1 Bhakolongwa 6

Solomoni achenga Nyumba jaka Bambo Chapanga

1Solomoni akatumbwi kuchenga Nyumba jaka Bambo Chapanga mu chaka cha mia nchechi na semanini baada ja Bhaizilaeli kubhoka ku inchi ja Misili, chenihechi chakabhi chaka cha kachechi cha utawala waka Solomoni mu Izilaeli, ukabhi mwehi wa Zivu, yani mwehi wa kabheli wa chaka. 2Nyumba jeniheji ambaju nkolongwa Solomoni akunchengi Bambo Chapanga jakabhi na ulachu wa mita ishilini na saba, upana wa mita tisa, na kimu cha mita komi na tatu na nusu. 3Liwangala la palongi la Nyumba jaka Chapanga heji, lakabhi na upana wa mita ncheche na nusu, kutumbu upambala ghumu wa nyumba mbaka upambala ghongi wa nyumba, na ulachu wa nyumba jeniheji ukabhi mita tisa. 4Nyumba jaka Bambo Chapanga heji akajibhekiki madilisha ghaghabhonakini kubha mapana kwa mkati na mapepandau kwa kunja. 5Akalenganaki yumba ya munkeghi kuyongolota Nyumba jokapi jaka Bambo Chapanga, nahuli ikamulana na lumatu yokapi ya Nyumba jaka Bambo Chapanga. 6Yumba ya gholofa ja pahi nakanopi yakabhi na upana wa mita ibheli na sentimeta ishilini na nhwanu, yumba ya gholofa ja pachilanda yakabhi na upana wa mita ibheli na sentimeta sabini na nhwanu, na yumba ya gholofa ja kunani nakanopi yakabhi na upana wa mita itatu. Gholofa yeniheyi yakalekini kwa upana waki, maghambu Solomoni akakepishi pandu pa lumatu lwa kunja kujiyongolota nyumba, nahuli boliti ngaikamulana na lumatu ya Nyumba jaka Bambo Chapanga.

7Mu chikahi cha kuchenga Nyumba jaka Bambo Chapanga heji, ngachepajowaniki nyundu pandu pa kuchenga nyumba heji, wala chombu chokapi chela cha choma, maghambu jakachengakiki kwa maganga ghaghakabhi ghahonguliwi na kulenganakeka tayali koghakabhi ghatolakeka hoku.

8Ndyangu wa kujingalila chumba cha pahi nakanopi chakabhi upambala wa kunkachi wa Nyumba jaka Bambo Chapanga. Mkati kukabhi na chikwelelu ambachu bhandu bhakaweziki kukwela nahuli kujenda ku gholofa ja pachilanda na ku gholofa ja katatu. 9Bhela Solomoni akachengiki Nyumba jaka Bambo Chapanga na kujomola, najombi akabhekiki nhwaghala kwa boliti na mbau ya mielezi. 10Nkolongwa Solomoni akachengiki yumba ya munkeghi kuyongolota Nyumba jokapi jaka Bambo Chapanga, yeyakabhi na kimu cha mita ibheli na sentimita ishilini na nhwanu kwa chumba cha pahi, chumba cha pachilanda, na chumba cha kunani nakanopi. Yumba heyi yakalombini na Nyumba jaka Bambo Chapanga heji kwa boliti ya mielezi.

11Bhela Bambo Chapanga akumpwaghi Solomoni, 12“Kubhokana na Nyumba jenjenu jeuchenga, ngati anaujengalela amuli yangu, na kuighoha shelia yangu, na kughakamula malaghalakilu ghangu ghokapi na kughatii, kwa kupetela wehapa anandimiza mambu ghokapi ghanakundaghili tati waku Daudi. 13Nepani anandama pachilanda ja Bhaizilaeli, nanatu nganabhaleki bhandu bhangu Izilaeli ng'o.”

14Bhela Solomoni akachengiki Nyumba jaka Bambo Chapanga na kujomola.

Mapambu gha mkati ja Nyumba jaka Bambo Chapanga

2 Mambu gha Chikahi 3:8-14

15Akaluyekalili lumatu lwaki lwa mkati kwa mbau ya mielezi, akaikomangalili mu lumatu kutumbula sakafu ja Nyumba jaka Chapanga mbaka ku boliti ya nhwaghala, na kujala pa sakafu ja Nyumba jaka Chapanga kwa mbau ya misonobali. 16Chumba cha mkati, chechalowakiki Pandu Pahuhu Nakanopi, chakachengakiki mu pandu pa kunyuma ja Nyumba jaka Bambo Chapanga. Chakabhi chichengakiki kwa mbau ya mielezi kutumbula pa sakafu mbaka ku nhwaghala, na ulachu waki ukabhi wa mita tisa. 17Chumba chikolongwa chechakabhi palongi ja Pandu Pahuhu Nakanopi, chakabhi na ulachu wa mita komi na nane. 18Mbau ya mielezi yeyabhekakiki mu lumatu lwa Nyumba jaka Bambo Chapanga heji, kwa mkati yakabhi ipambakiki kwa ulenganesu wa mongu na malobha ghaghaliyekwile. Kila pandu pakabhi payekaliwi kwa mbau ya mielezi, wala njeta liganga lelabhonakini.

