1 Bhakolongwa 2

Daudi ampeke Solomoni malaghalakilu gha kujomulela

1Chikahi Daudi paakaheghali kupotela, akundohiki mwana waki Solomoni na kumpeke lilaghalakilu, akapwaghaje: 2“Mwanango, ngati moubhelili ntetu kwa ihumbi yokapi kupotela, machobha ghangu ghajomwike. Bhela ukangamalaje na ukubha na makile. 3Ukamulaje malaghalakilu ghaka Bambo Chapanga, Chapanga waku: Ujendaje mu indela yaki, ukamula malaghalakilu na amuli yaki, shelia yaki na ndemulu yaki, ngati moilembakiki mu Shelia yaka Musa, nahuli upata kuneng'anela mu mambu ghokapi ghautenda na pokapi paujenda, 4nahuli Bambo Chapanga awezaje kulangiha chilanga chaki cheakabhohiki chikahi paakambwaghile, ‘Ngati bhana bhaku anabhakamwili amuli yangu na kundumakila kwa ulongwana, kwa mitima jabhu jokapi na kwa roho yabhu yokapi, ngapilepi kubha na jumu wabhu wa kutawala mu Izilaeli ng'o.’

5“Nakanopi ja ghanihagha, wehapa ughamanyi mambu ghala ghaakahengiki Yoabu, mwana waka Seluya, ntundu moakabhahengile manjolinjoli bhakolongwa bhabheli bha Izilaeli, Abineli mwana waka Neli, na Amasa mwana waka Yeteli. Akabhakomiki chikahi cha lukwali koni akapala kulepa kisasi ngati kubha bhakabhi mu chikahi cha ngondo. Akabhakomiki bhandu bhangakubha na hatia, na sajenu nepani mbata lawama kubhokana na chitendu chaki cheakahengiki hechi, na kunetela mang'ahiku. 6Bhela, wehapa unhengilaje lijambu lela leubhona kubha nde lamboni kwaku, nambu ngawandeka kusejeka na kupotela kwa lukwali.

7“Nambu ubhatendila ghamboni bhana bhaka Balizilai wa ku muchi wa Gileadi na ubhabhekaje bhakubha pachilanda ja bhala bhabhakula chilebhi pameza jaku. Kwa ndandi bhakandendili ghamboni chikahi panakabhi nuntila ndongu waku Abisalomu.

8“Ukombukaje, ubhi naku Shimei mwana waka Gela, Mbenyamini kuhuma ku Bahulimu, ambaju akambeki masolu namaa mu lichobha lenakapiti ku muchi wa Mahanaimu. Paakahelili kunyopalela ku nkoka Yoludani hoku, nakundapili kwaka Bambo Chapanga, ‘Nepani nganukukomi kwa lipanga!’ 9Nambu wehapa ngawandeka panga kuntemula. Wehapa nde wa mundu weubhi na malangu, anaumanya lijambu la kuntendela. Unkomaje hata ngati jombi atehi kusejeka.”

Kupotela kwaka Daudi

10Bhela, Daudi akapotili, najombi akataghakiki mu muchi ghoukalowakiki muchi Daudi. 11Daudi akatawili mu inchi ja Izilaeli kwa hyaka alobaini: Ku Hebuloni hoku akatawili kwa hyaka saba, na mu Yelusalemu akatawili kwa hyaka selasini na itatu. 12Bhela, Solomoni akatami pa chitehu cha ukolongwa badala jaka tati waki Daudi, na ukolongwa waki ukajemakakili namaa.

Kupotela kwaka Adoniya

13Bhela, Adoniya, mwana waka Hagiti, akapiti kwaka Betisheba, mabhu waka Solomoni. Betisheba akundalukile, “Bho, uhikiki le kwa lukwale?”

Adoniya akayangike, “Ena, nhikiki kwa lukwale.” 14Nambu, “Mili na lilobhi limu pela la kukupwaghila.”

Betisheba akayangike, “Upwagha pela.”

15Adoniya akumpwaghile, “Ngati moumanyila, ukolongwa ukabhi wangu. Bhandu bhokapi bha Izilaeli bhakaningalili nepani ngati nkolongwa wabhu, nambu mambu ghakang'anambwiki, na ukolongwa upiti kwaka ndongu wangu, maghambu ghanihagha nde ghaghakabhi mapalu ghaka Bambo Chapanga. 16Nambu minalu lilobhu limu pela lenukulobha. Chondi ngawinganila.”

