2 Samweli 21

Kukomakeka kwa bhabhelakeka bhaka Sauli

1Chakahi cha utawala waka Daudi kukabhi na injala kwa hyaka itatu ya kulongana, bhela Daudi akundobhiki Bambo Chapanga. Bambo Chapanga akapwaghike, “Nde kwa ndandi jaka Sauli na bhandu bha munyumba jaki bhakabhi na mahoku gha kukoma, kwa ndandi akabhakomiki Bhagibeoni.” 2Nkolongwa akabhalohiki Bhagibeoni na kulonge nabhu. Bhagibeoni ngachebhakabhi bhana bha Izilaeli, nambu bhakabhi mahighalilu gha Bhaamoli. Bhaizilaeli bhakabhi bhalapiki kubhaleka bhomi, nambu Sauli kwa wihu waki kwa ndandi ja Izilaeli na Yuda, akalengiki kubhayonanga. 3Daudi akabhalaluki Bhagibeoni, “Bho, nuntendila kike? Ndenda chindu bholi nahuli kutenda ujonganeshu, na mpata kujipengalela inchi jenjenu na bhandu bhaka Bambo Chapanga?”

4Bhagibeoni bhakayangike, “Lijambu litu tepani na Sauli papamu na bhandu bha munyumba jaki nga kwa ndandi ja madini gha feza au zahabu. Wala nga kwa ndandi jitu tepani kupala kunkoma mundu jokapi jola mu Izilaeli.”

Nkolongwa akabhalaluki kabhete, “Bho, henu mpala nuntendila kike?”

5Bhombi bhakamuyangiki nkolongwa, “Sauli akaholali kutukoma tepani na kutuyonanga, akapaliki ngaandeka mundu witu jokapi jola mu pandu pokapi pa Izilaeli. 6Bhela, utupekya bhana bhaki saba bha chikambaku nahuli tukabhakoma palanga palongi jaka Bambo Chapanga ku chitombi cha Gibea jaka Sauli, joakahaghuliwi na Bambo Chapanga.”

Bhela nkolongwa akapwaghike, “Ananumpekyaje.”

7Nambu nkolongwa akumuhiiki Mefibosheti, mwana waka Yonasani, nchokolu waka Sauli, ndandi akabhi alapiki palongi jaka Bambo Chapanga, pachilanda jaka Daudi na Yonasani, mwana waka Sauli. 8Nambu nkolongwa akabhatoliki bhana bhabheli ambabhu Lisipa, mwali waka Ahiya, akumbelaki Sauli, yani Alimoni na Mefibosheti, papamu na bhana bhokapi nhwanu bha chikambaku bhaka Mikali, mwali waka Sauli, ambabhu akumbelaki Adilieli mwana waka Balizilai, kuhuma ku Meholati. 9Bhana bhanihabha saba bha chikambaku Daudi akabhapekihi Bhagibeoni, nabhombi bhakabhajenjihi pachitombi palongi jaka Bambo Chapanga, na bhokapi saba bhakapoti papamu. Bhana bhanihabha bhakakomakiki mu utumbulilu wa mahunu gha shayili.

10Bhela, Lisipa mwali waka Ahiya akatoliki ingobhu ja ligunila, na kulitandakila panini ja litalaghu. Lisipa akatami panihapa kutumbu utumbulilu wa mahunu mbaka chikahi cha iyula pajakatonyiki panani ja hyegha ya bhandu bhabhakomakiki habha. Chikahi chenihechi chokapi Lisipa ngacheakailekiki hijuni ya kunani kuigusa hyegha heyi chikahi cha muhi, wala hinyama ya muchitengu chikahi cha ikilu.

11Bhela chikahi Daudi paakapwaghakiki chela cheakahengiki Lisipa mwali waka Ahiya, mtumika wa chimbomba waka Sauli, 12akapiti kuitola ihupa yaka Sauli na mwana waki Yonasani kuhuma kwa bhandu bha ku Yabeshi Gileadi. Bhakaitoliki kwa kulihiya kuhuma ku lubhanja lwa bhandu bhokapi bha ku Beti Shani hoku, pandu ambapu Bhafilisiti bhakabhi bhabhajenjihi pabhakajomwi kukomakeka na Sauli ku chitombi cha Giboa hoku. 13Daudi akailetiki ihupa yaka Sauli na Yonasani mwana waki, kuhuma konihoku, bhelabhela bhakaibhongini ihupa ya akakombu saba bhabhakabhi bhakomakiki na kuhomekwa panani. 14Bhela, bhandu bhaka Daudi bhakaitaghiki ihupa yaka Sauli na Yonasani mwana waki, mu litengeli laka Kishi, tati waka Sauli, ku Sela hoku mu inchi jaka Benyamini. Nabhombi bhakahengiki kila chindu ngati moakalaghalaki nkolongwa. Paghakapetiki ghanihagha, Chapanga akaghayangiki malobhu kwa ndandi ja inchi jabhu.

Ngondo na mibhandu ja Bhafilisti

1 Mambu gha Chikahi 20:4-8

15Bhela Bhafilisti bhakakomini kabhete na Bhaizilaeli. Najombi Daudi papamu na bhandu bhaki bhakahelili nahuli kukomana na Bhafilisti. Daudi akatondiki namaa mu lichobha leniheli. 16Najombi Ishi Benobu, jumu wa bhabhelakeka bha Bhalefai, ambaju kutopa kwa nkoha waki wa shaba ukabbhi kilu itatu na nusu, akabhi alikongiki lipanga lahenu, na akapwaghiki kubha anaankoma Daudi. 17Nambu Abishai mwana waka Seluya, akapiti kunkengale Daudi. Abishai akundapwi Mfilisti jola na kunkoma. Bhela, bhandu bhakundapi Daudi, bhakapwaghaje, “Ngawijendi kabhete na tepani kungondo, nanga bhela anauchuchuha taa ja ukolongwa mu Izilaeli.”

18Paghakapetiki ghanihagha, kukapitali kabhete ngondo na Bhafilisti ku Gobu hoku. Konihoku Sibekai, kuhuma mu lukolu lwaka Hushati, akunkomiki Safu, joakabhi jumu wa bhabhelakeka bha Bhaalefai.

19Panakatai, kukapitali kabhete ngondo na Bhafilisti ku Gobu hoku. Najombi Elihanani mwana waka Yaili, kuhuma ku Beselehemu, akunkomiki Goliati, Mgiti, ambaju mpini wa nkoha waki ukabhi ngati waka mloka.

20Panakatai, kukapitali kabhete ngondo ku Gati. Konihoku kukabhi na mundu jumu ndachu namaa, mundu jonihoju akabhi na ngonji sita mu kila libhoku ghaki, na ngonji sita mu kila ligholu laki, yokapi ikabhi ngonji ishilini na ncheche. Jonihoju najombi akabhi mbelakeka wa Bhalefai. 21Jonihoju najombi paakabhatondwi Bhaizilaeli, Yonasani mwana waka Shama, ndongu waka Daudi, akunkomike.

22Bhafilisti bhokapi ncheche habha bhakabhi mimundu ku muchi wa Gati hoku, nabhombi bhakakomakiki na Daudi, papamu na bhatumika bhaki.