1 Bhakolongwa

Chitabu cha

1 Bhakolongwa

Ulongulelo

Itabu ya 1 Bhakolongwa na 2 Bhakolongwa pakutumbula hapa yakabhi chitabu chimu chikolongwa. Kwa mala ja kutumbula yakagabhinywi na kubha itabu ibheli mu litoleu la Kiebulania lelilowakeka Bibilia ja Seputuaginti, litoleu ambalu nde la mwande nakanopi la Lulaghilu lwa Mwande mu lugha ja Kigiliki. Ngacheimanyikana kwa uchakaka kubha nde nane joakailembiki itabu ya 1 Bhakolongwa na 2 Bhakolongwa, au kuibheka mu mpangiliu ghoubhi nayu. Mlemba wa itabu ya Bhakolongwa akatumili malembu ghangi gha mwande mu chikahi cha kuilemba (linga 1 Bhakolongwa 11:41, 14:19 na 14:29 ngati milenganesu jejilongalela uchakaka aghoghu. Bhelabhela ngacheimanyikana kwa uchakaka kubha nde chaka bholi itabu yenu payalembakiki au kubhekakeka mu mpangiliu waki. Nde chakaka kubha yakakamiliki kulembakeka baada jaka nkolongwa Yekonia kulekakewa kuhuma ku utumwa ku Babeli mu chaka cha 561 K. K. Maghambu lijambu aleli lilembakiki kwa uchakaka mu chitabu cha 2 Bhakolongwa 25:27. Bhasomi bhamaheli bha mambu gha Bibilia bhahobhale kubha pandu pakolongwa pa itabu yenjenu yakalembakiki hyaka yamaheli mangani ja chikahi chenihechi.

Itabu ya 1 Bhakolongwa na 2 Bhakolongwa alongalela malobhi gha kila nkolongwa wa Izilaeli na Yuda kutumbu mu chikahi cha utawala waka Solomoni, chikahi inchi ayeyi ibheli payakabhi yakali ilombine. Itabu ya 1 Bhakolongwa na 2 Bhakolongwa ilongalela ntundu ukolongwa wa Izilaeli jejakalombini moukagabhanakili na kubha ngolongwa ibheli yeyakajengalili mu mielekeu jibheli jejilekine, mbaka chikahi chela ngolongwa ayeyi payakalepali na bhandu bha inchi nayenge, na bhandu bhaki kutolakeka kujenda kugheni. Mlemba wa itabu yenu alolakela uhusianu waka kila nkolongwa na Chapanga nahuli kumanya ngati akunjengali Chapanga kwa uchakaka au la. Bhakolongwa bhakumu bhahengiki “ghambone palongi jaka Bambo Chapanga” (2 Bhakolongwa 18:3). Bhangi bhakahengiki “ghaghabhi mahoku palongi jaka Bambo Chapanga” (2 Bhakolongwa 21:2). Mlemba alanda kwa mkati nakanopi malobhi gha utawala wa bhakolongwa bhabhakahengiki ghamboni palongi jaka Bambo Chapanga na kulangi kubha kuneng'anela kwa kila inchi kukabhokini na ulongwana waka nkolongwa kwaka Chapanga. Mu 2 Bhakolongwa 17:7, tusoma kubha bhandu bha inchi ja Izilaeli bhakatolakiki kwa makili na kupelekwa kugheni ngati bhatumwa kwa ndandi ayeyi: “Ghakahengakiki ghanihagha maghambu bhandu bha Izilaeli bhakahengiki mahoku palongi jaka Bambo Chapanga” na bhelabhela kwa kubha “bhakaijojabhi ichapanga nayenge.”

Ghaghabhihomu

Mu sula ja 1-11 ilandila ntundu Solomoni mwana waka Daudi moakapati kubha nkolongwa na malobhi gha utawala wa ukolongwa wa Izilaeli jejilombanike.

Mu sula ja 12-16 tusoma panani ja kugabhanika kwa ukolongwa wa Izilaeli na Yuda, na bhelabhela bhakolongwa bhakumu bha inchi ayeyi ibheli.

Mu sula ja 17-19 ilandila malobhi gha lihengu laka mlota Eliya na nakanopi panani ja mihutanu jejakabhi pachilanda jaki na Ahabu nkolongwa wa Izilaeli.

Mu sula ja 20-22 ilongalela ujomukelu wa utawala waka nkolongwa Ahabu panani ja Izilaeli, bhelabhela malobhi gha bhakolongwa bhangi bhabhakatawili baada jaka jombi, papamu na malobhi gha bhakolongwa bha Yuda.