1 Bhakolongwa 18

Eliya apengana na bhalota bhaka kichapanga Baali

1Bhela paghapetiki machobha ghamaheli, mu chaka cha katatu cha kulepa kubha na iyula, lilobhi laka Bambo Chapanga lakunhiki Eliya, kupwagha, “Ujenda ukalilangiha kwaka nkolongwa Ahabu, na nepani ananijitenda iyula jitonyaje panani ja inchi.” 2Bhela, Eliya akapiti kulilangiha kwaka nkolongwa Ahabu.

Chikahi chenihechi injala jakabhi ngolongwa namaa ku Samalia hoku. 3Najombi nkolongwa Ahabu akundohiki Obadia njemalela wa nyumba jaki ja kikolongwa. Obadia akabhi mundu joantopela namaa Chapanga. 4Chikahi Yezebeli paakabhi abhakoma bhalota bhaka Bambo Chapanga, Obadia akabhi abhatoliki bhalota mia jimu na kubhahiya mu mambaku ghabheli, bhalota hamsini kwa kila limbaku na kubhapelakela chilebhi na machi. 5Ahabu akumpwaghi Obadia, “Ujendaje mu inchi jokapi mu tukoka twokapi na mu mabondi. Pangi tuweza kupata manyonyoli gha kuileha falasi na nyumbu ipata kutama nahuli ngachikuwa chinyama hata chimu.” 6Bhela bhakaghabhini pandu pa kujenda, nahuli bhapata kujipete jokapi kulonda manyonyoli, Ahabu akapiti upambala ghumu na Obadia akapiti upambala ghongi.

7Chikahi Obadia paakabhi mu indela, akahimangini na Eliya, najombi Obadia paakummanyi Eliya, akajinimi na kuchikama mbaka pahi paluhombi, na kupwagha, “Bho, chakaka le wehapa wa bambo wangu wa Eliya?”

8Eliya akamuyangike, “Ena, nepani nde Eliya, ujenda ukumpwaghila bambo waku Ahabu, ‘Eliya abhi pambane.’ ”

9Obadia akundalukile, “Bho, nhokihi kiki mbaka kumeka nepani mtumika waku mu mabhoku ghaka Ahabu, nahuli angomaje? 10Chakaka ngati Bambo Chapanga, Chapanga waku, moatamila, njeta inchi hata jimu au ukolongwa ambau bambo wangu ngacheakuntumiki mundu kukulonda. Kila chikahi bhandu bha inchi au ukolongwa pabhakapwaghiki kubha ngacheubhi konihoku, Ahabu akuntendiki nkolongwa wa konihoku alapaje kubha ngacheakuweni. 11Nambu sajenu upala nyenda kwaka bambo wangu, na kumpwaghila, ‘Eliya abhi pambane!’ 12Ngachemanyi kubha nde kwaku Roho waka Bambo Chapanga anaapala kukupeleka chikahi panakulekaje. Ngati anambiti kumpwaghi Ahabu kubha ubhi pambani, najombi nangakukuhimanila, anaangomaje. Hata bhela nepani mtumika waku nundongwana kwa Bambo Chapanga kutumbula ukombu wangu. 13Bho, ngacheujowini kubha Yezebeli paakabhi abhakoma bhalota bhaka Bambo Chapanga? Ntundu nepani monakabhahiiki bhalota bhaka Bambo Chapanga mia jimu mu mambaku ghabheli, bhalota hamsini mu kila limbaku limu, na kubhapekeha chilebhi na machi? 14Na wehapa umbwaghi nyenda kwaka bambo wangu, na kumpwaghi: Eliya abhi pambane! Manyi Ahabu anaangomaje!”

15Eliya akamuyangike, “Ngati Bambo Chapanga wa manjolinjoli moatamila, jombi jonuntumakila, chakaka ananililangiha kwaka nkolongwa Ahabu lalenu.”

16Bhela, Obadia akapiti kuhimangana na nkolongwa Ahabu, na kumpwaghila, najombi Ahabu akapiti kuhimangana na Eliya. 17Ahabu paakumbweni Eliya, akumpwaghile, “Bho, wehapa le nde weubhang'aha bhandu bha Izilaeli?”

