1 Bhakolongwa 17

Eliya ahibhalaki iyula

1Bhela Eliya wa chijiji cha ku Tishibi ku Gileadi hoku, akumpwaghi nkolongwa Ahabu, “Napa kwaka Bambo Chapanga, Chapanga wa Izilaeli, joabhi mwomi ambaju nepani nuntumakila, ngapikubhi na lyangami wala iyula mu hyaka yenu, mbaka panipwagha lilobhi.” 2Bhela, Bambo Chapanga akumpwaghi Eliya, kupwagha, 3“Ubhoka pambane, na ujenda ku upambala wa kolipita lyobha ukajobhyaje pambipi na chikoka cha Keliti, chechibhi kolipiti lyobha mwa nkoka Yoludani. 4Konihoku anaukunywa machi kuhuma mu chikoka chela, nanatu naghalakili makongolu ghakuletila chilebhi.”

5Bhela Eliya akatendiki chela cheakalaghalakiwi na Bambo Chapanga. Akapiti ku chikoka cha Keliti, kolipita lyobha mwa nkoka Yoludani, na kutama konihoku. 6Makongolu ghakundeti libumunda na inyama, lukela na pakamihe, akapatiki na machi gha kunywa mu chikoka hechi. 7Machobha machokopi ghakapetiki, chikoka chela chakajomalili, maghambu iyula ngachejatonyiki pa inchi.

Eliya amuhyoha mwana waka mbomba joakaweliwi na ndomi waki wa ku Saleputa

8Bhela lilobhi laka Bambo Chapanga lakunhiki Eliya, kupwagha, 9“Ubhokaje ujenda kumbwani ku Saleputa, pambipi na muchi wa Sidoni, ukatama konihoku. Nundaghalakili mbomba jumu joakaweliwi na ndomi waki akupekya chilebhi.” 10Bhela, Eliya akabhokiki, na kujenda ku Saleputa. Paakahikiki pundyangu wa muchi, akunhimani mbomba jumu joakaweliwi na ndomi waki akatondula hanju. Eliya akundohiki mbomba jola na kumpwaghila, “Chondi, nobha machi gha kunywa.” 11Mbomba jola paakabhi ajenda kundete machi, Eliya akundohiki akapwaghaje, “Chondi, nukulobha unetila na chipandi cha libumunda.”

12Mbomba jola akamuyangike, “Nukulapila kwa lihina laka Bambo Chapanga, Chapanga waku, joabhi mwomi, ngachemi na libumunda hata lichokopi. Nambu mi pela na lihumbatu limu la uhembi mu ndundu, na mahuta machokopi mu libotolu. Nhikiki pambani kutondo hanju ichokopi nahuli nyenda kunyumba kujocha libumunda heli, kwa ndandi jangu na mwana wangu, nahuli tukulaje anachijomwiki, tupotilaje.”

13Eliya akumpwaghile, “Ngawijoghopa. Ujendaje kunyumba ukatenda ngati moupwaghile. Nambu unenganakya nepani hoti libumunda lichokopi, anaujomwi kunenganake nepani, ulilenganakya libumunda wamweti na mwana waku. 14Kwa kubha Bambo Chapanga, Chapanga wa Izilaeli, apwagha Anana: ‘Ndundu wa uhembi ngawijomoki, wala libotolu la mahuta lela ngalijomoki, mbaka lichobha lela Bambo Chapanga payileta iyula panani ja inchi.’ ”

15Bhela mbomba joakaweliwi na ndomi waki jola, akapiti kuhenga ngati Eliya moakumpwaghile. Bhela kukabhi na chilebhi kila lichobha kwa ndandi jaka Eliya, na kwaka mbomba na bhalongu bhaki. 16Uhembi ghoukabhi mu ndundu ghola ngachewajomwiki, wala mahuta mu libotolu ngacheghajomwiki, kulengana na lilobhi lela laka Bambo Chapanga leakapwaghiki Eliya.

17Paghakapetiki ghanihagha, mwana waka mbomba joakaweliwi na ndomi waki jola, akalwaliki, na hali jaki ngachejakabhi jinyahi, na pakujomukela akapotile. 18Mbomba hoju akumpwaghi Eliya, “Wenga wa mundu waka Chapanga, ubhi na kiki na nepane? Bho, uhikiki nahuli kuhyekula mahoku ghangu, na kunkoma mwana wangu?”

19Eliya akumpwaghile, “Umbekya mwana waku.” Bhela Eliya akuntoliki mwana kuhuma pachihimba jaka mabhu waki, akumpapiki mbaka kuchumba chaki cha kunani moakabhi atama, na kungoneka panani ja chitanda chaki. 20Bhela akundobhiki Bambo Chapanga, akapwaghaje, “Wenga wa Bambo Chapanga, Chapanga wangu, bho, mbaka mbomba joakaweliwi na ndomi waki ajoju ambaju nepani ndama kwaki, najombi atenda kung'oha, undetili chilelu kwa kunkoma mwana waki?” 21Bhela Eliya akungonalili mwana hoju mala patatu, na kundobha Bambo Chapanga, akapwaghaje, “Wenga wa Bambo Chapanga, Chapanga wangu, nukulobha roho jaka mwana ajoju junkelabhukyaje mkati jaki kabhete!” 22Bambo Chapanga akajowanili lilobhu laka Eliya, palapala mwana akahyokiki.

23Eliya akuntoliki mwana jola kuhuma ku chumba cha kunani, na kunheleha pahi kwaka mabhu waki, na kumpwaghila, “Lingalyaje, mwana waku abhi mwomi!”

24Bhela mbomba joakaweliwi na ndomi waki jola, akumpwaghi Eliya, “Henu manyi kwa uchakaka kubha wehapa nde wa mundu waka Chapanga, na malobhi ghaka Bambo Chapanga ghaghahuma mundomu waku nde chakaka!”