2 Samweli 20

Sheba ang'anambuka Daudi

1Bhela, ku Giligali hoku kukabhi na mundu jumu muhakau namaa lihina laki akalowakiki Sheba mwana waka Bikili, Mbenyamini. Jombi akalapwi lipenenga na kujamali kwa sauti, akapwaghaje, “Ngachetubhi na pandu kwaka Daudi, wala ngachetubhi na pandu kwaka mwana waka Yese! Kila mundu ajendaje ku nyumba jaki, mwenga mabhandu bha Izilaeli!” 2Bhela bhandu bhokapi bha Izilaeli bhakundekiki Daudi na kunjengale Sheba joakabhi mwana waka Bikili. Nambu bhandu bha Yuda bhakabhi pambipi na nkolongwa wabhu mu mwanja wokapi kutumbu ku nkoka Yoludani mbaka kuhika ku Yelusalemu.

3Bhela chikahi Daudi paakakelawiki ku nyumba jaki ja kikolongwa ku Yelusalemu hoku, akabhatoliki bhatumika bha chimbomba komi bhaakabhi abhalekiki nahuli kujighoha nyumba ja kikolongwa na kubhabheka mkati ja nyumba najengi pahi ja ulingalilu wa manjolinjoli. Akabhaghohiki wichu, nambu ngacheakaghoni nabhu kihyegha. Akabhabhekiki muchifungu, na kutama ngati bhabhahweliwi na bhalomi bhabhu mbaka pabhakpotile.

4Bhela nkolongwa akumpwahi Amasa, “Ubhaloha bhandu bha Yuda bhahika pambani kwa machobha ghatatu, na wehapa wamwete ukubhaje.” 5Bhela Amasa akapiti kubhaloha bhandu bha Yuda, nambu mweni akakabhaki kukelabhuka mu chikahi chela cheakabhekiki nkolongwa. 6Daudi akumpwghi Abishai, “Henu, Sheba mwana waka Bikili, anaatuletila mang'ahiku nakanopi kuliku moakahengi Abisalomu. Ubhatola bhandu bhaka bambu waku na undondaje, nanga bhela anapata muchi ghoubhi na ngomi na kututila.” 7Bhela bhandu bha Yoabu, na Bhakeleti na Bhapelesi, papamu na bhakomana ngando bhabhabhi na makili bhokapi bhakabhokiki pahi ja ulonguheku waka Abishai. Bhakabhokiki ku Yelusalemu nahuli kundonda Sheba, mwana waka Bikili. 8Pabhakahiki ku litalaghu likolongwa ku Gibeoni hoku, Amasa akahikiki kubhajopalela. Yoabu akabhi awati ingobhu yaki ya kinjolinjoli, panani jaki akakongiki ulamba muchibhunu ghoukabhi na lipanga mkati ja ala. Paakabhi ajenda palongi, lipanga lela lakahawiki pahi kuhuma mu ala. 9Yoabu akumpwaghi Amasa, “Ujumwiki bholi, ndongu wango?” Bhela Yoabu akunkamwi Amasa indeu kwa chiwoku chaki cha kumalelelu nahuli ambuswaje. 10Nambu Amasa ngacheakaliweni lipanga lelakabhi mu mabhoku ghaka Yoabu, najombi Yoabu akunhotwi nalu mulutumbu, naghombi matumbu ghaki ghakapitiki kunja, na kupotela. Yoabu ngacheakunhotwi mala pabheli.

Bhela, Yoabu na ndongu waki Abishai bhakajendali kundonda Sheba, mwana waka Bikili. 11Jumu wa bhandu bhaka Yoabu akajemiki pambipi na hyegha jaka Amasa, na kupwagha, “Jokapi joampala Yoabu, na jokapi joampala Daudi, na anjengalyaje Yoabu!” 12Amasa akabhi aghalabhuka pa mwahi waki pachilanda ja indela ngolongwa, mundu jumu akaweni kubha lipogha lokapi la manjolinjoli lakabhi lijemiki panipala. Mundu hoju paakaweni kubha kila mundu joahika pandu panipala paakabhi Amasa akatehi kujema, akunhutini Amasa kuhuma pa indela ngolongwa pala mbaka kungonda, na kuhyekalela ingobhu panani jaki. 13Pabhakajomwi kubhoha hyegha jaka Amasa pa indela pala, bhandu bhokapi bhakapiti papamu na Yoabu kundonda Sheba, mwana waka Bikili.

