2 Samweli 22

Lujembu lwa kuweza lwaka Daudi

Zabuli 18

1Bhela Daudi akunjembili Bambo Chapanga malobhi gha lujembu alolu ambapu Bambo Chapanga paakunkengalili kuhuma kwaka maadui bhaki bhokapi, kabheti kuhuma kwaka Sauli.

2Bhela akapwaghike, “Bambo Chapanga nde litalaghu langu,

ngomi jangu, na mkengalela wangu.

3Chapanga wangu nde litalaghu langu,

ambaju kwaki ngembalela,

Ngau jangu na linyelu la ukombola wangu.

Jombi nde ngomi jangu, likembalelu langu

na nkombola wangu,

4Nundoha Bambo Chapanga, jombi joapalika kulumbaliwa,

nanatu ngengalewa

kuhuma kwa maadui bhangu!”

5“Majegha gha kupotela ghakaniyongalwiti, machi ghamaheli gha kupwitukila,

gha uyonangeku ghakaniyekiti.

6Mighoji ja kuwawa jakaniyongalwiti,

miteghu ja kupotela ikangembalili.

7Mu mang'ahiku ghangu nakundohiki Bambo Chapanga,

nakundohiki Chapanga wangu kwa ujangatilu.

Kuhuma mu Nyumba jaki akajowini sauti jangu,

na chilelu changu chakunhikili mumakutu ghaki.

8Ndema ukabhaghiji na kunyukanyuka,

misingi ja kunani kumahundi jakatehi kunyukanyuka,

yakatehi kunyukanyuka maghambu Chapanga akatehi kuhakalila!

9Lyohi lakahukiki kuhuma muimbulu jaki,

moto ghouyonanga ukapitiki mundomu waki, na makalakala gha moto ghakalipwiki kuhuma kwaki.

10Chapanga akakutendiki kunani kumahundi kujinama, na akaheli pahi,

na mahundi mapili ghakabhi pahi ja magholu ghaki.

11Akatami panani ja ihumbi yeibhi na mapapanila,

na kugholoka kunani kwa mapapanilu gha mpongu.

12Akaliyongalutili lubhendu lihema laki la kumuyongolota,

chiyekalelu chaki chakabhi mahundi makolongwa gha kunani na malundikanu gha machi.

13Kubhokana na unang'anu ghoukabhi palongi jaki, makalakala gha moto ghakapambakike.

14Bambo Chapanga akalundamili kuhuma kunani kumahunde,

na sauti jaka Joabhi Kunani Nakanopi jakajowanike.

15Akalapwi mipendi na kubhagabhanya maadui,

akabhahomi unang'anu wa chitobhi na kubhatopola.

16Bambo Chapanga paakabhakenjukili,

kubhokana na mbomu ja muimbulu jaki,

mabondi gha bahali ghakayekuliwe,

na misingi ja ndema jakabhonakine.

17Akahatambwi chibhoku chaki kuhuma kunani kumahundi na kungamula,

na kumoha kuhuma mu machi ghamaheli.

18Akangengalili kuhuma kwaka adui wangu joabhi na makili,

akangengalili kuhuma kwa bhandu bhabhanhakalila,

maghambu bhakabhi na makili ghamaheli kupeta nepani.

19Bhakanhikili kunapula mu lichobha panakabhi mu mang'ahiku,

nambu Bambo Chapanga akabhi ujangatilu wangu.

20Akanetiki kunja pandu papabhi na lukwale,

akangengalili kwa kubha akanyambakiki na nepani.

21Bambo Chapanga akandendili kulengana na ulongwana wango,

akambeki nhupu ndandi mabhoku ghangu ngacheghakabhi na lihakau.

22Kwa ndandi nakaikamwi indela yaka Bambo Chapanga,

wala ngachenundekiki Chapanga wangu.

23Ndandi shelia yaki yokapi ibhi palongi jangu,

wala ngachengotwiki kughajengalela malaghalakilu ghaki.

24Ngachemi na lihakau palongi jaki,

na nililendiki nahuli nganitenda mahoku.

25Bambo Chapanga anepiki kulengana na ulongwana wango,

kwa kubha amanyi kubha ngechemi na lihakau palongi jaki.

