi mundu jonihoju, “Kyani? Ukumbweni Abisalomu? Bho, maghambu kiki ngacheukundapwi pala pala mbaka kuhabhuka pahi paluhombi? Ukahengiki bhenibhela nepani nakabya nukupeki ipandi komi ya madini gha feza na ulamba waka linjolinjoli mwana makili.”

12Nambu mundu jola akamuyangiki Yoabu, “Hata ngati nakabhi mbatiki ipandi elufu jimu ya madini gha feza mumabhoku ghangu, nganakahatambwi chiwoku changu kwaka mwana waka nkolongwa. Maghambu tukunjowini nkolongwa paakabhi akulaghalaki wehapa na Abishai, papamu na Itai, akapwaghaje, ‘Mundenda nkombu jola, Abisalomu kwa chiha kwa ndandi jangu.’ 13Nanatu ngati nakabhi nuntehi kunkoma, na wala njeta leliweza kuhiyakika kwaka nkolongwa, wehapa wamwete ukabya ulitengiki na nepani.”

14Bhela Yoabu akapwaghike, “Nepani ngachemi na chikahi cha kuhoa pambani na wehapa.” Panihapa akatoliki mipendi jitamu mumabhoku jaki, na kujenda kunhotola Abisalomu puntima, koni Abisalomu akabya akali mwomi akajenjala panani ja limbandi la nkongu wa mwaloni. 15Nabhombi bhatotola silaha komi bhaka Yoabu, bhakahikiki kumuyongalota Abisalomu, bhakundapwili na kunkoma.

16Bhela Abisalomu akalapwi lipenenga, nabhombi manjolinjoli bhakakotwiki kubhajengale bhandu bha Izilaeli, maghambu Yoabu akabhi abhahibhalakile. 17Bhakuntoliki Abisalomu, na kundekela mu libhomba likolongwa lelakabhi kuchitengu hoku, na kulundika lundu lukolongwa namaa lwa maganga panani jaki. Bhela bhandu bhokapi bha Izilaeli bhakatiliki, kila mundu ku nyumba jaki mweni.

18Chikahi Abisalomu paakabhi akali mwomi, akatoliki nguzu na kujijemeka ku Libondi laka Nkolongwa, ndandi akapwaghiki, “Nepani ngachemi na mwana wa chikambaku wa kulijendaleha lihina langu nahuli ngombukwaje.” Nguzu jeniheji akajipekihi lihina laki, na jakalowakiki, “Nguzu jaka Abisalomu,” mbaka lalenu.

Daudi apwaghakika kupotela kwaka Abisalomu

19Bhela, Ahimaasi mwana waka Sadoki akapwaghike, “Unyetakya nepani ngembala nakumpwaghila nkolongwa malobhi ghani kubha Bambo Chapanga ankombwili kuhuma mu makili gha maadui bhaki.”

20Yoabu akumpwaghi Ahimaasi, “Lalenu wehapa ngaupeleki ubholu. Uweza kupeleka ubholu ghonihoghu mu lichobha lengi. Nambu lalenu ngawipeleki ubholu wokapi ghola, maghambu mwana waka nkolongwa atehi kupotela.” 21Bhela Yoabu akumpwaghi mundu jumu Mkushi, “Ujenda ukumpwaghi nkolongwa lijambu lela leuliwene.” Mkushi jola akajinimi kwa utopelu palongu jaka Yoabu, na kubhoka kwa imbelu.

22Bhela, Ahimaasi mwana waka Sadoki, akumpwaghi kabhete Yoabu, “Chechibya chibyaje, chondi unyetakyaje na nepani nunkembalya Mkushi jola!”

Nambu Yoabu akumpwaghile, “Mwanango, maghambu kiki upala kujenda? Wehapa ngaupati nhupu jokapi jela kwa malobhi ghanihagha.”

23Ahimaasi akapwaghike, “Chechibya chibyaje, nepani mbala kukembela.”

Bhela Yoabu akumpwaghile, “Haya, ukembalaje.” Panihapa Ahimaasi akakembi imbelu, kwa kujengalela indela ja kuuwanda ja kuchingwenji, na kumpeta Mkushi jola.

24Bhela Daudi akabhi atami pachilanda ja milyangu mikolongwa jibheli ja muchi. Najombi mlonda wa ndyangu akakweliki mu lumatu lwa muchi mbaka panani, na paakalolakili wichu mihu ghaki akumbweni mundu akembe imbelu kanjika jaki. 25Mlonda jola akajamalili na kumpwaghi nkolongwa. Najombi nkolongwa akapwaghike, “Ngati anaabhi kanjika jaki, lazima kubhi na ubholu.” Najombi mundu jola akajendali kuheghale nakanopi.

26Mlonda jola akumbweni mundu jongi akembela, akundohiki kabhete mlonda wa ndyangu, akapwaghaje, “Lingalyaje, kubhi kabhete na mundu jongi atenda kuhika koni akembe imbelu!”

Nkolongwa akapwaghike, “Bhelabhela lazima anaakubha aleta ubholu unyahi.”

27Mlonda jola akapwaghike, “Mona kubha wa kutumbula jola akembe ngati Ahimaasi mwana waka Sadoki.”

Nkolongwa akapwaghike, “Jombi nde mundu wamboni, aleta ubholu wamboni.”

28Bhela Ahimaasi akundohiki nkolongwa, akapwaghaje, “Mambu ghokapi nde ghamboni!” Akachikimi na kujinama palongi jaka nkolongwa, akapwaghaje, “Alumbalikaje Bambo Chapanga, Chapanga waku, joakukombwi wehapa kuhuma kwa bhandu bhabhakwehiki mabhoku ghabhu kukupenga wehapa, wa bambo wangu nkolongwa!”

29Bhela nkolongwa akalalukile, “Bho, nkombu Abisalomu hoju le alama?”

Ahimaasi akayangike, “Chikahi Yoabu paakandumiki nepani nuntumika waku, nakaweni kukabhi na manjobhela ghamaheli, nambu ngachenamanyi ndandi jaki.”

30Najombi nkolongwa akapwaghike, “Ujema punkeghi, na ulendalya panihapa.” Bhela akaheghali punkeghi na kujema panihapa.

31Bhela Mkushi jola akahikiki na kupwagha, “Kubhi na ubholu wamboni, wa bambo wangu nkolongwa! Maghambu lalenu Bambo Chapanga akukombwili kuhuma mu makili gha bhandu bhokapi bhabhakajinwiki nahuli kukupenga wehapa.” 32Nkolongwa akundaluki nkombu jola, “Bho, nkombu Abisalomu le alama?”

Mkushi jola akayangike, “Maadui bhaku wehapa, wa bambo wangu nkolongwa, papamu na bhokapi bhabhajinuka nahuli kukuyonanga wehapa, na bhakubha ngati nkombu Abisalomu.”

33Panihapa nkolongwa akabhaghiji namaa. Akajingi mu chumba chechakabhi panani ja ndyangu ukolongwa na kulela. Paakabhi akwela, akabhi alela koni akapwaghaje, “Wa mwanangu Abisalomu, wa mwanangu Abisalomu! Ngati nakabya mbotili pandu paku wehapa! Abisalomu wa mwanangu! Wa mwanango!”