1 Bhakolongwa 10

Nkolongwa wa chimbomba wa ku Sheba anjendela Solomoni

2 Mambu gha Chikahi 9:1-12

1Nkolongwa wa chimbomba wa ku muchi wa Sheba paakajowini malobhi gha kumanyikana kwaka Solomoni, na upambipi waki na Bambo Chapanga, akahikiki kundenga kwa malalukilu ghaghanonwipe. 2Akahikiki ku Yelusalemu akabya na bhahemba bhamaheli namaa, papamu na ngamia yeitotwi manungilu, zahabu yamaheli namaa, na maganga gha mbija yamaheli. Akahikiki kwaka Solomoni na kulonge naku kubhokana na mambu ghokapi ambaghu akabhi naghu muntima waki. 3Solomoni akamyangiki nkolongwa wa chimbomba hoju malalukilu ghaki ghokapi, na ngachepakabhi na lijambu lokapi lela lelanonwipi kwaka nkolongwa Solomoni langakuweza kundandila. 4Nkolongwa wa chimbomba wa ku Sheba paakamanyiki mbulau yokapi yaka Solomoni, na nyumba ja chikolongwa jeakabhi achengiki, 5bhelabhela paakaweni chilebhi chechakabhi pameza jaki, ntundu ihongozi bhaki mobhakatamili, bhatumika bhaki mobhakawati kanzu yabhu wichu, bhakenga bhaki na nyambiku ya kujochakeka yeabhohiki mu Nyumba jaka Bambo Chapanga, akakangichi namaa. 6Bhela, akumpwaghi nkolongwa Solomoni, “Mambu ghokapi ghanyowini ku inchi jangu kubhokana na kuneng'anela kwaku na mbulau yaku nde chakaka! 7Nambu ngachenahobhalili mambu ghanihagha mbaka panakahikiki na kughabhona kwa mihu ghangu namwete. Lingalyaje, ngachebhambwaghi hata nusu jaki. Mbulau yaku na hindu yokapi yeubhi nayu ipetiki mambu ghanajowine. 8Mbanga bhandu bhaku! Mbanga bhatumika bhaku abhabha bhabhajema palongi jaku chikahi chokapi na kujowanela mbulau yaku! 9Alumbalika Bambo Chapanga, Chapanga waku, ambaju anyambakiki namaa na wehapa na kukubheka panani ja chitehu cha ukolongwa cha Izilaeli. Maghambu kwa upalu wa mileli waka Bambo Chapanga kwa ndandi ja Izilaeli, akutendiki wehapa kubha nkolongwa, nahuli ujendalya kuighoha shelia na wambone.”

10Najombi akumpeki nkolongwa Solomoni kilu elufu ncheche ya zahabu, na manungilu ghamaheli namaa, na maganga gha mbija yamaheli. Ngachekulabhali ng'o kuletakeka kabheti manungilu ghamaheli ngati ghanihagha, ambaghu nkolongwa wa chimbomba wa ku Sheba ghaakumpeki nkolongwa Solomoni.

11Bhelabhela sitima yaka Hilamu yakaletiki zahabu kuhuma ku Ofili, bhelabhela kuhuma konihoku yakaletiki mikongu ja msandali jamaheli namaa, papamu na maganga gha mbija yamaheli. 12Nkolongwa Solomoni akatumili mikongu ja msandali heji kubha nguzu ya Nyumba jaka Bambo Chapanga, na kwa ndandi ja nyumba jaki ja kikolongwa, na kwa ndandi ja kulenganakela hilimba na zeze kwa ndandi ya bhajemba. Umaheli wa mikongu jeniheji ngachekulabhali kuletakeka mu inchi jeniheji kutumbu lichobha lenilela.

13Nkolongwa Solomoni akumpekihi nkolongwa wa chimbomba wa ku Sheba kila chindu cheakatokulili na cheakalobhiki, papamu na hindu yengi ambayu Solomoni akumpekihi kubhokana na ntetu wabhu na wamboni wa chikolongwa. Bhela nkolongwa wa chimbomba hoju akabhokiki na kubhuja ku inchi jaki, jombi papamu na bhatumika bhaki.

