1 Bhakolongwa 16

1Bhela lilobhi laka Bambo Chapanga lakunhiki Yehu mwana waka Hanani, panani jaka Baasha, akapwaghaje, 2“Wehapa Baasha, ukabhi wa mundu wangakumanyikana, nukutendiki kubha chiongozi wa bhandu bhangu Izilaeli. Wehapa unjighiki Yeloboamu, jombi akabhatendiki bhandu bhangu Izilaeli bhatenda mahoku na kundenda niyomaje kwa mahoku ghabhu. 3Bhela mi tayali kukuyonanga wa Baasha papamu na bhandu bha lukolu lwaku, nanatu ananabhatenda bhandu bha lukolu lwaku ngati monakatendi kwa bhandu bha lukolu lwaka Yeloboamu mwana waka Nebati. 4Mundu jokapi joabhi ndongu waku wa Baasha joanawelila kumbwani, nakawa anajunkulaje, na jokapi joanawelila mu mighonda, ijuni ya kunani anayunkulaje.”

5Matendu ghangi ghaka Baasha, na ghokapi ghaakahengiki ghalembakiki mu chitabu cha kombukombu ya bhakolongwa bha Izilaeli. 6Bhela Baasha akapotili, na akataghakiki ku muchi wa Tiliza hoku. Najombi Ela, mwana waki akabhi nkolongwa pandu paki.

7Bhelabhela lilobhi laka Bambo Chapanga lakunhiki Baasha papamu na bhandu bha lukolu lwaki, kupetela kwaka mlota Yehu mwana waka Hanani, kwa ndandi ja mahakau ghokapi ghaakabhi ahengiki palongi jaka Bambo Chapanga. Bhela Bambo Chapanga akayomiki kwa ndandi ja mambu ghaakahengiki Baasha, na kubha ngati bhandu bha lukolu lwaka Yeloboamu, na kwa ndandi jeniheji akatehi kubhayonanga.

Ela atawala mu inchi ja Izilaeli

8Mu chaka cha ishilini na sita cha utawala waka Asa nkolongwa wa ku Yuda, Ela mwana waka Baasha akatendakiki kubha nkolongwa wa Izilaeli, najombi akatawili mu Izilaeli kwa hyaka ibheli koni akabya ku Tiliza hoku. 9Najombi Zimili, jumu wa linjolinjoli waki nkolongwa, joakabhi na amuli panani ja nusu ja magali ghaki gha kuhutakika na falasi, akatendiki njama ja kunkoma Ela. Chikahi hechi Ela akabhi ku muchi wa Tiliza hoku, akakunywiki mbaka kulobhela mu nyumba jaka Alisa, mundu joakabhi njemalela wa nyumba ja kikolongwa ku Tiliza hoku. 10Bhela Zimili akajingi mkati mu nyumba akundapwili mbaka kunkoma mu chaka cha ishilini na saba cha utawala waka Asa nkolongwa wa ku Yuda. Bhela Zimili akabhi nkolongwa pandu paki. 11Chikahi pela Zimili paakatumbwi kutawala na kutama panani ja chitehu cha ukolongwa, Zimili akabhakomiki bhandu bhokapi bha lukolu lwaka Baasha. Ngacheakundekiki mwanalomi hata jumu, akubhi ndongu waki, wala nkochi waki. 12Bhela Zimili akabhayoningi bhandu bhokapi bha lukolu lwaka Baasha, ngati lilobhi laka Bambo Chapanga leapwaghiki panani jaka Baasha kupetela kwaka mlota Yehu. 13Mambu aghagha ghakahengakiki kwa ndandi ja mahoku ghokapi ghaakahengiki Baasha na mwana waki Ela. Bhanihabha bhakuntendiki Bambo Chapanga, Chapanga wa Izilaeli ayomaje, kwa kutenda mahoku na kubhatenda bhandu bha Izilaeli bhatenda mahoku kwa kujojabhela imong'umong'u ya ichapanga yabhu. 14Matendu ghangi ghaka Ela, na ghokapi ghaakahengiki mu chikahi cha utawala waki ghalembakiki mu chitabu cha kombukombu ya bhakolongwa bha Izilaeli.

