2 Samweli 23

Malobhi gha kujomulela ghaka Daudi

1Aghagha nde malobhi gha kujomulela ghaka Daudi: Nde ubholu waka Daudi mwana waka Yese, ubholu waka mundu ambaju Chapanga akuntendiki akubha nkolongwa. Chapanga waka Yakobo akunhawi Daudi kubha nkolongwa, na malobhi ghaki Bhaizilaeli bhakahekalili kughajemba.

2Roho waka Bambo Chapanga akalongi kupete kwangu nepani,

na akaghabhekiki malobhi ghangu mundomu wangu.

3Chapanga wa Izilaeli akapwaghike,

Litalaghu la Izilaeli akambwaghile,

“Mundu paatawala bhandu ngati moipalakila,

joatawala kwa kunjoghopa Chapanga,

4jonihoju nde ngati lyobha la lukela palipita, lukela jangakubha na mahundi,

ngati unang'anu baada ja iyula, ghoutenda manyonyoli kutundula kuhuma muluhombi.”

5Bhenibhela nde ntundu ambau Chapanga anaabhapengalya bhabhelakkeka bhangu,

maghambu atendiki na nepani lulaghilu lwa mileli,

lulaghilu ambalu ngalwihekateke,

lulaghilu ambalu ngalwing'anambuke.

Ndandi ghonihoghu nde ukengaleku wangu wokapi,

na utokulelu wangu wokapi.

6Nambu bhandu bhahakau bhokapi, nde ngati miha yeilekaleka,

maghambu ngacheiweza kukamulika kwa mabhoku.

7Kila mundu joanakamulaje miha yeniheyi,

anaimpalika kutumi choma au mpini wa nkoha. Nabhombi anabhajochakika nakanopi kwa mato.

Bhakomana ngondo bhana makili bhaka Daudi

1 Mambu gha Chikahi 11:10-41

8Aghagha nde mahina gha bhakomana ngondo bhana makili bhaka Daudi: Wa kutumbula akabhi Yoshebu Bashebeti, wa lukolu lwaka Takimoni, joakabhi chiongozi wa “Bhakomana ngondo bhana makili bhatatu,” jombi akakomini kwa nkoha waki, na kubhakoma bhandu mia nane kwa chikahi chimu.

9Wa kabheli akabhi Eleazali, mwana waka Dodai, wa lukolu lwaka Mwahohi. Lichobha limu Eleazali akabhi papamu na Daudi, chikahi pabhakabhi bhabhalongama Bhafilisti bhabhakabhi bhalibhongini kukomana ngondo ku Pasi Damimu hoku. Bhela bhandu bha Izilaeli bhakabhatiliki Bhafilisti. 10Nambu Eleazali akajemiki kwa ukangamalu na kukomana na Bhafilisti mbaka chiwoku chaki chakatondike na kulepalela kupenda, chakahighali chikamulaki pe lipanga. Mu lichobha leniheli Bambo Chapanga akabhajangatili kuweza kukolongwa. Baada ja kuweza kunihoku, ikosi ya manjolinjoli gha Bhaizilaeli bhakakelawiki pandu paakabhi Eleazali, na kuitola hindu kuhuma kwa Bhafilisti bhabhapotile.

11Nkomana ngondo mwana makili wa katatu akabhi Shama mwana waka Agee, kuhuma mu lukolu lwaka Halali. Bhafilisti bhakalibhongini ku Lehi hoku, pandu papakabhi na ngonda wa dengu yamaheli, nabhombi manjolinjoli bha Bhaizilaeli bhakabhatiliki Bhafilisti. 12Nambu Shama akajemiki kwa ukangamalu pachilanda ja ngonda ghonighola. Akalikomanili na kubhakoma Bhafilisti, najombi Bambo Chapanga akabhajangati kubhaweza.

13Bhela, bhakomana ngondo bhana makili bhatatu bhala pachilanda ja ihongozi selasini bhakahelili, na kunjende Daudi ku limbaku la ku Adulamu hoku. Chikahi chenihechi manjolinjoli gha Bhafilisti bhakabhekiki likambi labhu ku libondi la Bhalefai. 14Chikahi chenihechi najombi Daudi akabhi mungomi, na manjolinjoli gha Bhafilisti ghakabhi ku muchi wa Beselehemu. 15Daudi akaghatokuli machi, akapwaghike, “Ngati mundu akambeki machi gha kunywa kuhuma mu chilibha chekibhi pambipi na ndyangu ukolongwa wa muchi wa Beselehemu!” 16Bhakomana ngondo bhaki bhatatu bhana makili bhala, bhakalipekinyi pachilanda ja likambi la Bhafilisti, na kujenda kuteka machi mu chilibha chekibhi pambipi na Beselehemu, pambipi na ndyangu ukolongwa wa muchi, na kundetela Daudi. Nambu Daudi akakaniki kunywa machi ghanighala, akayajiti pahi nahuli kubha ngati nhupu kwaka Bambo Chapanga. 17Akapwaghike, “Wenga wa Bambo Chapanga, nepani ngacheimbalika kunywa machi aghagha ng'o! Bho, machi aghagha le nga ngati mwahi wa bhandu bhala bhabhahatalishi matamu ghabhu kwa kughaleta pambane?” Bhela, Daudi akakaniki kunywa machi ghanihagha. Aghagha nde mambu ghabhakahengiki bhakomana ngondo bhana makili bhatatu bhala.