Betisheba akupwaghike, “Upwagha pela.”

17Najombi akajendali kupwagha, “Chondi undobha nkolongwa Solomoni, anyetakyaje nuntola Abishagi, Mshunami, akubha nhwanu wangu, mili na chakaka kwaku wehapa ngaakukanile.”

18Betisheba akayangike, “Wichu namaa, ananongila na nkolongwa kwa ndandi jaku.”

19Bhela, Betisheba paakapiti kwaka nkolongwa Solomoni nahuli kulonge naku kwa ndandi jaka Adoniya, nkolongwa akajemiki kunjopalela mabhu waki, akunjinamili na kutama pachitehu chaki cha ukolongwa. Akalaghalakili chitehu chengi cha kikolongwa chiletakikaje kwa ndandi jaka mabhu waka nkolongwa, najombi mabhu waki akatami upambala wa kumalelelu waka nkolongwa. 20Betisheba akumpwaghi nkolongwa, “Mili na lilobhu limu lichokopi la kukulobha, chondi ngawinganila.”

Nkolongwa akayangike, “Ulobhaje, mabhu wangu, nganukukanile.”

21Najombi akapwaghike, “Unjetakalyaje ndongu waku Adoniya antoghula Abishagi, Mshunami hoju.”

22Nkolongwa Solomoni akamuyangiki mabhu waki, “Bho, maghambu kiki upala Adoniya numpekya Abishagi, Mshunami? Uweza kundobhela na ukolongwa wangu kwa ndandi jaki! Nakanopi ja ghanihagha, jombi nde ndongu wangu nkolongwa, na ukombuka kubha mpenganyambiku Abiasali, na linjolinjoli nkolongwa Yoabu, mwana waka Seluya, bhabhi upambala wake!” 23Panihapa nkolongwa Solomoni akalapiki kwaka Bambo Chapanga, akapwaghaje, “Chapanga ungomila kutali, panga na chiha, ngati nganunkomi Adoniya kwa ndandi ja kubhoha lilobhu lenu! 24Bhela, ngati Bambo Chapanga moatamila, joambeki ukangamalu mu ukolongwa waka tati wangu, najombi ambekihi ukolongwa wa kutamakila nepani na bhabhelakeka bhangu ngati moakalaghile, napa kubha Adoniya anakomakika lalenu!”

25Panihapa nkolongwa Solomoni akabhohiki amuli kwaka Benaya mwana waka Yehoyada, najombi akapiti kundapu Adoniya, mbaka kupotela.

Kukomakeka kwaka Yoabu

26Nkolongwa Solomoni akumpwaghi mpenganyambiku Abiasali, “Ubhokaje ujendaye kungonda waku, ku muchi wa Anatoti hoku. Wehapa ikupalika kupotela, nambu nganukukomi sajenu, kwa ndandi ukalitoliki Lisanduku laka Bambo Chapanga palongi jaka tati wangu Daudi na kuhinakila mang'ahiku ghokapi papamu na tati wangu.” 27Bhela, nkolongwa Solomoni akuntopwi Abiasali ngayikubha mpenganyambiku waka Bambo Chapanga, bhela lakapitalili chakaka lilobhi laka Bambo Chapanga leakabhi alonguli kulipwagha ku muchi wa Shilo hoku kwa ndandi jaka mpenganyambiku Eli, na bhabhelakeka bhaki.

28Yoabu paakajowini malobhi ghanihagha, akatilili mu Lihema laka Bambo Chapanga na kukamulakila mu manyelu gha meza ja maganga ja kubhokeha nyambiku, maghambu akabhi chindu chimu na Adoniya, nambu ngacheakunjengali Abisalomu. 29Nkolongwa Solomoni paakajowini kubha Yoabu abhi mu Lihema laka Bambo Chapanga na akamulakili manyelu gha meza ja maganga ja kubhokeha nyambiku, panihapa Solomoni akuntumiki Benaya mwana waka Yehoyada, akapwaghaje, “Ujendaje ukunkomaje.” 30Bhela, Benaya akajingili mu Lihema laka Bambo Chapanga na kumpwaghi Yoabu: Nkolongwa apwagha, “Upita kunja.”

Yoabu akayangike, “Nepani ngapiti kunja, ananhwelila pambane.”

Benaya akakelawiki kwaka nkolongwa, na kumpwaghi ghaakayangiki Yoabu.

