1 Bhakolongwa 14

Kupotela kwaka mwana waka Yeloboamu

1Chikahi chenihechi, Abiya mwana waka nkolongwa Yeloboamu, akabhi mtamwa. 2Yeloboamu akumpwaghi nhwanu waki, “Ujenda ukaling'anambulaje, nahuli bhandu ngabhimanya kubha wehapa nde nhwanu waka Yeloboamu. Bhela ujenda ku muchi wa Shilo. Mlota Ahiya abhi konihoku, jola joakambwaghi kubha nepani anangubha nkolongwa wa Izilaeli. 3Utolaje mabumunda komi, maandazi na busi libotolu limu. Jombi anaakupwaghila chechipitalyaje kwaka nkombu witu.”

4Bhela nhwanu waka Yeloboamu akatendiki ngati moakapwaghiki ndomi waki, akapiti mu nyumba jaka Ahiya ku muchi wa Shilo hoku. Chikahi chenihechi Ahiya akabhi ngacheweza kulola, kwa ndandi ja uzee waki. 5Nambu Bambo Chapanga akabhi ampwaghi Ahiya, “Nhwanu waka Yeloboamu ahika kukulalukila kubhokana na mwana waki, maghambu atenda kulwala, na wehapa umuyanga anana na anana. Paakahikiki, akalitendiki kubha ngati mundu jongi.” 6Nambu Ahiya paakajowini nganyatu ya kujenda kwaki pundyangu, akapwaghike, “Ujingala mkati, nhwanu waka Yeloboamu. Bho, maghambu kiki utehi kuling'anambula? Mili na ubholu wangakubha unyahi kwaku. 7Ujenda ukampwaghila Yeloboamu kubha Bamba Chapanga, Chapanga wa Izilaeli, apwagha anana, ‘Nakakuhawili pachilanda ja bhandu, na kukutenda kubha chilongozi wa bhandu bhangu Izilaeli. 8Nakaukachwili ukolongwa kuhuma kwa bhabhelakeka bhaka Daudi na kukupekeha wehapa, nambu ngacheubhi ngati mtumika wangu Daudi, joakakamwi malaghalakilu ghangu na kunyengalela kwa mtima waki wokapi, akatendiki pe lela lelakabhi lamboni palongi jangu. 9Wehapa utendiki mahakau ghamaheli kupeta bhakolongwa bhokapi bhabhukulongulile. Unekiki nepani na kundenda nhyomaje kwa kulilenganakela ichapanga nayengi, na imong'umong'u ya kuyeyusha. 10Kwa ndandi ja lijambu lendenu, ananeta mahakau panani ja bhandu bha lukolu lwaka Yeloboamu. Anangoma kuhuma kwaka Yeloboamu kila mbelakeka wa kujomukela bha chikambaku mu Izilaeli, akubhi mtumwa au mundu wa kulijeka. Ananabhayonanga bhandu bha lukolu lwaka Yeloboamu mbaka bhayonangikika bhokapi, ngati mundu joajocha mandipi gha hinyama. 11Jokapi joabhi lukolu lwaka Yeloboamu jonaawelila mumbwani, nakawa anayunkulaje, na jokapi jonaawelila mu mighonda, ijuni ya kunani anayunkulaje. Maghambu Bambo Chapanga, mbwaghiki lijambu leniheli.’ ”

12Bhela, Ahiya akumpwaghi nhwanu waka Yeloboamu, “Ujemaje ubhuja kunyumba jaku. Chikahi pela pawijingala mu muchi waku, mwana waku anapotilaje. 13Bhandu bhokapi bha Izilaeli anabhaombulizaji kwa ndandi jaki na kuntagha. Maghambu jombi pela kanjika jaki kuhuma kwa bhandu bha lukolu lwaka Yeloboamu nde joanataghakikaje, ndandi jombi pela nde akunyambihi Bambo Chapanga, Chapanga wa Izilaeli. 14Bambo Chapanga anaankweha mundu jongi kubha nkolongwa panani ja Izilaeli, ambaju anaabhayonanga bhandu bha lukolu lwaka Lehoboamu. Hata sajenu lijambu leniheli litumbwi kupitalila. 15Najombi Bambo Chapanga anaabhalapula bhandu bha Izilaeli, nabhombi anabhanyuhakika ngati linyonyoli molinyuhakika panani ja machi. Anaajitupulaje Izilaeli kuhuma mu inchi jenu jinyahi jeabhapekihi akahokolu bhabhu na kubhapechangana kwihi ja nkoka Eufulati, maghambu bhandendiki nepani Bambo Chapanga niyomaje nakanopi, kwa kulilenganakela imong'umong'u ya ichapanga ya Ashela. 16Bambo Chapanga anaabhaleka bhandu bha Izilaeli kwa ndandi ja mahoku ghaatendiki Yeloboamu, na kubhatenda bhandu bha Izilaeli nabhombi kutenda mahoku.”

