1 Bhakolongwa 4

Bhatumika bhaka Solomoni

1Bhela nkolongwa Solomoni akabhi mtawala wa inchi jokapi ja Izilaeli. 2Abhabha nde bhabhakabhi ihongozi bhabhakabhi pahi jaki: Mpenganyambiku Azalia, mwana waka Sadoki. 3Eliholefu na Ahiya, bhana bhaka Shisha: Bhakabhi bhalemba. Yehoshafati mwana, waka Ahiludi: Akabhi ngoha kombukombu ya mambu. 4Benaya mwana waka Yehoyada: Akabhi nkolongwa wa manjolonjoli, Sadoki na Abiasali: Bhakabhi bhapenganyambiku. 5Azalia mwana waka Nasani: Akabhi njemalela nkolongwa wa ihongozi bha Izilaeli. Zabudi mwana waka Nasani: Akabhi mpenganyambiku, na mshauli waka nkolongwa. 6Ahishali: Akabhi njemalela wa nyumba ja kikolongwa, Adolamu mwana waka Abuda: Akabhi njemalela wa lihengu la kujomalakela.

7Solomoni akabhahawili ihongozi bha pahi jaki komi na bhabheli kwa inchi jokapi ja Izilaeli. Bhanihabha bhakapekiwi lihengu la kubhongana na kupeleka chilebhi kwa ndandi jaka nkolongwa na nyumba jaki. Kila jumu wabhu akaletiki chilebhi kuhuma ku wilaya jaki kwa mwehi ghumu kila chaka. 8Aghagha nde mahina gha ihongozi bhanihbha: Mwana waka Huli, akabhi chiongozi wa pandu pa itombi yaka Efulahimu. 9Mwana waka Dekeli, akabhi chiongozi wa michi ja Makasi, Shaalibimu, Betishemeshi na Eloni Betihanani. 10Mwana waka Hesedi, akabhi chiongozi wa michi ja Aluboti, bhelabhela akajemalili muchi wa Soko na pandu pokapi pa muchi wa Hefeli. 11Mwana waka Abinadabu, ndomi waka Tafati, joakabhi mwali waka Solomoni, akajemali muchi wa Nafati Doli. 12Baana, mwana waka Ahiludi, akajemali michi ja Taanaki na Megido, na pandu pokapi pa Beti Sheani ghoubhi pambipi na muchi wa Saletani kunkachi ja muchi wa Yezileeli, na kutumbu ku Beti Sheani mbaka ku muchi wa Abeli Mehola, na kupeta mbaka ku muchi wa Yokimeamu. 13Mwana waka Gebeli, akabhi chiongozi wa muchi wa Lamoti Gileadi papamu na ijiji ya Gileadi yeyakabhi pahi jaka Yaili, mwana waka Manase, bhelabhela akajemali mkoa wa Aligobu ghoubhi ku Bashani na michi jaki mikolongwa sitini jejiyongalitwi na lumatu lolubhi na makabali gha shaba. 14Ahinadabu mwana waka Ido, akabhi chiongozi wa pandu pa Mahanaimu. 15Ahimaasi, joakuntowi Basemati, mwali jongi waka Solomoni, akabhi chiongozi wa pandu pa Nafutali. 16Baana, mwana waka Hushai, akabhi chiongozi wa muchi wa Asheli na muchi wa Bealoti. 17Yehoshafati mwana waka Palua, akabhi chiongozi wa pandu pa Isakali. 18Shimei mwana waka Ela, akabhi chiongozi wa pandu pa Benyamini. 19Gebeli mwana waka Uri, akabhi chiongozi wa pandu pa Gileadi, inchi jejakalabhali kutawaliwa na Sihoni, nkolongwa wa Bhaamoli, na Ogu nkolongwa wa Bashani. Najombi akabhi chiongozi wa kanjika mu inchi jeniheji jokapi.

