1 Bhakolongwa 7

Nyumba ja kikolongwa jaka Solomoni

1Solomoni akalichengili nyumba jaki ja kikolongwa, najombi jakuntoliki hyaka komi na itatu kujomola nyumba jaki jokapi. 2Bhela, Solomoni akachengiki nyumba jaki ja kikolongwa jejalowakiki lihina la Chitengu cha Lebanoni, ulachu waki ukabhi mita alobaini na ncheche na nusu, upana waki ukabhi mita ishilini na ibheli na sentimita ishilini na nhwanu, na kimu chaki chakabhi mita komi na itatu na nusu. Jakachengakiki panani ja safu nchechi ya nguzu ya mielezi, nguzu ambayu yakakamulakili boliti ya mielezi kwa upambala wa kunani. 3Kila safu jakabhi na nguzu komi na nhwanu, bhela yokapi kwa papamu yakabhi nguzu alobaini na nhwanu. Yumba yeyachengakiki panani ja nguzu yeniheyi, akaibheki dali ja mbau ya mielezi. 4Madilisha ghaki ghakabhekakiki panani kwa safu itatu, ghakatehi kulingalanila. 5Milyangu jokapi na ngelaketi yakabhi ya mlaba, yakabhi upambala wa kulongi mu safu itatu, yakatehi kulingalanila.

6Akachengiki liwangala la nguzu, ambalu ulachu waki ukabhi mita ishilini na ibheli na sentimita ishilini na nhwanu, na upana waki ukabhi mita komi na itatu na nusu. Palongi ja lichengu leniheli kukabhi na balaza. Palongi ja balaza kukabhi na nguzu, na palongi ja nguzu yeniheyi pakabhi na nhwaghala uchoku. 7Solomoni akachengiki liwangala la chitehu cha ukolongwa, liwangala la kutemula matakilu gha bhandu. Panihapa pakalowakiki Liwangala la Utemulu. Liwangala leniheli lakapambakiki kwa mbau ya mielezi kutumbu pa sakafu mbaka kugholu.

8Nyumba jaki ja kutama mweni, jejakabhi kunyuma ja liwangala la utemulu, jakabhi jakachengakiki kwa ntundu ghumu ngati yengi yela. Bhelabhela Solomoni akachengiki nyumba ja kikolongwa jejilengana na liwangala likolongwa kwa ndandi jaka mwali waka Falao, joakabhi antowile. 9Nyumba yeniheyi yokapi yakachengakiki kwa maganga gha mbija yamaheli kutumbu luhuli mbaka kunani, maganga ambaghu ghakabhi ghabhachakiki kwa hipemu na kuheketwa kwa msumenu upambala wa mkati na wa kunja. 10Luhuli ya nyumba yeniheyi yakachengakiki kwa maganga makolongwa ghaghabhi wichu, ghaghabhi na ulachu wa mita itatu na nusu, na upana wa mita ncheche na nusu. 11Pandu pa panani pakachengakiki kwa maganga manyahi nakanopi ghaghahekitwi kwa hipemu, na boliti ya mielezi. 12Liwangala likolongwa lela lakayongalwitwi na lumatu lwa misitali jitatu ja maganga ghaghabhachakiki, na msitali ghumu wa boliti ya mielezi yeilenganakiki wichu, ngati molakabheli liwangala la mkati la Nyumba jaka Bambo Chapanga, na balaza jaki.

Lihengu laka Hilamu

2 Mambu gha Chikahi 2:13-14

13Nkolongwa Solomoni akatumiki bhandu ku Tilo kujenda kundoha Hilamu. 14Hilamu akabhi mwana waka mbomba joakaweliwi na ndomi waki wa likabila laka Nafutali, na tati waki akabhi mundu wa ku Tilo, bhelabhela akabhi ndenganakela wa shaba. Hilamu akabhi na mbulau yamaheli na umanyi, na ndenganakela mnyahi wa mahengu ghokapi gha shaba. Bhela akahikiki kwaka nkolongwa Solomoni na kuhenga lihengu lokapi lela leakapekiwi.

Nguzu ibheli ya shaba

2 Mambu gha Chikahi 3:15-17

15Hilamu akalenganaki nguzu ibheli ya shaba, kila jimu jakabhi na ulachu wa mita tisa, na kuyongolotwa kwa mita nhwanu na nusu. Mkati ja nguzu yeniheyi kukabhi na limboghi ambalu kunenepa kwaki kukabhi kwa sentimita ibheli. 16Kabheti akalenganaki mataji ghabheli gha shaba ja kuyeyusha, nahuli kughabheka panani ja nguzu yeniheyi, kila litaji lakabhi na kimu cha mita ibheli na sentimita ishilini na nhwanu kujenda kunani. 17Akalenganaki wavu wa mikufu ghoakaulokiki mu mapambu ghanighala panani ja nguzu saba yela kwa kila litaji. 18Akalenganaki makomamanga mu misitali jibheli kuyongolota kila wavu kughapamba mataji ghaghabhi panani ja nguzu. Akatendiki bhenibhela kwa kila nguzu.

