1 Bhakolongwa 20

Ngondo pachilanda ja Bhaizilaeli na Bhasilia

1Chikahi chenihechi, Beni Hadadi nkolongwa wa ku Silia, akaghabhongini manjolinjoli ghaki ghokapi, akalombini na bhakolongwa bhangi selasini na ibheli papamu na falasi na magali ghabhu gha kuhutakika gha ngondo. Akaujendili muchi wa Samalia, akauyongalwiti na kuulapula. 2Bhela, akabhatumiki bhabholu bhaki ku muchi waka nkolongwa Ahabu wa Izilaeli, bhakumpwaghilaje, “Nkolongwa Beni Hadadi apwagha anana, 3‘Madini ghaku gha feza na zahabu yaku yokapi nde yangu, na akabhahanu bhaku bhabhabhi bhanyahi nakanopi na bhana bhaku nde bhangu.’ ”

4Nkolongwa wa Izilaeli akayangike, “Bambo wangu nkolongwa, kubya ngati moupwaghile. Nepani na yokapi yeminayu nde mali ghaku.”

5Bhabholu bhala bhakakelawiki kabhete kwaka Ahabu, bhakumpwaghile, “Nkolongwa Beni Hadadi apwagha anana, ‘Nukutumili ubholu umbekya madini gha feza, zahabu, akabhahanu bhaku, papamu na bhana bhaku. 6Nambu chilabhu chikahi ngati chenjenu, ananabhatuma bhatumika bhangu kukaghulila nyumba jaku ja kikolongwa na nyumba ja bhatumika bhaku. Chindu chokapi chela chebhibhona uchipala nakanopi, anabhachitolaje.’ ”

7Panihapa Ahabu nkolongwa wa ku Izilaeli, akabhalohiki ihongozi bhokapi bha inchi, na kubhapwaghila, “Ndingalyaje ntundu mundu ajoju moatumbulila milomu! Atumiki ubholu kubha apala akabhahanu bhangu, bhana bhangu, madini ghangu gha feza na zahabu yangu, nanatu ngachenunjimike.”

8Bhazee na bhandu bhokapi bhakayangike, “Ngawanjowanela, wala ngawijetakela ghaaghapala.”

9Bhela, Ahabu akabhapwaghi bhabholu bhaka Beni Hadadi, “Mumpwaghila bambo wangu nkolongwa anana, ‘Mtumika waku anaahenga ghokapi ghaukapaliki pakutumbula, nambu malaghalakilu gha kabheli hagha nganyetakeli hata pachokopi.’ ”

Bhakabhokiki na kupeleka liyangu kwaka nkolongwa Beni Hadadi. 10Bhela Beni Hadadi akatumiki ubholu ghongi kwaka Ahabu, kupwagha, “Ichapanga na inetila mahakau, hata nakatopi ja ghanihagha, nukulapi kubha ananijiyonanga Samalia hata ngapihighalili chindu chokapi chela ambachu kila jumu wa manjolinjoli wangu aweza kuchitola kubha ngati kombukombu.”

11Nkolongwa Ahabu wa ku Izilaeli akayangike, “Mumpwaghila nkolongwa Beni Hadadi kubha mwana makili alilumbalila baada ja kukomana ngondo, nga mangani ja kukomana.”

12Beni Hadadi akajopalili ubholu aghoghu kuhuma kwaka Ahabu chikahi jombi na bhakolongwa bhaakalombini nabhu pabhakabhi mu mahema ghabhu bhakakunywaje. Bhela, akabhalaghalaki bhandu bhaki, “Muliandia kujenda kukomana ngondo.” Bhela bhakaliandii wichu nahuli kujenda kuulapula muchi wa Samalia.

13Chikahi chelachela, mlota jumu akunjendili Ahabu, nkolongwa wa ku Izilaeli, na kumpwaghila, “Bambo Chapanga apwagha anana, ‘Bho, ubhona wamaheli wa manjolinjoli aghagha? Lalenu ananabhatenda bhalepalyaje palongi jaku, nanau anaumanya kubha nepani nde Bambo Chapanga.’ ”

14Ahabu Akalalukile, “Bho, ananyangatya nane?”

Mlota akayangike, “Anana nde moapwaghi Bambo Chapanga, ‘Kwa ujangatilu wa akakombu bhakolongwa bhabhahenga lihengu la manjolinjoli pahi ja ihongozi bha wilaya bhanihabha nde bhabhihenga leniheli.’ ”

Najombi nkolongwa akalalukile, “Bho, nde nane joanatumbula ngondo?”

Mlota akamuyangike, “Anautumbula wehapa.”

