1 Bhakolongwa 11

Solomoni ajileka indela jaka Chapanga

1Solomoni akabhapaliki namaa akambomba bhamaheli bha chigheni: Mwali waka nkolongwa Falao, akambomba bha Bhamoabu, akambomba bha Bhaamoni, akambomba bha Bhaedomu, akambomba bha Bhasidoni na akambomba bha Bhahiti. 2Akambomba bha inchi ambayu Bambo Chapanga akabhi abhakanakili Bhaizilaeli, akapwagha, “Ngamwitogho akambomba bha chigheni, wala bhombi ngabhitogho akambomba kuhuma kwinu, kwa ndandi akambomba bhanihabha anabhajing'anambula mitimi jinu nahuli muitumakyaje ichapanga yabhu.” Nambu Solomoni akabhapaliki namaa akambomba bhanihabha. 3Solomoni akabhi na akabhahanu mia saba, bhokapi bhakabhi akakamwali bha bhabhelakeka bha kikolongwa, bhelabhela akabhi na akabhahanu mia itatu ambabhu bhakabhi bhatumika bhaki bha chimbomba. Akabhahanu bhaki habha bhakung'anambwili mtima waki. 4Solomoni paakabhi mzee, akabhahanu bhaki bhakundongwihi kutumbu kuitumakila ichapanga nayengi, wala ngacheakabhi ndongwana kwaka Bambo Chapanga, Chapanga waki, ngati tati waki Daudi moakabheli ndongwana. 5Panihapa, Solomoni akuntumakili Ashitoleti, joakabhi chapanga wa chimbomba wa Bhasidoni, na Moleki chapanga ambaju Bhaamoni pabhakunjojabhili bhakunhakalihi Chapanga. 6Bhela, Solomoni akatendiki mahakau palongi jaka Bambo Chapanga, wala ngacheakunjengali kwa ulongwana Bambo Chapanga, ngati tati waki Daudi moakatendile. 7Panani ja chitombi chechibhi upambala wa kolipita lyobha wa muchi wa Yelusalemu, Solomoni akachengiki pandu pa kunjojabhela kichapanga Kemoshi, kichapanga ambaju Bhamoabu pabhakunjojabhili bhakunhakalihi Chapanga, na pandu pa kunjojabhela kichapanga Moleki, kichapanga ambaju Bhaamoni pabhakunjojabhili bhakunhakalihi Chapanga. 8Bhelabhela akabhachengili akabhahanu bhaki bhokapi bha chigheni pandu pa kuhukila ubani, na kuibhokeha ichapanga yabhu nyambiku.

9Bhela, Bambo Chapanga akamuyomi Solomoni kwa ndandi mtima waki ukang'anambwiki kutali na Bambo Chapanga, Chapanga wa Izilaeli, joakumpitali mala pabheli, 10na kundakali Solomoni ngaijojabhela ichapanga ya chigheni, nambu Solomoni ngacheakakamwili amuli yaka Bambo Chapanga. 11Bhela, Bambo Chapanga akumpwaghi Solomoni, “Kwa kubha uhengiki ghanihagha, wala ngachewakamwili Lulaghilu lwangu, na shelia yangu yenukulaghalakili, chakaka ananukachula ukolongwa kuhuma kwaku, na kumpekeha mtumika waku. 12Hata bhela, kwa ndandi jaka tati waku Daudi, nga ndendi lijambu leniheli chikahi cha womi waku. Nambu ananukachula ukolongwa hoghu kuhuma mu mabhoku ghaka mwana waku. 13Nganaukachuli ukolongwa wokapi kuhuma kwaki, nambu ananumpekya mwana waku likabila limu, kwa ndandi jaka mtumika wangu Daudi, na kwa ndandi ja Yelusalemu, muchi ghonuhawili kubha wangu namwete.”

