1 Bhakolongwa 3

Solomoni alobha kupekewa mbulau

2 Mambu gha Chikahi 1:3-12

1Bhela, Solomoni akatendiki majetanganelu na nkolongwa Falao wa ku inchi ja Misili na kuntogho mwali waki. Akundetiki mwali hoju mu muchi waka Daudi mbaka paakajomwi kuchenga nyumba jaki ja kikolongwa na Nyumba jaka Bambo Chapanga, papamu na kuchenga lumatu kuyongolota muchi wa Yelusalemu. 2Mbaka kuhika pa chikahi chenihechi, bhandu bhakabhi bhakali bhabhoha nyambiku ya kujochakeka mu tutombi, kwa ndandi Nyumba jaka Bambo Chapanga jakabhi jakona ngakuchengakeka. 3Solomoni akalangihi upalu waki kwaka Bambo Chapanga kwa kukamulakila wichu amuli yeakapekiwi na tati waki Daudi, nambu jombi mweni akabhohiki nyambiku ya kujochakeka na kuhuwa ubani pa tutombi.

4Lichobha limu nkolongwa Solomoni akapiti kubhoha nyambiku ku muchi wa Gibeoni, maghambu pakabhi nde pandu pa katombi papamanyakini pa kujojabhela, najombi Solomoni akabhohiki nyambiku elufu jimu ya kujochakeka panani ja pandu pa kubhokeha nyambiku hapa. 5Bambo Chapanga akumpitali Solomoni ku muchi wa Gibeoni hoku chikahi cha ikilu mu ndoto, najombi Chapanga akumpwaghile, “Ulobha chokapi cheupala, nanatu ananukupekyaje.”

6Solomoni akayangike, “Untendili mtumika waku, Daudi tati wangu, upalu wangakujomoka, kwa ndandi akabhi ndongwana kwaku na joajetakalewa palongi jaku, na akabhi na mtima wamboni. Nanau ujendalili kumpekeha upalu ghoni wangakubha na ujomukelu kwa kumpeke mwana wa kutama pa chitehu chaki cha ukolongwa, ngati mokubheli lalenu. 7Bhela, wenga wa Bambo Chapanga, Chapanga wangu, umekiki nepani mtumika waku kubha nkolongwa pandu paka tati wangu Daudi, nambu nepani nde nunkombu nchoku pela, na ngachemanyi ntundu wa kutawala. 8Mtumika waku abhi pambani pachilanda ja bhandu bhaubhahawile, nabhombi nde bhamaheli namaa, hata ngacheiwezikana kubhabhalanga kwa ntundu mobhabheli bhamaheli. 9Bhela, umpekya mtumika waku mtima wa umanyi nahuli nhweza kubhatawala bhandu bhaku na kumanya kughayekula pachilanda ja ghamboni na mahakau. Maghambu bho, nde nane joaweza kubhatawala bhandu bhaku abhabha bhabhabhi bhamaheli anana?”

10Lilobhu leniheli laka Solomoni lakabhi lamboni palongi jaka Bambo Chapanga. 11Bhela Chapanga akumpwaghile, “Kwa kubha ulobhiki lilobhi lenu na ngacheulobhiki matamu malachu au upata hindu yamaheli kwa ndandi jaku, wala ngacheulobhiki maadui bhaku bhayonangikikaje, nambu ulobhiki umanyi wa kubhoha utemulu ngati moipalakila, 12bhela, anandenda lela leulobhike. Lingalyaje, ananukupekya mtima wa mbulau na mtima wa umanyi, ambayu mangani jaku ngachepalabhali kubha na mundu ngati wehapa, wala palongi jaku ngapikubhi na mundu ngati wehapa. 13Nyonjeka ja ghanihagha, ananukupekya ghala ambaghu ngacheulobhiki: Ananukupekya wamaheli wa hindu na utopelu nakanopi jaka nkolongwa jongi jokapi jola wa chikahi chaku. 14Kabheti ngati anaujengalili indela yangu, na malaghalakilu ghangu na kukamula amuli yangu ngati tati waku Daudi moakatendili, ananukupekya matamu malachu.”

15Solomoni akajumwiki, na kumanya kubha jakabhi ndoto. Akakelawiki ku muchi wa Yelusalemu, na kujema palongi ja Lisanduku la Lulaghilu laka Bambo Chapanga, najombi akabhohiki nyambiku ya kujochakeka na nyambiku ya lukwali. Bhela akabhatendili bhatumika bhaki bhokapi uwangalalu.

Solomoni atemula kwa mbulau

16Bhela lichobha limu akambomba bhabheli bhakemi, bhakapiti kujema palongi jaka nkolongwa Solomoni. 17Mbomba jumu akapwaghike, “Wenga wa bambo wangu, nepani na mbomba hajoju tutama mu nyumba jimu. Nepani nakalibhopwi mwana panakabhi papamu naku kunyumba. 18Panilibhopwi nepani ghakapetiki machobha ghatatu na mbomba ajoju najombi akalibhopwi mwana. Tukabhi kanjika jitu, na ngachepakabhi na mundu jongi papamu na tepani panyumba, nambu tepani tabhabheli pela. 19Bhela ikilu jimu, mwana waka mbomba ajoju akapotile, maghambu akatei kungonalela. 20Bhela akajumwiki ikilu pamahiku, akuntoliki mwana wangu kuhuma pachihimba changu chikahi nepani panakabhi ng'ochi lughonu, na kungoneka pachihimba changu mwana waki joapoti jola. 21Panakajumwiki lukela nahuli kunjongeha mwana wangu, mwana akabhi apotile! Nambu panakundingalaki wichu, nakamanyi kubha ngacheakabhi mwana wangu jonumbeliki.”

22Nambu mbomba jongi jola akapwaghike, “Ngabhela! Mwana joabhi mwomi nde wangu, na joapoti nde waku wehapa.”

Nambu mbomba wa kutumbula jola akajomalakile, “Ngabhela! Mwana joapoti nde waku wehapa, na joabhi mwomi nde wangu nepani.”

Bhenibhela nde mobhakajendali kulochana palongi jaka nkolongwa.

23Panihapa nkolongwa Solomoni akapwaghike, “Kila jumu winu ajomalake kubha, mwana waki nde joabhi mwomi, na kubha mwana joapoti nga waki.” 24Bhela nkolongwa akapwaghike, “Mnetila lipanga.” Panihapa bhakundeti nkolongwa lipanga. 25Bhela nkolongwa akapwaghike, “Unhekata mwana joabhi mwomi ipandi ibheli, umpekya ajoju nusu, na jongi nusu.”

26Mbomba ambaju mwana waki akabhi mwomi jola akakamuliki na chiha kwa ndandi jaka mwana waki, bhela akumpwaghi nkolongwa, “Chondi bambo wangu, umpekya jombi mwana joabhi mwomi hoju! Ngawankoma!”

Nambu mbomba jongi jola akapwaghike, “Unhekata ipandi ibheli. Mwana ngaikubha wangu nepani, wala ngaikubha waka jombi!”

27Nkolongwa Solomoni akapwaghike, “Ngawankoma mwana! Umpekya mbomba wa kutumbula antolaje, maghambu jombi chakaka nde mabhu waki.”

28Bhandu bhokapi bha Izilaeli pabhakajowini panani ja utemulu ghoakabhohiki nkolongwa Solomoni, bhakunjowipi nkolongwa, ndandi bhakamanyi kubha akabhi na mbulau yaka Chapanga yeyakuntendiki kubhoha utemulu ghoujetakalewa palongi jaka Chapanga.