1 Bhakolongwa 15

Nkolongwa Abiya atawala mu inchi ja Yuda

2 Mambu gha Chikahi 13:1-14:1

1Mu chaka cha komi na nane cha utawala waka Yeloboamu mwana waka Nebati, Abiya akatendakiki kubha nkolongwa wa Yuda. 2Najombi akatawili mu Yuda kwa hyaka itatu koni akabya ku Yelusalemu hoku. Lihina laka mabhu waki akalowakiki Maaka, mwali waka Abisalomu. 3Abiya akatendiki mahoku ghalaghala ghaakatendiki tati waki, wala ngacheakabhi na mtima wa ulongwana kwaka Bambo Chapanga, Chapanga waki, ngati mtima waka hokolu waki Daudi moukabhelile. 4Hata bhela, kwa ndandi jaka Daudi, Bambo Chapanga, Chapanga waki, akumpekihi Abiya mwana joanatawalaje pandu paki, na kubha taa ja kumulakila mu Yelusalemu na kuubheka Yelusalemu ujemakyaje. 5Bambo Chapanga akehengiki bhenibhela maghambu Daudi akatendiki ghaghabhi ghamboni palongi jaki, ngacheakalepalili kukamula malaghalakilu ghokapi ghaka Bambo Chapanga machobha ghokapi gha matamu ghaki, nambu pela kubhokana na mambu ghaka Uria, Mhiti. 6Bhela kukabhi na ngondo pachilanda jaka Lehoboamu na Yeloboamu machobha ghokapi gha matamu ghaka Abiya. 7Matendu ghangi ghaka Abiya, na ghokapi ghaakahengiki ghalembakiki mu chitabu cha kombukombu ya bhakolongwa bha Yuda. Kukabhi na ngondo pachilanda jaka Abiya na Yeloboamu.

8Abiya akapotili na kutaghakika mu muchi waka Daudi. Najombi Asa, mwana waki akabhi nkolongwa pandu paki.

Nkolongwa Asa tawala mu inchi ja Yuda

2 Mambu gha Chikahi 15:16-16:6

9Mu chaka cha ishilini cha utawala waka Yeloboamu nkolongwa wa Izilaeli, Asa akabhi nkolongwa wa Yuda. 10Najombi akatawili mu Yelusalemu kwa hyaka alubaini na jimu. Lihina laka mabhu waki akalowakiki Maaka, mwali waka Abisalomu. 11Asa akatendiki mambu ghaghabhi ghamboni palongi jaka Bambo Chapanga, ngati moakatendi Daudi, hokolu waki. 12Akabhatopwi mu inchi akanalomi bhokapi bhabhajilanya kihyegha na akanalomi bhajabhu kwa ndandi ja kujojabhalela ichapanga, na kubhoha imong'umong'u yokapi ambayu akahokolu bhaki bhakabhi bhalenganakile. 13Akumbohiki mbuja waki Maaka mu pandu paki pa ukolongwa waki wa chimbomba, maghambu akabhi alenganaki chimong'umong'u cha kunjojabhela Ashela, chapanga wa chimbomba. Bhela Asa akachikajulini chimong'umong'u hechi na kuchijocha pa moto pa libondi la Kidiloni. 14Nambu pandu pa panani pa kujojabhalela ichapanga ku itombi hoku, ngacheakabombwile, hata bhela mtima waka Asa ukabhi ulibhekiki wichu kwaka Bambo Chapanga kwa matamu ghaki ghokapi. 15Akaletiki mkati ja Nyumba jaka Bambo Chapanga madini gha feza, zahabu na yombu yokapi ambayu jombi na tati waki bhakabhi bhaibhekiki palongi jaka Chapanga.

16Chikahi chokapi cha utawala wabhu kukabhi na ngondo pachilanda jaka Asa nkolongwa wa Yuda, na Baasha nkolongwa wa Izilaeli. 17Nkolongwa Baasha wa Izilaeli akaulapwi muchi wa Yuda na kutumbula kuchenga lumatu mu muchi wa Lama, nahuli kuhibhalakila mundu jokapi ngaipita kunja, wala kujingila mu inchi jaka Asa, nkolongwa wa ku Yuda. 18Bhela nkolongwa Asa akatoliki madini gha feza na zahabu yokapi yeikahighalili mu chikoku cha Nyumba jaka Bambo Chapanga na chikoku cha nyumba jaki ja kikolongwa. Akabhapekihi bhatumika bhaki, na kubhatuma kwaka Beni Hadadi mwana waka Tabilimoni, nchokolu waka Hezioni, nkolongwa wa ku Silia, joakabhi atawala ku Damesko, akapwaghaje, 19“Tutenda majetanganelu pachilanda jangu na wehapa, ngati mokwabheli pachilanda jaka tati wangu na tati waku. Lingalyaje, nukuletili nhupu wa madini gha feza na zahabu. Bhela uhekataje majetanganelu ghaku na Baasha nkolongwa wa Izilaeli, nahuli abhokaje mu inchi jangu.”