Maadui bhaka Solomoni

14Bhela Bambo Chapanga akuntendiki Hadadi joakabhi wa lukolu lwaka nkolongwa wa ku Edomu, kubha adui waka Solomoni. 15Chikahi Daudi paakabhi nkolongwa, akapiti kukomana na bhandu bha ku Edomu. Yoabu, joakabhi nkolongwa wa manjolinjoli ghaka nkolongwa Daudi, akapiti kubhatagha Bhaizilaeli bhabhakomakiki kungondo. Mu chikahi chenihechi, Yoabu akabhakomiki akanalomi bhokapi bha ku Edomu. 16Yoabu na Bhaizilaeli bhokapi bhakatami konihoku kwa myehi sita, mbaka pabhakajomwili kubhayonanga akanalomi bhokapi bha ku Edomu hoku. 17Nambu Hadadi, akabya akona nkombu nchoku, akatilili ku Misili papamu na Bhaedomu bhakumu, bhabhakabhi bhatumika bhaka tati waki. 18Hadadi na bhajaki bhakatendiki mwanja kuhuma ku Midiani, bhakabhatoliki bhandu bhangi ku Palani hoku, bhakapiti nabhu mbaka ku Misili, kwaka Falao nkolongwa wa inchi ja Misili, Falao akumpekihi Hadadi nyumba, chilebhi, na mighonda. 19Falao akanyambakiki namaa na Hadadi, hata akuntoghuki ndamu waki, ndongu waka nhwanu waki nkolongwa wa chimbomba Tapenesi, kubha nhwanu waka Hadadi. 20Ndongu waka nkolongwa wa chimbomba Tepenesi hoju akumbelakili Hadadi mwana joakalowakiki Genubati. Genubati akaleliwi na Tapenesi mu nyumba jaka nkolongwa Falao. Konihoku Genubati akatami papamu na bhana bhaka nkolongwa Falao.

21Chikahi Hadadi paakabhi ku Misili hoku, akajowini kubha Daudi apotili na kutaghakika kobhakataghakiki akahokolu bhaki, bhelabhela Yoabu joakabhi nkolongwa wa manjolinjoli najombi apotile. Bhela, Hadadi akumpwaghi Falao, “Chondi, nukulobha unyetakyaje ngelabhuka ku inchi jangu.”

22Falao akundalukile, “Bho, pambani ukepakiwi na kiki mbaka upala kubhuja ku inchi jako?”

Hadadi akamuyangiki Falao,

“Nga chindu, nambu unyetakya pena nyendaje.”

23Bhelabhela Chapanga akuntendiki Lezoni mwana waka Eliada, kubha adui jongi waka Solomoni. Lezoni akabhi antiliki bambo waki Hadadezeli, nkolongwa wa ku Soba. 24Chikahi Daudi paakabhakomiki bhandu bha ku Soba hoku, Lezoni akabhongini bhandu na kulenganakela lipogha la bhandu bha kupenga, najombi Lezoni akabhi chiongozi wabhu. Bhela, bhakapiti ku Damasko, bhakatami konihoku na kuntenda Lezoni kubha nkolongwa wa Damasko. 25Lezoni akabhi adui wa Izilaeli kwa machobha ghokapi gha ukolongwa waka Solomoni, akung'ahiki namaa Solomoni ngati najombi Hadadi moakung'ahi Solomoni. Bhela, Lezoni akajitawili inchi ja Silia, koni akabya abhahakalila namaa bhandu bha Izilaeli.

Chilanga chaka Chapanga kwaka Yeloboamu.

