1 Bhakolongwa 8

Lisanduku la Lulaghilu liletakeka mu Nyumba jaka Bambo Chapanga

2 Mambu gha Chikahi 5:2-6:2

1Bhela, nkolongwa Solomoni akabhalohiki palongi jaki ihongozi bhokapi bha Izilaeli ku Yelusalemu hoku, na ihongozi bhokapi bha makabila, na ihongozi bha ngolu ya Izilaeli, nahuli bhakaletaje Lisanduku la Lulaghilu laka Bambo Chapanga kuhuma ku muchi wa Sayuni, yani muchi waka Daudi. 2Chikahi cha Uwangalalu wa Etanimu, yani mwehi wa saba, bhandu bhokapi bha Izilaeli bhakalibhongini kwaka nkolongwa Solomoni. 3Chikahi ihongozi bhokapi pabhakapiti, bhapenganyambiku bhakatotwi Lisanduku la Lulaghilu. 4Nabhombi bhakalibhohiki Lisanduku la Lulaghilu laka Bambo Chapanga, na Lihema Lihuhu, papamu na yombu yokapi ihuhu yeyakabhi mkati ja Lihema heli. Bhapenganyambiku na Bhalawi nde bhabhakaitotwili hindu yeniheyi. 5Nkolongwa Solomoni na lipogha lokapi la Bhaizilaeli bhakalibhongini palongi ja Lisanduku la Lulaghilu, nabhombi bhakabhohiki nyambiku yamaheli ya mambeleli na ng'ombi yangakubhalangika. 6Bhela bhapenganyambiku bhakalijingihi Lisanduku la Lulaghilu laka Bambo Chapanga mbaka pandu paki, mu chumba cha mkati cha Nyumba jaka Bambo Chapanga, yani Pandu Pahuhu Nakanopi, na kulibheka pahi ja mapapanila gha ulenganesu wa makelubi ghala. 7Makelubi ghanihagha ghakahatambwili mapapanila ghabhu panani ja pandu pa Lisanduku la Lulaghilu, makelubi ghanihagha ghakayekiki Lisanduku lela na mipeku jaki ja kutotulela. 8Mipeku heji jakabhi milachu namaa, incha yaki yakabhonakini mu liwangala, yani Pandu Pahuhu palongi ja chumba cha mkati, yani Pandu Pahuhu Nakanopi, nambu ngacheyabhonakini kunja ja Pandu Pahuhu. Najombi mipeku heji jikali jibhi mbaka lalenu. 9Mkati ja Lisanduku la Lulaghilu ngachekukabhili na chindu chengi chokapi chela, nambu pela hibau ibheli ya maganga ambayu Musa akabhi abhekiki mkati jaki ku chitombi cha Holebu hoku, pandu ambapu Bambo Chapanga akatendiki Lulaghilu na Bhaizilaeli pabhakabhi bhajomwi kubhoka ku inchi ja Misili.

10Bhapenganyambiku pabhakabhokiki mu Pandu Pahuhu, lihundi lakatweli mu Nyumba jaka Bambo Chapanga. 11Nabhombi bhapenganyambiku ngachebhakaweziki kuhenga lihengu labhu kwa ndandi ja lihundi lela, maghambu ulumbalilu waka Bambo Chapanga ukatwelili mu Nyumba jaki. 12Bhela Solomoni akapwaghike,

“Bambo Chapanga akapwaghiki kubha,

anatama mu lubhendu lukolongwa.

13Chakaka, nukuchengili Nyumba jinyahi namaa ja kutama,

pandu paku pa kutama mileli.”

Solomoni abhatangazi bhandu

2 Mambu gha Chikahi 6:3-11

14Bhela, lipogha lokapi la Bhaizilaeli palakabhi lijemiki panihapa, nkolongwa Solomoni, akabhang'anambukili na kubhapengalela. 15Akapwaghiki, “Alumbalika Bambo Chapanga, Chapanga wa Izilaeli, ambaju kwa uwezu waki atendiki lela leakundaghili tati wangu Daudi kwa ndomu waki mweni. Kwa ndandi akapwaghiki, 16‘Kutumbula lichobha lenakabhabhohiki bhandu bhangu Izilaeli kuhuma ku inchi ja Misili, ngachenakahawili muchi mu likabila lokapi lela la Izilaeli nahuli Nyumba jangu jichengakika monihomu, nahuli bhandu bhanyojabya monihomu, nambu nunhawi Daudi kubhatawala bhandu bhangu Izilaeli.’ ”

17Solomoni akajendali kupwagha, “Bhela, tati wangu Daudi akaholalili muntima waki kuchenga nyumba kwa ndandi ja kunjojabhela Bambo Chapanga, Chapanga wa Izilaeli. 18Nambu Bambo Chapanga akumpwaghi tati wangu Daudi, ‘Kwa kubha muntima waku ukaholalili kuchenga Nyumba kwa ndandi jangu nepani, ukatendiki wichu kubha na lijambu aleli muntima waku. 19Hata bhela, ngawehapa weanaunjengila Nyumba nepani, nambu mwana waku, joanaumbelakaje, jombi nde joanachenga Nyumba kwa ndandi jangu.’