19Mkati nakanopi ja Nyumba jaka Bambo Chapanga heji, Solomoni akalenganakili chumba ambamu akabhekiki Lisanduku la Lulaghilu laka Bambo Chapanga. 20Chumba chenihechi chakabhi na ulachu wa mita tisa, upana wa mita tisa na kimu cha mita tisa. Akachiyekiki chumba chenihechi kwa zahabu jinyahi, bhelabhela akayekiki pandu pa kubhokeha nhupu kwa mbau ya mielezi. 21Solomoni akayekiki pandu pa mkati ja Nyumba jaka Chapanga heji kwa zahabu jinyahi, akabekiki mikufu ja zahabu kutumbu upambala ghumu mbaka upambala ghongi palongi ja chumba cha mkati, na akapayekiki kwa zahabu. 22Solomoni akapayekiki pandu pa mkati ja Nyumba jaka Bambo Chapanga heji kwa zahabu jinyahi, bhelabhela akayekiki meza jokapi ja kubhokeha nhupu ya kuhuwa ubani jejakabhi mkati ja chumba cha mkati hechi kwa zahabu.

23Mu chumba cha mkati nakanopi hechi akalenganaki ulenganesu wa makelubi ghabheli ghaghabhi na mapapila kwa mbau ya mizeituni, kila jumu akabhi na kimu cha mita ncheche na nusu. 24Lipapanila limu laka kelubi hoju lakabhi na ulachu wa mita ibheli na nusu, na lipapanila lengi lakabhi na mita ibheli na nusu, bhela ulachu kutumbu ujomukelu wa lipapanila limu mbaka ujomukelu wa lipapanila lengi ukabhi mita nhwanu. 25Ulachu wa mapapanila ghaka kelubi wa kabheli lakabhi na ulachu wa mita nhwanu, ihumbi yokapi ibheli heyi yakalengini kwa ipemu na kwa kila chindu. 26Kimu chaka kelubi jumu akabhi mita ncheche na nusu, na kelubi jongi akabhi bhelabhela. 27Akaghabhekiki makelubi ghanihagha mkati ja chumba cha mkati nakanopi ja Nyumba jaka Bambo Chapanga, koni mapapanila ghabhu ghakabya ghahatambuliwi. Lipapanila laka kelubi jumu lakagusiki mu lumatu lumu, na lipapanila laka kelubi jongi jola lakagusiki ku lumatu longi, na mapapanila ghabhu ghangi ghakagusini pachilanda ja chumba. 28Akaghayekiki makelubi ghanihagha kwa zahabu.

29Panani ja lumatu yokapi kujiyongolota Nyumba jaka Chapanga, lumatu ya yumba ya mkati na lumatu ya yumba ya kunja, akaipambiki kwa micholu ja makelubi, mikongu ja mitende, na malobha ghaghaliyekwile. 30Bhelabhela akajiyekiki sakafu yokapi ya yumba ya mkati na yumba ya kunja ya Nyumba jaka Chapanga kwa zahabu.

31Pundyangu wa kujingalila mu chumba cha mkati nakanopi akalenganakili milyangu kwa mbau ya nkongu wa mzeituni. Ngelaketi na mapanda ghaki ghakalenganakili kwa liumbu la pembi nhwanu. 32Panani ja milyangu jibheli ja mbau ya mzeituni heji, akalenganakili makelubi, mikongu ja mitende, na malobha ghaghaliyekwile, bhelabhela akaghayekiki makelubi hagha na mikongu ja mitende heji kwa zahabu jinyahi. 33Bhelabhela akalenganaki ngelaketi jejibhi na pembi nchechi kwa mikongu ja mizeituni, kwa ndandi ja ndyangu wa kujingalila mu liwangala likolongwa. 34Kukabhi na milyangu jibheli jejakaweziki kuhatambuka jejakalenganakiki kwa mbau ya msonobali, na kila ghumu ukabhi na bawaba ambaju jakaweziki kulikunja kila chipandi panani ya chengi. 35Panani ja iyekalelu ya milyangu heji akalenganakili makelubi, mikongu ja mitende na malobha ghaghaliyekwi, na kuiyeka kwa zahabu jejijochakiki wichu panani ja micholu jeniheji.

36Bhelabhela akachengiki liwangala la mkati safu itatu ya maganga ghaghahonguliwi, na safu jimu ja boliti ya mielezi yeipambakiki wichu.

37Luhuli lwa Nyumba jaka Bambo Chapanga heji, Solomoni akaluchengiki mu chaka cha kachechi wa utawala waki, mu mwehi wa Zivu, yani mwehi wa kahanu. 38Mu chaka cha komi na jimu, mwehi wa Buli, yani mwehi wa nane, Nyumba jaka Bambo Chapanga heji jakabhi jijomwiki, na lihengu lakabhi lijomwiki ngati mokwapangakike. Bhela Solomoni akatumi hyaka saba kujichenga Nyumba jaka Bambo Chapanga heji.