19Mataji ghaghakabhi panani ja nguzu mu balaza, ghakabhi mu liumbu la lilobha la yungiyungi, ulachu waki lakabhi mita jimu na sentimita nane. 20Panani ja mataji gha nguzu ibheli yela, bhelabhela yakabhi panani ja pandu pa kuyongolota papakapitali pambipi na wavu yela. Pakabhi na maumbu mia ibheli gha mapambiku gha makomamanga, ghakapangakiki misitali jibheli kuliyongolota kila litaji.

21Hilamu akaijemiki nguzu yeniheyi mu balaza ja Nyumba jaka Bambo Chapanga. Nguzu ja upambala wa kunkachi akajilohiki Yakini, na jela jeakajijemiki upambala wa kungondi akajilohiki Boazi. 22Mataji ghaghakabhi panani ghakabhi na maumbu gha yungiyungi.

Bhela lihengu la kulenganakela nguzu lakajomwike.

Liteleku likolongwa la shaba

2 Mambu gha Chikahi 4:2-5

23Hilamu akalenganaki liteleku likolongwa lelalowakiki Bahali ja choma. Lakabhi na liumbu lilobha la kuyongolota, lelakabhi na upana wa mita ncheche na nusu, kutumbu ukengu ghumu mbaka ukengu ghongi, na ulachu wa mita ibheli na sentimita ishilini na nhwanu, na kuliyongolota liteleku heli lakabhi na mita komi na tatu na nusu. 24Pahi ja ukengu waki kuliyongolota liteleku heli, kukabhi na misitali jibheli ja itamilu yeibhi ngati liumbu la lilobha la mongu, kila chimu chakabhi na ulachu wa mita komi na itatu na nusu. Itamilu yeniheyi yakalenganakiki chikahi chelachela liteleku heli palakabhi lilenganakeka. 25Liteleku leniheli lakabhekakiki panani ja ulenganesu wa ng'ombi ikambaku komi na ibheli yela: Itatu yakalingali upambala wa kungondi, itatu yakalingali upambala wa kolijibhi lyobha, itatu yakalingali upambala wa kunkachi, na itatu yakalingali upambala wa kolipita lyobha. Liteleku leniheli lakabhekakiki panani ja ng'ombi ikambaku yela, na upambala wabhu wa kunyuma yakatehi kulingalanila. 26Kunenepa kwa liteleku heli lakabhi na sentimita saba na nusu. Ukengu waki ukalengini na ukengu wa chikombi chechibhonikana ngati liumbu la lilobha la yungiyungi. Liteleku lenilela lakabhi liweza kutwele machi lita elufu alubaini.

Hitamilu ya shaba

27Hilamu akalenganaki hitamilu komi ya shaba, kila chitamilu chakabhi na ulachu wa mita jimu na sentimita nane, upana waki ukabhi mita jimu na sentimita nane, na kimu chaki chakabhi mita jimu na sentimita ishilini na nhwanu. 28Hitamilu heyi yakalenganakiki anana: Yakabhi na mbau munkeghi yeyakamulini na nguzu. 29Panani ja mbau heyi pakabhi na imong'umong'u ya lihimba, ng'ombi makambaku, na makelubi. Imong'umong'u ya lihimba heyi na ngo'mbi makambaku yakabhi iyekaliwi na kutandika mapambu ghaghalokakiki wichu. 30Kila chitamilu chakabhi na maguludumu nchechi gha shaba, na yoma ya pachilanda ya kuyongoloha maguludumu ghanihagha, yakabhi ya shaba. Mu kona nchechi ya hitamilu heyi kukabhi na hikamulilu ya shaba kwa ndandi ja liteleku. Pambipi ja kila chikamulilu kukabhekakiki mapambu gha malobha ghaghalokakiki. 31Mkati ja chitamilu kukabhi na mbekenyu ja lipala jejakabhi na ubhonikanu wa kuyongolota lelakabhi na kimu cha nusu mita. Mbekenyu heji ja lipala jakabhi ja kuyongolota, chitamilu chaki chakabhi na nusu mita. Kuyokolota ndomu waki hoghu kukajeghaliki micholu, hitamilu heyi yakabhi ya mlaba, wala nga ya kuyongolota. 32Maguludumu nchechi ghaghakabhi pahi ja papi, na yoma ya pachilanda ya kuyongolotela maguludumu ghanihagha yakabhi ilombanishwi mu chitamilu. Mbekenyu ja kila liguludumu jakabhi sentimita sitini na sita. 33Maguludumu ghakalenganakiki ngati gha magali gha ngondo gha kuhutakika, yoma ya pachilanda ya maguludumu, uyongolotu waki, mataluma ghaki na ikombi yaki yokapi yakabhi ya kuyeyusha. 34Pahi ja kila chitamilu kukabhi na mataluma ncheche mu kona yaki, naghombi ghakakamulini na chitamilu. 35Panani ja chitamilu kukabhi na utepe wa shaba wa kuyongolota ghoukabhi na kimu cha sentimita ishilini na ibheli. Hikamulilu na papi yakakamulini mu upambala wa kunani wa chitamilu. 36Akabhekiki micholu ja makelubi, lihimba na mikongu ja mitende panani ja pamihu ja hikamulilu, na panani ja papi, mu kila mbekenyu jejakabhi, papamu na mataji ghaghalokakiki kuyongolota ipambala yokapi. 37Bhenibhela nde Hilamu moakalenganakili hitamilu komi yela. Yokapi yakabhi ya kuyeyusha, yakabhi na chipemu chimu, na yokapi yakabhi ya ntundu ghumu.