18Bhela, Abishai ndongu waka Yoabu, mwana waka Seluya, akabhi nkolongwa bha bhakomana ngondo bhana makili selasini. Jombi akakomini kwa kutumila nkoha na bhandu mia itatu, akabhakomiki, na kulipati lujiniku pachilanda ja bhakomana ngondo bhana makili bhatatu bhala. 19Bho, jonihoju le ngacheakabhi na utopelu nakanopi pachilanda ja bhakomana ngondo bhana makili bhatatu bhala? Bhela jonihoju akabhi nde nkomana ngondo wabhu nkolongwa, nambu ngacheakabhalangiki pachilanda ja bhakomana ngondo bhana makili bhatatu bhala.

20Najombi Benaya, mwana waka Yehoyada, akabhi linjolinjoli mwana makili joakahengiki mambu ghamaheli gha kukangacha namaa. Akabhakomiki bhakomana ngondo bhana makili bhabheli kuhuma ku Moabu, na lichobha limu chikahi cha kuganda seluji, akajingi mulibhomba na kulikoma lihimba. 21Bhelabhela akunkomiki mundu jumu ndachu nkolongwa kuhuma ku Misili. Hata ngati Mmisili hoju akabhi na nkoha mumabhoku ghaki, nambu Benaya akunjendili koni akabya na ndonga pela. Akunyawili Mmisili jola nkoha waki, na kunkoma kwa nkoha waki mweni. 22Aghagha nde mambu ghaakahengiki Benaya mwana waka Yehoyada, najombi akalipati lujiniku pachilanda ja bhakomana ngondo bhana makili bhatatu bhala. 23Bhela, jonihoju najombi akabhi na lujiniku pachilanda ja bhakomana ngondo selasini bhala, hata ngati ngacheakabhi ngati bhakomana ngondo bhana makili bhatatu bhala. Daudi akumbekiki kubha chiongozi wa bhalonda bhaki.

24Pachilanda ja selasini bhala bhakabhi: Asaheli ndongu waka Yoabu, Elihanani mwana waka Dodo, kuhuma ku muchi wa Beselehemu, 25Shama na Elika, kuhuma mu lukolu lwaka Halodi, 26Helesi, kuhuma ku muchi wa Peloni, na Ila, mwana waka Ikeshi, kuhuma ku muchi wa Tekoa, 27Abiezeli, kuhuma ku muchi wa Anasosi, na Mebunai, kuhuma mu lukolu lwaka Hushati, 28Salimoni, kuhuma mu lukolu lwaka Ahohi, na Mahalai, kuhuma ku muchi wa Netofati, 29Heledi, mwana waka Baana, kuhuma ku muchi wa Netofati, na Itai, mwana waka Libai, kuhuma mu likabila laka Benyamini, 30Benaya, kuhuma ku muchi wa Pilatoni, na Hidai, kuhuma ku ikoka ya Gaashi, 31Abialimoni, kuhuma mu lukolu lwaka Alibati, na Azimaweti, kuhuma ku muchi wa Balihumi, 32Eliaba, kuhuma ku muchi wa Shaaliboni, na bhana bha chikambaku bhaka Yasheni, Yonasani, 33mwana waka Shama, kuhuma ku muchi wa Halali, na Ahimu mwana waka Shalali, kuhuma ku muchi wa Halali, 34Elifeleti mwana waka Ahasibai, na Hefeli kuhuma ku muchi wa Maaka, na Eliamu mwana waka Ahitofeli, kuhuma ku muchi wa Giloni, 35Hezilo, kuhuma ku muchi wa Kalimeli, na Paalai, kuhuma ku muchi wa Alibi, 36Igali, mwana waka Nasani, kuhuma ku muchi wa Soba, na Bani, kuhuma mu likabila laka Gadi, 37Zeleki, kuhuma kwa bhandu bhaka Amoni, Nahalai, kuhuma ku Beeloti, joakabhi mtotola wa silaha yaka Yoabu, mwana waka Seluya, 38Ila na Gelubi, kuhuma ku muchi wa Itili, 39na Ulia, Mhiti. Bhandu bhokapi kwa papamu bhakabhi selasini na saba.