17Panihapa nhwanu waka Yeloboamu akajemiki, na kubhoka kujenda ku muchi wa Tiliza. Najombi paakahikiki pela pundyangu, mwana akapotile. 18Bhandu bhokapi bha Izilaeli bhakuntaghiki, na kuombuleza kwa ndandi jaki, ngati moakapwaghi Bambo Chapanga kwa kupetela kwaka mtumika waki, mlota Ahiya.

Kupotela kwaka Yeloboamu

19Matendu ghangi ghaka nkolongwa Yeloboamu, ntundu moakakomani ngondo na kutawala, ghokapi ghalembakiki mu chitabu cha kombukombu ya bhakolongwa bha Izilaeli. 20Yeloboamu akatawili kwa hyaka ishilini na ibheli, najombi akapotili na kutaghakika, najombi Nadabu mwana waki akabhi nkolongwa pandu paki.

Lehoboamu atawala mu inchi ja Yuda

2 Mambu gha Chikahi 11:5-12:15

21Lehoboamu mwana waka Solomoni akatendakiki kubha nkolongwa wa ku Yuda. Akabhi na hyaka alobaini na jimu chikahi paakatumbwi kutawala, najombi akatawili kwa hyaka komi na saba koni akabya ku muchi wa Yelusalemu, muchi ambau Bambo Chapanga akabhi auhawili kuhuma mu makabila ghokapi gha Izilaeli, nahuli apata kujojabhalewa monihomu. Lihina laka mabhu waki akalowakiki Naama, kuhuma mu likabila la Bhaamoni.

22Bhandu bha Yuda bhakatendiki mahoku polongi jaka Bambo Chapanga. Bhakuntendiki Chapanga kubha na inyela ja wihu nakanopi kwa mahoku ghabhu ghamaheli ghabhakahengiki, kupeta hata ghabhakahengiki akahoko bhabhu. 23Bhelabhela bhakalilenganakili pandu pa kujojabhela ichapanga ya upuhe, nguzu ya kujojabhela, na imong'umong'u ya Maashela panani ja kila katombi kakajinwiki, na kila nkongu ghoubhi na mahamba mabhehi. 24Bhelabhela kukabhi na akanalomi mu inchi ja Yuda bhabhakabhi bhajingalanila kihyegha bheni mu inchi kwa ndandi ja kujojabhela imong'umong'u yabhu. Mambu ghanihagha gha kuhakaliha ghaghakabhi ghahengakeka na bhandu bha inchi nayengi, ambayu Bambo Chapanga akaghatopwili mangani Bhaizilaeli pabhakabhi bhakali ngakujingila mu inchi ja Kanaani.

25Mu chaka cha kahanu cha utawala waka nkolongwa Lehoboamu, Shishaki nkolongwa wa ku Misili, akaulapwili muchi wa Yelusalemu. 26Akatoliki hindu yokapi kuhuma mu chikoku cha Nyumba jaka Bambo Chapanga na chikoku cha mu nyumba ja kikolongwa. Akatoliki kila chindu, papamu na ngau yokapi ya zahabu yeakabhi alenganakili nkolongwa Solomoni. 27Bhela Nkolongwa Lehoboamu akalenganaki ngau ya shaba na kubhapekeha bhakolongwa bha bhalonda, bhabhalendika ndyangu wa nyumba ja kikolongwa. 28Kila chikahi nkolongwa paakapiti mu Nyumba jaka Bambo Chapanga, bhalonda bhakaitowi ngau heyi, na kuikelabhu kabheti mu chumba cha bhalonda.

29Matendu ghangi ghaka nkolongwa Lehoboamu, na ghokapi ghaakahengiki, ghalembakiki mu chitabu cha kombukombu ya bhakolongwa bha Yuda. 30Chikahi chokapi kubhabhi na ngondo pachilanda jaka Lehoboamu na Yeloboamu. 31Lehoboamu akapotili na kutaghakika mu matengeli gha akatati bhaki, mu muchi waka Daudi. Lihina laka mabhu waki akalowakiki Naama, kuhuma mu likabila la Amoni, najombi Abiya mwana waki, akabhi nkolongwa pandu paki.