Zimili atawala mu inchi ja Izilaeli

15Mu chaka cha ishilini na saba cha utawala waka Asa nkolongwa wa ku Yuda, Zimili akatendakiki kubha nkolongwa wa Izilaeli, najombi akatawili kwa machobha saba pela koni akabya ku Tilisa hoku. Manjolinjoli ghakabhekiki likambi pambipi na Gibetoni, muchi wa Bhafilisti. 16Chikahi Bhaizilaeli bhabhakabhi mu likambi pabhakajowini kubha Zimili atendiki chindu chihakau kwa kunkoma nkolongwa Ela, bhakuntangizi Omili, nkolongwa wa manjolinjoli, kubha nkolongwa wa Bhaizilaeli lichobha lelalela pabhakabhi kulikambi. 17Omili na Bhaizilaeli bhokapi bhakabhokiki ku Gibetoni na kujenda kuulapula muchi wa Tiliza. 18Chikahi Zimili paakaweni kubha muchi utolakiki kwa makili, akajingi mkati ja ngomi ja nyumba ja kikolongwa, na kujijocha moto nyumba ja kikolongwa na mweni, na akawelili monihomu. 19Lijambu heli lakatendakiki kwa ndandi ja mahoku ghaakatendiki Zimili palongi jaka Bambo Chapanga, na kunjigha Yoloboamu kwa mahoku ghaakatendiki, kwa kubhatenda bhandu bha Izilaeli kutenda mahoku. 20Matendu ghangi gha utawala waka Zimili, na kupenga kwaki, ghokapi ghaakahengiki, ghalembakiki mu chitabu cha kombukombu ya bhakolongwa bha Izilaeli.

Omili atawala mu inchi ja Izilaeli

21Bhela bhandu bha Izilaeli bhakaghabhaniki mu mapogha ghabheli: Lipogha limu lakummanyi Tibini mwana waka Ginati kubha nkolongwa, na lipogha lengi la kabheli lakummanyi Omili kubha nkolongwa. 22Nambu bhahemba bhaka Omili bhakabhapetiki makili bhahemba bhaka Tibini mwana waka Ginati. Bhela, Tibini akapotili na Omili akabhi nkolongwa. 23Mu chaka cha selasini na jimu cha utawala waka Asa nkolongwa wa ku Yuda, Omili akabhi nkolongwa wa Izilaeli, najombi akatawili kwa hyaka komi na ibheli. Hyaka sita akabhi atawala kuhuma ku muchi wa Tilisa. 24Akahemili katombi ka Samalia kwa hipandi elufu sita ya madini gha feza kuhuma kwaka mundu jumu joakalowakiki Shemeli, akachengiki ngomi panani jaki, na muchi. Akaulohiki Samalia, kubhokana na lihina Shemeli laka joakabhi mweni katombi kanihaka pakutumbula hapa.

25Nambu Omili akatendiki mahakau palongi jaka Bambo Chapanga, akatendiki mahakau kupeta bhakolongwa bhokapi bhabhakundongulile. 26Kwa kubha akunjighiki Yeloboamu mwana waka Nebati, akuntendiki Bambo Chapanga, Chapanga wa Izilaeli, ayomaje, kwa kubhatenda bhandu bha Izilaeli bhatenda mahoku kwa kujojabhela imong'umong'u ya ichapanga. 27Matendu ghangi ghaakahengiki Omili mu chikahi cha utawala waki na ukangamalu waki, ghokapi ghalembakiki mu chitabu cha kombukombu ya bhakolongwa bha Izilaeli. 28Omili akapotili, na kutaghakika ku Samalia hoku, najombi mwana waki Ahabu akabhi nkolongwa pandu paki.

Ahabu atawala mu inchi ja Izilaeli

29Mu chaka cha selasini na nane cha utawala waka Asa nkolongwa wa ku Yuda, Ahabu mwana waka Omili, akatumbwi kutawala ku Izilaeli. Akatawili ku Samalia hoku kwa hyaka ishilini na ibheli. 30Ahabu mwana waka Omili akatendiki mahakau ghamaheli palongi jaka Bambo Chapanga kupeta bhakolongwa bhokapi bhabhakundongulile. 31Kabheti, papamu na kujigha mambu mahakau ghaka Yeloboamu mwana waka Nebati, Ahabu akuntowili Yezebeli mwali waka Etibaali, nkolongwa wa ku Sidoni, na akatumbwi kuntumaki Baali, na kunjojabhela. 32Akunchengi Baali nyumba ku Samalia hoku, na mkati jaki akalenganaki pandu pa kumbokeha nyambiku. 33Bhelabhela Ahabu akalenganakili chimong'umong'u cha Ashela, chapanga wa chimbomba. Bhela akuntendiki Bambo Chapanga, Chapanga wa Izilaeli ayomaje. Ahabu akatendiki mahakau ghamaheli kupeta ghabhakatendiki bhakolongwa bhokapi bha Izilaeli bhabhakundongulile. 34Chikahi cha utawaka waka Ahabu, Hieli kuhuma ku Beseli, akauchengiki kabheti muchi wa Yeliko. Nambu chikahi paakabhi achenga luhuli lwa muchi, mwana waki wa kutumbula joakalowakiki Abilamu akapotile, bhelabhela chikahi paakabhi abheka milyangu mikolongwa ja muchi, mwana waki nchoku joakalowakiki Segubu akapotile. Ghanihagha ghakapitalili kulengana na lilobhi laka Bambo Chapanga leakapwaghiki kupetela kwaka Yoshua.