2 Samweli 24

Daudi abhabhalanga Bhaizilaeli

1Bhela Bambo Chapanga akabhayomi kabhete bhandu bha Izilaeli, najombi akunkokaki Daudi kupeleka mang'ahiku pachilanda jabhu, akapwaghaje, “Ujenda ukabhabhalanga bhandu bha Izilaeni na bhandu bha Yuda.” 2Bhela nkolongwa akumpwaghi Yoabu, papamu na manjolinjoli bhakolongwa bhaakabhi nabhu, “Njenda kwa makabila ghokapi gha Izilaeli kutumbu ku muchi wa Dani mbaka ku muchi wa Beeli Sheba, mkabhabhalanga bhandu, nahuli mbata kumanya ubhalangiku wabhu.”

3Nambu Yoabu akamyangiki nkolongwa, “Bambo Chapanga, Chapanga waku, na ajonjukya manjolinjoli mala mia kupeta mobhabheli sajenu, naghombi mihu ghaka bambo wango nkolongwa na ghabhona haleli. Nambu, maghambu kiki bambo wangu nkolongwa anyambakiki na lijambu haleli?” 4Nambu, lilobhi laka nkolongwa lakabhi na makili panani jaka Yoabu, papamu na manjolinjoli bhakolongwa bha linjolinjoli, bhela bhakabhokiki palongi jaka nkolongwa, na kujenda kubhabhalanga bhandu bha Izilaeli.

5Pabhakalombwiki nkoka Yoludani, bhakabhekiki likambi labhu pambipi na Aloeli, muchi ghoubhili kunkachi ja libondi lipepandau, lelijenda ku Gadi, mbaka ku muchi wa Yezeli. 6Bhela kuhuma panihapa bhakapiti mbaka ku muchi wa Gileadi, na kuhika mbaka ku muchi wa Bhahiti ku Kadeshi hoku, na kubhoke panihapa bhakajendalili mbaka ku muchi wa Dani Yaani, na kuhyongolota kujenda ku muchi wa Sidoni. 7Bhela bhakabhokiki na kujenda ku ngomi ja Tilo, papamu na michi jokapi ja Bhahivi na michi ja Bhakanaani. Pakujomulela, bhakapiti ku nkachi ja Yuda, muchi ghoubhi ku Beeli Sheba. 8Pabhakajomwi kupeta mu inchi jokapi, bhakakelawiki ku muchi wa Yelusalamu pajakapetiki myehi tisa na machobha ishilini. 9Yoabu akabhoiki ubhalangiku wa manjolinjoli kwaka nkolongwa: Mu Izilaeli kukabhi na bhandu laki nane, bhabhakabhi na uwezu wa kukomana kwa kutumi mapanga, na mu Yuda kukabhi na bhandu laki nhwanu.

10Nambu Daudi akang'ahakiki namaa muntima waki paakajomwi kubhabhalanga bhandu. Bhela, Daudi akumpwaghi Bambo Chapanga, “Nhengiki lihoku likolongwa kwa kuhenga lijambu aleli. Wenga wa Bambo Chapanga, chondi nukulobha, unekakya nepani nuntumika waku, maghambu nhengiki lijambu la king'ang'a namaa.”

11Bhela Daudi paakajumwiki chilabhu jaki lukela, Bambo Chapanga akumpwaghi mlota Gadi, joakabhi mlola wa mambu ghaka Daudi, kupwagha, 12“Ujenda ukumpwaghila Daudi, ‘Anana nde moapwaghi Bambo Chapanga: Ananukupekya wehapa mambu ghatatu gha kuhaghula, nanau uhaghula lijambu limu laki, nanatu ananukuhengilaje.’ ” 13Bhela, Gadi akunjendi Daudi, na kumpwaghila, “Bho, upala le injala ja hyaka itatu jihika mu inchi jako? Bho, au upala le wehapa ubhatila maadui bhaku kwa myehi jitatu, koni bhukujengalela? Bho, au upala le kukubha na machobha ghatatu ambapu mu inchi jaku kukubha na itamu ihakau? Bhela, uholalyaje na umbekya liyangu nahuli numpelakya jola joandumike.”