26Kwaka mundu joabhi ndongwana ulangiha ulongwana kwaki,

na ulangiha wamboni kwaka mundu wamboni.

27Wehapa unkamilifu kwaka mundu joabhi mkamilifu,

nambu ulangi ukatile kwaka mundu muhakau.

28Wehapa ubhakengalela bhandu bhabhabhonewa,

nambu mihu ghaku ghabhalolakela bhabhabhi na ing'omu, nahuli kubhaheleya.

29Wenga wa Bambo Chapanga, nde taa jango,

na Bambo Chapanga alumulakila lubhendu lwango.

30Kwa ujangatilu waku nhweza kughatopola manjolinjoli gha maadui bhango,

anami papamu na Chapanga wangu, nhweza kuhomba lumatu.

31Indela yaka Chapanga nde ikamilike,

chilanga chaka Bambo Chapanga nde chakuhobhaleka!

Jombi nde ngau jabhu,

bhokapi bhabhunkembale jombi.

32Bho, nde nane joabhi Chapanga, nambu pe Bambo Chapanga kanjika jake?

Bho, nde nane joabhi litalaghu, nambu pe Chapanga wito?

33Chapanga nde ngomi jangu jejibhi na makili,

na ajitendiki indela jangu kubha lukwale.

34Aghatendiki magholu ghangu kubha ngati gha chinyama kulungu,

na anyangatili kujema pandu pangu papajinwike.

35Aghabholiki mabhoku ghangu kukomana ngondo,

hata mabhoku ghangu ghaweza kuupenda upendi wa shaba.

36Umbekihi ngau ja ukengaleku waku,

kwa ujangatilu waku ungwehiki nepani.

37Unenganakili mbekenyu indela jangu,

nahuli magholu ghangu ngaghinyelambuka.

38Nakabhajengalili maadui bhangu na kubhayonanga,

ngachenakelawiki kunyuma mbaka pabhakayonangike.

39Nakabhayoningi, na kubhahabhu pahi nahuli ngabhiweza kujema kabhete,

Ena, bhakahawiki pahi ja magholu ghango.

40Wehapa ukanyangatili makili gha kukomana ngondo,

bhela ukabhatendiki maadui bhangu kujinama palongi jangu.

41Ukabhatendiki maadui bhangu bhang'anambukaje na kutila,

nahuli bhala bhabhanhakalila nabhayonangaje.

42Bhakalondiki ujangatilu, nambu ngachepakabhi na mundu wa kubhajangatila,

bhakundeli Bambo Chapanga, nambu ngacheakabhayangike.

43Nakabhatimbiki ngati luhombi lwa ndema,

nakabhakanyiti na kubhapechangana ngati makandu gha muindela.

44Wehapa ungengalili kubhokana na malapuliku gha bhandu bhango,

unendiki nepani nahuli ngubha ngati chiongozi wa inchi yokapi.

Bhandu ambabhu ngachenabhamanyi bhatenda kundumakila.

45Bhagheni anabhahika kuliheleya kwangu,

na kwa kujowana pela malobhi ghangu bhakatehi kunitii.

46Nabhombi bhagheni anabhapotila mtima,

bhakapitiki kuhuma mu ngomi yabhu koni bhabhaghaja.

47Bambo Chapanga abhi mwomi! Alumbalikaje Litalaghu langu!

Alumbalikaje Bambo Chapanga, Litalaghu la ukengaleku wango.

48Jombi anyangatili kubhalapula maadui bhangu,

na kubhabheka bhandu bha inchi nayengi pahi jango.

49Angengalili kuhuma kwa maadui bhango.

Wenga wa Bambo Chapanga, ungwehiki panani ja maadui bhango,

na ungengalili kuhuma kwa bhandu bhabhabhi na ing'omo.

50Bhela, ananukulumbalyaje wa Bambo Chapanga, pachilanda ja inchi nayengi,

nanatu ananilijemba lihina lako.

51Chapanga ampekeha nkolongwa joanhawili ukengaleku ukolongwa,

andangiha chiha chaki jola joanhimiki kubha nkolongwa,

ena, kwaka Daudi na bhabhelakeka bhaki mileli.”