1 Bhakolongwa 12

Makabila komi gha kungondi ghalitenga

2 Mambu gha Chikahi 10:1-19

1Bhela, Lehoboamu akapiti ku Shekemu, kwa kubha Bhaizilaeli bhokapi bhakabhi konihoku nahuli kuntenda jombi kubha nkolongwa. 2Najombi Yeloboamu mwana waka Nebati paakajowini lijambu leniheli, akabhi akona ku Misili koakabhi atilili nahuli kubha kutali na nkolongwa Solomoni, akatami ku Misili. 3Bhela bhakatumiki bhandu kundoha Yeloboamu, jombi na lipogha lokapi la Izilaeli bhakunjendili Lehoboamu, na kumpwaghila, 4“Tati waku akatutwekiki hibwahila yeitopiki. Bhela, utujeluha chibwahila hechi, na tepani anatukutumakyaje.”

5Lehoboamu akayangike, “Njendaje, na anaghapetiki machobha ghatatu, mkelabhuka kwangu.” Bhela, bhandu bhakabhokike.

6Bhela nkolongwa Lehoboamu akapaliki kumanya maholalelu gha ihongozi ambabhu bhakuntumaki tati waki Solomoni chikahi cha womi waki, akabhalalukile, “Bho, muholake nabhapekya liyangu bholi bhandu abhabha?”

7Ihongozi bhanihabha bhakamuyangike, “Ngati lalenu anaubhi mtumika wa bhandu abhabha na kubhatumakila na kubhapekeha liyangu linyahi, anabhakubha bhatumika bhaku machobha ghokapi.”

8Nambu Lehoboamu akakaniki maholalelu ghaakapekiwi na ihongozi na kupala maholalelu kuhuma kwa akakombu bha chikambaku bhabhakakoliki papamu naku, na bhabhakabhi bhuntumakila. 9Bhela akabhalalukile, “Bho, na mwehapa mbi na maholalelu bhole?” Nahuli tubhayanga bhandu abhabha bhabhanaluki, bhakapwaghaje, “Nyeluhaje chibwahila yeakabhatwekiki tati wangu?”

10Akakombu bhanihabha bhakamyangike, “Bhandu habha bhabhakupwaghi kubha tati waku akabhatwekiti chibwahila chechitopiki, bhakakulobhiki ujeluhaje chibwahila hechi, wehapa ubhapwaghila anana, ‘Wehapa anaubhapekya lihengu lelitopiki nakanopi, kupeta mahengu ghala ghabhakapekiwi na tati waku. 11Chibwahila chaka tati wangu chakabhi chechitopike, nambu chibwahila changu nepani anachikubha chechitopiki nakanopi. Tati wangu akundapwi kwa iboku ya ndomondo, nambu nepani ananundapula kwa iboku yeibhi na miha!’ ”

12Bhela lichobha la katatu, Yeloboamu papamu na bhandu bhokapi bhakakelawiki kwaka nkolongwa Lehoboamu ngati moakabhalaghalakile. 13Nkolongwa Yeloboamu akabhayangiki bhandu bhanihabha kwa ukale, akaghalekiki maholalelu ghaakapekiwi na ihongozi, 14na akajengalili maholalelu gha akakombu bhajaki, akapwaghaje, “Chibwahila chaka tati wangu chakabhi chechitopike kwinu, nambu chibwahila changu nepani anachikubha chechitopiki nakanopi. Tati wangu akabhalapwili kwa iboku ya ndomondo, nambu nepani ananundapula kwa iboku yeibhi na miha!” 15Bhela nkolongwa ngacheakabhajowani bhandu, kwa ndandi lijambu leniheli lakahumiki kwaka Bambo Chapanga, nahuli kutimiza lilobhi laki, leakumpwaghi Yeloboamu mwana waka Nebati kupetela kwaka mlota Ahiya, kuhuma ku Shilo.

16Nambu bhandu bhokapi bha Izilaeli pabhakaweni kubha nkolongwa akaniki kubhajowanela, bhakumpwaghile, “Ngachetubhi na majetanganelu ghokapi na Daudi! Tepani ngachetubhi na upwelelu kwaka mwana waka Yese. Njendanyaje mu mahema ghinu, mwenga mabhandu bha Izilaeli! Wenga wa Daudi ujighoha nyumba jaku wamwete!”

Bhela Bhaizilaeli bhakapiti mu mahema ghabhu. 17Nambu bhandu bha Izilaeli bhabhakabhi bhatama mu michi ja inchi ja Yuda, bhanihabha pena nde bhabhahighalili pahi ja utawala waka Lehoboamu.

18Nkolongwa Lehoboamu akuntumiki Adolamu, joakabhi njemalela wa bhala bhabhakabhi bhahenga lihengu linonopi la kujomalakewa, nambu bhandu bhokapi bha Izilaeli bhakundapwi kwa maganga mbaka kupotela. Hata bhela, nkolongwa Lehoboamu, akakweliki manyata mu ligali laki la kuhutakika na falasi, na kutilila ku Yelusalemu. 19Bhela, bhandu bha Izilaeli bhakapengiki panani ja lukolu lwaka nkolongwa Daudi mbaka lalenu.