26Bhelabhela, Yeloboamu mwana waka Nebati, Mwefulaimu wa ku Seleda, mtumika waka Solomoni, ambaju mabhu waki joakaweliwi na ndomi waki akalowakiki Selua, najombi akumpengiki nkolongwa. 27Na aghagha nde malobhi gha ntundu jombi moakumpengi nkolongwa: Solomoni akayelalili mabhomba na kuchenga ngazi yeyalowakiki Milo yeyakabhi ijenda ku lumatu lwa muchi waka tati waki Daudi. 28Bhela Yeloboamu akabhi mundu joakangamili na mwana makili, najombi Solomoni paakumbweni ntundu nkombu hoju moakahengi lihengu laki, akumbekiki kubha chiongozi wa mahengu ghokapi gha kujomalakewa gha munyumba jaka Yusufu. 29Lichobha limu, Yeloboamu paakabhi atenda mwanja kuhuma ku Yelusalemu, mlota Ahiya, Mshiloni akahimangini naku mu indela, Ahiya akabhi awati likanzu lahenu. Bhokapi bhabheli bhakabhi kanjika jabhu ku mighonda. 30Najombi Ahiya akalihuliki likanzu laki lahenu, akalikachwili ipandi komi na ibheli. 31Bhela akumpwaghi Yeloboamu, “Utolaje ipandi komi kwa ndandi jaku, kwa kubha anana nde Bambo Chapanga, Chapanga wa Izilaeli, moapwaghila, ‘Lingalyaje, ananukachula ukolongwa kuhuma mu mabhoku ghaka Solomoni na kukupeke wehapa makabila komi. 32Nambu jombi ananundekila likabila limu kwa ndandi jaka mtumika wangu Daudi, na kwa ndandi ja muchi wa Yelusalemu, ambau nuhawili kubha wangu mu makabila ghokapi gha Izilaeli. 33Anandenda bhenibhela maghambu Solomoni anekiki nepani na kujojabhela ichapanga ya kigheni: Ashitoleti chapanga wa chimbomba wa Bhasidoni, Kemoshi chapanga wa Bhamoabu, na Moleki chapanga wa Bhaamoni. Solomoni atehi kuneka, atendiki mahakau palongi jangu, na ngacheamwili shelia yangu, na malaghalakilu ghangu, ngati moakatendi tati waki Daudi. 34Nambu nganibhohi ukolongwa wokapi kuhuma mu mabhoku ghaka Solomoni, nuntendiki kubha nkolongwa machobha ghokapi gha matamu ghaki kwa ndandi jaka mtumika wangu Daudi, jonunhawili na joakabhi akamu amuli yangu na shelia yangu. 35Anamoha ukolongwa kuhuma mu mabhoku ghaka mwana waki, na kukupeke wehapa makabila komi. 36Mwana waka Solomoni hoju ananumpekya likabila limu, nahuli mtumika wangu Daudi, apata kubha na taa machobha ghokapi palongi jangu mu Yelusalemu, muchi ghola ghonuhawili kubha pandu pangu pa kunyojabhela. 37Bhela, wehapa wa Yeloboamu, ananukutenda kubha nkolongwa wa Izilaeli, nanau anautawala ngati moupalila. 38Na ngati anautendiki kila chenakulaghalakyaje, kujenda mu indela yangu na kutenda ghaghabhi ghamboni palongi ja mihu ghangu, kwa kuikamula amuli yangu na malaghalakilu ghangu ngati moakatendi mtumika wangu Daudi, anangubha papamu na wehapa. Ananukuchengila ukolongwa ghoanautamakya ngati ghola ghonukunchengi Daudi, nanatu ananukupekyaje wehapa Izilaeli. 39Kubhokana na ghanihagha ananabhang'ahaje bhabhelakeka bhaka Daudi kwa ndandi ja leniheli, nambu nga mileli.’ ”

40Bhela, Solomoni akalengiki kunkoma Yeloboamu, nambu Yeloboamu akatilili ku Misili, kwaka nkolongwa Shishaki, najombi akatami konihoku mbaka Solomoni paakapotile.

Kupotela kwaka Solomoni

2 Mambu gha Chikahi 9:29-31

41Mambu ghangi ghaka Solomoni, ghokapi ghaakahengiki na mbulau yaki, ghalembakiki mu chitabu cha matendu ghaka Solomoni. 42Solomoni akatawili Izilaeli jokapi kwa yaka alobaini, akabya ku Yelusalemu. 43Bhela, Solomoni akapotile, akataghakiki mu muchi waka tati waki Daudi. Najombi Lehoboamu mwana waka Solomoni, akabhi nkolongwa pandu paki.