15Bhela, nkolongwa Ahabu akabhalohiki akakombu bhabhakabhi ihongozi bha bhakomana ngondo bha wilaya, bhokapi bhakabhi akakombu mia ibheli na selasini na ibheli. Bhela, akabhabhongini manjolinjoli gha Bhaizilaeli bhokapi bhabhakahighalile, nabhombi bhakabhi manjolinjoli elufu saba.

16Bhela, chikahi cha saa sita ja muhe, nkolongwa Ahabu na manjolinjoli bha Izilaeli bhakabhokiki chikahi Beni Hadadi na bhakolongwa bhajaki selasini na bhabheli bhaakalombini nabhu bhala, pabhakabhi mu mahema ghabhu bhakakunywaji na kulobhela. 17Akakombu bhabhakabhi ihongozi bha bhakomana ngondo bha wilaya bhala, bhakalongulile. Chikahi chenihechi Beni Hadadi akabhi abhatumiki bhapelelezi, ambabhu bhakaletiki ubholu kupwagha, “Manjolinjoli ghahika kuhuma ku muchi wa Samalia.” 18Beni Hadadi akabhapwaghile, “Mubhakamula bhakabya bhomi. Hata ngati bhahikiki kwa ndandi ja ngondo, au kwa ndandi ja lukwali.”

19Bhela, akakombu bhabhakabhi ihongozi bha bhakomana ngondo bha wilaya bhala, bhakalonguli pangondo, na kujengalewa na manjolinjoli bha Izilaeli kunyuma jabhu. 20Kila jumu wabhu akunkomiki adui jumu. Bhandu bha Silia bhakatilike, nabhombi manjolinjoli bha Izilaeli bhakabhajengalile. Nambu Beni Hadadi, nkolongwa wa Silia akatiliki akabya akweliki panani ja lifalasi laki, papamu na bhakumu bha bhakwela falasi bhaki. 21Bhela, nkolongwa wa Izilaeli akaweziki ngondo, akatoliki kwa makili falasi na magali ghamaheli gha kuhutakika, na kubhakoma bhandu bhamaheli bha Silia. 22Paghakapetiki ghanihagha, mlota jola akunjendili nkolongwa wa Izilaeli na kumpwaghila, “Uliandia wichu, na uholalyaje la kuhenga, maghambu pamwaka nkolongwa wa Silia anahika kukulapu kabheti.”

Bhasilia bhabhalapu kabheti bhandu bha Izilaeli

23Ihongozi bhabhakabhi pahi jaka nkolongwa Beni Hadadi bhakumpwaghi anana, “Ichapanga ya bhandu bha Izilaeli nde ichapnga ya mwitombi, nde ndandi bhakabhi na makili kutupeta tepani. Nambu ngati anatukomini nabhu mu inchi ja uwanda, chakaka anatubhawezaje. 24Henu, utenda anana: Ubhabhoha bhakolongwa bhokapi selasini na bhabheli habha kuhuma mu pandu pabhu pa ukolongwa na ubheka ihongozi bhakomana ngondo badala jabhu. 25Uandia manjolinjoli bhamaheli ngati bhala bha kutumbula, bhelabhela uandia falasi na magali gha kuhutakika ngati ghala gha kutumbula, nahuli tuweza kukomana na Izilaeli mu inchi ja uwanda. Chakaka anatukubha na makili kupeta bhombi.”

Najombi nkolongwa Beni Hadadi akajowanili maholalelu ghabhu, na akatendiki bhenibhela. 26Chaka chechajengalyaje, pachapetiki chikahi cha imbepu, Beni Hadadi akabhabhongini Bhasilia, na kujenda ku muchi wa Afeki kukomana na bhandu bha Izilaeli. 27Nabhombi bhandu bha Izilaeli bhakabhonginwi na kupekewa silaha, nabhombi bhakapiti kukomana ngondo na Bhasilia. Bhaizilaeli bhakabhekiki likambi pambipi nabhu ngati mapogha ghabheli machokumachoku gha imbuhi, nambu Bhasilia bhakajaghani mu inchi jokapi.

28Bhela, mundu waka Chapanga akunhikili na kumpwaghi Ahabu nkolongwa wa Izilaeli, “Bambo Chapanga apwagha anana, ‘Kwa ndandi Bhasilia bhaholalela Bambo Chapanga nde Chapanga wa mwitombi na nga Chapanga wa inchi ja uwanda, ananabhatenda manjolinjoli abhabha bhalepalya palongi jaku, nanau anaumanya kubha nepani nde Bambo Chapanga.’ ”