31Bhela, nkolongwa akundaghalaki Benaya, “Utenda ngati moapwaghile. Unkoma na kuntagha, nahuli umokiha nepani na nyumba jaka tati wangu Daudi mahoku ghaakatendiki Yoabu kwa kubhakoma bhandu bhangakubha na mahakau. 32Najombi Bambo Chapanga anaantemula Yoabu kwa kubhakoma bhandu panga kumanya tati wangu Daudi, akabhalapwili bhandu bhabheli habha na kubhakoma kwa lipanga. Abineli mwana waka Neli, nkolongwa wa manjolinjoli gha Izilaeli, na Amasa mwana waka Yeseli, nkolongwa wa manjolinjoli gha Yuda, bhandu bhanihabha bhakabhi bhamboni na bhabhajetakalewa palongi jaka Chapanga kupeta jombi. 33Utemulu wa makomakeku ghanihagha anaghakubha panani jaka Yoabu na bhabhelakeka bhaki mileli. Nambu kwaka Daudi na bhabhelakeka bhaki, bhandu bha munyumba jaki na chitehu chaki cha ukolongwa, anakukubha na lukwali lwa mileli kuhuma kwaka Bambo Chapanga.”

34Bhela, Benaya mwana waka Yehoyada, akapiti ku Lihema laka Bambo Chapanga na kundapu na kunkoma Yoabu, najombi akuntaghiki kunyumba jaki mweni jejibhi kuchingwenji. 35Nkolongwa akumbekiki Benaya mwana waka Yehoyada, kubha nkolongwa wa manjolinjoli pandu paka Yoabu, na Sodoki akabhi mpenganyambiku pandu paka Abiasali.

Kupotela kwaka Shimei

36Bhela, nkolongwa akatumiki ubholu kwaka Shimei na kumpwaghila, “Ulichengila nyumba pani pa Yelusalemu na utama monihomu, nambu ngawijenda pandu pangi pokapi pala kunja ja muchi. 37Lichobha lewibhokaje kulomboka libondi la kikoka cha Kiduloni, nukupwaghi chakaka anaupotilaje, kupotela kwaku anakukubha kwa kulipali wamwete.”

38Shimei akamuyangiki nkolongwa, “Upwaghiki lijambu lamboni. Mtumika waku ananyenda kutama ngati bambo wangu nkolongwa moupwaghile.” Najombi Shimei akatami ku muchi wa Yelusalemu kwa chikahi chilachu.

39Nambu payapetiki hyaka itatu, bhatumwa bhabheli bhaka Shimei bhakatiliki na kujenda kwaka Akishi mwana waka Maaka, nkolongwa wa muchi wa Gati, najombi Shimei akapwaghakike, “Bhatumwa bhaku bhabhi ku muchi wa Gati.” 40Panihapa Shimei akabhokiki, na kutama panani ja liponda laki, akapiti ku muchi wa Gati kwaka nkolongwa Akishi, nahuli kubhalonda bhatumwa bhaki. Bhela, paakabhahimanili, akabhakelawihi kunyumba jaki. 41Chikahi nkolongwa Solomoni paakajowini kubha Shimei abhokiki ku muchi wa Yelusalemu na kujenda ku muchi wa Gati na ajomwi kukelabhuka, 42nkolongwa akundohiki Shimei na kumpwaghila, “Bho, ngachenakakulapili kwaka Bambo Chapanga na kukulakalila, ‘Lichobha lewibhokaje na kujenda pandu pangi pokapi pala kunja ja muchi, umanya kubha chakaka anaupotilaje?’ Chikahi chela ukambwaghi, ‘Upwaghiki lijambu lamboni!’ 43Bho, henu maghambu kiki uhekiti kulapa kwaku kwaka Bambo Chapanga, na kukotoka kutii amuli jenukupekihe?” 44Kabheti nkolongwa akumpwaghi Shimei, “Ughamani hotuhotu mahakau ghauntendi tati wangu Daudi. Bhela Bambo Chapanga anaakulepa uhakau waku kwa ndandi ja mahakau ghaku ghautendiki. 45Nambu nkolongwa Solomoni anapengalikaje, na chitehu chaki cha ukolongwa chaka Daudi anachijemakya kwa ukangamalu palongi jaka Bambo Chapanga mileli.”

46Panihapa nkolongwa akabhohiki amuli kwaka Benaya mwana waka Yehoyada, najombi akabhokiki na kujenda kundapu Shimei na kunkoma. Bhela ukolongwa ukakangamili pahi ja utawala waka Solomoni.