1 Bhakolongwa 13

1Lichobha limu nkolongwa Yeloboamu akabhi ajemiki punkeghi ja meza ja maganga ja kubhokeha nyambiku nahuli kuhuwa ubani. Mundu waka Bambo Chapanga kuhuma ku Yuda akahikiki pa Beseli hapa na ubholu waka Chapanga. 2Bhela, mundu hoju akalapwi njobhela panani ja pandu pa kubhokeha nyambiku, kwa lilobhi laka Bambo Chapanga, akapwaghaje, “Wenga wa meza ja maganga ja kubhokeha nyambiku, wenga wa meza ja maganga ja kubhokeha nyambiku, lendenu nde leapwagha Bambo Chapanga: Anaabhelakika mwana mu lukolu lwaka Daudi, lihina laki anaalowakika Yosia. Jonihoju nde joatumikaje pandu pa kujojabhela na kuhuwa ubani panani jaku, na kutambikila ichapanga panani jaku, na ihupa ya bhandu anaijochakikaje panani jaku.” 3Lichobha lelalela mundu waka Chapanga akabhohiki nginyulila, akapwaghaje, “Jenjenu nde nginyulila jeakapwaghiki Bambo Chapanga, lingalyaje, meza jenjenu ja maganga ja kubhokeha nyambiku anajikajukaje, na ilihu yeibhi panani jaki anaijitakaje.” 4Nkolongwa Yeloboamu paakajowini chela cheakapwaghiki mundu waka Chapanga, chikahi paakalapwi njobhela pa meza ja maganga ja pandu pa kubhokeha nyambiku ku Beseli hoku, akahatambwi chibhoku chaki pa meza ja maganga ja kubhokeha nyambiku, na kupwagha, “Munkamulaje!” Palapala chibhoku chaki cheakahatambwi chela ngacheakaweziki kuchikunja. 5Najombi meza ja maganga ja kubhokeha nyambiku pakakajwiki, na ilihu yakajitiki pahi, ngati nginyulila jela jeakabhohiki mundu waka Chapanga hoju kwa lilobhi laka Bambo Chapanga. 6Bhela, nkolongwa Yeloboamu akumpwaghili mundu waka Chapanga, “Chondi unobhila kwaka Bambo Chapanga, Chapanga waku, nahuli chibhoku changu chipata kulama.” Najombi mundu waka Chapanga akundobhi kwaka Bambo Chapanga, chibhoku chaka nkolongwa chakalamiki na kubha ngati moukabheli pakutumbula hapa. 7Nkolongwa akumpwaghi mundu waka Chapanga jola, “Kambokaje kunyumba jangu ukakula chilebhi, nanatu ananikupekya nhupu.”

8Nambu mundu waka Chapanga jola akamuyangiki nkolongwa, “Hata ngati anaumbeki nusu ja hindu yaku, nganyendi papamu na wehapa, wala nganguli chilebhi, wala ngangunywi machi pandu pambane. 9Maghambu Bambo Chapanga anaghalaki, ‘Ngawikula chilebhi, wala kunywa machi, wala ngawikelabhuka kwa indela jeukahikiki pambani ng'o.’ ” 10Bhela, mundu jola akabhokiki kwa kupetela indela jengi, wala ngacheakelawiki kwa indela jela jeakahikili ku Beseli.

Mlota mzee wa ku Beseli

11Chikahi chenihechi kukabhi na mlota jumu mzee ku Beseli hoku, bhana bhaki bhakapiti kundandila mambu ghokapi ghaatendiki mundu waka Chapanga jola lichobha leniheli. Bhelabhela bhakumpwaghi tati wabhu malobhi ambaghu mundu jola akumpwaghi nkolongwa Yeloboamu. 12Tati wabhu akabhalalukile, “Bho, apetiki indela bhole?” Nabhombi bhana bhaki bhakundangihi indela jela jeapetiki mundu waka Chapanga kuhuma ku Yuda. 13Najombi akabhapwaghi bhana bhaki, “Mniandalya liponda langu la mwanja.” Pabhakajomwi kuliandaa liponda heli, mzee jola akakweliki panani ja liponda, 14na kunjengalela mundu waka Chapanga jola. Akunhimanili atami pahi ja nkongu wa mwaloni. Bhela, akundalukile, “Bho, wehapa le nde wa mundu waka Chapanga kuhuma ku Yuda?”

Najombi akunjangiki, “Ena, nde nepani.”

15Bhela mlota mzee jola akumpwaghile, “Kambokaje kunyumba jangu, ukakula chilebhi.”

