1 Bhakolongwa 1

Nkolongwa Daudi paakabhi mzee

1Chikahi nkolongwa Daudi paakabhi mzee nakanopi, bhatumika bhaki bhakamuyekiki libulangeti, nambu hata bhela ngacheakapatiki upyohu. 2Bhela bhatumika bhaki bhakumpwaghi, “Bambo witu, nde mbanga tundonda mwali bikila akutumakya unkolongwa na kukughoha. Mwali hoju aweza kughonela punkeghi jaku nahuli bambo witu nkolongwa upata upyohu.” 3Bhela, bhakundondiki mwali mnyahi ku inchi jokapi ja Izilaeli. Bhakumpatiki mwali jumu mnyahi joakalowakiki Abishagi, kuhuma ku muchi wa Shunami, nabhombi bhakumpeliki kwaka nkolongwa. 4Mwali bikila hoju akabhi mnyahi namaa, bhela akatumbwili kungoha nkolongwa na kuntumakila, nambu nkolongwa ngacheakaghoni naku kihyegha.

Adoniya atokulela ukolongwa

5Chikahi chenihechi, Adoniya, mwana waka Daudi, ambaju mabhu waki akalowakiki Hagiti, akalighambiki na kupwagha, “Nepani anangubha nunkolongwa.” Bhela akabhekiki wichu magali gha kuhutakika na falasi na bhabhajendesha falasi, papamu na bhandu hamsini bhabhakabhi bhundongulela palongi jaki. 6Nambu Daudi tati waka Adoniya, akabhi ngacheakalabhali kundakalila mwana waki hoju hata mala punkamu wala kundalukila, “Bho, maghambu kiki utenda anana?” Adoniya akabhi nkombu mnyahi namaa, na akunjengali Abisalomu kwa kubhelakeka. 7Adoniya akajetanganili na Yoabu, mwana waka Seluya, na mpenganyambiku Abiasali, nabhombi bhakajetakili kunjangatila. 8Nambu mpenganyambiku Sadoki, na Benaya mwana waka Yehoyada, na mlota Nasani, Shimei, Lei, papamu na bholonda bhaka Daudi ngachebhakabhi upambala waka Adoniya.

9Lichobha limu, Adoniya akabhohiki nyambiku ya mambeleli, ng'ombi na matoli ghaghanenipi pa Liganga la Zoheleti, lelibhi pambipi na chemichemi jejilowakeka Eni Logeli. Akabhalohiki bhalongu bhaki bhokapi, bhana bhokapi bhaka nkolongwa na ihongozi bhokapi bha likabila laka Yuda na bhatumika bhaka nkolongwa, 10nambu Adoniya ngacheakundohiki mlota Nasani, Benaya, bhalonda bhaka nkolongwa, wala Solomoni ndongu waki.

Solomoni ahimikwa kubha nkolongwa

11Panihapa, Nasani akapiti kwaka Batisheba, mabhu waka Solomoni na kundulukila, “Bho, ngacheujowini kubha Adoniya, mwana waka Hagiti, abhi nkolongwa panga bambo witu Daudi kumanya lijambu lenihele? 12Bhela ngati anaupala kughakengalela matamu ghaku na matamu ghaka mwana waku Solomoni, nukupwaghi anana: 13Unjendila nkolongwa Daudi na kumpwaghila, ‘Bambo wangu nkolongwa, bho, ngachewanapili nepani mtumika waku, ukapwaghaje, “Chakaka mwana waku Solomoni anakubha nkolongwa pandu pangu, na jombi nde jonaatamaje panani ja chitehu changu cha ukolongwa?” Bho, henu maghambu kiki Adoniya abhi nkolongwa?’ ” 14Nasani akajendali kupwagha, “Lingalyaje, chikahi pawikubha ulonge na nkolongwa Daudi, nepani ananyingalaje na kughalandila kwa uchakaka malobhi ghaku.”

15Bhela, Betisheba akapiti kumbona nkolongwa kuchumba chaki, chikahi hechi nkolongwa akabhi mzee namaa. Abishagi, kuhuma ku muchi wa Shunami, akabhi antumakila. 16Betisheba akajinimi na kuchikama palongi jaka nkolongwa. Najombi nkolongwa akundalukile, “Upala kike?”