20“Bhela Bambo Chapanga atimizi chilanga cheakabhekike: Nanatu nyingili pandu paka tati wangu Daudi, na kutama pa chitehu cha ukolongwa cha Izilaeli, ngati Bambo Chapanga moakalaghile, bhelabhela njengiki Nyumba ja kunjojabhela Bambo Chapanga, Chapanga wa Izilaeli. 21Nakanopi ja ghanihagha, mekiki pandu pa kubheka Lisanduku la Lulaghilu, ambamu mkati jaki kubhi na Lulaghilu lola lwaka Bambo Chapanga loakatendiki na akahoko bhitu chikahi paakabhabhohiki ku inchi ja Misili.”

Malobhu ghaka Solomoni

2 Mambu gha Chikahi 6:12-42

22Bhela Solomoni akajemiki palongi ja meza ja maganga ja kubhokeha nyambiku paka Bambo Chapanga, palongi ja lipogha lokapi la bhandu bha Izilaeli, na kukweha mabhoku ghaki kunani kumahunde, 23na kupwagha, “Wenga wa Bambo Chapanga, Chapanga wa Izilaeli, njeta Chapanga jongi ngati wehapa kunani kumahunde wala pahi pundema, wehapa ughoha Lulaghilu lwaku lwa upalu, na kubhapeke chiha bhatumika bhaku bhabhatama koni bhakabya bhakutii wehapa kwa mtima wokapi. 24Utimizi chilanga chaku kwaka mtumika waku tati wangu Daudi, kwa ndomu waku ukalaghili na kwa uwezu waku utehi kutimiza, ngati mokubheli lalenu. 25Bhela, Bambo Chapanga, Chapanga wa Izilaeli, bhelabhela nukulobha untimazya chilanga chela cheukundaghi mtumika waku tati wangu Daudi, ukapwaghaje, ‘Machobha ghokapi anaukubha na mbelakeka wa kutama pa chitehu cha kikolongwa cha Izilaeli, ngati bhabhelakeka bhaku anabhahengiki ghokapi wichu kwa kujenda palongi jangu, ngati wehapa moujendi palongi jangu.’ 26Bhela, wenga wa Chapanga wa Izilaeli, nukulobha utimizaje lilobhi laku lela leukundaghi mtumika waku tati wangu Daudi kwa kulitenda lipitalyaje.

27“Nambu Chapanga, bho, chakaka le anautama pundema? Ngati mbengu, hata mbengu ya kunani nakanopi ngacheyukujaghanila, bho, anajukujaghanya bholi nyumba ajeji jenjengike? 28Hata bhela, wehapa wa Bambo Chapanga, Chapanga wangu, nepani mtumika waku nukulobha unyowanyaje malobhu ghangu na kuniyanga malobhu ghangu ghanukulobha lalenu. 29Ujighohaje nyumba jaku jenu ikilu na muhi, pandu ambapu ukapwaghiki, ‘Machobha ghokapi anangubha monihomu.’ Nahuli ujowanyaje malobhu ghangu nepani mtumika waku panihika pandu pambani kulobha. 30Ujowanyaje malobhu ghangu nepani mtumika waku na gha bhandu bhaku bhandu bha Izilaeli chikahi pabhalobha bhakabya pandu pambani. Ujowanyaje kuhuma kunani kumahundi, pandu pa matamu ghaku, na chikahi paujowana, utulekakyaje.

31“Ngati mundu anaanhokihi njaki na kupalakika kulapa, anahikiki na kulapa palongi ja meza ja maganga ja kubhokeha nyambiku mkati ja Nyumba jenjenu, 32bhela, wehapa ujowanaje kuhuma kunani kumahundi, na ubhatemula bhatumika bhaku. Jola joabhi na mahakau untemula kulengana na mahakau ghaki, na jwangakubha na mahakau umpekya ghamboni kulengana na ulongwana waki.

33“Ngati bhandu bhaku bha Izilaeli pabhikubha bhalepalili na maadui bhabhu kwa ndandi ja mahoku ghabhakutendili wehapa, pabhakung'ambukyaje na kulijetakela lihina laku, ngati anabhalobhiki kulekakewa kwaku wehapa kwa kuliheleya mu Nyumba jenjenu, 34bhela, ubhajowanyaje kuhuma kunani kumahundi hoku, ubhalekakyaje mahoku gha bhandu bhaku Izilaeli, na ubhakelabhuhaje mu inchi jeukabhapekihi akatati bhabhu.