16Nambu mundu waka Chapanga jola akumpwaghile, “Nganhwezi kujenda papamu na wehapa, wala nganhwezi kula chilebhi, wala nganhwezi kunywa machi pandu pambani. 17Maghambu Bambo Chapanga anaghalakili, ‘Ngawikula chilebhi, wala kunywa machi, wala ngawikelabhuka kwa indela jeukahikiki pambani ng'o.’ ”

18Mlota mzee wa ku Beseli hoju akumpwaghile, “Nepani nanatu nde mlota ngati wehapa, na mtumika wa kunani kwaka Chapanga akambwaghili kwa lilobhi laka Bambo Chapanga, ‘Unkeluha ahika munyumba jaku, nahuli akula chilebhi, na kunywa machi.’ ” Nambu mlota mzee hoju akabhi mpuhi pela.

19Bhela, mundu waka Chpapanga akakelawiki papamu naku, akakuliki chilebhi, na kunywa machi kunyumba jaka mlota mzee jola. 20Chikahi pabhakabhili bhatami pameza, lilobhi laka Bambo Chapanga lakunhiki mlota mzee joakunkelawihi mundu waka Chapanga jola. 21Najombi akunjamalalili mundu waka Chapanga joakahumiki ku Yuda jola, akapwaghaje, “Bambo Chapanga apwagha anana, ‘Wehapa ukaniki kujowanela lilobhi laka Mambo Chapanga, na ngachewajengali amuli jeakakupekihi Bambo Chapanga, Chapanga waku. 22Nambu ukakelawiki, na kula chilebhi, na kunywa machi pandu ambapu akakupwaghili ngawikula, wala kunywa machi. Kwa ndandi jeniheji ntuhi waku ngawitaghakiki mu litengeli la akahoko bhaku.’ ”

23Chikahi mundu waka Chapanga jola paakajomwi kula chilebhi na kunywa machi, mlota mzee hoju akamuandali liponda mundu waka Chapanga kuhuma ku Yuda, najombi akabhokiki. 24Paakabhi ajenda akahimangini na lihimba mwindela, lihimba lakunkomiki na ntuhi waki ukabhi ulekaliki mu indela, liponda laki na lihimba heli ghakabhi ghajemiki pambipi na ntuhi. 25Bhandu bhakumu bhabhakapetiki indela jenijela bhakauweni ntuhi pahi pala, na lihimba lijemiki pambipi na ntuhi, nabhombi bhakapiti kubhoha ubholu ku muchi ambau mlota mzee jola akabhi atama.

26Mlota mzee joakabhi ankelawihi mundu kuhuma mu mwanja waki paakajowini ubholu ghonihoghu, akapwaghiki, “Jonihoju nde mundu waka Chapanga ambaju akalilekiki lilobhi laka Bambo Chapanga! Bambo Chapanga alitumiki lihimba, lunkachulini na kunkoma, ngati lilobhi laka Bambo Chapanga molakunkanakile.” 27Mlota mzee jola akabhapwaghi bhana bhaki, “Mniandalya liponda langu la mwanja.” Nabhombi bhakamuandalile. 28Bhela mzee hoju akabhokiki, akauhimanili ntuhi waka mundu waka Chapanga mu indela, liponda na lihimba ghakabhi ghajemiki pambipi ja ntuhi, lihimba ngachelakakuliki ntuhi, wala kulikachulana liponda. 29Bhela, mlota mzee jola akautoliki ntuhi waka mundu waka Chapanga, akaughoniki panani ja liponda laki, na kuukelabhuha mu muchi waki, nahuli kundelela na kuntagha. 30Panihapa bhakautaghiki ntuhi mu litengeli laka mlota mzee jola, nabhombi bhana bhaki bhakaombulizi, bhakapwaghaje, “Wehapa undongu witu!” 31Pabhakajomwili kuntagha, mlota mzee jola akabhapwaghi bhana bhaki, “Anambotili, mwindagha mu litengeli leniheli leataghakiki mundu waka Chapanga, mwibheka ihupa yangu punkeghi ja ihupa yaki. 32Mambu ghokapi ghaghalaghalakiwi na Bambo Chapanga kupetela pa meza ja maganga ja kubhokeha nyambiku pa ku Beseli na kupetela pa meza yokapi pa kubhokeha nyambiku mu itombi ya Samalia, chakaka anaghapitalyaje.”

Yeloboamu atenda mahoku

33Nambu nkolongwa Yeloboamu ngacheakaulekiki uhakau waki, nambu mala jengi kabhete akabhekiki bhapenganyambiki bhatumikaje pa meza ya maganga ya kubhokeha nyambiku ku itombi. Mundu jokapi jola joakalibhohiki kubha mpenganyambiku, akuntendiki kubha mpenganyambiku pandu pa kujojabhela ichapanga ku itombi. 34Chitendu chenihechi chakabhi lihoku kwa lukolu lwaka Yeloboamu, hata chakamuyoningi na kubhohakeka panani ja ndema.