17Betisheba akamuyangiki, “Bambo wangu, wehapa wamweti ukanapili nepani mtumika waku kwaka Bambo Chapanga, Chapanga waku, ukapwaghaje, ‘Solomoni mwana waku anaakubha nkolongwa pandu pangu, na nde jonaatamaje pa chitehu changu cha ukolongwa.’ 18Nambu lingalyaje, Adoniya abhi nkolongwa, na wehapa, bambo wangu nkolongwa ngacheumanyi mambu ghanihagha. 19Abhohiki nyambiku yamaheli ya ng'ombi, matoli ghaghanenipi na mambeleli, najombi abhakokiki bhana bhaku bhokapi, mpenganyambiku Abiasali, na Yoabu nkolongwa wa manjolinjoli, nambu ngacheankokiki mtumika waku Solomoni. 20Bambo wangu nkolongwa, mihu gha Bhaizilaeli bhokapi ghakulingalila wehapa nahuli ubhapwaghilaje jola jonaatamaje panani ja chitehu chaku pandu paku, wenga wa bambo wangu nkolongwa. 21Ngati ngabhela, chikahi pela pawikubha upotili na kutaghakika pandu pabhakataghakiki akatati bhaku, nepani na mwana wangu Solomoni anatubhalangika kubha bhana mahakau.”

22Bhela, chikahi Betisheba paakabhi akona kulonge na nkolongwa, mlota Nasani akahikike. 23Bhakumpwaghi nkolongwa, “Mlota Nasani abhi pambane.” Panihapa mlota Nasani akapiti palongi jaka nkolongwa, akajinimi ukutama na kuchikama mbaka pamihu jaki jakagusiki paluhombi. 24Nasani akapwaghike, “Wenga wa bambo wangu nkolongwa, bho, utangizi le kubha Adoniya anakubha nkolongwa pandu paku na kubha anaatama pachitehu chaku cha ukolongwa? 25Maghambu lalenu ahelili na kubhoha nyambiku yamaheli ya ng'ombi, matoli ghaghanenipi na mambeleli. Najombi abhakokiki bhana bhaku bhokapi, nkolongwa wa manjolinjoli na mpenganyambiku Abiasali. Sajenu, bhatenda uwangalalu na kujamalila bhakapwaghaje, ‘Atamaje matamu malachu, nkolongwa Adoniya!’ 26Nambu nepani mtumika waku, mpenganyambiku Sadoki, Benaya mwana waka Yehoyada, na mtumika waku Solomoni ngacheatukokike. 27Bho, ghokapi hagha le ughahengiki wehapa wa bambo wangu nkolongwa, panga kutumanyiha tepani bhatumika bhaku mundu joanatama pa chitehu chaka bambo wangu nkolongwa baada jako?”

28Panihapa nkolongwa Daudi akapwaghike, “Munohilaje Betisheba, ajingala mkati.” Betisheba akapiti kwaka nkolongwa na kujema palongi jaki. 29Najombi nkolongwa akalapiki akapwaghaje, “Chakaka ngati Bambo Chapanga moatamila, joangengalili kuhuma mu mang'ahiku ghangu ghokapi, 30chakaka ananhenga lalenu bhela chela chenakakulapile kwaka Bambo Chapanga, Chapanga wa Izilaeli nakapwaghaje, ‘Mwana waku Solomoni anakubha nkolongwa pandu pangu,’ najombi anatama pa chitehu changu cha ukolongwa badala jangu.”

31Bhela Betisheba akajinimi na kuchikama palongi jaka nkolongwa mbaka chibhongi chaki chakagusiki paluhombi, akapwaghaje, “Bambo wangu nkolongwa Daudi na utama mileli!”

32Nkolongwa Daudi akapwaghike, “Munohilaje mpenganyambiku Sodoki, mlota Nasani na Benaya mwana waka Yehoyada.” Nabhombi pabhakahikiki palongi jaka nkolongwa, 33nkolongwa akabhapwaghile, “Njendaje na bhatumika bhangu nepani bambo winu, mukuntamika mwana wangu Solomoni panani ja liponda langu, na mukumpelaka mbaka ku chemichemi ja Gihoni. 34Konihoku mpenganyambiku Sodoki na mlota Nasani bhunjeghala mahuta nahuli kunhimika kubha nkolongwa wa Izilaeli. Bhela, muhona mbata na njamalyaje kwa sauti ngolongwa, mkapwaghaje, ‘Nkolongwa Solomoni na atama matamu malachu!’ 35Ananjomwi kutenda ghanihagha, mwikwela papamu naku, najombi anahika na kutama pa chitehu changu cha ukolongwa na kutawala pandu pangu. Jonihoju nde jonunhawili kubha mtawala wa Izilaeli na Yuda.”

36Panihapa Benaya, mwana waka Yehoyada, akamuyangiki nkolongwa, “Amina! Bambo Chapanga, Chapanga waku wehapa wa bambo wangu nkolongwa, na alitenda haleli lihengakikaje. 37Ngati bhela Bambo Chapanga moakabhelili na bambo wangu nkolongwa, bhela bhela na akubha na Solomoni, na kuchitenda chitehu chaki cha ukolongwa kubha chikolongwa kupeta chela chaka bambo wangu nkolongwa Daudi!”

