1 Bhakolongwa 9

Chapanga ampitali Solomoni mala ja kabheli

2 Mambu gha Chikahi 7:11-22

1Nkolongwa Solomoni paakajomwi kuchenga Nyumba jaka Bambo Chapanga na nyumba ja kikolongwa, na kujomola kughahenga ghokapi hagha ghaakapaliki kuhenga, 2bhela, Bambo Chapanga akumpitalili Solomoni mala ja kabheli ngati moakumpitalili ku muchi wa Gibeoni hoku. 3Bambo Chapanga akumpwaghi Solomoni, “Nyowini kusali kwaku na malobhu ghaku ghaunobhike, nijigholwili Nyumba ajeji jeunjengili, nahuli bhandu bhanyojabya nepani monihomu mileli. Ananijighohaji na kujipala machobha ghokapi. 4Nanau ngati anaujendiki kwa mtima wamboni kwangu na kubha na ulongwana ngati tati waku Daudi moakatendili, na anaukamwi amuli yangu na kughahenga ghokapi ghanukulaghalakila, kwa kughaghoha malaghalakilu ghangu na shelia yangu, 5bhela, nepani ananichitenda chitehu chaku cha kikolongwa chitamakya panani ja Izilaeli mileli, ngati monundaghili tati waku Daudi, nakapwaghaje, ‘Ngawilepi kubha na mundu wa kutama panani ja chitehu chaku cha kikolongwa cha Izilaeli.’ 6Nambu ngati mwehapa na bhana bhinu anamung'anambwiki na kuileka shelia yangu, na amuli yangu yenumpeki mwehapa, na kujenda kutumakila ichapanga nayengi na kuijojabhela, 7bhela, ananabhabhoha bhandu bhangu Izilaeli kuhuma mu inchi jenjenu jenabhapekihe, bhelabhela na Nyumba jenjenu jenijigholwili kwa ndandi ja kunyojabhe nepani. Ananijilekala kutali na nepani, na kujitenda chindu cha kupohakeka lihamu na bhandu, na Bhaizilaeli anabhatondulikaje kwa bhandu bha inchi yokapi. 8Hata ngati nyumba jenjenu jihutila namaa sajenu, nambu chikahi bhandu pabhipeta pambipi jaki anabhakangachaje na kulongama, bhakapwaghaje, ‘Bho, maghambu kiki Bambo Chapanga ajitendili mambu aghagha inchi ajeji na Nyumba ajeji?’ 9Bhandu bhangi anabhayangaje, ‘Maghambu bhundekiki Bambo Chapanga, Chapanga wabhu, joakabhabhohiki akahoko bhabhu kuhuma ku inchi ja Misili, nabhombi bhakamulini na ichapanga nayengi kwa kuijojabhela na kuitumakila, kwa ndandi jeniheji Bambo Chapanga abhaletili mahakau aghagha ghokapi panani jabhu.’ ”

Solomoni atenda majetanganelu na Hilamu

2 Mambu gha Chikahi 8:1-2

10Mu ujomukelu wa hyaka ishilini, ambayu Solomoni akachengiki nyumba ayeyi ibheli, yani Nyumba jaka Bambo Chapanga na nyumba jaki ja kikolongwa, 11nkolongwa Solomoni akumpekihi Hilamu, nkolongwa wa ku muchi wa Tilo, michi ishilini mu nkoa wa Galilaya, akahengiki bhenibhela maghambu Hilamu akabhi ampeki Solomoni mbau ya mielezi na misonobali, na zahabu jokapi jela jeakapalike. 12Nambu Hilamu paakabhokiki ku Tilo kujenda kujibhona michi jeniheji jeakapekiwi na Solomoni, ngacheakanyambakiki naju. 13Bhela, Hilamu akundalukiki Solomoni, “Ndongu wango, bho, ajeji nde michi ja ntundu bhole jeumbekihi?” Najombi Hilamu akajilohiki inchi ja Kabuli, yani inchi janga na ndandi, lihina lelibhi mbaka lalenu. 14Hilamu akabhi ampelaki nkolongwa Solomoni zahabu kilu elufu itatu na mia sita.

