2 Samweli 19

Yoabu andakali nkolongwa Daudi

1Bhela Yoabu akapwaghakiki, “Nkolongwa Daudi alela na kuombuleza kwa ndandi jaka Abisalomu.” 2Bhela, kuweza kungondo kwa lichobha lenilela kukang'anambwiki kubha maombulezu kwa bhandu bhokapi, maghambu bhandu bhakajowini kubha nkolongwa andele mwana waki Abisalomu. 3Mu lichobha lenilela, bhandu bhakajingi mu muchi chinunu ngati bhandu mobhajingali mu muchi kwa iyoni, kwa ndandi ja kutila ngondo. 4Nkolongwa akayekali pamihu jaki na kulela kwa sauti ngolongwa, akapwaghaje, “Wenga wa mwanangu Abisalomu! Wa mwanangu Abisalomu! Abisalomu!”

5Bhela Yoabu akajingi munyumba jaka nkolongwa, na kupwagha, “Lalenu utupeki iyoni tepani tabhatumika bhaku bhokapi, tetughakengali matamu ghaku, matamu gha bhana bhaku bha chikambaku, matamu gha bhana bhaku bha chimbomba, matamu gha akabhahanu bhaku na matamu gha bhatumika bhaku bha chimbomba. 6Wehapa ubhapala bhala bhabhakuhakalila, na ubhahakali bhala bhabhakupala. Lalenu utulangihi hotu hotu kubha manjolinjoli bhaku bhakolongwa ngachetubhi na ndandi jokapi jela kwaku. Mona kubha lalenu, ngati Abisalomu akabhi mwoni, na tepani tabhokapi tukabhi tutehi kupotela, wehapa ukabya uhekalile. 7Bhela sajenu, upita kunja ukabhajeghala mtima bhandu bhaku. Ndandi napa kwaka Bambo Chapanga kubha, ngati ngaujendi kulonge nabhu, njeta hata jumu joanahighalya papamu na wehapa mbaka kuhika pakamihi ja lalenu. Haleli analikubha lijambu lihakau nakanopi kwaku wehapa kupeta mahakau ghokapi ghaghalabhali kukupata kutumbu ukombu waku mbaka sajenu.” 8Bhela, nkolongwa akapitiki, na kujenda kutama pachitehu chaki pambipi na ndyangu ukolongwa wa muchi. Bhandu pabhakapwaghakiki, “Nkolongwa atami pundyungu ukolongwa wa muchi,” bhokapi bhakunjendile.

Daudi akelabhuka ku Yelusalemu

Chikahi chenihechi Bhaizilaeli bhakabhi bhakembalili kila mundu kunyumba jaki. 9Bhandu bha makabila ghokapi gha Izilaeli, bhakabhi bhatenda kujojalanela bheni kwa bheni, bhakapwaghaje, “Nkolongwa Daudi akatukengalili kuhuma makili gha maadui bhitu, jombi nde joakatukengalili kuhuma mu makili gha Bhafilisti. Nambu sajenu ajitiliki inchi jenjenu kwa ndandi jaka Abisalomu. 10Najombi Abisalomu, jotukumpakiki mahuta nahuli akaubha nkolongwa witu, akomakiki kungondo. Henu maghambu kiki ngachetukolabhake lijambu lokapi lela panani ja kunkelabhu nkolongwa Daudi?”

11Bhela nkolongwa Daudi akatumiki ubholu aghoghu kwa bhapenganyambiku Sadoki na Abiasali, kupwagha, “Mubhalalukya ihongozi bha Yuda, ‘Bho, maghambu kiki bhombi bhakubha nde bha kujomukela kunkelabhu nkolongwa kunyumba jake? Kwa kubha malobhi gha bhandu bhokapi bha Izilaeli ghanhikili nepani nunkolongwa, nahuli kungelabhu nepani kunyumba jangu. 12Mwehapa nde bhalongu bhangu, inyama jangu na mwahi wangu namwete. Henu maghambu kiki mkubha bha kujomukela kungelabhu kabhete nepani nunkolongwa kunyumba?’ ” 13Bhelabhela mumpwaghila Amasa, “Bho, wehapa le nga undongu wangu wa pambipe? Chapanga na angomaje ngati nepani nganuntendi jombi kubha linjolinjoli wangu nkolongwa kutumbu lalenu pandu paka Yoabu!” 14Bhela, Daudi akajihutiki mitima ja bhandu bhokapi bha Yuda, ngati mundu jumu. Panihapa bhakumpelaki ubholu, kupwagha, “Ukelabhuka kunyumba, wehapa na bhatumika bhaku bhokapi.”