18Eliya akamuyangike, “Nepani ngachenabhang'aha bhandu bha Izilaeli. Nambu wehapa na bhalongu bhaka tati waku nde mwentenda ghanihagha. Muilekiki amuli yaka Bambo Chapanga, na kujojabhela ichapanga ya Mabaali. 19Bhela ubhalohaje bhandu kuhuma ku Izilaeli jokapi tuhimangana nabhu panani ja chitombi cha Kalimeli. Na wehapa ubhaleta bhalota mia nchechi na hamsini habha bhaka Baali na bhalota mia nchechi habha bhaka Ashela, kichapanga wa chimbomba, bhabhakula chilebhi pameza na nkolongwa wa chimbomba Yezebeli.”

20Bhela, Ahabu akatumiki ubholu mu Izilaeli jokapi, na kubhabhongana bhalota bhanihabha panani ja chitombi cha Kalimeli. 21Bhela, Eliya akajemiki palongi ja bhandu na kupwagha, “Bho, anamnyema nyema mu maholalelu ghabheli mbaka lile? Anangati Bambo Chapanga, nde Chapanga, munjengalya jombi, nambu anangati Baali nde Chapanga, bhela munjengalya jombi.” Nambu bhandu bhanihabha ngachebhakayangiki lilobhi lokapi lela. 22Bhela, Eliya akabhapwaghi bhandu, “Nepani kajika jangu nde mlota waka Bambo Chapanga nenhighalile, nambu Baali abhi na bhalota mia nchechi na hamsini. 23Ndetaje ng'ombi ibheli ikambaku, na bhalota bhaka Baali bhahaghula ng'ombi jimu jikambaku, bhachinjaji na kuheketa ipandi ipandi na kuibheka panani ja hanju, panga na kupambaki moto. Nanatu anandola ng'ombi jikambaku jengi heji, ananjinjaji na kujibheka panani ja hanju panga kupambaki moto. 24Mwehapa ndobhaje kwa lihina laka chapanga winu, na nepani ananobhaje kwa lihina laka Bambo Chapanga. Chapanga jola joanayangaje kwa kuleta moto, jonihoju nde Chapanga wa chakaka.”

Panihapa lipogha lokapi lakapwaghike, “Leniheli leupwagha nde lambone.”

25Bhela, Eliya akabhapwaghili bhalota bhaka Baali, “Muhaghulaye litoli limu pachilanda ja matoli makambaku hagha na mukabya bhakutumbula kundenganakela, kwa ndandi mwehapa mbili bhamaheli namaa. Mukundobhaje chapanga winu, nambu ngamwipambaki moto.”

26Bhalota bhanihabha bhakatoliki likambaku la ng'ombi lebhapekiwi lela, bhakalilenganakili, bhela bhakatumbwili kulobha kwa lihina laka Baali, kutumbula lukela mbaka saa sita ja muhi, bhakalapula njobhela, “Wenga wa Baali, utuyangaje!” Nambu ngachepakabhi na liyangu lokapi lela, njeta joakayangiki. Nabhombi bhakakiniki kuyongolota pa meza ja maganga ja kubhokeha nyambiku pabhakalenganakile.

27Saa sita ja muhi, Eliya akatumbwi kubhalongama, akapwaghaje, “Ndapula njobhela nakanopi! Maghambu jonihoju nde chapanga! Pangi abhi mu maholalelu ghaki makolongwa, au abhi na lihengu lamaheli, au atendiki mwanja, au pangi aghoni lughonu lukolongwa, impalika munjumuhaje!” 28Bhela bhalota bhanihabha bhakalapwi njobhela nakanopi, na kuliheketa heketa kwa mapanga na mipamba, ngati moukabhelili ntetu wabhu, mbaka mwahi ukabhapitike. 29Saa sita ja muhi jakapetike, nabhombi bhakajendali kulapu njobhela ngati bhabhabhi na mangongu mbaka chikahi cha kubhoha nyambiku ja pakamihe. Nambu ngachepakabhi na liyangu lokapi lela, njeta joakabhayangiki, wala joakabhalingalile.