14Bhela, Daudi akamuyangiki Gadi, “Nyingili mu mang'ahiku makolongwa namaa! Nambu nde mbanga kulapulika na Bambo Chapanga, maghambu chihomu chaki nde chikolongwa namaa, kuliku kulapulika na bhandu.” 15Bhela, Bambo Chapanga akabhaletili Bhaizilaeli chitamu chihakau, kutumbu lukela mbaka chikahi chechipangakike. Bhandu elufu sabini bhakapotili mu inchi jokapi kutumbu ku Dani mbaka ku Beeli Sheba. 16Nambu chikahi mtumika wa kunani kwaka Chapanga paakahatambwi chiwoku chaki kujenda ku muchi wa Yelusalemu nahuli kuuyonanga, Bambo Chapanga akang'anambwi maholalelu ghaki. Chapanga akumpwaghi mtumika wa kunani joakabhi ahenga lijambu leniheli la kubhayonanga bhandu, “Ijaghanila! Ukelabhuha chiwoku chaku.” Chikahi chenihechi mtumika wa kunani kwaka Chapanga akabhi ajemiki palubhanja lwa kupumundi mahunu lwaka Alauna, Myebusi.

17Bhela Daudi paakumbweni mtumika wa kunani joakabhi abhakoma bhandu hoju, akumpwaghi Bambo Chapanga, “Lingalyaje, nepani nde nemi na mahoku na nenhokie. Bhandu abhabha bhanyengali nepani ngati mambeleleli ghaghunjengale mdima. Bho, bhahengiki kike? Chondi nukulobha unapula nepani, papamu na bhandu bha munyumba jaka tati wango.”

18Mu lichobha leniheli Gadi akunjendi Daudi, na kumpwaghila, “Ukwelaje, ukunchengila Bambo Chapanga pandu pa kubhokeha nyambiku ku chibhanja cha kupumundi mahunu ghaka Alauna, Myebusi.” 19Bhela, Daudi akakweliki na kuhenga ngati Bambo Chapanga moakalaghalakile kupetela kwaka Gadi. 20Chikahi Alauna paakalingali kumochu akumbweni nkolongwa akahikaje koni akabya na bhatumika bhake, najombi akabhokiki, na kujenda kunchikamila ukutama, akajinimi mbaka pahi paluhombe. 21Panihapa Alauna akundaluki nkolongwa, “Bho, maghambu kiki bambo wangu nkolongwa anhiki nepani nuntumika wako?”

Daudi akayangike, “Nhikiki kuhemela lubhanja lwaku lwa kupumundila mahunu, nahuli nunchengila Bambo Chapanga pandu pa kubhokeha nyambiku, nahuli chitamu chechabhakamwi bhandu chabhabhokaje.”

22Alauna akumpwaghi Daudi, “Bambo wangu nkolongwa, utolaje chokapi chela cheubhona kubha chipalika kwa kubhokeha nhupu. Nepani anamohaje mapongu gha ng'ombi aghagha kwa ndandi ja nyambiku ja kujochakeka, na mikongu ajeji ja kupumundila, na nila ya ng'ombi kubha hanjo.” 23Wenga nkolongwa, hindu ayeyi yokapi nepani ndenda kukupekeha. Bhelabhela Alauna akumpwaghi nkolongwa, “Bambo Chapanga waku na ajopalyaje nyambiku jaku kwa wambone.”

24Nambu nkolongwa akumpwaghi Alauna, “Ngabhela! Wehapa ngawimbekehi chokapi chela. Nepani ananhemala kuhuma kwaku kwa samani jokapi jela. Nganumbokehi Bambo Chapanga, Chapanga wangu, nyambiku ambaju ngachenijihengi chindu chokapi chela.” Bhela, nkolongwa Daudi akahemi lubhanja lwa kupumundi mahunu lola na mapongu gha ng'ombi kwa ipandi hamsini ya madini gha feza. 25Bhela, Daudi akunchengi Bambo Chapanga pandu pa kubhokeha nyambiku, na nhupu ya kutama kwa lukwale pandu panihapa. Panihapa Bambo Chapanga akaghajetakili malobhu kwa ndandi ja inchi, na chitamu chihakau chechakabhapatiki Bhaizilaeli chela chakabhabhokike.