Umaheli wa hindu waka nkolongwa Solomoni

2 Mambu gha Chikahi 9:13-28

14Kila chaka nkolongwa Solomoni akapelakiwi kilu elufu ishilini na ibheli ya zahabu. 15Yeniheyi nga papamu na kodi yeakapatiki kuhuma kwa bhabhahemela na kulombesa na bhachuuzi, na kwa bhakolongwa bhokapi bha ku Alabia na ihongozi bha mikoa ja Izilaeli.

16Nkolongwa Solomoni akalenganaki ngau ikolongwa mia ibheli kwa zahabu jejigholuliki, kila ngau jakabhi ja kilu saba ya zahabu. 17Akalenganaki ngau ichoku ichoku mia itatu ya zahabu jejigholuliki, kila ngau jimu jakabhi ja kilu jimu na nusu. Nkolongwa akaibhekiki ngau yeniheyi mu nyumba ja jikolongwa jejalowakiki chitengu cha ku Lebanoni.

18Bhelabhela nkolongwa akalenganaki chitehu chikolongwa cha kikolongwa kwa kutumila manyelu gha ndembu, na kuchipaka kwa zahabu jinyahi. 19Chitehu chenihechi chakabhi na hikwelelu sita. Pandu pa panani pakabhi pa kuyongolota na chakabhekakiki na pandu pa kujeghamakela mabhoku ipambala yokapi ibheli, na imong'umong'u ya mahimba ghabheli ijemiki chimu punkeghi ja pandu pala pa kujeghamakela mabhoku kwa kila chiwoku. 20Kukabhi na imong'umong'u komi na ibheli ya mahimba ijemakiki, chimu mu kila upambala wa kila chikwelelu. Chitehu ngati chenihechi ngachechilabhali kulenganakeka mu ukolongwa wokapi ghola.

21Ikombi yokapi ya kunywelela yaka nkolongwa Solomoni yakabhi ya zahabu, na yombu yokapi yeyakabhi mu nyumba ja Chitengu cha ku Lebanoni yakabhi ya zahabu jinyahi. Ngachepakabhili na chindu chechalenganakiki kwa madini gha feza, maghambu madini gha feza ngacheghabhalangiki kubha chindu mu chikahi chaka nkolongwa Solomoni. 22Nkolongwa Solomoni akabhi na sitima yamaheli ikolongwa ya Tashishi yeyakabhi ijenda mu bahali. Yakabhi ilongana na sitima yaka nkolongwa Hilamu. Kila chaka cha tatu sitima yeniheyi ya Tashishi yakundeti nkolongwa zahabu, madini gha feza, manyelu gha ndembu, majani makolongwa na majani machoku, na tausi.

23Bhela, nkolongwa Solomoni akabhapetiki bhakolongwa bhokapi bha pundema, kwa kubha na hindu yamaheli na mbulau. 24Bhandu bhokapi bha pundema bhakabhi na chilolu cha kunjendela Solomoni nahuli kujowanela mbulau ambayu Chapanga akabhi abhekiki muntima waki. 25Kila jumu wabhu akaletiki nhupu: Yambu ya madini gha feza, yombu ya zahabu, ingobhu, silaha, manungilu, falasi, na nyumbu. Nhupu yeniheyi akaijopalili mu chaka mbaka chaka.

26Solomoni akabhongini magali gha kuhutakika na falasi, na bhabhajendesha falasi, najombi akabhi na magali elufu jimu na mia nchechi na bhabhajendesha falasi elufu komi na ibheli, ambabhu akabhabhekiki mu michi jejibhi na pandu pa kujemakela magali gha kuhutakika na falasi, na magali ghangi akaghabhekiki ku Yelusalemu hoku. 27Bhela, nkolongwa Solomoni akaghatendiki madini gha feza mu muchi wa Yelusalemu kubha chindu cha kawaida ngati maganga, na mbau ya mielezi yakabhi yamaheli ngati mbau ya mikoju jejimela mu uwanda wa pahi. 28Solomoni akalaghalakili falasi kuhuma ku Misili, na Kilikia, bhakapekiwi bhahemela na bhalombesa bhaka nkolongwa kwa mapogha, na kila lipogha lakabhi na samani jaki. 29Bhakalaghalaki magali kuhuma ku Misili kwa kilu saba ya madini gha feza, na falasi jimu bhakahemi kwa kilu ibheli ya madini gha feza. Bhelabhela falasi yeniheyi bhakailombisi kwa bhakolongwa bhokapi bha Bhahiti na bhakolongwa bha ku Silia.