29Bhandu bha Izilaeli na Bhasilia bhakabhekiki likambi kwa machobha saba bhakalingalanyaje, na lichobha la saba ngondo jakatumbwile. Bhaizilaeli bhakabhakomiki manjolinjoli ghaghajenda kwa magholu gha Bhasilia laki jimu kwa lichobha limu. 30Bhabhahighalili, bhakatilili ku muchi wa Afeki, konihoku lumatu lwa muchi lukabhahabhukili na kubhakoma manjolinjoli elufu ishilini na saba bhabhakahighalili bhala. Najombi nkolongwa Beni Hadadi akatilili kumbwani, na kujenda kulihiya mu chumba cha mkati. 31Bhatumika bhaki bhakapiti kumpwaghila, “Lingalyaje, tujowini kubha bhakolongwa bha Izilaeli nde bhandu bhabhabhi na chiha. Tujendaje kwaka nkolongwa wa Izilaeli tukabya tuweti ingobhu ya magunila mu ibhunu hitu, na mighoji kuyongolota mimutu jitu. Pangi aweza kukuleka kubha mwomi.” 32Bhela, bhalikongiki ingobhu ya magunila mu ibhunu yabhu na mighoji kuyongolota mimutu jabhu, bhakapiti kwaka nkolongwa wa Izilaeli na kumpwaghila, “Mtumika waku Beni Hadadi apwagha, ‘Chondi, nobha uneka mwomi.’ ”

Nkolongwa Ahabu akayangike, “Bho, akona le abhi wome? Jombi nde ndongu wangu.”

33Bhatumika bhaka Beni Hadadi bhakabhi bhapendakela nginyulila jokapi jejibhi jinyahi, bhela Ahabu paakapwaghiki bhenibhela, bhombi bhakayangiki, bhakapwaghaje, “Ena, Beni Hadadi nde ndongu waku!” Ahabu akabhapwaghile, “Njendanya mukundetaje.”

Bhela, Beni Hadadi paakahikiki, Ahabu akunkwehiki Beni Hadadi mu ligali laki la kuhutakika la ngondo. 34Bhela, Beni Hadadi akumpwaghile, “Michi jokapi ambaju tati wangu akunyawi tati waku, ananukukelabhukyaje. Uweza kutumbulila pandu pa kuhemela na kulombesa ku Damasko hoku, ngati moakatendi tati wangu ku Samalia hoku.”

Ahabu akapwaghike, “Ananukulekakya kulijeka kwa majetanganelu ghanihagha.” Panihapa, akabhekiki majetanganelu naku, na kundeka abya wa kulijeka.

Mlota ampekeha masolu Ahabu

35Bhela, kwa lilobhi laka Bambo Chapanga, mundu jumu wa bhana bhaka mlota akumpwaghi njaki, “Chondi, nukulobha unapula kwa silaha jaku.” Nambu njaki jola akakaniki kundapula. 36Mlota jola akumpwaghile, “Kwa kubha ukaniki kutii sauti jaka Bambo Chapanga, lingalyaje, chikahi pela pawibhoka kwangu lihimba analukukomaje.” Na chikahi pela mundu jola paakabhokiki, lihimba lakumpitalili na kunkoma.

37Mlota akunhimani mundu jongi na kumpwaghila, “Chondi, nukulobha unapula kwa silaha jaku.” Panihapa mundu jola akundapwi na kumpoteka. 38Bhela, mlota akabhokiki na kujenda kujema punkeghi ja indela kundendalela Ahabu nkolongwa wa Izilaeli, koni alikongiki chitambala pamihu, nahuli ngaimanyikana. 39Nkolongwa paakabhi apeta, mlota jola akundohiki, akapwaghaje, “Mtumika waku akapiti kungondo chikahi ngondo pajakabhi jijendalela, mundu jumu akanetili mundu joatolakiki kwa makili, akapwaghaje, ‘Undendaje mundu jonjone. Anatiliki anaunepa womi waku wamwente au ipandi elufu itatu ya madini gha feza.’ 40Chikahi mtumika waku paakabhi na lihengu la maheli pambani na palapala, mundu jola akatilike.”

Nkolongwa wa Izilaeli akapwaghike, “Bhenibhela nde mokwibhelila utemulu waku. Ulitemwi wamwete.”

41Panihapa, mlota jola akatendiki manyata kuchibhoha chitambala pamihu jaki, najombi Ahabu nkolongwa wa Izilaeli akummanyiki kubha nde jumu wa bhalota. 42Bhela, mlota jola akumpwaghi nkolongwa, “Bambo Chapanga apwagha anana, ‘Undekiki kulijeka mundu joakapalakiki apotilaje. Bhela womi waku anaulepa kwa womi wake, na bhandu bhaku kwa bhandu bhaki.’ ”

43Bhela, Ahabu nkolongwa wa Izilaeli akapiti kunyumba jaki ku Samalia hoku, koni akabya atweli inyela, na mabhinilu makolongwa.