38Bhela, mpenganyambiku Sodoki, mlota Nasani, Benaya mwana waka Yehoyada, Bhakeleti na Bhapeleti bhabhakabhi bhalonda bhaka nkolongwa, bhakunkwehiki Solomoni panani ja liponda laka nkolongwa Daudi, nabhombi bhakunhindaki mbaka ku chemichemi ja Gihoni. 39Mpenganyambiku Sodoki akatoliki linyelu lelakabhi na mahuta kuhuma mu Lihema Lihuhu na kunjeghe Solomoni mahuta. Panihapa bhakahoniki mbata na bhandu bhokapi bhakajamalili kwa sauti ngolongwa, bhakapwaghaje, “Nkolongwa Solomoni na atama matamu malachu!” 40Bhela, bhandu bhokapi bhakakweliki koni bhakunjengalyaje, bhakabhi bhahona filimbi na kuhekalela namaa, mbaka inchi jakanyukiki kwa sauti yabhu.

41Bhela, Adoniya papamu na bhagheni bhokapi bhabhakabhi papamu naku bhakajowini sauti heji pabhakabhi bhajomulela uwangalalu wabhu. Pabhakajowini sauti ja mbata, Yoabu akalalukile, “Bho, manjobhela ghanihgha ghabhi na ndandi ja kike kumbwani hoko?” 42Najombi paakabhi alongela ghanihagha, Yonasani mwana waka mpenganyambiku Abiasali akahikike. Adoniya akapwaghike, “Ujingala mkati. Maghambu wehapa nde mundu wambone, uleta malobhi ghamboni.”

43Panihapa Yonasani akamuyangiki Adoniya, “Ngabhela, chakaka nkolongwa Daudi bambo witu anhimiki Solomoni kubha nkolongwa. 44Nkolongwa antumiki papamu na mpenganyambiku Sadoki, mlota Nasani, Benaya mwana waka Yehoyada, Bhakeleti na Bhapeleti bhalonda bhaka nkolongwa, nabhombi bhunkwehiki panani ja liponda laka nkolongwa. 45Bhela mpenganyambiku Sadoki na mlota Nasani bhunjeghi mahuta Solomoni ku chemichemi ja Gihoni hoku, nahuli akubha nkolongwa. Kutumbula panihapa bhajendalela kuhekalela na sauti ijaghanili pambwani pokapi. Jeniheji nde ndandi ja njobhela yeujowana. 46Nakanopi ja ghanihagha, sajenu Solomoni atami panani ja chitehu cha ukolongwa. 47Bhelabhela bhatumika bhaka nkolongwa bhahikiki nahuli kumpengalela bambo witu nkolongwa Daudi bhakapwaghaje, ‘Chapanga waku na alitendaje lihina laka Solomoni limanyikanaje nakanopi kupeta laku, na chitehu chaki cha ukolongwa chibya na makili kupeta chaku!’ Najombi nkolongwa akajinimi na kujojabhela panani ja chitanda chaki. 48Na alobhiki akapwaghaje, ‘Alumbalikaje Bambo Chapanga, Chapanga wa Izilaeli, joantendiki jumu wa bhabhelakeka bhangu kubha nkolongwa pandu pangu, na joambeki matamu mbaka naghaweni aghagha ghapitalila.’ ”

49Bhela, bhagheni bhokapi bhabhakabhi papamu na Adoniya bhakajowipi namaa, bhakapechangini kwa choghoi, kila mundu na indela jaki. 50Nambu Adoniya kwa kunjoghopa Solomoni, akapiti na kujingi mu Lihema laka Bambo Chapanga na kukamula mu manyelu gha meza ja maganga ja kubhokeha nyambiku. 51Nkolongwa Solomoni akapwaghakike, “Adoniya anjoghopa nkolongwa Solomoni na akamulakili mu manyelu gha meza ja maganga ja kubhokeha nyambiku, akapwaghaje, ‘Nkolongwa Solomoni na anapila lalenu kubha ngaankomi mtumika waki kwa lipanga.’ ”

52Solomoni akayangike, “Ngati ananumbweni kubha nde mtumika ndongwana, njeta hata lijunju laki leanalihabhuka panani ja luhombi, nambu ngati uhakau anaubhonakini mkati jaki, anapotilaje.” 53Bhela, nkolongwa Solomoni akabhatumiki bhandu kundoha Adoniya kuhuma mu Lihema, bhakumbohiki kuhuma pandu pa meza ja maganga ja kubhokeha nyambiku. Najombi Adoniya akahiki palongi jaka nkolongwa, na kunjinamila nkolongwa Solomoni kwa utopelu. Nkolongwa akumpwaghi Adoniya, “Ujenda kunyumba jaku.”