Matendu ghangi ghaka Solomoni

2 Mambu gha Chikahi 8:3-18

15Ghangani nde malobhi kubhokana na mahengu gha kujomalakewa ambaghu nkolongwa Solomoni, moakabhahengili bhandu nahuli kujichenga Nyumba jaka Bambo Chapanga, nyumba jaki ja kikolongwa, na ngomi ja Milo, lumatu lwa Yelusalemu, michi ja Hazoli, Megido na Gezeli. 16Falao, nkolongwa wa Misili, akabhi aulapwili na kuutola kwa makili muchi wa Gezeli hoghu. Akabhi aujochiki kwa moto, na kubhakoma Bhakanaani bhabhakabhi bhatama monihomu. Panakatahi, mwali waka Falao paakatoghuliki na Solomoni, nkolongwa wa Misili akumpekihi mwali waki muchi wa Gezeli hoghu ubya nhupu wa ndowa. 17Najombi Solomoni akauchengiki kabhete muchi wa Gezeli, akachengiki muchi wa Beti Holoni ja pahi, 18akachengiki muchi wa Baalati na Tamali, muchi ghoubhi ku chingwenji mu inchi ja Yuda, 19bhelabhela akachengiki michi ja chikoku, na michi kwa ndandi ja magali ghaki gha kuhutakika, na kwa ndandi ja falasi yaki, chokapi cheakapaliki kuchenga mu Yelusalemu, mu Lebanoni, na mu inchi jokapi jela jeatawalaje. 20Bhandu bhokapi bhabhakahighalili kuhuma kwa Bhaamoli, Bhahiti, Bhapelizi, Bhahivi na Bhayebusi, bhandu bha inchi ayeyi ngachebhakabhi Bhaizilaeli, 21papamu na bhabhelakeka bhabhu bhabhakahighali mu inchi, ambabhu Bhaizilaeli ngachebhakaweziki kubhayonanga nakanopi, bhanihabha Solomoni akabhajomalakili kubha bhatumwa mu mahengu gha kujomalakewa ngati mokubheli mbaka lalenu. 22Nambu pachilanda ja Bhaizilaeli, Solomoni ngacheakuntendiki mundu jokapi jola kubha mtumwa, bhombi nde bhakabhi manjolinjoli, bhatumika bhaki, bhakolongwa bhaki bha manjolinjoli, ihongozi bhaki, bhakolongwa bha magali ghaki gha kuhutakika, na bhabhajendesha falasi.

23Bhelabhela kukabhi na ihongozi bhakolongwa bhabhakabhi bhajemalela mahengu ghaka Solomoni: Bhandu mia nhwanu na hamsini, bhanihabha bhakabhajemali bhandu bhabhakabhi bhahenga lihengu.

24Baada jaka mwali waka Falao kuhama kuhuma ku muchi waka Daudi, na kujenda ku nyumba jaki ja kikolongwa ambaju Solomoni akabhi anchengili, bhela Solomoni akachengiki ngomi ja Milo.

25Solomoni akabhi abhoha nyambiku ya kujochakeka na nyambiku ja lukwali mala patatu kwa chaka, pa meza ja maganga pa kubhokeha nyambiku paakachengiki kwa ndandi jaka Bambo Chapanga, akahuwiki ubani palongi jaka Bambo Chapanga papamu na nyambiku heji. Bhela akajomwili kujichenga Nyumba jaka Bambo Chapanga.

26Bhelabhela nkolongwa Solomoni akalenganaki sitima yamaheli ku muchi wa Esioni Gebeli hoku, ambayu ibhi pambipi na muchi wa Elati mu inchi ja Edomu, mu ukengu wa bahali ja Shamu. 27Najombi nkolongwa Hilamu akatumiki bhatumika bhaki bha mumachi, bhabhajimanyi bahali, na kuhenga lihengu papamu na bhatumika bhaka Solomoni. 28Bhakatendiki mwanja kwa bahali mbaka ku mkoa wa Ofili na kukelabhuka na zahabu kilu elufu komi na ncheche, na kumpelakela nkolongwa Solomoni.