Kuneng'anela kwa utawala waka Solomoni

20Bhandu bha Yuda na Izilaeli bhakabhi bhamaheli ngati luhanga lwa mumaheku ja bahali, nabhombi bhakabhi na chilebhi chamaheli, bhakabhi bhakula, bhakunywa na kuhekalela. 21Nkolongwa Solomoni akatawili mu ngolongwa yokapi kutumbu nkoka Eufulati mbaka ku inchi ja Bhafilisti, mbaka mu malindakilu gha Misili. Bhandu bha inchi yeniheyi bhakuntumakili na kuleta kode na ikabhi pahi jaka Solomoni, machobha ghokapi gha matamu ghaki.

22Chilebhi chaka Solomoni kwa lichobha limu, chakabhi uhembi laini madebi mia tatu sitini, na uhembi wa kawaida madebi mia saba na ishilini, 23ng'ombi komi yeinenipi, na ng'ombi ishilini yeidimakika, mambeleli na mbuhi mia jimu, papamu na holoku, mbabhala, swala na ingoku yeinonike.

24Solomoni akatawili inchi jokapi kolijibhi lyobha wa nkoka Eufulati, kutumbu ku Tifusa mbaka ku muchi wa Gaza, jakabhi pahi ja utawala waki. Bhakolongwa bhokapi bha kolijibhi lyobha wa nkoka Eufulati bhakabhi pahi jaki, na akatami kwa lukwali na inchi yokapi ya pambipi. 25Machobha ghokapi gha ukolongwa waka Solomoni, bhandu bha Yuda na bhandu bha Izilaeli, kutumbu ku muchi wa Dani mbaka ku Beeli Sheba, bhakatami kwa lukwali, kila mundu akabhi ahenga lihengu mu mighonda jaki ja mikongu ja mizabibu na mikongu ja mitini.

26Solomoni akabhi na indamba elufu alubaini kwa ndandi ja kubheka magali ghaghahutakika na falasi, na manjolinjoli bhabhajendeha falasi elufu komi na ibheli. 27Ihongozi komi na bhabheli bhala, kila jumu kwa mwehi waki ghoakapangiwi, bhakabhongini na kupeleka chilebhi cha kujaghanila kwa ndandi jaka nkolongwa Solomoni na bhokapi bhabhakula mu nyumba jaki. Machobha ghokapi ngachepakepiki chindu chokapi chela. 28Zamu ja kila jumu wabhu pajahikiki bhakapeliki shaili na manyonyoli gha kulehakeha falasi yeihuta magali gha kuhutwa, na falasi yengi.

29Chapanga akumpeki Solomoni mbulau na malangu ghamaheli namaa, bhelabhela akumpeki umanyi ukolongwa wangakupemeka ngati luhanga lwa mumaheku ja bahali. 30Mbulau yaka Solomoni yakabhi ikolongwa kupeta mbulau ya bhandu bhokapi bha kolipitila lyobha na yakabhi ikolongwa kupeta mbulau ya ku Misili. 31Akabhaweziki bhandu bhokapi kwa mbulau, akabhaweziki Esani, Mwezilahi jola, Hemani, Kalikoli na Dalida, bhana bhaka Maholi. Kumanyikana kwaki kukajaghanili ku inchi yokapi ya pambipi. 32Najombi akatongiki mesali elufu itatu, na nyembu yaki yakabhi elufu jimu na nhwanu. 33Akalongalili matamu gha mikongu kutumbu mwelezi wa ku Lebanoni mbaka hisopu ghoumela mu lumatu. Bhelabhela akabholiki kubhokana na hinyama na injuni, hindu yeikwabha, na homba. 34Bhandu bha kuhuma ku inchi yokapi bhakahikiki kujowanela malobhi gha mbulau yaka Solomoni, bhabhakatumakiki na bhakolongwa bhokapi bha pundema, bhabhakabhi bhajowini kubhokana na mbulau yaki.