14Sheba akapetiki mu makabila ghokapi gha Izilaeli mbaka ku muchi wa Abeli ja Beti Maaka na kupeta pandu pokapi pa Bhabikili ambabhu bhakalibhongini papamu na kunjengalela. 15Mapogha ghokapi gha ikosi yaka Yoabu yakahikiki na kumuyongolota Sheba, mwana waka Bikili ku muchi wa Abeli ja Beti Maaka hoku. Bhakauyongalwiti muchi kwa kubheka lipogha la manjolinjoli, nahuli kubombola lumatu na kuluhabhu pahi. 16Bhela, mbomba jumu joakabhi na mbulahu akajowaniki akapwaghaje kuhuma mu muchi, “Njowanyaje! Njowanyaje! Mumpwaghila Yoabu ahika pambani nahuli nongila naku.” 17Yoabu akapiti palongi jaka mbomba hoju, najombi mbomba hoju akundalukile, “Bho, wehapa le wa Yoabu?”

Yoabu akayangike, “Ena, nde nepani.”

Mbomba jola akumpwaghile, “Unyowanya malobhi ghanukupwaghi nepani nuntumika waku.”

Yoabu akumpwaghile, “Nukujowanela.”

18Mbomba hoju akajendali kupwagha, “Pamwandi hapa bhandu bhakabhi bhapwagha, ‘Bhakalonda mbulau ku muchi wa Abeli hoku.’ Bhenibhela nde ntundu bhandu mobhakawezi kujomo lijambu leling'aha. 19Nepani nde jumu wa bhandu bhala bhabhapala lukwali na ulongwana mu Izilaeli. Henu wehapa upala kuyonanga muchi ambahu nde ngati mabhu mu Izilaeli. Bho, maghambu kiki henu upala kuuyonanga muchi waka Bambo Chapanga mweni?”

20Yoabu akayangike, “Lijembu leniheli likubha kutali na nepani ng'o. Nepani ngachemi na ndandi ja kuumila wala kuuyonanga! 21Lilobhi leniheli ngachelibhi bhenibhela. Nambu mundu jumu kuhuma ku itombi yaka Efulaimu joalowakeka Sheba mwana waka Bikili, apala kumpenga nkolongwa Daudi. Mumpiha jonihoju kwangu nepani nanatu anamoka mu muchi ghoni.”

Mbomba jola akumpwaghi Yoabu, “Mmutu waki anamlekaliwa kunja kwa kupete panani ja lumatu lwa muchi.” 22Bhela, mbomba jonihoju akapiti kwa bhandu bhokapi mu muchi kwa mbolau yaki. Bhakunhekiti mmutu Sheba mwana waka Bikili, na kuhoma kunja kwaka Yoabu. Bhela, Yoabu akalapwi lipenenga, na kubhapechangana bhandu bhaki kuhuma mu muchi ghonihoghu, kila jumu wabhu akapiti kunyumba jaki. Bhela Yoabu akakelawiki kwaka nkolongwa, ku muchi wa Yelusalemu.

Bhajangatila bhaka nkolongwa Daudi

23Yoabu akabhi linjolinjoli nkolongwa wa manjolinjoli bhokapi bha Izilaeli, Benaya, mwana waka Yehoyada, akabhi chiongozi wa Bhakeleti na Bhapeleti. 24Adolamu akabhi chiongozi wa bhabhakabhi bhahenga lihengu la kujomalakewa, na Yehoshafati, mwana waka Ahihudi, akabhi mlemba wa kombukombu. 25Sheva akabhi mlemba, Sadoki na Abiasali bhakabhi bhapenganyambiku. 26Najombi Ila, kuhuma ku muchi wa Yaili, akabhi mpenganyambiku waka Daudi.