15Bhela, nkolongwa akakelawiki, na kuhika mbaka pu nkoka ya Yoludani. Nabhombi bhandu bhokapi bha Yuda bhakahikiki mbaka ku Giligali nahuli kujenda kunjopalela nkolongwa, na kundomboha nkoka Yoludani. 16Najombi Shimei mwana waka Gela, Mbenyamini, kuhuma ku muchi wa Bahulimu, akajombatiki papamu na bhandu bha Yuda nahuli kunjopale nkolongwa Daudi. 17Shimei akapiti papamu na Bhabenyamini elufu jimu. Najombi Siba, mtumika wa bhandu bha munyumba jaka Sauli, papamu na bhana bhaki komi, na bhatumika ishilini, bhakapiti manyata ku nkoka Yoludani, nahuli kundongule nkolongwa. 18Bhela, bhakalombwiki pa chilomboku nahuli kubhajangati bhandu bha munyumba jaka nkolongwa, na kubhalomboha na kutenda kila chindu cheakapaliki nkolongwa. Shimei mwana waka Gela, paakalombwiki nkoka Yoludani, akachikimi na kujinama ukutama palongi jaka nkolongwa. 19Shimei akumpwaghi nkolongwa, “Bambo wangu, chondi nukulobha ngawimalangi uhakau wala kukomboka lihoku lenakahengiki mu lichobha lela paukabhi ubhoka mu muchi wa Yelusalemu. Nukulobha ngaughabheka ghanighala muntima waku. 20Kwa ndandi nepani mtumika waku manyi kubha ndendiki lihoku. Nde ndandi lalenu mili wa kutumbula kuhuma mu likabila laka Yusufu, kuhika kukujopale wehapa wa bambo wangu, nkolongwa.”

21Bhela Abishai mwana waka Seluya akapwaghike, “Bho, Shimei le ngacheapalika kukomakeka, kwa kubha akumpeki masolu mpakwa mahuta waka Bambo Chapanga?”

22Nambu Daudi akapwaghike, “Mwenga mabhana bhaka Seluya, bho, nepani mi na kyani na mwehapa? Lalenu mbi maadui bhangu! Bho, lalenu kubhi na jokapi jola joanakumakika mu Izilaeli? Bho, nepani le ngachemanyi kubha lalenu nepani nde nunkolongwa wa Izilaeli jokapi?” 23Bhela nkolongwa akumpwaghi Seluya, “Wehapa ngaukomakeki.” Najombi nkolongwa akundaghi Shimei kwa kulapa.

24Bhelabhela Mefibosheti nchokolu waka Sauli, akahelili kujenda kunjopale nkolongwa Daudi. Kutumbu lichobha lela nkolongwa paakabhokiki mu Yelusalemu mbaka paakakelawiki lukwali, Mefibosheti ngacheakagholwi magholu ghaki, kumogha indehu yaki, wala kuchapa ingobhu yaki. 25Chikahi paakabhokiki ku Yelusalemu kujenda kunjopale nkolongwa, nkolongwa akumpwaghile, “Mefibosheti, bho, maghambu kiki ngachewapiti papamu na nepani?”

26Mefibosheti akapwaghike, “Wenga wa bambo wangu nkolongwa, mtumika wangu akatehi kungolowa. Ndandi nepani nuntumika waku nakumpwaghile, ‘Undandakya liponda langu, nahuli ndama panani jaki, nyendaje papamu na nkolongwa.’ Maghambu nepani nuntumika waku nde chilema wa magholu. 27Najombi akahikiki kungopunganela kwaku wehapa wa bambo wangu nkolongwa. Nambu wehapa wa bambo wangu nkolongwa, ubhi ngati mtumika waka kunani kwaka Chapanga. Bhela utenda lijambu lokapi lela leubhona kubha nde lamboni kwaku. 28Bhabhelakeka bhokapi bhaka tati wangu ngacheitupalika chindu chengi chokapi chela kuhuma kwaku nambu pe kukomakeka palongi jaku, wa bambo wangu nkolongwa. Nambu ukambeki nepani nuntumika waku mbekenyu pachilanda ja bhala bhabhakabhi bhakula pameza jaku. Bho, mi le haki jokapi jela ja kundele nkolongwa nakanopi ja ghanihagha?” 29Nkolongwa akayangike, “Bho, maghambu kiki ukolabheka nanope? Naghalaki wehapa na Siba ngabhana inchi jeniheji.”