35“Ngati mbengu anaikongakiki, hata njeta iyula, kwa ndandi bhandu bhaku bhakutendili mahoku wehapa, ngati anabhalobhiki pandu pambani na kulijetakela lihina laku, na kughaleka mahoku ghabhu, chikahi chela paubhalakalila, 36bhela, ubhajowanyaje kuhuma kunani kumahundi, na ubhalekakyaje mahoku gha bhatumika bhaku bhandu bha Izilaeli. Ubhabholaje matamu manyahi ghaghapalika kutama, na ukabhatonyila iyula mu inchi jabhu jenjenu, inchi jeukabhapeki bhandu bhaku kubha jabhu bheni.

37“Ngati mu inchi anapajingi injala, chitamu chikolongwa, kulepa kubha na iyula, chitamu cha mahunu, nzige au mapahi, au anangati bhandu bhaku bhayongalitwi na maadui bhabhu mu muchi wabhu wokapi ghola, ngati anakubhi na lilapuliku lokapi lela au chitamu chokapi chela, 38bhela, ujowanyaje kusali na malobhu ghokapi ghabhilobha bhandu bhaku bha Izilaeli, au ghailobha mundu jokapi jola, kila jumu anaamanyi mang'ahiku gha muntima waki mweni, najombi anaakulobhiki kwa kuhatambula chiwoku chaki kulolakela ku Nyumba jenjenu, 39bhela, ujowanyaje kuhuma kunani kumahunde, mu matamu ghaku. Ulekakyaje na utenda chela chekipalika, na unhengila kila mundu kulengana na matendu ghaki, maghambu whepa pela kanjika jaku nde weujimanya mitima ja bhandu bhokapi, 40nahuli bhatama kwa kukutopela wehapa chikahi chokapi pabhitamaje mu inchi jeukabhapekihi akatati bhitu.

41“Bhelabhela hata ngeni ambaju nga jumu wa bhandu bhaku bha Izilaeli, nambu ahikiki kuhuma ku inchi ja kutali kwa ndandi ja kukujojabhe wehapa, 42kwa ndandi bhandu bha inchi nayenge anabhajowana sifa yaku na kubhokana na makili ghaku, mundu jonihoju ngati anahikiki kukulobha mu Nyumba ajeji, 43bhela, ujowanyaje kuhuma kunani kumahunde, pandu pa matamu ghaku, ukatendaje lokapi ambalu ngeni hoju anaakulobhaje, nahuli bhandu bha inchi yokapi pundema bhakumanya wehapa, na kukutii wehapa ngati mobhatende bhandu bhaku Izilaeli, na bhapata kumanya kubha nyumba ajeji jenjengiki, nde pandu pa kukujojabhe wehapa.

44“Chikahi bhandu bhaku pabhijenda kukomana ngondo na maadui bhabhu, pokapi paubhapelakaje, nabhombi pabhilobha kwaku wehapa wa Bambo Chapanga koni bhakalolakya ku muchi ghouhawili na Nyumba jenukuchengili kwa ndandi ja kukujojabhe wehapa, 45bhela, ujowanyaje kusali kwabhu na malobhu ghabhu kunani kumahundi hoku, na ubhahengila ngati moipalakila.

46“Chikahi pabhakutendila mahoku wehapa, maghambu njeta mundu jwangakutenda mahoku, nanau anaubhayomili na kubhaleka bhalepalyaje na maadui bhabhu, hata kutolakeka kwa makili mbaka ku inchi ja maadui bhabhu jejibhi kutali au ja pambipi, 47na ngati anabhang'anambwiki mitima yabhu mu inchi jebhapelikwi kwa kutolakeka kwa makili, nabhombi anabhang'anambwiki na kukulelela wehapa kwa kulobha kulekakewa mahoku ghabhu, bhakapwaghaje, ‘Tuhengiki mahoku, tuhobhiki na kutenda mahakau,’ 48bhelabhela chikahi chebhikubha mu inchi ja maadui bhabhu, anabhang'anambwiki kwa mtima wabhu wokapi na kwa roho yabhu yokapi, na ngati anabhakulobhiki koni bhakalolakya ku inchi yabhu jeukabhapekihi akatati bhabhu, analolakili ku muchi ghongoni ghouhawili na Nyumba jenjenu jenukuchengili kwa ndandi ja kukujojabhe wehala, 49bhela, ujowanyaje kusali na malobhu ghabhu kuhuma kunani kumahundi hoku, pandu pa matamu ghaku, na ubhahengila ngati moipalakila. 50Ubhalekakya mahoku gha bhandu bhaku, ghabhehengiki kwa kukupenga wehapa, ubhabhonila chiha palongi ja maadui bhabhu, nahuli nabhombi maadui bhapata kubhabhone chiha. 51Maghambu bhanihabha nde bhandu bhaku wamwete, bhaubhabhohiki ku inchi ja Misili, kobhakabhi bhapata mang'ahiku makolongwa.

