1 Bhakolongwa 19

Eliya akembalela ku chitombi cha Sinai

1Nkolongwa Ahabu akundandi nhwanu waki Yezebeli mambu ghokapi ghaahengiki Eliya, na ntundu moakabhakomi bhalota bhokapi bhaka Baali kwa lipanga. 2Bhela Yezebeli akuntumiki mbolu kwaka Eliya, kupwagha, “Nukulapila, ichapanga ingomila kutali, mbaka kuhika chilabhu chikahi ngati chenjenu ngati nganukukomi ngati jumu wa bhalota abhabha.” 3Eliya akajowipi, na akatiliki nahuli kukengalela womi waki. Akahikiki ku Beeli Sheba mu muchi wa Yuda.

Najombi akundekiki mtumika waki konihoku, 4nambu mweni Eliya akajendiki lujendu lwa lichobha limu kujingila mulipololu. Akahikiki punkongu wa mletemu, akatami pahi jaki na kulobha nahuli apotilaje. Akapwaghike, “Ijaghanila Bambo Chapanga, ngachenhweza kabheti, ubhohaje womi wangu, maghambu nepani nga wamboni kupeta akahokolu bhangu!”

5Bhela, Eliya akaghoni pahi ja nkongu ghonihoghu, na kughochela lughonu. Palapala mtumika wa kunani kwaka Chapanga akamgusiki na kumpwaghila, “Ujumuka na ukulaje.” 6Eliya akalingalili ipambala yokapi, na pambipi na mmutu waki pakabhi na libumunda lelijochakiki pa makalakala gha moto na ligudulia la machi. Akalili na kunywa, na kughone kabhete. 7Mtumika wa kunani kwaka Bambo Chapanga jola akunhiki mala ja kabheli, akamgusiki na kumpwaghila, “Ujumuka na ukulaje, maghambu mwanja nde ulachu kwaku.” 8Eliya akajumwiki, akakuliki na kunywa. Paakabhi apatiki makili kwa ndandi ja chilebhi chela, akatendiki mwanja machobha alubaini ikilu na muhi mbaka akahikiki ku Holebu, yani Sinai, chitombi chaka Chapanga. 9Konihoku akajingi mulimbaku, na kughonela monihomu ikilu jela.

Palapala Bambo Chapanga akumpwaghile, “Eliya, bho, uhenga kiki pambane?”

10Eliya akayangiki, “Mweni wihu wamaheli kwa ndandi jaka Bambo Chapanga, Chapanga wa manjolinjoli. Bhaizilaeli bhalukaniki Lulaghilu lwaku, bhabombwili meza yaku ya maganga ya kubhokeha nyambiku, na kubhakoma bhalota bhaku kwa lipanga. Nepani kanjika yangu pela nde nenhighalile, nabhombi sajenu bhanonda nahuli bhaniyonangaye.”

11Bambo Chapanga akumpwaghile, “Upita kunja ukajema panani ja chitombi palongi jaka Bambo Chapanga, maghambu Bambo Chapanga abhi pambipi kupeta panihapa.” Panihapa mpongu wamaheli na ghoubhi na makili ukakajwili itombi yela na kukaju matalaghu palongi jaka Bambo Chapanga, nambu Bambo Chapanga ngacheakabhi mu mpongu ghola. Pawapetiki mpongu chakahikiki chinyukunyuku cha ndema, nambu Bambo Chapanga ngacheakabhi mu chinyukunyuku chela. 12Pachapetiki chinyukunyuku cha ndema hechi, ukahikiki moto. Nambu Bambo Chapanga ngacheakabhi mu moto ghonihoghu. Pawakapetiki moto jakahikiki sauti njokopi, ja kuteluka.

13Bhela, Eliya paakajowini sauti jeniheji, akaliyekalili pamihu jaki kwa likanzu laki, akapitiki na kujema pundomu wa limbaku. Panihapa sauti jela jakumpwaghile, “Eliya, bho, uhenga kiki pambane?”

14Eliya akayangike, “Mweni wihu wamaheli kwa ndandi jaka Bambo Chapanga, Chapanga wa manjolinjoli. Bhaizilaeli bhalukaniki Lulaghilu lwaku, bhabombwili meza yaku ya kubhokeha nyambiku, na kubhakoma bhalota bhaku kwa lipanga. Nepani kanjika jangu pela nde nenhighalile, nabhombi sajenu bhanonda nahuli bhaniyonangaje.”

15Bambo Chapanga akumpwaghile, “Ukelabhukaje kwa kupetela indela ja kulipololu mbaka ku Damasko. Chikahi pawihika konihoku, unjeghala Hazaeli mahuta kubha nkolongwa wa Silia. 16Bhelabhela unjeghala mahuta Yehu mwana waka Nimushi kubha nkolongwa wa Izilaeli, na unjeghalaje mahuta Elisha mwana waka Shafati kuhuma ku Abeli Mehola kubha mlota pandu paku. 17Bhela, jokapi joanatilaje lipanga laka Hazaeli, Yehu anaankomaje, na jokapi joanatilaje lipanga laka Yehu, Elisha anaankomaje. 18Nambu, nabhabhekiki akiba bhandu elufu saba mu inchi ja Izilaeli, ambabhu ngachebhunjojabhi Baali, wala kuchibusu chimong'umong'u chaki.”

Elisha alowakeka kubha mlota

19Bhela, Eliya akabhokiki konihoku na kunhimani Elisha mwana waka Shafati. Akabhi alema kwa kutumila ng'ombi makambaku komi na ibheli, najombi mweni akailongwihi ng'ombi komi na ibheli yela. Eliya akapetiki pambipi jaki, na kundekalela likanzu laki. 20Bhela, Elisha akailekiki ng'ombi yaki, akunkembali Eliya, na kumpwaghila, “Unyetakalyaje nyenda nakabhalaghila tati wangu na mabhu wangu, nahuli nukujengalyaje.”

Eliya akamuyangike, “Ujenda, na ukelabhukaje, nambu ukombukaje lenukuhengile.”

21Bhela, Elisha akundekiki Eliya, akaikelawihi ng'ombi yaki, akachichinjiki ng'ombi makambaku komi na ghabheli ghala na kuteleka kwa kutumila mangolingoli ngati hanju, akabhapekihi bhandu, nabhombi bhakakuliki. Panihapa Elisha akabhokiki, na kunjengale Eliya na kubha mtumika waki.