20Bhandu bhokapi bha Izilaeli pabhakajowini kubha Yeloboamu akelawiki kuhuma ku Misili, bhakatumiki bhandu na kundoha pa uhimanganu, na kuntenda kubha nkolongwa wa Izilaeli jokapi. Njeta likabila lengi lelakalombini na lukolu lwaka Daudi, nambu likabila laka Yuda pela.

Ulota waka Shemaya

2 Mambu gha Chikahi 11:1-4

21Chikahi Lehoboamu paakahikiki ku Yelusalemu, akabhongini manjolinjoli ghaghabhi wichu laki jimu na elufu semanini gha makabila gha Yuda na likabila laka Benyamini, nahuli kukomana ngondo na utawala wa Izilaeli, nahuli kuukelabhuha kabheti ukolongwa kwaka Lehoboamu mwana waka Solomoni. 22Nambu lilobhi laka Chapanga lakunhiki mlota Shemaya, mundu waka Chapanga, kupwagha, 23“Umpwaghila Lehoboamu mwana waka Solomoni, nkolongwa wa Yuda, na bhandu bhokapi bha likabila laka Yuda na likabilalaka Benyamini na bhandu bhangi bhokapi, 24‘Bambo Chapanga apwagha anana: Ngamwijenda, wala ngamwikomana ngondo na bhalongu bhinu Bhaizilaeli, mbuja kila mundu kunyumba jaki, maghambu lijambu leniheli nilitendiki nepani.’ ” Bhela bhakalijengalili lilobhi laka Bambo Chapanga, bhakabhujiki kunyumba yabhu kabheti, ngati Bambo Chapanga moakabhalaghalakile.

Yeloboamu andeka Bambo Chapanga

25Bhela, nkolongwa Yeloboamu akauchengiki kabheti muchi wa Shekemu mu inchi ja itombi yaka Efulahimu, na kutama konihoku. Bhelabhela akabhokiki konihoku na kujenda kuuchenga muchi wa Penueli. 26Yeloboamu akaholalili muntima waki, “Sajenu iwezikana ukolongwa kukelabhuka munyumba jaka Daudi. 27Ngati bhandu abhabha anabhajendali kukwela kujenda kubhoha nyambiku mu Nyumba jaka Bambo Chapanga ku Yelusalemu hoku, mitima jabhu anajung'anambukya bambo wabhu, yani Lehoboamu nkolongwa wa Yuda. Nabhombi anabhangoma nepani na kunkelabhukila nkolongwa Lehoboamu.”

28Bhela, nkolongwa paakalongili na bhandu bhangi, akalenganakili imong'umong'u ya matoli gha ng'ombi ghabheli gha zahabu. Akabhapwaghili bhandu, “Mwenga mabhandu bha Izilaeli, kunonwipi namaa kwinu mwehapa kukwela kujenda ku Yelusalemu. Ndingalyaje, ichapanga hinu yepambane, yeyakumbohiki mwehapa kuhuma ku inchi ja Misili.” 29Chimong'umong'u chimu cha litoli la zahabu akachibhekiki ku muchi wa Beseli, na chengi ku muchi wa Dani. 30Chitendu hechi chakabhi lihoku, maghambu bhandu bhakabhi bhajenda mbaka ku muchi wa Beseli na Dani kuijojabhalela imong'umong'u heyi. 31Bhelabhela Yeloboamu akachengiki nyumba pandu pa panani ja tutombi, na kubhahaghu bhapenganyambiku kuhuma kwa bhandu ambabhu ngachebhakabhi likabila laka Lawi.

Kujojabhela ku Beseli kupengakeka

32Yeloboamu akalaghalaki kutendakika uwangalalu mu lichobha la komi na nhwanu la mwehi wa nane, ngati uwangalalu ghoukabhi ukahengakeka ku Yuda hoku, na kubhoha nyambiku pa meza ja maganga ja kubhokeha nyambiku jejakabhi pandu pala payakabhi imong'umong'u ja litoli la zahabu lelakabhi ku Beseli. Akatendiki bhenibhela ku Beseli hoku, akabhohiki nyambiku palongi ja imong'umong'u ya matoli gha zahabu yeakalenganakile. Akabhabhekiki bhapenganyambiku bhala bhaakabhahawili nahuli bhatumika pa kila meza ja maganga ja kubhokeha nyambiku papakalenganakiki ku tutombi hoku. 33Mu lichobha la komi na nhwanu la mwehi wa nane, mwehi ghoakahawili mweni, akabhohiki nyambiku panani ja meza ja maganga ja kubhokeha nyambiku jeakachengiki ku muchi wa Beseli hoku. Bhela akatumbulili uwangalalu kwa ndandi ja Bhaizilaeli na akakweliki pa meza ja maganga ja kubhokeha nyambiku, na kuhuwa ubani.