52“Ujowanyaje lilobhu laka mtumikwa waku, na lilobhu la bhatumika bhaku, Izilaeli, nanau ubhajowanyaje kila pabhakulobha. 53Kwa ndandi ukabhahawili bhombi kuhuma kwa bhandu bha inchi yengi yokapi ya pundema nahuli bhakubha bhaku wamwete, ngati moukapwaghile kwa kupetela kwaka mtumika waku Musa, chikahi wehapa wa Bambo Chapanga, Chapanga, paukabhabhohiki akatati bhitu kuhuma ku inchi ja Misili.”

Lilobhu la kujomulela

54Chikahi Solomoni paakajomwi kulobha molobhu ghanihagha kwaka Bambo Chapanga, akajinwiki kuhuma palongi ja meza ja maganga ja kubhokeha nyambiku jaka Bambo Chapanga, pandu paakabhi achikime, koni mabhoku ghaki akabya aghakwehiki kunani kumahunde. 55Akajemiki na kulipengalela lipogha lokapi la bhandu bha Izilaeli kwa sauti ngolongwa, akapwaghaje, 56“Alumbalikaje Bambo Chapanga, joabhapekihi bhandu bhaki Izilaeli lukwale, ngati moakabhi alaghile. Atimizi chilanga yaki yokapi inyahi, yeakalaghili kwa kupetela kwaka mtumika waki Musa. 57Bambo Chapanga, Chapanga witu, na akubhaje papamu na nepani, ngati moakabheli papamu na akatati bhitu, ngawatuleka, wala ngawatulekela ng'o. 58Jombi na ajing'anambula mitima jitu kwaki, nahuli tujengalya indela yaki, koni tukakamula amuli yaki, shelia yaki, na malaghalakilu ghaki, ghaakabhapeki akatati bhitu. 59Bhela, malobhi ghangu aghagha, ghanobhiki palongi jaka Bambo Chapanga, na ghakubhaje pambipi na Bambo Chapanga, Chapanga witu, ikilu na muhe, nahuli najombi anjangatya mtumika waki, na bhandu bhaki Izilaeli, nahuli kila lichobha abhajangatya ghala ghabhapala. 60Nahuli bhandu bha inchi yengi yokapi ya pundema bhamanya kubha wenga wa Bambo Chapanga, nde Chapanga, wala njeta Chapanga jongi. 61Nanamu mkubha bhalongwana kwaka Bambo Chapanga, Chapanga witu, kwa kutama kwa kujengalela malaghalakilu ghaki, na kutii amuli yaki yokapi, ngati montende chikahi chenu.”

Nyumba jaka Bambo Chapanga jibhekakeka palongi jaki

2 Mambu gha Chikahi 7:4-10

62Bhela, nkolongwa Solomoni na Bhaizilaeli bhokapi bhabhakabhi papamu naku, bhakabhohiki nyambiku ya kujochakeka palongi jaka Bambo Chapanga. 63Najombi nkolongwa Solomoni akumboki Bambo Chapanga nyambiku ya lukwali: Ng'ombi elufu ishilini na ibheli, na mambeleli laki jimu na elufu ishilini. Bhenibhela nde nkolongwa na bhandu bhokapi bha Izilaeli mobhakajibheki Nyumba jaka Bambo Chapanga palongi jaki. 64Lichobha lelalela nkolongwa Solomoni akabhekiki pandu pa pachilanda ja liwangala lelakabhi palongi ja Nyumba jaka Bambo Chapanga, panihapa nde paakabhokili nyambiku ya kujochakeka, nyambiku ya mahunu, mahuta gha nyambiku ya lukwali. Akahengiki bhenibhela maghambu pandu pa kubhokeha nyambiku papalenganakiki kwa shaba pala, ngachepajaghanili kubheka nyambiku yeniheyi yokapi.

65Bhela, nkolongwa Solomoni kwa chikahi cha machobha saba, na machobha ghani saba nakanopi, yani machobha komi na ncheche, akatendiki uwangalalu papamu na Bhaizilaeli bhokapi palongi jaka Bambo Chapanga. Pakabhi na bhandu bhamaheli namaa, nabhombi bhakahumiki ku ujingalilu wa kungonde ja Hamati, mbaka ku ulindakanilu wa kunkache wa kikoka cha Misili. 66Lichobha la nane, Solomoni akabhatawiki bhandu bhabhokaje, nabhombi bhakumpengalili nkolongwa, bhakakelawiki kunyumba yabhu koni bhakahekalyaje kwa ndandi ja mambu ghokapi ghamboni ambaghu Bambo Chapanga aghatendiki kwa ndandi jaka mtumika waki Daudi, na kwa bhandu bhaki Izilaeli.