30Bhela, Eliya akabhapwaghi bhandu bhokapi, “Muheghalyaje pambipi na nepane.” Bhandu bhokapi bhakunheghalile, bhela Eliya akachengiki kabhete meza ja maganga ja kumbokeha Bambo Chapanga nyambiku, jejakabhi jibombuliwi. 31Eliya akaghatoliki maganga komi na ghabheli, limu kwa ndandi ja kila likabila la bhana bhaka Yokobo, ambaju lilobhi laka Bambo Chapanga lakunhikili, lakapwaghaje, “Lihina laku analikubha Izilaeli.” 32Kwa maganga ghanihagha, Eliya akunchengi Bambo Chapanga meza ja maganga ja kubhokeha nyambiku, akahembiki nkolulela kupayongolota pa meza ja maganga ja kubhokeha nyambiku hapa, nkolulela ghouweza kutola ngati lita selasini ya machi. 33Akachochaki hanju, akachinjiki likambaku la ng'ombi lela na kuheketa ipandi ipandi na kuibheka panani ja hanju. Bhela akabhapwaghi bhandu, “Ntwelakya mapipa nchechi machi na kughajiti panani ja nyambiku ja kujochakeka na panani ja hanju.” 34Akabhapwaghile, “Mtenda mala ja kabheli.” Nabhombi bhakatendiki mala ja kabheli. Akalaghalaki kabhete, “Mtenda kwa mala ja katatu.” Nabhombi bhakatendiki bhelabhela mala ja katatu. 35Machi ghakanyiliki kuyongolota pa meza ja maganga ja kubhokeha nyambiku, na kuutwelakela nkolulela machi.

36Chikahi cha kubhoha nyambiku ja pakamihe, mlota Eliya akaheghali pa meza ja maganga ja kubhokeha nyambiku na kundobha Bambo Chapanga, akapwaghaje, “Wenga wa Bambo Chapanga, Chapanga waka Ibulahamu, Isaka na Izilaeli, imanyikana lalenu kubha wehapa nde Chapanga mu Izilaeli, na kubha nepani nde mtumika waku, na ndendiki mambu ghangani ghokapi kwa lilobhi laku. 37Uniyangaje nepani, Wenga wa Bambo Chapanga, uniyangaje nahuli bhandu abhabha bhamanya kubha wehapa wa Bambo Chapanga, nde Chapanga, na kubha ujing'anambula mitima jabhu jukukelabhukya kabhete.”

38Palapala moto waka Bambo Chapanga ukahelili na kujijocha nyambiku ja kujochakeka jela, hanju, maganga na luhombi, na kughajomeha machi ghokapi ghaghakabhi ghatwelili mkati ja nkolulela. 39Bandu bhokapi pabhakaghaweni mambu ghanihagha, bhakajinimi na kuchikama ukupama mbaka paluhombi, bhakapwaghaje, “Bambo Chapanga nde Chapanga! Bambo Chapanga nde Chapanga!”

40Bhela Eliya akabhalaghalakile, “Mubhakamulaje bhalota bhokapi bhaka Baali. Ngamwandeka hata jumu wabhu atilaje!” Bhakabhakamwili, na Eliya akabhatoliki mbaka kulibondi la nkoka Kishoni, na akabhakomiki konihoku.

Kujomoka kwa Ulale

41Baada ja ghanihagha, Eliya akumpwaghi nkolongwa Ahabu, “Ujendaje, ukakula na kunywa, kwa ndandi kubhi na sauti ngolongwa ja ihula.” 42Bhela Ahabu akabhokiki nahuli kula na kunywa. Nambu Eliya akakweliki panani ja chitombi cha Kalimeli, na kujinimi na kuchikama ukupama mbaka pahi na kubheka chibhongi chaki pachilanda ja majuwa ghaki. 43Akumpwaghi mtumika waki, “Ujendaje ukalingaje upambala wa ku bahali.” Mtumika akapiti, akalingalili na kukelabhuka.

Akapwaghike, “Njeta chindu chokapi konihoku.” Eliya akumpwaghile, “Ujenda kabheti mala saba.” 44Mala ja saba, mtumika akaletiki ubholu, akapwaghaje, “Niliweni lihundi lichokopi ngati chiwoku chaka mundu lakakwela kuhuma mu bahali.”

Bhela Eliya akapwaghike, “Ujenda ukumpwaghila Ahabu, ‘Uliandia ligali laku la kuhutakika na falasi, na uhelala mangani iyula ngachejukuhibhalakile.’ ”

45Chikahi chelachela kunani kumahundi kukabhi kupili kwa ndandi ja mahundi, mpongu ukapuliki, na iyula jikolongwa jakatonyiki, najombi Ahabu akakweliki ligali laki la kuhutakika na falasi, na kukelabhuka ku Yezileeli. 46Makili ghaka Bambo Chapanga ghakunhikili Eliya, najombi akalikongiki na kulikaza likanzu laki, akakembili na kundongulela Ahabu kujingila ku muchi wa Yezileeli.