20Panihapa nkolongwa Beni Hadadi akunjetakili nkolongwa Asa, na kubhatuma bhakolongwa bha manjolinjoli ghaki kujenda kujilapula michi ja Izilaeli. Nabhombi bhakajiweziki michi ja Iyoni, Dani, Abeli Beti Maaka na Kineleti jokapi, papamu na Nafutali. 21Nkolongwa Baasha paakajowini mambu gha ngondo hagha, akakotwiki kuuchenga muchi wa Lama na akapiti kutama ku muchi wa Tiliza.

22Bhela nkolongwa Asa akatangizi kwa bhandu bhokapi bha Yuda, panga kundeka mundu hata jumu, bhatotulaje maganga na mbau kuhuma ku Lama, ambayu Baasha akatumili kuchengela. Nkolongwa Asa akaitumili kuchengela muchi wa Geba, jejibhi ku Benyamini na ku Misipa.

23Matendu ghangi ghaka nkolongwa Asa, makili ghaki na michi jokapi jeachengiki, ghokapi ghalembakiki mu chitabu cha kombukombu ya bhakolongwa bha Yuda. Nambu, chikahi cha uzee waki, Asa akapatiki chitamu cha magholu. 24Bhela, Asa akapotili na kutaghakika mu matengeli gha kikolongwa, mu muchi waka Daudi, najombi mwana waki Yehoshafati akatawili pandu paki.

Nadabu atawala mu inchi ja Izilaeli

25Nadabu mwana waka Yeloboamu akabhi nkolongwa wa Izilaeli mu chaka cha kabheli cha utawala waka Asa wa ku Yuda, najombi akatawili Izilaeli kwa hyaka ibheli. 26Nadabu akatendiki mahakau palongi jaka Bambo Chapanga, ngati moakatendi tati waki, joakabhatendiki bhandu bha Izilaeli bhatenda mahakau.

27Baasha mwana waka Ahiya, wa likabila laka Isakali, akuntendili njama Nadabu. Bhela chikahi Nadabu na Bhaizilaeli bhokapi pabhakabhi bhauyongalwiti muchi wa Gibetoni, ghoubhi ku muchi wa Bhafilisti, Baasha akundapwili na kunkoma. 28Baasha akunkomiki Nadabu mu chaka cha katatu cha utawala waka Asa nkolongwa wa Yuda, najombi Baasha akabhi nkolongwa wa Izilaeli pandu paka Nadabu. 29Chikahi pela Baasha paakatumbwi kutawala, akabhakomiki bhandu bhokapi bha lukolu lwaka Yeloboamu, ngacheakundekiki kubha mwomi mundu hata jumu pachilanda ja lukolu lwaka Yeloboamu, ngati lilobhi leakapwaghiki Bambo Chapanga kwa indela jaka mtumika waki Ahiya wa ku Shilo. 30Mambu ghanihagha ghakatendakiki kwa ndandi Yeloboamu akuntendiki Bambo Chapanga, Chapanga wa Izilaeli, ayomaje, kwa mahoku ghaki na kwa kubhatenda bhandu bha Izilaeli bhatenda mahoku.

31Matendu ghangi ghaka Nadabu, na mambu ghangi ghokapi ghaakahengiki, ghalembakiki mu chitabu cha kombukombu ya bhakolongwa bha Izilaeli. 32Kukabhi na ngondo pachilanda jaka Asa nkolongwa wa Yuda, na Baasha nkolongwa wa Izilaeli, chikahi chokapi cha utawala wabhu.

Nkolongwa Baasha atawala mu inchi ja Izilaeli

33Mu chaka cha katatu cha utawala waka Asa nkolongwa wa ku Yuda, Baasha mwana waka Ahiya akabhi nkolongwa wa Izilaeli jokapi koni akabya ku Tiliza hoku, najombi akatawili kwa hyaka ishilini na ncheche. 34Nkolongwa Baasha akatendiki mahakau palongi jaka Bambo Chapanga, akunjighiki Yeloboamu na kutenda uhakau gholaghola ambau akabhatendiki bhandu bha Izilaeli bhatenda mahakau.