38Hilamu akalenganaki mateleku komi gha shaba, liteleku limu kwa kila chitamilu. Kila liteleku lakabhi na upana wa mita jimu na sentimita nane, na lakabhi na uwezu wa kutwele machi lita mia nane. 39Akabekiki hitamilu nhwanu upambala wa kunkachi wa Nyumba jaka Bambo Chapanga, na hitamilu nhwanu upambala wa kungondi wa Nyumba jaka Bambo Chapanga. Akalibekiki liteleku lela pa kona ja upambala wa kunkachi wa Nyumba jaka Bambo Chapanga.

Hindu ya mu Nyumba jaka Bambo Chapanga

2 Mambu gha Chikahi 4:11-5:1

40Hilamu akalenganakili mateleku, sepetu na mabakuli gha kumichila. Bhela, Hilamu akajomwi lihengu lokapi mu Nyumba jaka Bambo Chapanga ngati nkolongwa Solomoni moakundaghalakile. 41Nguzu ibheli, mabakuli ghabheli gha mataji ghaghakabhi panani ja kila nguzu, wavu ibheli kwa ndandi ja kuyekalela mataji ghabheli hagha ghaghabhi panani ja nguzu, 42makomamanga mia ncheche kwa ndandi ja wavu ibheli heyi, misitali jibheli ja makomamanga kwa kila wavu, nahuli kughapamba mataji ghabheli hagha ghaghabhi panani ja nguzu. 43Bhelabhela, Hilamu akalenganaki hitamilu komi, na mateleku komi panani ja hitamilu, 44na liteleku limu na imong'umong'u ya makambaku gha ng'ombi komi na ibheli pahi ja liteleku heli. 45Mateleku, sepetu na mabakuli gha kumichila, na yombu yokapi yeyakabhi mu Nyumba jaka Bambo Chapanga, ambayu Hilamu akabhi andenganakili nkolongwa Solomoni, yakabhi ya shaba jejigholulike. 46Hindu yokapi heyi nkolongwa akalaghalaki ilenganakikaje kwa kuyeyusha mu uwanda wa Yoludani, pandu pa lutopi lolubhi pachilanda ja Sukoti na Saletani. 47Solomoni ngacheapemiki kutopa kwa hindu yeniheyi jokapi, maghambu yakabhi yamaheli namaa, nde ndandi kutopa kwaki ngachewamanyakine.

48Bhelabhela Solomoni akalenganaki hindu yokapi yeyakabhi mu Nyumba jaka Bambo Chapanga: Meza ja zahabu ja kubhokeha nyambiku, meza ya zahabu ja kubhekela mabumunda palongi jaka Chapanga, 49Inala ya taa ya zahabu jinyahi yeyabhekakiki palongi ja chumba cha mkati, nhwanu upambala wa kunkachi na nhwanu upambala wa kungondi, malobha, taa, na makoleu gha kujokule moto, yokapi yakabhi ya zahabu, 50na masinia, ikombi, mikasi ja kulenganakalela utambi, mabakuli, mbundi ya kujokule moto, na chetezu, yokapi yakabhi ya zahabu jinyahi, bhelabhela kukabhi na bawaba ya zahabu kwa ndandi ja milyangu ja chumba cha mkati nakanopi, yani Pandu Pahuhu Nakanopi, na bawaba ya milyangu ja liwangala likolongwa la Nyumba jaka Bambo Chapanga.

51Bhela, nkolongwa Solomoni akajomwi lihengu lokapi la Nyumba jaka Bambo Chapanga, akaijingihi mkati hindu yokapi ambayu Daudi tati waki akabhi aibhekiki palongi jaka Bambo Chapanga: Yani madini gha feza, zahabu na hindu ya mbija yamaheli, bhela, akaibhekiki mu chikoku cha Nyumba jaka Bambo Chapanga.