30Bhela Mefibosheti akumpwaghi nkolongwa, “Umpwaghila atola kila chindu, maghambu sajenu bambo wangu nkolongwa, akelawiki kunyumba lukwali.”

31Balizilai, Mgileadi bhelabhela najombi akahelili kuhuma ku Logelimu, nahuli kujenda kulomboka nkoka Yoludani papamu na nkolongwa, na kunhindakila mbaka kwihi ja nkoka. 32Najombi Balizilai akabhi asejiki namaa, akabhi na hyaka semanini. Akabhi ampekihi nkolongwa ghala ghaaghapala nkolongwa mu chikahi chokapi paakabhi atama ku Mahanaimu hoku, ndandi akabhi na hindu yamaheli namaa. 33Bhela, nkolongwa akumpwaghi Balizilai, “Tamboka papamu na nepani ku muchi wa Yelusalemu, nanatu ananukughoha konihoku.”

34Nambu Balizilai akamuyangiki nkolongwa, “Bho, mile na hyaka hingi ya kutama, mbaka nyenda papamu na wehapa unkolongwa mbaka ku muchi wa Yelusalemu? 35Sajenu nepani mi na hyaka semanini. Bho, nhweza le kulekanisha pachilanda ja lelibhi lamboni na lelibhi lihakau? Bho, nepani nuntumika waku le nhweza kumanya kunogha kwa chilebhi chela chengula au chengunywa? Bho, nakali le nhweza kujowanela sauti ya bhajemba bha chikambaku na bha chimbomba? Bho, maghambu kiki nepani mtumika waku nyonjukya chibwahila kwaka bambo wangu nkolongwa? 36Nepani mtumika waku ananombuka nkoka Yoludani papamu na wehapa unkolongwa kwa lujendu lujipi pela, nambu maghambu kiki nkolongwa umbeke nhupu ngolongwa ntundu aghoghu? 37Nukulobha, nepani nutumika waku, unyetakyaje nhwelila mu muchi wangu, pambipi na litengeli laka tati wangu na mabhu wangu. Nambu mtumika waku Kimhamu ajoju, unjetakya ajenda papamu na wehapa wa bambo wangu nkolongwa, na ukuntendila jombi lijambu lokapi lela lewibhona kubha nde lamboni.”

38Bhela nkolongwa akumpwaghi Balizilai, “Kimhamu anaalombuka nkoka Yoludani papamu na nepani, nanatu ananunhengila lokapi lela leanalukunyambiha wehapa. Nanau chindu chokapi chela chewipala kuhuma kwangu nepani, ananukutendilaje.” 39Panihapa bhandu bhokapi bhakalombwiki nkoka Yoludani, najombi nkolongwa akalombwike. Nkolongwa akunjobhatili na kumpengalela Balizilai, najombi Balizilai akabhujiki kunyumba jaki.

Bhayuda na Bhaizilaeli bhalochana kwa ndandi jaka nkolongwa

40Bhela nkolongwa akalombwiki, na kujenda mbaka ku Gileadi, Kimhamu najombi akapiti papamu na nkolongwa. Nabhombi bhandu bhokapi bha Yuda na nusu ja bhandu bha Izilaeli, bhakunhindaki nkolongwa. 41Pachapetiki chikahi kichokopi, bhandu bhokapi bha Izilaeli bhakunjendi nkolongwa, na kumpwaghila, “Bho, maghambu kiki bhalongu bhitu, bhandu bha Yuda, bhunkelawihi nkolongwa kwa kulihiya panga kutupwaghila, na kundomboha kwihi ja nkoka Yoludani, jombi na bhandu bha munyumba jaki, papamu na bhandu bhokapi?”

42Bhela bhandu bhokapi bha Yuda bhakabhayangiki bhandu bha Izilaeli, “Tukahengiki bhenibhela maghambu nkolongwa nde ndongu witu wa pambipi. Bho, maghambu kiki muyoma kubhokana na lijambu leniheli? Bho, tepani le tukuliki chindu mu chikahi chokapi chela kwa malepu ghaka nkolongwa? Au, bho, atupeki le nhupu wokapi ghola?”

43Panihapa bhandu bha Izilaeli bhakabhayangiki bhandu bha Yuda, bhakapwaghaje, “Tepani tubhi na haki mala komi panani jaka nkolongwa Daudi, kupeta yembi nayu mwehapa. Henu maghambu kiki mtujojoha? Bho, tepani le ngachetabhi bha kutumbula kupwagha kubha nkolongwa witu akelabhuka kunyumba?” Malobhi gha bhandu bha Yuda ghakabhi makali kupeta malobhi gha bhandu bha Izilaeli.